1 Kọrịntị 1 - FỊAFỊA BAỊBỤLỤ

¹ Yẹrị Pọlụ, Tamụnọ ḅụụ-ḅẹlẹ tẹ tọnm Kịrayịsị Jizọsị fịrịmẹnjịḅọ sọọ ḅẹẹ ḅọ ḅe na, wamịna mịnaḅọ Sosịtinisi na:

² Mị ḍiri mẹ kẹẹ tẹ kẹ Tamụnọ sọsị mẹ tẹ Kọrịntị ḅụ simearị apụ ma, inimgba tẹ Tamụnọ sịnm ḅo ọ̀ fịafịa atomi sọ ḅẹẹ apụ ma fịrịmam, anie sime ọ̀ pịrị apụ ma, Kịrayịsị Jizọsị na, ḅẹ anga, ḅẹ anga ḅụ simearị atomi ma, tẹ sunsin KỊNỊNYANAḄỌ Jizọsị Kịrayịsị pịrịarị apụ ma na gbọrụ ḅụ sime ḅụ, ori anie ịn Nyanaḅọ pịkị wa Nyanaḅọ.

³ Yee Tamụnọ, wamịna Ḍaḅọ ḅe na, KỊNỊNYANAḄỌ Jizọsị Kịrayịsị na, ḍiki-ḅụụjịrị na dein na kẹ ọ́ pịrịị.

Kịrayịsị Ḅụ Ḅo Aboma

⁴ Kịrayịsị Jizọsị ḅụ ḅọrọ ḅo ọ́ la ḍiki-ḅụụjịrị mẹ gotẹ, à sakị mamgba ịmịẹtẹ kẹ ị̀ Tamụnọ ḅẹẹarị.

⁵ Ọ́ Kịrayịsị ḅụ emi ye mẹ ẹrẹsị ó ye mamgba nyana tẹẹ, ẹkwẹn-ḅịḅị na ye-nimi na sọ kẹ sụa.

⁶ Kịrayịsị gboloma oku mẹ ọmịna ḅụụ ḅio sọ ḍiḅi lama tẹ,

⁷ mịẹtẹ boma tẹ ọ́ gbarị ḅẹ gberie-sọ ofori, ó sime tẹ wa Nyanaḅọ Jizọsị Kịrayịsị amịna ḅụụ ḍie-pakama ḅarị sakị mẹ koruarị, sakị goyegoye ḅụ.

⁸ Ọ̀ pịkị ọ́ mịẹ tẹ ọ́ sịẹ-kụrọ mu kunoma la ḅa, mịẹtẹ wa Nyanaḅọ Jizọsị Kịrayịsị Ene mẹ ḅụ ọ́ ḅụụ ḅụ ḅẹẹ-ḅẹẹye ofori ḅara sime ḅarị ḅara.

⁹ Tamụnọ anie ḅioḅẹngbọ-kẹ-sịrẹrẹ-niḅi ḅọ, anị Tamụnọ ḅe tẹ ọ́ sịn ḅo ọ̀ Tụḅọ Jizọsị Kịrayịsị wa Nyanaḅọ ḅe na gboloma ḅọ ḅe.

Sọsị Mẹ Ḅio Sime Pua

¹⁰ Ị̀ amịnapụ, wa Nyanaḅọ Jizọsị Kịrayịsị kẹ ị̀ pịrị kụrọ ḅụ, sisi àrị ọmịnị-mgba tẹkẹm, mịnẹ ó ḍukoarị ye goyegoye ḅụ ọ́ gbọrụ-ḅịḅị-fie, mịẹtẹ pua ọmịna ogboku paka ḅịa ḅara. Ọ́ gbọrsịḅị gbọrụ ḅụ sime fama, tẹ ọmịna kuroma na, ò gotẹ ọ́ mịẹarị ye mịẹarị ye na sọ, gberie ngẹrị sọọ.

¹¹ Kẹ gotẹ ọkọ ḍukoarị, ị̀ amịnapụ, Kilohẹ warị ḅẹ apụ ḅẹ ja apụ tẹ mịanga ḅo apụ, gberie-sọ kikima-a ḅara kẹ ḍuko ị̀ pịrịm mịnẹ ọ́ kamụ-sọ-sọ-sọarị ọmịna ogboku.

¹² À fiearị ye anie, ọrụḅọ-ọrụḅọ mḅọ ḅụụ-ḅẹlẹ ye ḍukoarị: gbọrụḅọ ḅẹẹarị, “À Pọlụ ḍukamẹnjịarị”; osi-ḅọ mẹẹ, “Àrị Apọlọsị ḍukamẹnjịarị”; jụmọ ḅẹẹarị, “À Pita ḍukamẹnjịarị”; tẹ jụmọ pịkị ḅẹẹarị, “À Kịrayịsị ḍukamẹnjịarị.”

¹³ Wa inetẹ Kịrayịsị kẹ kụlọ-kụlọ ḍiema ḅẹ? Pọlụ mie ẹngbẹsẹ-sịn ọgọnọ fịị ọ́ pịrị ye? Pọlụ ẹrẹ ḅụ ó minji sara?

¹⁴ Àrị ịmịẹtẹ kẹ Tamụnọ ḅẹẹm, mịnẹ ọmịna ḅụụ Kirisipọsị na Gayọsị na sikima à minji kẹ sara ḅọ ofori.

¹⁵ Ọmịna ḅụ inetẹ ḍuko ḅẹ ḅọ ofori, mịnẹ arị ọmịnị ì ḍukamẹnjị ḅẹ tẹ minji kẹ ọ́ saram.

¹⁶ (Inn, ì ḅiokoroma tẹẹ, à pịkị minji kẹ Sitifanasị na ọ̀ warị-kpo na saram, anie sikima, à sịn-a à minji kẹ jụmọ sọ saram.)

¹⁷ Kịrayịsị minji sara kẹ ị̀ fịrịma-a; ori ị̀ fịrịmam à mu Iḅi Oku mẹ ḍuko, kụma à tomina nimi ẹkwẹn ḅụ anị ḍuko ma, anieofori Kịrayịsị ẹngbẹsẹ-sịn ọgọnọ kọn fịị mẹ kụrọ mẹ ḅofa papaaye sọ.

Kịrayịsị Anie Tamụnọ Kụrọ Na Nimi Na

¹⁸ Kẹ gotẹ ọkọ ḍukoarị, Kịrayịsị ẹngbẹsẹ-sịn ọgọnọ fịịm nwẹn ḅẹẹ oku mẹ faarị apụ ma ḅụụ anị oḅori ẹkwẹn sọ wararị, kụma wamịnị Tamụnọ ḅọrọmarị apụ ma ḅụụ anị Tamụnọ kụrọ sọ wararị.

¹⁹ Fịafịa Ḍiri mẹ ḅẹẹm, “À ye-nimiapụ ma nimi mẹ kẹ papaaye mịẹ ḅa, tẹ opu aị ḍawọ ḍin apụ ḍawọ aị ma saakị anga pịrị ḅa.”

²⁰ Mịọkụ ndẹẹ ye-nimiḅọ ḅe sime anga? Anịanịa opu aị ḍawọ ḍin apụ ma? Anịanịa tomikiri ḅụ iḅiọkụ ẹkwẹn ḍin apụ ma? Tamụnọ ḍie-pakama tẹ mịnẹ tomikiri mẹ ḅẹ nimi mẹ oḅori ye!

²¹ Gbala Tamụnọ ò ye-nimi ḅụ mịẹtẹ tomi ịna ye-nimi ḅụ ḅọrọ tẹ ò nimi ḅẹ ọkụ ḅarị ofori. Anie nakara, wa kọn tẹ ịn kẹ “oḅori ẹkwẹn” sịn-arị ye mẹ ḅụ mie Tamụnọ tọn tẹ ye mịnẹ ọ̀ ḅọrọ tẹ anị minini apụ ma ḅọrọma ḅa.

²² Juu-ḅẹ-apụ ḅụụ-buama-aị ẹrị ḅẹ ḍọkịarị, anịsakị Girisi ḅẹ apụ nimi ḍọkịarị.

²³ Wamịnị kụma, wa Kịrayịsị ẹngbẹsẹ-sịn mẹ ọgọnọ ḅakụ ye mẹ ḍukoarị, tẹ anị Juu-ḅẹ-apụ ịganịmarị, pịkị Ja asịẹ ḅẹ apụ ḅụụ ye fie-a ye sọarị.

²⁴ Anịsọ, Juu-ḅẹ-apụ ma na, Ja asịẹ ḅẹ apụ ma na ḅụụ, Tamụnọ sịn ọ̀ ḅụụ pịrị tẹ apụ ma ḅụ, mị ẹkwẹn mẹ anie, Kịrayịsị anie Tamụnọ kụrọ, pịkị Tamụnọ ye-nimi mẹ.

²⁵ Kẹ gotẹ ọkọ ḍukoarị, Tamụnọ oḅori-sọarị kịkaye mẹ tomina ye-nimi nẹngịm, tẹ Tamụnọ ịnyọ ofori ḅara sime ye mẹ pịkị tomina ịnyọ nyana nẹngịm.

Tamụnọ Ori Amịẹaị Mịẹ, Mịẹ Ḅara

²⁶ Ị̀ amịnapụ, ọ́ Tamụnọ ọ́ sịn ọ̀ ḅụụ pịrị sakị ó sime-ḅara kẹ ḅiokoromaa. Tomi kẹ ye ḍikiḍiki ḅara ḅụ, ọmịna ḅụ boowa apụ kịngẹ mie ịn kẹ ye-nimiapụ, anịanịa kụrọ nyana apụ, anịanịa opu kiri sime apụ sịn ye.

²⁷ Kụma Tamụnọ tọrụ-gelegele tomikiri ḅẹ atomi kẹ papaa apụ sịn apụ ma sẹlẹ-ọkịm, mịẹtẹ ye-nimim nwẹn ḅẹẹ apụ ma ḅụụ-jịrị ḅarị ḅara, tẹ pịkị ọkọ kẹ tomikiri ḅẹ apụ kẹ ịnyọ nyana-a apụ sịn apụ ma sẹlẹ-ọkịm, mịẹtẹ kụrọ apụ ma ḅụụ-jịrị ḅarị ḅara.

²⁸ Tomi ḍiki-sima tẹ kẹ ye-sịn-a tẹ kẹ papaa apụ kịẹn apụ ma mie ọ̀ sẹlẹ-ọkị ye, mịẹtẹ ịn kẹ ye sọmarị apụ ma papaa apụ sọ ḅarị ḅara.

²⁹ Mie fiearị ye, Tamụnọ tọrọkọ ḅụ gbọrụḅọ sọ inetẹ ḅụụ-boma ḅịa.

³⁰ Kụma Tamụnọ ọ́ kẹ ḅo Kịrayịsị Jizọsị na gboloma tẹ, Tamụnọ Kịrayịsị kẹ wamịna nimi sọma tẹ. Ọ̀ ḅụụ ḅụ wa pịkị ḅo Tamụnọ na kura apụ sọ tẹ, pịkị Tamụnọ fịafịa atomi, tẹ ḅo si omoni ḅara-ḅio ofori apụ sọ tẹ.

³¹ Miemẹ ẹrẹsị, Fịafịa Ḍiri mẹ ḅẹẹm, “Ḅụụ-boma ḅẹ ḅọ sime, sime, mḅọ KỊNỊNYANAḄỌ ḅe kọrịnama mẹ kịngẹ gotẹ.”