1 Kọrịntị 12 - FỊAFỊA BAỊBỤLỤ

Fịafịa Tẹmẹ Ḅe Ḅara Ḅo Ḍiepịrị-aị

¹ Mịọkụ, ị̀ amịnapụ, à Fịafịa Tẹmẹ ḅe ḅara ḅo ḍiepịrị-aị ma gboloma ye ḅụ ọ́ kẹ ḍiri kẹẹ aị ma ḅẹ karakara mịẹ tẹ ó nimi ḅẹ-ḅiiarị.

² Ó nimi ḅara ḅụ, ọ́ paa oru nimi sime sakị mẹ ḅụ tọnwa aḅọkọ ḅụ ini ó toluma irima mu ḍumo nyana-a oru afụḅara kẹ tamụnọ sọma tẹkẹ etela ḅụ suum.

³ À ḅiiarị ó nimi, mịnẹ Tamụnọ Tẹmẹ ḅe tọrọkọ tarị pịrịarị ḅọ tẹ Jizọsị wori ḅẹ ḅọ ofori, tẹ gbọrụḅọ-sọ pịkị inetẹ ḍuko pakama ḅịa, “Jizọsị anie KỊNỊNYANAḄỌ”, Fịafịa Tẹmẹ ḅe mḅọ datụkụmarị sikima.

⁴ Kịrị-kịrị tẹmẹ ḅụ ḅẹ ḍiepịrị-aị emi, kụma gbọrụ Tẹmẹ ḅe mie arị pịrịarị.

⁵ Kịrị-kịrị fịrịmẹnjị aḅara emi, kụma gbọrụ KỊNỊNYANAḄỌ ḅe mie ịn mẹnjị pịrịarị.

⁶ Kịrị-kịrị fịrịmẹnjị akụrọ emi, tẹ kịnị kẹ fịrịmẹnjịarị, kụma gbọrụ Tamụnọ ḅe mie kụrọ mẹ kẹ ḅẹḅọ-ḅẹḅọ pịrịarị, mḅọ kẹ karakarama tẹ sime mḅọ pịrị fịrị mẹ mẹnjịị.

⁷ Tẹmẹ ḅe ọrụḅọ-ọrụḅọ ḅụụ ḅio sime tẹ gbọrụ ḅọkọ ḅụ amịna ḅụụ ḍie-pakamarị, tẹ mịẹ tẹ kịnị mamgba anị ḅẹ iḅi mẹ fịarị.

⁸ Tẹmẹ ḅe nimi ẹkwẹn kẹ gbọrụḅọ pịrị anga, ò ye ḍawọ ḍin kụrọ kẹ jụmọ pịrịarị.

⁹ Ḅị gbọrụ Tẹmẹ ḅe kụrọtẹ minini nyana kẹ gbọrụḅọ pịrịarị anga, ọ̀ kịnị gwọ kụrọ kẹ jụmọ pịrịarị.

¹⁰ Tẹmẹ ḅe ḅụụ-buama kọrịnama kọrị kụrọ kẹ gbọrụḅọ pịrịarị; ọ̀ Tamụnọ oku mẹ ḍuko kụrọ kẹ jụmọ pịrịarị; tẹ ọ̀ pịkị kụrọ kẹ jụmọ pịrị tẹ mḅọ kẹ Tẹmẹ ḅe ḅara ḅo ḍiepịrị-aị na, Tẹmẹ ḅe ḅara ḅo-a ḍiepịrị-aị na ḅẹ kịrị nimiarị. Ọ̀ kụrọ kẹ gbọrụḅọ pịrị tẹ mḅọ kịrị aḅẹlẹ kẹ ẹkwẹn-arị, anịsakị ọ̀ pịkị kụrọ kẹ jụmọ pịrị tẹ mḅọ kẹ anị ḅọ mẹ kọn ẹkwẹn mẹ puu-finjiarị.

¹¹ Kụma paa ḅị gbọrụ Tẹmẹ ḅe anie ma mamgba mịẹarị; anị ọ̀ ḅụụ-ḅẹlẹ ḅara mie ò ḍiki tẹ kịrị-kịrị ye ḍie ọrụḅọ-ọrụḅọ pịrịarị.

Gbọrụ Oju Tẹ Tọnwa Apakịrị Nyana Ye

¹² Kịrayịsị kịkarị ye anie tomḅọ oju, tẹ kịrị-kịrị apakịrị nyana ye mẹ, anịsọ paa gbọrụ oju mẹ, tomi-juḅẹye, kịrị-kịrị apakịrị anị ḅụ emi sọ.

¹³ Anị gbọrụ ḅara ḅụ, wamịnị-mgba, ḅọrọ Juu-ḅẹ-apụ-o, Ja asịẹ ḅẹ apụ-o; omoniapụ-o, amịna sịḅị atomi-o, gbọrụ Tẹmẹ ḅe minji kẹ wa sara tẹ wa kẹ gbọrụ oju mịẹ tẹ, wamịnị-mgba pịkị anị gbọrụ Tẹmẹ ḅe nyana tẹ Kịrayịsị ọmbie mẹ ḅuu tẹ.

¹⁴ Gbala tomḅọ oju mẹ gbọrụ pakịrị kịngẹ anị mịẹ-a, kụma tọnwa apakịrị.

¹⁵ Ḅụọ nwẹnị ḅẹẹ mịnẹ anị ḅara-a ẹrẹsị anị ḅarị oju mẹ ḅụ ofori mẹ mịẹtẹ anị ḅarị oju mẹ ḅụ ofori?

¹⁶ Tẹ ḅeri ḅẹẹ mịnẹ anị tọrụngbọ-a ẹrẹsị anị oju mẹ ḅụ ofori mẹ mịẹtẹ anị ḅarị oju mẹ ḅẹ gbọrụ pakịrị-a?

¹⁷ Bebe oju mẹ tọrụngbọ kụma, ndẹẹ anị ye naa ḅẹ ḅara? Tẹ anịmgba ḅeri-ḅeri kụma, ndẹẹ anị fụrụye naa ḅẹ ḅara?

¹⁸ Ye sime-ḅara ḅụ, Tamụnọ amịna ḅụụ-ḅẹlẹ ḅara ḍiki tẹ pakịrị, pakịrị ma kẹ oju mẹ ḅụ sụam.

¹⁹ Arịmgba gbọrụ pakịrị kụma oju mẹ ḅarị oju-a!

²⁰ Anị sime-ḅara ḅụ, tọnwa apakịrị emi, kụma gbọrụ oju mẹ.

²¹ Ọkọẹrẹsị tọrụngbọ mẹ inetẹ, ḅara mẹ ḅẹẹ ḅịa, “Àrị aị kẹ mịẹye nyana-a.” Sịḅị mẹ sọ inetẹ, “Àrị aị kẹ mịẹye nyana — kẹ ḅụọ ma ḅẹẹ ḅịa.”

²² Anie nakara, oju mẹ ḅụ wa kụrọ nyana ja apakịrị na gbasị-a tọrụ kẹ ḍikiarị apakịrị ma, mịẹtẹ mịẹye ḅụ sọ-sọa ḅara ofori,

²³ tẹ wa gberie ḅụ sọ, sọ na-iḅi-a tọrụ kẹ ḍikiarị apakịrị ma rẹ wa kaị tẹịn-arị; tẹ oju mẹ ḅụ gbala-gbala tọrụ-gbẹ-a ḅara sime apakịrị ma, wa arị bala lamarị,

²⁴ anie tọrụ-gbẹ arị nẹngị lama wararị apakịrị ma ḅii-a bala ḅara. Tamụnọ ḅarana oju mẹ ḅẹ pakịrị, pakịrị ma kẹ gberie mịẹ tẹ kụn nyana osi-aị nẹngị ḅara kẹ ja apakịrị wẹrị tẹ, arị ọkọ sime na-iḅim ẹrẹsị.

²⁵ Anie mịẹtẹ oju mẹ ḅarị puua nyana-a, kụma anị ḅẹ kịrị-kịrị apakịrị ma ḅo gbọrụ ḅara kẹ jen-jen bala tẹẹ.

²⁶ Oju mẹ ḅẹ gbọrụ pakịrị tọrụsiẹrịarị ḅẹḅẹ, osi apakịrị mamgba anị na sọ tẹ tọrụsiẹrịarị; ịn gbọrụ pakịrị tokinim ḅẹḅẹ, osi apakịrị mamgba anị na sọ tẹ ḅioḅẹlẹarị.

²⁷ Ọmịnị-mgba anie Kịrayịsị oju mẹ, tẹ ọrụḅọ-ọrụḅọ anị ḅẹ gbọrụ pakịrị.

²⁸ Sọsị mẹ ḅio Tamụnọ ọrụḅọ-ọrụḅọ kiri kẹ mḅọ pịrị wararị: fịrịmẹnjịapụ ma tarị; maaịn karama kiri, ịkịankoroapụ; tẹrẹị karama kiri, ye-tolumapụ; Anịtẹso ḅụụ-buama kọrịnama kọrị apụ; ịn palị apụ anie ini obi gwọ kụrọ kẹ pịrị apụ, anịanịa ḅarasụa ja apụ pịrị apụ, anịanịa ịn datụkụmarị apụ, anịanịa kịrị aḅẹlẹ kẹ ẹkwẹn apụ.

²⁹ Inimgba fịrịmẹnjịapụ-a, anịanịa ịkịankoroapụ, anịanịa ye-tolumapụ. Ḅẹḅọ-ḅẹḅọ ḅụụ-buama-aị mịẹ kụrọ nyana-a,

³⁰ anịanịa obiapụ gwọ kụrọ; anịanịa kịrị aḅẹlẹ kẹ ẹkwẹn; anịanịa ẹkwẹn mẹ puu-finji.

³¹ Ọkọẹrẹsị, ọmịnị ọmịna aḅioḅẹngbọ kẹ yela tẹịn wararị gbọrụ ḍiepịrịye mẹ ḅụ gbanaa. À kẹ ó ḍie ḅẹ-yearị etela mẹ anie iḅitẹịn etela.