1 Jọnị 5 - FỊAFỊA BAỊBỤLỤ

Wa Kẹ Tomikiri Mẹ Nẹngịmarị Ye

¹ Jizọsị anie Mẹsaya ḅe, minini ḅọ, minini ḅọ, anie Tamụnọ tụḅọ; anịsakị ḍaḅọ ḅẹlẹmarịḅọ mẹ pịkị mḅọ tụḅọ sọ ḅẹlẹmarị.

² Wa Tamụnọ ḅẹlẹma tẹ, ọ̀ ḅịḅị poki tẹ ori oloko kokoarị ḅara, mie wa ḅọrọ tẹ nimiarị mịnẹ wa Tamụnọ awọmẹ ma ḅẹlẹmarị.

³ Kẹ gotẹ ọkọ ḍukoarị, wa Tamụnọ ḅẹlẹmarị mẹ fiearị ye anie, ọ̀ ḅịḅị poki tẹ ori oloko koko. Anịsakị ori oloko ma pịkị kụrọ ḅaka-a wamịna ḅụụ,

⁴ gbala Tamụnọ tụḅọ nwẹn goḅọ-goḅọ inetẹ tomikiri mẹ nẹngịma ḅa ẹrẹsị. Anịsakị wa nyana minini ḅụ mie wa ḅọrọ tẹ tomikiri mẹ nẹngịma ḅarịye.

⁵ Tụḅọ inetẹ tomikiri mẹ nẹngịma ḅẹ? Anị ḅọ mẹ tẹ, mininiarị mịnẹ Jizọsị anie Tamụnọ Tụḅọ nwẹn ḅẹẹ ḅọ mẹ kịngẹ.

Jizọsị Kịrayịsị Gbolomaye Ḍuko

⁶ Jizọsị Kịrayịsị anie, ò minji sara ḅụ na, ò fịị na ḅụ Tamụnọ ḍukom mịnẹ ori Tamụnọ Tụḅọ nwẹn ḅẹẹ ḅọ ḅee. Ò minji mẹ ngẹrị ḅụ ḅo-a, kụma maaịn ma ḅụ, minji mẹ na fịị mẹ na ḅụ. Tẹ Tẹmẹ ḅe ḅioju ḍukoarị mịnẹ miemẹ karakaraye, gbala Tẹmẹ ḅe anie ḅe karakara ẹrẹsị.

⁷ Tẹra ḅẹrẹ-kiri sime apụ emi:

⁸ anie Tẹmẹ ḅe na, minji mẹ na, pịkị ọmbie mẹ na; tẹ ma tẹra aị mamgba gbọrụ ḅịḅị ḍukoarị.

⁹ Wa tomi ḍukoarị ye ọkị tẹ mininiarị sakị goyegoye, wa nimi mịnẹ Tamụnọ ḍukoarị ye kụrọ nyana tomi ḍukoarị ye nẹngịm, tẹ ori mie ọ̀ Tụḅọ ḅe gbolomaye ḅụ mie mẹ ḍukoye.

¹⁰ Mie ḅụ, ḅẹḅọ-ḅẹḅọ tẹ, Jizọsị anie Tamụnọ Tụḅọ ḅe mẹ minini ḅọ mẹ mḅọ ḅioḅẹngbọ ḅụ Tamụnọ ḍuko ye mẹ kiri nyana tẹ; kụma ḅẹḅọ-ḅẹḅọ tẹ Tamụnọ ḍuko ye mẹ minini-a ḅọ, mḅọ ọ̀ kẹ iruoḅọ sọma tẹ, mḅọ Tamụnọ ọ̀ Tụḅọ ḅe gbolomaye ḅụ ḍuko ye mẹ minini-a ẹrẹsị.

¹¹ Mie Tamụnọ ḍuko ye mẹ: ò sime gbamaso ḍumo kẹ wa pịrị tẹ, anịsakị ọ̀ Tụḅọ ḅe ḅụ mie mị ḍumo mẹ sime tẹ paka-ḅoarị ye.

¹² Tamụnọ Tụḅọ ḅe nyana tẹ ḅọ, nyana tẹ ḅọ mị ḍumo mẹ nyana tẹ; Tụḅọ ḅe nyana-a ḅọ, nyana-a ḅọ, pịkị mị ḍumo mẹ nyana-a.

Sime Gbamaso Ḍumo

¹³ Ọmịnị Tamụnọ Tụḅọ ḅe ḅụụ minini nyana apụ ma nimi ḅẹ ḅara, mịnẹ ó sime gbamaso ḍumo nyana wararị mẹ, mie à gotẹ mị ḍiri mẹ kẹẹ tẹ kẹ ọ́ fịrịmarị ye.

¹⁴ Wa nimi lama wararị mịnẹ, wa Tamụnọ ḅụụ-ḅẹlẹ ye ḅiiarị sakị ọ̀ wamịna tẹkẹ naarị mẹ ẹrẹsị, wa ḅiokpọ tẹ ọ̀ tọrọkọ muarị.

¹⁵ Wa ọ̀ tẹkẹ sakị, tẹkẹ sakị ọ̀ wa naarị, tẹ wa nimi wararị mịnẹ miemẹ karakaraye ḅẹ sakị wa pịkị nimi tẹ mịnẹ wa tẹkẹ ḅụ ọ̀ ḅara ḅiiarị ye mẹ ọ̀ kẹ wa pịrị tẹ.

¹⁶ Ị́ ị́ mịnaḅọ ẹrịm ọ̀ fịị dogi-ḅo ḅịa si mịẹarị ḅẹḅẹ, Tamụnọ tẹkẹ ọ̀ pịrị, oriḅe tẹ ḍumo kẹ ọ̀ pịrị ḅarị ḅọ ḅe. Miemẹ fịị dogi-ḅo ḅịa si mịẹ apụ kịngẹ mie anị sime pịrị ye. Kụma fịị dogi-ḅoarị si emi, à ḅẹẹ-a mịnẹ ọmịnị ọkọ sime si gbolomaye go Tamụnọ tẹkẹẹ.

¹⁷ Mịẹ-irima mamgba si, kụma fịị dogi-ḅoa si emi.

¹⁸ Wa nimi wararị mịnẹ Tamụnọ tụḅọ tẹ si mịẹ-mịẹ tọrọkọ mu ḅẹ ḅọ ofori, kẹ gotẹ ọkọ ḍukoarị, Tamụnọ Tụḅọ Jizọsị ḅe mḅọ ḍikiḍikiarị, anịsakị Ekwesu ḅe inetẹ ye kẹ mḅọ lama ḅịa.

¹⁹ Karakaraye Ekwesu ḅe bebe tomikiri mẹ ḅụ ḅẹrẹtọn-arị ḅẹ sọ, wa nimi wararị mịnẹ wamịnị kụma wa sime Tamụnọ pịrịm.

²⁰ Wa karakara ḅara kẹ Tamụnọ nimi ḅẹ ẹrẹsị Tamụnọ Tụḅọ ḅe ḅo tẹ ò gboloma nimi mẹ kẹ wa pịrịm. Mịọkụ wa Tamụnọ na pịkị ọ̀ Tụḅọ Jizọsị Kịrayịsị ḅe na gbọrụ ḅụ angarị. Mị karakara ḅara mẹ kẹ Tamụnọ nimi mẹ anie pịkị sime gbamaso ḍumo mẹ.

²¹ Ị̀ awọmẹ, ọmịnị ọmịna ḅụụ wẹrị ḅelemaa oru nimi amịẹaị ḅụ.