1 Kọrịntị 11 - FỊAFỊA BAỊBỤLỤ

¹ Ọkọẹrẹsị, ọmịnị ì ḍikima mịẹ, yẹrị sọ Kịrayịsị ḍikima mịẹarị ḅara.

Sọsị Ḅio Sịḅị Gbaịn Tẹ Sunsin Tamụnọ Pịrị Mẹ

² Sakị mamgba ọmịnị ị̀ kẹ ḅiokoroma tẹ à tolumarị, tẹ saakị ọmịna ḅarasụa aị ma ḍukamẹnjịarị mẹ gotẹ, arị ó tokinim.

³ Kụma à ḅiiarị ó nimi mịnẹ Kịrayịsị anie owiḅọ nwẹn-sịn owiḅọ sịḅịdaḅọ, diḅọ pịkị taḅọ sịḅịdaḅọ, anịsakị Tamụnọ pịkị Kịrayịsị sịḅịdaḅọ.

⁴ Anie ḅụ, owiḅọ tomina ogboku tẹkẹarị, anịanịa Tamụnọ ẹkwẹn kọn-arị, tẹ amịna sịḅị gbaịnm ḅẹḅẹ, mḅọ Kịrayịsị mịẹ-simarị.

⁵ Tẹ ḅẹẹ ẹrẹḅọ, ḅẹẹ ẹrẹḅọ tẹ tomina ogboku tẹkẹarị, anịanịa Tamụnọ ẹkwẹn kọn-arị, tẹ sịḅị gbaịn-a ḅẹḅẹ, arị á di mịẹ-simarị, tẹ sịḅị sẹịn-siin wararị ẹrẹḅọ na árị na ḅụ kịrị ofori.

⁶ Ẹrẹḅọ sịḅị gbaịn-a ḅẹḅẹ, á gbọrsịḅị á sịḅị kịrịị. Ẹrẹḅọ sịḅị kịrị na sẹịn sin na mẹ ḅụụ-jịrịma ye sọ wararị sakị goyegoye, árị á sịḅị gbaịn.

⁷ Owiḅọ gotẹ sịḅị gbaịn na-iḅi-a ye, ọ̀ Tamụnọ sime ḅara na Tamụnọ ebube na ḍie-pakamarị ẹrẹsị. Kụma ẹrẹḅọ nwẹnị owiḅọ ebube ḍie-pakamarị;

⁸ ini ẹrẹḅọ ḅụ owiḅọ tẹmẹ-a, kụma owiḅọ ḅụ rẹ mie ini ẹrẹḅọ tẹmẹ ye.

⁹ Ịn pịkị owiḅọ tẹmẹ ẹrẹḅọ pịrị-a, kụma ẹrẹḅọ mie ịn tẹmẹ owiḅọ pịrị ye.

¹⁰ Ọkọẹrẹsị, enjẹlị apụ ma gotẹ, anị iḅim ẹrẹḅọ ye kẹ á sịḅị kikima, tẹ kẹ árị á di suku-ḅio emi tẹ ọ̀ ḅẹrẹtọn á pịrịarị mẹ ḍie-pakama.

¹¹ Anị sime-ḅara, sime-ḅara sọ, KỊNỊNYANAḄỌ ḅe ḅụ wa kọn-arị ḍumo mẹ ḅụ, ẹrẹḅọ owiḅọ ofori ḅara kẹ sime ḅịa, owiḅọ pịkị ẹrẹḅọ ofori ḅara kẹ sime ḅịa.

¹² Kẹ gotẹ ọkọ ḍukoarị, Tamụnọ owiḅọ ḅụ ẹrẹḅọ tẹmẹ ḅara, anie ọ̀ pịkị mịẹtẹ owiḅọ ḅe ẹrẹḅọ furo ḅio paka-ḅo ḅara; ye goyegoye Tamụnọ anie mịẹ tẹ anị ḍumo simearị.

¹³ Ọmịnị sọ ḍikii: ẹrẹḅọ tomina ogboku tẹkẹarị tẹ á sịḅị gbaịn-a mẹ kura ḅoto.

¹⁴ So kẹ ye wẹrị ḅara ḅụ, nangwọ sara wararị inume kọkọ ḅụụ-jịrịmarị owiḅọ sịḅị ḅụ,

¹⁵ kụma ẹrẹḅọ sịḅị ḅụ anie árị iḅi. Á kẹ á sịḅị gbaịn ḅẹm ẹrẹsị Tamụnọ nangwọ wararị inume mẹ kẹ á pịrịm.

¹⁶ Kụma anị ḅụ ye-nụnụa ḅẹ ḅọ emi-emii, à nyana tẹ ḍukoarị ye anie, wamịnị na Tamụnọ asọsị ma na jen mịẹ-mịẹ ḅara nyana-a, kobiri tẹ tẹkẹ anga ḅụ.

KỊNỊNYANAḄỌ Ḅe Ḅoḅiri Fịye Mẹ

¹⁷ Mịọkụ à ḍuko ọ́ pịrị ḅẹ-yearị aị ma ḅụ àrị ó tokini-a, kẹ gotẹ ọkọ ḍukoarị, ọ́ tẹkẹ ḅẹ tẹ ḅo Kobiri sakị ọ́ mịẹarị aị ma ḅụ si kẹ ọ́ mịẹ ḅẹ aị tẹịn iḅi kẹ ọ́ mịẹ ḅẹ aị nẹngịm.

¹⁸ Tarịye, kịnị ḍuko ì pịrịm mịnẹ ọmịna ogboku ogbo, ogbo emi, tẹ jen-apụ, ja apụ na tụḅụrụarị, à pịkị kẹlẹ anị mininim.

¹⁹ (Piki-pikiye-ofori ḅara ḅụ, ọ́ pakịrị-pakịrị puu tẹ ọmịna ogboku ḅụ, miemẹ mịẹ tẹ karakara ịgbanịarị apụ ma paka-ḅo giregire tẹ).

²⁰ Ó ḅo kpoo ḅụ kobiri sakị ọ́ KỊNỊNYANAḄỌ Ḅoḅiri Fịye mẹ fị-a.

²¹ Kẹ gotẹ ọkọ ḍukoarị, ó ye mẹ fịarị sakị ọrụḅọ-ọrụḅọ amịna soku-ḅẹ fịye fịarị, anị nwẹnị mịẹtẹ ḅuru ja apụ tarịarị sakị, osi apụ iru ḅuu tọrụ-ḅaama tẹ.

²² Ó sime tẹ fị-na-ḅuu-na ḅẹ awarị ọ́ nyana-a? Anịanịa ọ́ sọsị mẹ ḍiki-sima ḅẹ ḍọkịarị, tẹ pịkị mịẹ ḅẹ ọkụ ofori atomi ma ḅụụ-jịrịma ḅẹ mụnọọ? Mie ḅụ ó kuromarị à ḍuko ḅẹ ye tiye? Àrị ó tokini ḅẹ? Gbala-gbala àrị ọkọ sime ye mịẹ ḅịa!

²³ À KỊNỊNYANAḄỌ ḅe ḅara daa-ọkị tolumaye mẹ mie à saḅama ọ́ pịrị ye: mịnẹ, KỊNỊNYANAḄỌ Jizọsị ḅe, ini ọ̀ kẹ tomina aḅara-ḅio dẹrịma gbọrụ ḍin mẹ ḅụ, ọ̀ fịturu pakịrị ọkị

²⁴ tẹ ịmịẹtẹ kẹ Tamụnọ ḅẹẹ tẹ, anị paịn tẹ ḅẹẹm, “Mịẹ ì oju mẹ, ịn kẹ ó gotẹ pịrị ye mẹ. Ó miemẹ mịẹ tẹ kẹ ị̀ kẹ ḅiokoromaa.”

²⁵ Anị gbọrụ ḅara ḅụ, in ḅoḅiri fịye mẹ fị fama tẹso, ori iru kọpụ mẹ ọkị tẹ ḅẹẹm, “Mị kọpụ mẹ anie Tamụnọ ịwọ ọḅọkụ mẹ, tẹ ị̀ ọmbie mẹ mịẹ kụrọma ye mẹ. Ọmịnị anị ḅuu sakị, ḅuu sakị, ọmịnị ị̀ kẹ ḅiokoroma ḅẹ ẹrẹsị ọkọ mịẹ.”

²⁶ Miemẹ fiearị mịnẹ, ọ́ mị fịturu mẹ fị tẹ, pịkị mị kọpụ mẹ ḅio ḅẹ iru mẹ ḅuu sakị, ḅuu sakị ọ́ KỊNỊNYANAḄỌ ḅe fịị mẹ ḍuko wasamarị, nwenii ò ḅo sakị la ḅa.

Anị Gbẹẹ-a Ḅara Kẹ Fịafịa Fịye Mẹ Fị Ḅẹ Si

²⁷ Anie ḅụ, ḅẹḅọ-ḅẹḅọ tẹ kụn kẹ anị pịrị-a ḅara kẹ KỊNỊNYANAḄỌ ḅe fịturu mẹ fị, anịanịa ọ̀ kọpụ mẹ ḅuu ḅọ ḅuu ḅọ, si mịẹ tẹẹ, KỊNỊNYANAḄỌ ḅe oju mẹ na ori ọmbie mẹ na gboloma ye ḅụ.

²⁸ Ọkọẹrẹsị, ọrụḅọ-ọrụḅọ amịna ḅụụ pekele-ḍiki tẹrẹmẹ ḅo fịturu mẹ fị, tẹ mị kọpụ mẹ ḅio ḅuu.

²⁹ Kẹ gotẹ ọkọ ḍukoarị, tomḅọ KỊNỊNYANAḄỌ ḅe oju mẹ fiearị ye nimiatẹ fịturu mẹ fị tẹ pịkị kọpụ mẹ ḅio ḅuuarị ḅẹḅẹ, mḅọ ọkọ mịẹarị sakị mḅọ ḅẹrẹkọn sịn ḅụụ pịrịarị.

³⁰ Anie mịẹtẹ ọmịna ḅụ ḅẹ tọnwa-apụ ḅụ ịnyọ faarị tẹ ịn pịkị obiarị, anị ḅụ ḅọrọ tẹ fịị tẹ apụ pịkị ḅakam.

³¹ Wamịnị tarị wamịna ḅụụ pekele-ḍiki kụma Tamụnọ ịganị ḅarị ḅo wa la ḅịa.

³² Kụma KỊNỊNYANAḄỌ ḅe wa kọn tẹ fomu-ḅara kẹ wa pịrị tẹ gotẹ ọ̀ ḅarị wa kẹ Kịrayịsị minini-a apụ ma na sụa ḅẹrẹ-ḅarasii kiri ḅụ wẹrị ḅịa.

³³ Ọkọẹrẹsị, ị̀ amịnapụ, ó ḅo kobiri tẹ KỊNỊNYANAḄỌ ḅe Ḅoḅiri Fịye mẹ fị ḅarị sakị, ọ́ jụmọ-jụmọ koruu.

³⁴ Ḅuru pọkọ-tarịarị ḅọ emi-emii, mḅọ tarị warị ḅio ye fị, anị rẹ ọmịna gboloma kiri ḅụ Tamụnọ ịganị ḅarị ḅo ọ́ la ḅịa. Osi aḅẹrẹ ma kụma à ḅo sakị àrị arị ḍuko sin ḅa.