1 Kọrịntị 13 - FỊAFỊA BAỊBỤLỤ

Ḅẹlẹma

¹ Ẹbịsịya àrị inetẹ tomina ẹkwẹn-aḅịḅị mamgba kẹ ẹkwẹn ḅa, pịkị enjẹlị apụ nye sọ, kụma à ḅẹlẹma nyana-a ḅẹḅẹ, ị̀ ẹkwẹn mẹ iḅi papaa okoin anịanịa, gbangara-gbangarama fiearị igbema nẹngị-a.

² Ẹbịsịya àrị inetẹ ịkịankoroapụ kụrọ kẹ Tamụnọ ẹkwẹn kọn ḅa; ẹbịsịya à ye mamgba ḍawọ ḍin tẹ ḅọị aị mamgba nimi ḅa; ẹbịsịya àrị à kẹ tụndụ saakị ḅelema ḅẹ minini nyana ḅa — kụma à ḅẹlẹma nyana-a ḅẹḅẹ, yẹrị papaa ye.

³ Àrị à nyana ye, nyana ye ḍie tomi pịrị fama tẹ ị̀ ḅụụ kẹ ịn pịrị dọkịma sọ tẹ à ḅẹlẹma nyana-a ḅẹḅẹ, miemẹ gbọrụ iḅi sọ kẹ ị̀ mịẹ-a.

⁴ Ḅẹlẹma ḅụ ye-inema na iḅi-yemịẹ-ḅara na emi; anị afana, anịanịa ḅụụ-gelema, anịanịa opu amịẹaị nyana-a;

⁵ ḅẹlẹma ḅụ si ye-mịẹ-ḅara, anịanịa tọrụ-kpọ, anịanịa ḅụụ-sịnịsịnị ofori; ḅẹlẹma pịkị si kẹ ḅioḅẹngbọ sụa kịnị pịrị pịrị-a;

⁶ ḅẹlẹma siye ḍiki ḅioḅẹlẹ-ḅẹlẹ-a, kụma karakara mie anị ḅioḅẹlẹmarị ye.

⁷ Ḅẹlẹma ḅụụ-lọkọ tẹ amịna mịẹarị iḅi ḅụ ḅara-siin sin-a; anị mininiye na, anị tọrụ kẹ ḍikiarị ye na, anị ḅẹ ye-inema na kuno kuno-a.

⁸ Ḅẹlẹma sime gbamasom; Fịafịa Tẹmẹ ḅe tomina ḅioḅẹngbọ jike tẹ ịn kọn-arị ẹkwẹn ma emi, kụma arị sime gbamaso-a; kịrị aḅẹlẹ kẹ ẹkwẹn ḍiepịrị-aị emi, kụma arị kuno ḅa; ḍawọye ḍin emi, kụma anị ḅọrọ-so ḅa.

⁹ Kẹ gotẹ ọkọ ḍukoarị, ḍawọye ḍin na Fịafịa Tẹmẹ ḅe tomina aḅioḅẹngbọ jike tẹ ịn kọn-arị ẹkwẹn ma na ḅẹ ḍiepịrị-aị ma bebe-a;

¹⁰ kụma kara-gbasị tẹ ye mẹ ḅo la sakị, bebe-a ye mẹ kịnị ḅarị anị ẹrị ḅịa.

¹¹ Ị̀ kala-sakị àrị awọmịna aị fiem, awọmịna ḅara mie ye pịkị kẹ ị̀ ịnọ ye, tẹ à pịkị awọmịna kuroma nyanam; mịọkụ à ḅo tomḅọ la tẹ mẹ, arị awọmịna amịẹaị ḅụ ḅara-siin tẹ.

¹² Mịọkụ wa ẹrịarị ye mẹ kịkarị ye anie tẹmẹ-ḍikiye ḅio banabana-a ḅara kẹ ẹrị ye; anịtẹso sakị wa tọrụ kẹ dama-dama ḅara kẹ ye ẹrị ḅa. Mịọkụ à nimi wararị ye mẹ anie ye ḅụ ḅẹ pakịrị, Anịtẹso sakị anị bebe ye sọ ḅa, tẹso, à ḅo Tamụnọ kẹ ì nimi ḅara mẹ kẹ bebe ye nimi fama ḅa.

¹³ Mịọkụ ye simearị ḅara ḅụ, ye ḅụ ḅẹ tẹrẹị emi: minini na, ḅiokpọ na, ḅẹlẹma na, tẹ mịna aị ma ḅụ tẹịn ye anie ḅẹlẹma.