1 Kọrịntị 2 - FỊAFỊA BAỊBỤLỤ

Kịrayịsị Ẹngbẹsẹ-sịn Ọgọnọ Ḅakụ Ḅọ Ḅe Gboloma Oku Mẹ

¹ Ì amịnapụ, à Tamụnọ karakara mẹ tẹ elemu tomi nimi-a ye mẹ ḍuko finji ọ́ pịrị ḅẹ ḅo ene mẹ ḅụ arị opu ẹkwẹn na opu ḍawọye na kẹ ẹkwẹn-a.

² Kẹ gotẹ ọkọ ḍukoarị, àrị ọmịnị na emi sakị mẹ à tọn-pẹlẹm mịnẹ à ye goyegoye kẹ ḅioḅọrọma ḅa, Jizọsị Kịrayịsị ḅe na ori ẹngbẹsẹ-sịn ọgọnọ ḅakụm mẹ na sikima tẹ.

³ Anie mịẹtẹ à ḅo ọ́ la sakị, ị̀ ḅụụ ịnyọ ofori ḅara mie à sime tẹ pịkị ḅalafa ḅụ oju sẹkị ye.

⁴ Tẹ à ye kẹ ó toluma tẹ oku mẹ daḅọrọma ọ́ pịrịarị sakị à tomikiri ḅẹ pokolotẹ nimi kẹ ẹkwẹn-a, kụma Tamụnọ Tẹmẹ ḅe kụrọ mẹ ḅẹ elekima ḅụ mie àrị ẹkwẹn ye.

⁵ Anie ḅụ, ọmịna minini mẹ tomḅọ nimi ḅụ sịrẹrẹ-a, kụma Tamụnọ kụrọ ḅụ.

Tamụnọ Nimi

⁶ Anịsọ, tẹmẹ etela mẹ nimi lamatẹ apụ ḅụ à ḍuko wasamarị oku mẹ ḅụ nimi emi, kụma mị tomikiri mẹ ḅẹ nimi-a, pịkị mị tomikiri mẹ ḅụ ḅẹrẹtọn-arị tẹ amịna kụrọ ḅara ḅụ soarị apụ ma nye-a.

⁷ À ḍuko wasamarị nimi mẹ anie Tamụnọ nimi tẹ tarị ḅụ kikima sime tẹ tomi nimi-a ye mẹ, anie tomikiri mẹ amụ tẹmẹ-a kụra-ḅio Tamụnọ kẹ wa pịrị ḅẹ tẹ tọn wẹrị ebube mẹ.

⁸ Tomikiri ḅụ ḅẹrẹtọn-arị apụ ma ḅẹ gbọrụḅọ-sọ mị nimi mẹ nimi-a. Ini anị nimi namịna ini ebube KỊNỊNYANAḄỌ ḅe kẹ ẹngbẹsẹ-sịn ọgọnọ ḅakụ-a so tẹ.

⁹ Anị sime-ḅara, sime-ḅara sọ, Fịafịa Ḍiri mẹ ḅẹẹarị, “Gbọrụḅọ-sọ amụ ẹrị-a, pịkị naa-a ye, gbọrụḅọ-sọ amụ inetẹ anị paka ḅẹ ḅara kuroma ḅo-a ye, anị gbọrụ ye mẹ mie Tamụnọ tẹlẹma ọ̀ ḅẹlẹmarịapụ ma pịrị ye.”

¹⁰ Kụma wamịnị mie Tamụnọ ọ̀ Tẹmẹ ḅe ḅụụ ḅọrọ tẹ ò kikima tẹ ye mẹ kẹ ḍie ye. Tẹmẹ ḅe ye goyegoye sọkịrị pakama ḅoarị, Tamụnọ mịẹ ḅẹ tẹ tọn wẹrị wararị pokolo aị ma sọ ḅọrọ-a.

¹¹ Tomḅọ ḅụụ ḅio simearị tẹmẹ mẹ ngẹrị mie mḅọ gboloma aị mamgba nimi ye; anị gbọrụ ḅara ḅụ Tamụnọ Tẹmẹ ḅe kịngẹ mie pịkị Tamụnọ gboloma aị mamgba nimi ye.

¹² Wa daa-ọkị ḅọ ḅe mị tomikiri mẹ ḅẹ tẹmẹ ḅe-a, anie nakara Tamụnọ kẹ fịrịma Tẹmẹ ḅe mie wa daa-ọkị ḅọ, mịẹtẹ wa Tamụnọ kẹ wa pịrị tẹ ḍiepịrịye mẹmgba nimi ḅẹ ḅara.

¹³ Ọkọẹrẹsị, wa ẹkwẹn-arị sakị wa tomi toluma nimi ẹkwẹn kọn-a, kụma Tẹmẹ ḅe kẹ wa toluma ye ḅẹ ẹkwẹn, anie wa tẹmẹ gboloma karakara ẹkwẹn mẹ ḍuko finji Tẹmẹ ḅe nyana tẹ apụ pịrịarị ḅara ḅụ.

¹⁴ Ḅẹḅọ-ḅẹḅọ tẹ Tẹmẹ ḅe nyana-a ḅọ, inetẹ Tamụnọ Tẹmẹ ḅe ḍiepịrị-aị ma daa-ọkị ḅịa. Ọkọ sime tomḅọ mẹ mḅọ karakaramatẹ ma aị ma fiearị ye naa-a; mḅọ ḅụ arị pịkị papaa aị sọ wararị, kẹ gotẹ ọkọ ḅẹẹarị, tẹmẹ pakịrị anga kịngẹ ḅụ mie ini arị ḅẹ iḅi mẹ tọn ḍikiarị.

¹⁵ Tẹmẹ ḅe nyana tẹ ḅọ mẹ mḅọ inetẹ ḅẹẹye-ḅẹẹye ḅẹ iḅi na karakara na kọn ḅa, kụma gbọrụḅọ-sọ inetẹ mḅọ kọn ḅịa.

¹⁶ Anie Fịafịa Ḍiri mẹ ḅẹẹ ḅara, “Tụḅọ KỊNỊNYANAḄỌ ḅe ḅioḅẹngbọ nimi? Tụḅọ inetẹ nimi kẹ ò toluma ḅẹ?” Wamịnị kịngẹ kụma wa Kịrayịsị kuroma nyana wararị.