1 Jọnị 4 - FỊAFỊA BAỊBỤLỤ

Karakara Tẹmẹ Ḅe Na Iruo Tẹmẹ Mẹ Na

¹ Ì iḅi ikiapụ, ọmịnị ọ́ ḅẹẹarị mịnẹ ịn Fịafịa Tẹmẹ ḅe nyana wararị ḅẹẹ apụ mamgba minini ma, kụma ọmịnị ịn tọn ḍiki tẹ nimi ịn nyana tẹmẹ mẹ Tamụnọ ḅara ḅoarị ḅoto. Kẹ gotẹ ọkọ ḍukoarị, tọnwa iruo ịkịankoroapụ anga, anga ḅụ saakị paka tẹ.

² À ḍuko ḅẹ-yearị ye mẹ ḅụ mie ọ́ ḅọrọ tẹ inetẹ nimi ḅarị ye, mịnẹ anị Tẹmẹ ḅe Tamụnọ nye ḅoto. Ḅẹḅọ-ḅẹḅọ tẹ minini tẹ ḍuko-pakamarị mịnẹ, Jizọsị Kịrayịsị ḅo tomḅọ sọm nwẹn ḅẹẹarị ḅọ mẹ anie Tamụnọ ḅara ḅoarị Tẹmẹ ḅe nyana ḅọ mẹ.

³ Kụma ḅẹḅọ-ḅẹḅọ tẹ Jizọsị gboloma ye ḅụ mie mẹ pikiarị ḅọ mẹ mḅọ Tamụnọ ḅụ ḅoarị Tẹmẹ ḅe nyana-a. Mḅọ nyana wararị tẹmẹ mẹ anie Kịrayịsị na tụḅụrụḅọ ḅe ḅara ḅoarị tẹmẹ; ọ́ naam mịnẹ anị ḅo ḅa, tẹ mịọkụ anị ḅo tomikiri mẹ ḅio sọ kụra-ḅio iḅerea.

⁴ Kụma, ị̀ awọmẹ, ọmịnị ma ọ́ sime Tamụnọ pịrịm, ọ́ pịkị iruo ịkịankoroapụ ma nẹngịma tẹ, ọmịna ḅụụ ḅio simearị Tẹmẹ ḅe kụrọ sime tomikiri mẹ pịrị apụ ma ḅụụ ḅio simearị tẹmẹ mẹ nẹngịm ẹrẹsị.

⁵ Nwẹn ḅẹẹ iruo ịkịankoroapụ ma, tomikiri mẹ gboloma aị mie in ḍukoarị, anie mịẹtẹ tomikiri ḅẹ atomi ma in ḍukoarị aị ma pokiarị, in sime tomikiri mẹ pịrịm ẹrẹsị.

⁶ Kụma wamịnị wa sime Tamụnọ pịrịm. Tamụnọ nimi ḅọ, nimi ḅọ wa ḍukoarị ye mẹ pokiarị; ḅẹḅọ-ḅẹḅọ tẹ sime Tamụnọ pịrị-a ḅọ, wa ḍukoarị ye mẹ poki-a. Ọkọẹrẹsị, mị ḅọkọ mie wa ḅọrọ tẹ inetẹ karakara Tẹmẹ ḅe na iri ye mịẹ tẹmẹ mẹ na ḅẹ kịrị nimiarị ye.

Tamụnọ Anie Ḅẹlẹma

⁷ Ì iḅi ikiapụ, ó yee wa jụmọ-jụmọ ḅẹlẹma, ḅẹlẹma Tamụnọ ḅụ sime tẹ paka-ḅoarị gotẹ. Ḅẹḅọ-ḅẹḅọ tẹ kịnị ḅẹlẹmarịḅọ mẹ, Tamụnọ ḅụụ mḅọ iyim, mḅọ pịkị Tamụnọ nimi wararị.

⁸ Ḅẹḅọ-ḅẹḅọ tẹ kịnị ḅẹlẹma-a ḅọ mẹ, mḅọ pịkị Tamụnọ nimi-a, kẹ gotẹ ọkọ ḍukoarị, Tamụnọ anie ḅẹlẹma.

⁹ Tẹ Tamụnọ ọ̀ nyana wamịnị tomi pịrị ḅẹlẹma kẹ wa ḍie tẹ, ori ọ̀ kpọkpọ gbọrụ Tụḅọ kẹ tomikiri fịrịma ye ḅụ, mịẹtẹ wa ọ̀ ḅụụ ḅọrọ tẹ ḍumo nyana ḅẹ ḅara.

¹⁰ Mie à ḅẹẹarị ḅẹlẹma mẹ: wamịnị rẹ Tamụnọ ḅẹlẹmam ḅẹẹ ye-a, kụma ori rẹ mie wa ḅẹlẹma tẹ ọ̀ Tụḅọ kẹ fịrịma tẹ, ò ḅo Tamụnọ ḅọrọ tẹ wamịna asi wẹrịso wa pịrị ḅe ḅọkọ sọ ye.

¹¹ Ì iḅi ikiapụ, Tamụnọ mị-ḅara sime-ḅara mẹmgba kẹ wa ḅẹlẹmam ḅẹḅẹ, wamịnị sọ jụmọ-jụmọ ḅẹlẹma saa fị tẹ.

¹² Tụkụmaye, jen sakị tọrụngbọ kẹ Tamụnọ ẹrị tẹ ḅọ ofori sọ, wa nwẹnị jụmọ-jụmọ ḅẹlẹmarị ḅẹ kụma, Tamụnọ wamịnị na gbọrụ ḅụ angarị, tẹ ọ̀ ḅẹlẹma pịkị wamịna ḅụụ ḅio bebe ye sọ tẹ.

¹³ Tamụnọ ọ̀ Tẹmẹ kẹ wa pịrị tẹ ye gotẹ wa ḅiokpọ tẹ, mịnẹ wa Tamụnọ na gbọrụ ḅụ angarị, anịsakị ori pịkị wamịnị na gbọrụ ḅụ angarị.

¹⁴ Tẹ wa ḅarana tọrụngbọ kẹ ẹrị tẹ ḍuko ja apụ pịrịarị, mịnẹ Ḍaḅọ ḅe ọ̀ Tụḅọ ḅe kẹ fịrịma tẹ ó ḅo tomikiri ḅẹ atomi Ḅọrọmaḅọ sọm.

¹⁵ Ḅẹḅọ-ḅẹḅọ tẹ minini tẹ ḍuko pakamarị mịnẹ Jizọsị anie Tamụnọ Tụḅọ ḅẹḅẹ, mḅọ Tamụnọ na gbọrụ ḅụ angarị, tẹ Tamụnọ pịkị mḅọ na gbọrụ ḅụ angarị.

¹⁶ Tẹ wamịnị ḅarana Tamụnọ nyana wa pịrị ḅẹlẹma mẹ nimi tẹ anị mininiarị. Tamụnọ anie ḅẹlẹma, tẹ ḅẹḅọ-ḅẹḅọ tẹ kịnị ḅẹlẹmarịḅọ, mḅọ Tamụnọ na gbọrụ ḅụ angarị, Tamụnọ pịkị mḅọ na gbọrụ ḅụ angarị.

¹⁷ Ḅẹlẹma ḅo wamịna ḅụụ ḅio bebe ye sọ tẹ ḅẹḅẹ, wa ḅiokpọ nyana tẹ Ḅẹrẹkọn Ene mẹ koruarị; mị tomikiri mẹ ḅụ wamịna ḍumo Kịrayịsị ḍumo mẹ na gbọrụ ḅara sime tẹ ẹrẹsị, wa ọkọ sime ḅiokpọ mẹ nyana ḅa.

¹⁸ Kịnị ḅẹlẹmarịḅọ gotẹ ḅalafa, fa ye ofori; bebe ye sọ tẹ ḅẹlẹma ḅalafa dee sin-arị. Anie ḅụ, ḅẹḅọ-ḅẹḅọ tẹ amịna ḅẹlẹma amụ bebe ye sọ-a ḅọ mẹ, ḅalafa sime mḅọ pịrịm, anie mḅọ ḅo mḅọ la ḅarị fomu-ḅara ḍiki-ḅalafarị ẹrẹsị.

¹⁹ Tamụnọ tarị wa ḅẹlẹma ye ḅụ mie wa ḅọrọ tẹ kịnị ḅẹlẹmarị.

²⁰ Gbọrụḅọ ḅẹẹarị mịnẹ mḅọ Tamụnọ ḅẹlẹmarị, kụma mḅọ amịna mịnaḅọ ḍiki-ḅioḅuarị ḅẹḅẹ, mḅọ iruoḅọ. Kẹ gotẹ ọkọ ḍukoarị, mḅọ inetẹ mḅọ tọrụngbọ kẹ ẹrị-a Tamụnọ ḅe ḅẹlẹma tẹ, mḅọ mịnaḅọ tẹ mḅọ tọrụngbọ kẹ ẹrịarị ḅọ mẹ ḅẹlẹma ḅịa ḅara ofori.

²¹ Tamụnọ ḅẹlẹmarịḅọ, ḅẹlẹmarịḅọ pịkị mḅọ mịnaḅọ sọ ḅẹlẹmaa: miemẹ anie Kịrayịsị sụa wa pịrị oloko mẹ.