1 Kọrịntị 10 - FỊAFỊA BAỊBỤLỤ

Pọlụ Oru Tẹkẹ Dogi-ḅoarị Si Aị Ḍukom

¹ Ị̀ amịnapụ, à ḅiiarị ọ́ wamịna atẹngịapụ ma ḅụ pakaye kẹ ḅiokoroma, anie Mozizi ḍuka Ijiputi ḅụ paka-ḅo apụ ma. Oḅuto inimgba kikimam, tẹ ịn pịkị gberie-sọ ịn la-a ḅara kẹ Awụ Tọrụ mẹ saḅa-korom.

² Inimgba oḅuto mẹ ḅio na tọrụ mẹ ḅio na minji saram, Mozizi ḍukamẹnjịapụ ḅara ḅụ.

³ Inimgba gbọrụ tẹmẹ fịturu mẹ fịm,

⁴ tẹ pịkị gbọrụ tẹmẹ minji mẹ ḅuum. Ini na mẹnjị sime tẹmẹ ḅụ ḅẹ ịkụ ḅe ḅẹ minji mie in ḅuu ye, tẹ anị ịkụ ḅe anie Kịrayịsị ḅioju.

⁵ Kụma anị ọkọ pakam sọ, ịna ḅụ ḅẹ opu anga mịẹ ye Tamụnọ ḅụụ-ḅẹlẹ-a, tẹ anie ḅụ ịn nwẹnị ịkpa mẹ ḅio fịị sara, anga-anga ḅụ.

⁶ Mịọkụ, mie mẹmgba tọnma ye sọ tẹ wamịna ḅeri nụnụarị, mịnẹ wa si-aị sọlịma ma, ịn wẹrịtẹ mịẹ ḅara,

⁷ wa pịkị oru tẹkẹ ma, ini ḅẹ ja apụ mịẹ ḅara. Fịafịa Ḍiri mẹ ḍukoarị, “Tomi ma nwẹnị lẹgị-sime tẹ alalị fị, tẹ ini alalị mẹ fị ḅụrama tẹso, in kiki ofori ḅara kẹ iru ḅuu na owiapụ na ereme na gboloma amịẹaị mịẹm.”

⁸ Owiapụ na ereme na kura-a ḅara kẹ gboloma si mẹ ḅẹ ḅẹrẹ-ḅarasii wamịna ḅụụ pakama, anị ịna ḅụ ḅẹ ja apụ ḅụụ paka ḅara — tẹ kpọkpọ gbọrụ ene ḅụ kịnị ẹndẹ oyia asi ofori kịnị tẹra apuku ịna ḅụụ ḅịkị-koro tẹ fịịm.

⁹ Wa KỊNỊNYANAḄỌ ḅe daaḍiki ma, ịna ḅụ ḅẹ ja apụ mịẹ ḅara — tẹ tọnwa oronwi ḅo ịn gbọn ḅaa gulugulumam.

¹⁰ Wa mbụrụmbụrụ ma, ịna ḅụ ḅẹ ja apụ mịẹ ḅara, tẹ Kịnị-ḅa Enjẹlị ḅe ịn ḅaa gulugulumam.

¹¹ Nwẹn ịna aḅụụ paka aị mamgba ịn kẹ tọnma aị sọma wa pịrịarị, tẹ ini arị kẹẹ koroma tẹ kẹ wamịna ḅeri nụnụarị. Gbala wa nwẹn simearị tomikiri mẹ fa ḅẹ sakị laa ḅẹ tẹ.

¹² Ḅẹḅọ-ḅẹḅọ tẹ ọkịarị mịnẹ mḅọ sịẹ-kụrọ wararị nwẹn ḅẹẹ ḅọ mḅọ ẹbịị, anieofori mḅọ ḅofa ḅịkị.

¹³ Ḅo tomi la-la daaḍiki mie ḅo ọ́ laarị. Kụma Tamụnọ amịna ḅịḅị sima simaa ẹrẹsị, ọ̀ ḍụkụ tẹ ọmịnị ịnyọ nẹngị daaḍiki ḅo ọ́ la ḅịa. Daaḍiki sakị mẹ ḅụ ori ịnyọ kẹ ọ́ pịrị tẹ ọ́ kẹ inema ḅa, tẹ ọ̀ pịkị ọ́ kẹ anị ḅio tolu-ḅọrọ ḅarị ḅọkọ pakama ọ́ pịrị ḅa.

¹⁴ Ọkọẹrẹsị, ị̀ iḅi ikiapụ, ó sunsin oru pịrị ḅụ ḅụụ kịẹn.

¹⁵ À ye-nimi atomi ḅara kẹ ẹkwẹn ọ́ pịrịarị ọmịnị à ḍukoarị ye mẹ pekele-ḍikii.

¹⁶ Wa KỊNỊNYANAḄỌ ḅe Ḅoḅiri Fịye mẹ fịarị sakị, wa kọpụ ọkị tẹ ịmịẹtẹ kẹ Tamụnọ ḅẹẹ tẹ anị ḅio simearị iru mẹ ḅuuarị. Wa anị ḅuuarị sakị wa Kịrayịsị ọmbie mẹ ḍiyarị. Tẹ wa paịn-arị fịturu mẹ sọ, wa anị fịarị sakị, wa Kịrayịsị oju ḅẹ meni mẹ ḍiyarị.

¹⁷ Gbọrụ fịturu ngẹrị emi sakị goyegoye wamịnị-mgba, tọnwa-apụ ḅẹsọ, wa gbọrụ oju mịẹ tẹ, kẹ gotẹ ọkọ ḍukoarị, wamịnị-mgba gbọrụ fịturu kpo mẹ ḍiya tẹ.

¹⁸ Ọmịnị Izirẹlịapụ kẹ ḅiokoromaa. Agbamịẹ-aị ḅụ ḅẹ aị fịarị apụ ma, agbamịẹ-anga mẹ ọgọnọ ịn mẹnjị Tamụnọ pịrịarị fịrị mẹ ini sọ, sọ tẹ mẹnjị tẹ.

¹⁹ Ọkọẹrẹsị, à ḍukoarị ye mẹ ḅọrọ fiearị mịnẹ oru fụḅara, anịanịa ịn kẹ agbamịẹ oru pịrị tẹ fịye ḅo ye sọ tẹ mụnọọ?

²⁰ Ọkọ-a; á fiearị ye anie, oru nimi apụ mịẹarị agba ma ịn kẹ Tamụnọ pịrị-a, oru mie ịn kẹ pịrịarị ẹrẹsị à ḅii-a ọmịnị oru ma na mịẹye gboloma.

²¹ Ọmịnị inetẹ KỊNỊNYANAḄỌ kọpụ mẹ ḅio ḅuu tẹ pịkị mu oru ma kọpụ ḅio ḅuu ḅịa; ọmịnị inetẹ KỊNỊNYANAḄỌ dẹbịlẹ ọgọnọ fịye fị tẹ pịkị mu oru ma dẹbịlẹ ọgọnọ fị ḅịa.

²² Anịanịa, wa ḅọrọ KỊNỊNYANAḄỌ ḅe ịganịma ḅẹ ḍọkịarị ḅoto? Wa ọkịarị wa kụrọ ọ̀ nẹngị wararị ḅoto?

²³ Ini mẹẹ, “Tọn-tọnye ofori.” Ọkọọ, kụma ye goyegoye iḅiye-a. “Tọn-tọn ye ofori” kụma ye goyegoye ḅarasụa tomḅọ pịrị-a.

²⁴ Gbọrụḅọ-sọ amịna iḅi ngẹrị ḍọkị ma, kụma mḅọ ja apụ iḅi ḍọkị tẹịn.

²⁵ Nama dẹrị ogumaḅiri ḅụ ị́ ḅụụ-ḅẹlẹtẹ ị́ fẹ pẹị ḅịa nama ofori, anị kẹ ị́ tẹmẹ ḅioḅẹngbọ fụkama-a ḅara ḅụ.

²⁶ Kẹ gotẹ ọkọ ḍukoarị, Fịafịa Ḍiri mẹ ḅẹẹarị, “Tomikiri mẹ na anị ḅio sime ye goyegoye na sime KỊNỊNYANAḄỌ ḅe pịrịm.”

²⁷ Kịrayịsị minini-a ḅọ fịye kẹ ị́ sịn tẹ í mu ḅẹ ḅii, ḅii, ị́ tẹmẹ ḅioḅẹngbọ ḅụ ye sime-ḅara bala tẹ fịye mẹ tọ-anga ḅo mọ gbela ma, tẹ ọ̀ dẹẹ ị́ pịrị fịye mẹ fịị.

²⁸ Kụma kịnị ḅo ị́ ḅẹẹ mịnẹ, “Mị fịye mẹ ịn kẹ oru karịma tẹ fịye”, ḅẹẹ, ḅẹẹ, anị fịye mẹ fị ma, ye mẹ ḍuko ḅọ ḅe sịḅị ẹrẹsị, pịkị tẹmẹ ḅioḅẹngbọ gotẹ;

²⁹ anie ị́ tẹmẹ ḅioḅẹngbọ-a, kụma osi tomḅọ ḅe tẹmẹ ḅioḅẹngbọ. Ẹbịsịya kịnị gbela ḅa, “Iḅim, ọkọ ḅẹ kụma ndẹẹ jụmọ tẹmẹ ḅioḅẹngbọ kẹ ì ḅiotọn tẹ à mịẹ ḅẹ ye kiki-kiki ḅara?

³⁰ À gotẹ ịmịẹtẹ kẹ Tamụnọ ḅẹẹ tẹ fịye mẹ ḅụ ndẹẹ jụmọ kẹ anị kẹ ì ḍuko sima ḅẹ ḅara?”

³¹ Iḅim, kụma ị́ mịẹarị ye, mịẹarị ye sọ, ị́ fị-aro, í ḅuu-aro anịmgba kẹ ebube kẹ Tamụnọ pịrị ḅẹ ḅara mịẹ.

³² Ḅụụ-fụka kẹ ja apụ pịrị ḅịa ḍumo kọn, anị ḅọrọ Juu-ḅẹ-apụ-o, Ja asịẹ ḅẹ apụ-o, Tamụnọ sọsị mẹ-o.

³³ Ọmịnị à mịẹarị ḅara mịẹ; à mịẹarị aị mamgba ḅụ à ḅụụkụrọma tẹ ḅẹḅọ-ḅẹḅọ ḅioḅẹlẹma ḅẹ ḍọkịarị, ì iḅi ngẹrị kẹ ḅiokoroma-a ḅara ḅụ, kụma inweni-mgba iḅi, mịẹtẹ ịn ḅọrọma ḅarị ḅara.