1 Kọrịntị 6 - FỊAFỊA BAỊBỤLỤ

Kịrayịsị Ḍukamẹnjịapụ Kẹ Ịna Ogboku Ḅẹrẹ-fama Ḅẹ Ḅara

¹ Ọmịna ḅụ gbọrụḅọ mḅọ pembema Kịrayịsị ḍukamẹnjịḅọ na ịgbanịya nyana tẹ gotẹ ḅẹrẹ mẹ kẹ oru nimi ḅẹrẹkọn-apụ tọrọkọ muarị, tẹ ḍụkụ tẹ Tamụnọ atomi ma ḅẹrẹ mẹ fama ịn pịrị-a ye tiye?

² Tamụnọ atomi ma tomikiri mẹ kọn ḅarị ḅara mẹ ó nimi-a? Ọkọ ḅẹḅẹ iḅim, ọmịnị tomikiri mẹ kọn ḅẹ kụma ndẹẹ ọmịnị inetẹ kala aḅẹrẹ rẹ kọn ḅịa ḅara?

³ Ó nimi-a, wamịnị enjẹlị apụ ma kọn ḅẹ ḅara? Ọkọ ḅẹḅẹ wa mị ḍumo mẹ ḅẹ aị ma kọn gbẹẹ tẹịn ḅara ḍikii!

⁴ Anie ḅụ ọkọ sime aḅẹrẹ paka kụma ndẹẹ ọ́ kẹ mu sọsị mẹ ḅio sịẹ-kiri nyana-a apụ tọrọkọ mu ḅẹ ḅara?

⁵ Ọ́ ḅụụ-jịrị na-iḅim! Piki-pikiye-ofori ḅara ḅụ, ọmịna ogboku ḅụ gbọrụ ye-nimiḅọ, tẹ Kịrayịsị ḍukamẹnjịapụ ogboku inetẹ ịgbanịya ḍuko sin ịn pịrị ḅẹ ḅọ paa paka ḅa.

⁶ Ọmịnị anị ḅara mịẹ ḅẹ nakara, Kịrayịsị ḍukamẹnjịḅọ amịna pembema Kịrayịsị ḍukamẹnjịḅọ dogi Kịrayịsị minini-a ḅẹrẹkọn-apụ tọrọkọ muarị!

⁷ Ḅẹrẹkọn warị mu ḅẹrẹ ọmịna ogboku emi ye mẹ kịngẹ sọ ḍie-pakamarị mịnẹ ọ́ mẹnjịarị etela mẹ ḅụ ọ́ ḅịkị fa so tẹ. Jụmọ kura-aye kẹ ị́ mịẹ tẹ ị́ wẹrịso mḅọ pịrị iḅi anie nẹngị-a? Jụmọ ị́ nyana aị pụkọ-ọkị iḅi anie nẹngị-a?

⁸ Anie nakara, ó kura-aye kẹ jụmọ-jụmọ mịẹarị, pịkị jụmọ-jụmọ nye pụkọ-ọkịarị, anie ọmịnị mịnapụ, mịnapụ nwẹn ḅẹẹ apụ ma-o!

⁹ Piki-pikiye-ofori ḅara ḅụ, ó nimi wararị mịnẹ si-sịḅịḅio sụarị ḅọ Tamụnọ Ama-da tẹ ḅẹrẹtọn-arị anga mẹ ḅụ sime ḅịa. Ọmịnị oḅori kẹ ọmịna aḅụụ sịn ma; si amịẹaị mịẹarị apụ, anịanịa oru tẹkẹarị apụ, anịanịa sẹfịarị apụ, anịanịa owiḅọ na ẹrẹḅọ na mịẹ-mịẹ ye kẹ amịna pembema owiḅọ na mịẹarị ḅọ,

¹⁰ anịanịa furuarị ḅọ, anịanịa opu pọkọ-ḅẹngbọ sụa ḅọ, anịanịa iru ḅuu ḅụramarị apụ anịanịa ja apụ ḍuko-simarị apụ, anịanịa furuapụ mịna aị ma mịẹarị apụ ma ḅẹ gbọrụḅọ-sọ Tamụnọ ama-da tẹ ḅẹrẹtọn-arị anga mẹ ḅụ sime ḅịa.

¹¹ Ọmịna ḅụ ḅẹ ja apụ anị ḅara mẹ simem. Kụma mịọkụ in si ḅụ ọ́ sịkịrị fịafịama tẹẹ; ini ọ́ saakị sikima Tamụnọ pịrị tẹẹ; KỊNỊNYANAḄỌ Jizọsị Kịrayịsị ḅe ḅụ ọ́ ḅọrọ tẹ Tamụnọ na ḅẹrẹ-fama tẹẹ, wamịna Tamụnọ ḅe Tẹmẹ ḅẹ ḅụ.

Ọmịnị Ọmịna Oju Ma Kẹ Ebube Kẹ Tamụnọ Pịrị Ḅẹ Aị Mịẹ

¹² Ẹbịsịya gbọrụḅọ ḅẹẹ ḅa, “À mịẹ ḅẹ tẹ oloko ì kiki ye ofori.” Inn; kụma ye goyegoye iḅi kẹ ị́ mịẹ ḅịa. Yẹrị inetẹ ḅẹẹ ḅa mịnẹ à mịẹ ḅẹ tẹ oloko ì kiki ye ofori, kụma arị omoni-sọ pịrị ḅẹ ye pịkị ofori.

¹³ Jụmọ pịkị ḅẹẹ ḅa, “Fịye sime furo pịrịm, tẹ furo pịkị sime fịye pịrịm.” Ọkọ; kụma Tamụnọ mịẹtẹ maaịn ma ḅo kunoma ḅa. Tomḅọ amịna oju ọkị tẹ kẹ owiḅọ na ẹrẹḅọ na mịẹye si kọn ḅịa, kụma mḅọ anị kẹ fịrịmẹnjị KỊNỊNYANAḄỌ ḅe pịrị ḅa; anịsakị KỊNỊNYANAḄỌ ḅe pịkị oju mẹ ḅiiarị ye kẹ anị pịrị ḅa.

¹⁴ Tamụnọ fịị ḅụ KỊNỊNYANAḄỌ ḅe saakịmam; tẹ ọ̀ pịkị wamịnị sọ saakịma ḅa, ọ̀ kụrọ ḅụ.

¹⁵ Ó nimi wararị, mịnẹ ọmịna oju ma anie Kịrayịsị oju mẹ ḅẹ pakịrị, pakịrị ma. À ḅọrọ Kịrayịsị oju mẹ ḅẹ pakịrị ọkị tẹ kẹ mu ama mẹnjị ẹrẹḅọ oju ḅẹ pakịrị sọma ḅẹ? Ọkọ sime ye mịẹ mịẹ-a!

¹⁶ Anịanịa, ó nimi-a ḅa, mịnẹ amịna oju kẹ ama-mẹnjị-ẹrẹḅọ na gbolomarị ḅọ mẹ mḅọ árị na gbọrụ oju mịẹ tẹ ḅara? Fịafịa Ḍiri mẹ banabana ḅara kẹ ḅẹẹ wararị, “Maa apụ ma gbọrụ oju mịẹ ḅa.”

¹⁷ Kụma amịna ḅụụ kẹ KỊNỊNYANAḄỌ ḅe na gbolomarị ḅọ mẹ, tẹmẹ ḅụ, ori na gbọrụ ḅụ sime tẹẹ.

¹⁸ Ọmịnị owiapụ na ereme na kọn-arị si mẹnjị mẹ ḅụ ḅụụ kịẹn. Tomḅọ mịẹarị jen si tẹ mḅọ oju ọmbịmarị ye ofori, kụma owiḅọ na ẹrẹḅọ na kura-a ḅara kẹ gbolomarị si mẹ mịẹ ḅọ mẹ mḅọ si kẹ mḅọ oju mịẹ tẹ.

¹⁹ Ó nimi-a ḅarị ya, mịnẹ ọmịna oju mẹ anie Tamụnọ Fịafịa Tẹmẹ ḅe warị, anie Tamụnọ kẹ ọ́ pịrị tẹ ọmịna ḅụụ ḅio angarị ḅọ ḅe ḅara? Ó sime ọmịna aḅụụ pịrị-a, kụma Tamụnọ mie ó sime pịrị ye;

²⁰ ò yela ye kẹ ọ́ fẹẹm. Ọkọẹrẹsị ọmịnị ọmịna oju ma kẹ ebube kẹ Tamụnọ pịrị ḅẹ aị mịẹ.