1 Amadapụ 9 - FỊAFỊA BAỊBỤLỤ

Tamụnọ pịkị siin Ọ̀ ḅụụ Kẹ Sọlọmọnị Ḍiem

¹ Amadaḅọ Sọlọmọnị KỊNỊNYANAḄỌ ḅe Tẹkẹ-warị mẹ na, amadaḅọ opu warị mẹ na pịkị ọ̀ nama ḅẹ ḅii jaị sọ nama fama tẹso,

² KỊNỊNYANAḄỌ ḅe nwẹnị Gibiyọnị ḅụ ọ̀ wẹrịtẹ ḅụụ kẹ ò ḍie ḅara kẹ ḅụụ pakama ò ḍie.

³ KỊNỊNYANAḄỌ ḅe nwẹnị ọ̀ ḅẹẹ, “Àrị ị́ tẹkẹ mẹ na ị́ ḅiiarị aị mamgba na naa tẹẹ. À mị Tẹkẹ-warị mẹ tẹ ị́ namam mịnẹ tomi sunsin ị́ pịrị ḅarị anga mẹ mịẹ fịafịama gbamaso ḅa. À tọrụ kẹ anị ḅụ wẹrị ḅa pịkị anị ḍikiḍiki ḅa sakị mamgba ḅụ.

⁴ Ọ́ nwẹnị ọḅụ furu-a ḍumo na karakara ḍumo na kẹ fịrịmẹnjị ị̀ pịrị ḅarị ḅẹḅẹ, ọmịna ḍaḅọ Devidi wẹrịtẹ mịẹ ḅara, tẹ ì oloko ma na à tọn tẹ kẹ ọ́ pịrị aị ma na kokom ḅẹḅẹ,

⁵ àrị à minini aị ma koko ḅa à kẹ ọmịna Ḍaḅọ Devidi karịma tẹ ọ̀ ḅẹẹ sakị mịnẹ ọ̀ ḅụụ ḅụ paka-ḅo apụ mie sakị mamgba Izirẹlị ḅụ ḅẹrẹtọn ḅarịye.

⁶ Kụma ọmịnị, anịanịa ọmịna ḅụụ ḅụ paka-ḅo apụ nwẹnị ì ḍukamẹnjị dasịẹma, tẹ ḅarị ị̀ ḅịḅị poki tẹ ị̀ oloko ma na à tọn ọ́ pịrị aị ma na koko-a, tẹ sunsin oru-atamụnọ pịrị-pịrị,

⁷ anịrẹ àrị ị̀ atomi Izirẹlịapụ ma ḅelema ḅa à kẹ ịn pịrị tẹ ama mẹ ḅụ. À pịkị mị Tẹkẹ-warị mẹ tẹ à tomi sunsin ị̀ pịrị ḅẹ anga wẹrị ḅara kẹ wẹrị fịafịama tẹ anga mẹ sọ kẹ gbin-koroma tẹ so ḅa. Anga-anga ḅụ simearị atomi mamgba Izirẹlị kẹ kpọọti ḅa tẹ ye-sịn-a ḅara kẹ arị na mịẹ ḅa.

⁸ Mị Tamụnọ-warị mẹ ḅo ịn tan kobiri gulugulutẹ aị sọ ḅa, tẹ mẹnjị-ḅọrọḅọ-ḅọrọḅọ ḅụụ-gbiripu tẹ ḅụụ-bua ḅa, tẹ ịn gbela ḅa, ‘KỊNỊNYANAḄỌ ḅe tiegotẹ miemẹ kẹ mị ama mẹ na, mị Tamụnọ-warị mẹ na mịẹ?’

⁹ Tomi nwẹnị pakịrị ḅa, ‘Ịn KỊNỊNYANAḄỌ Ịna Tamụnọ ḅe tẹ Ijiputi ḅụ ịna atẹngịapụ ma pakama-ḅo ḅọ ḅe kẹ gbin-koromam. In nwẹnị ịna sịḅị-tuu kẹ oru-atamụnọ pịrị tẹ fịrịmẹnjị arị pịrị. Aniemẹ mie KỊNỊNYANAḄỌ ḅe gotẹ mị ḅụụ-fụka mẹ ọkị-ḅo ịna ọgọnọ gbana yee.’ ”

Sọlọmọnị Na Hiramụ Na Nyana Ḅịḅị-kẹ-ogbosọ

¹⁰ Tẹkẹ-warị mẹ na, amadaḅọ opu warị mẹ na nama mẹ si akụra kẹ Sọlọmọnị ọkịm.

¹¹ Hiramụ, Taya ḅẹ amadaḅọ ḅe mie ọ̀ kẹ mị kọrịnama mẹ kọrị sida na payịnị asịn na golu mamgba na, ò ḅii ḅara ḅii ḅara kẹ ọ̀ pịrị yee. Kọrịnama mẹ fa tẹso, Amadaḅọ Sọlọmọnị nwẹnị Galili itu ḅụ si ama kẹ Hiramụ pịrị.

¹² Hiramụ nwẹnị ama ma ẹrị ḅẹ mu, kụma arị ọ̀ ḅụụ-ḅẹlẹ-a.

¹³ Anieḅụ ọ̀ nwẹnị Sọlọmọnị ḅẹẹ, “Mịna ama ma mie ị́ kẹ ị̀ pịrị tẹ ama ma mọ, ì iyimbere!” Miemẹ sịḅị ẹrẹsị mịọkụ sọ ịn paa anị itu mẹ sịn-arị Kabulu — anị fiearị ye, Papaaye.

¹⁴ Hiramụ golu kpo kpo puku amesi, sọnọa puku finji (360,000) kẹ Sọlọmọnị fịrịmam.

Sọlọmọnị Kọrị Ja Iḅi Akọrịnama

¹⁵ Amadaḅọ Sọlọmọnị kụrọ kọrịnama kọrị ḅara kẹ Tamụnọ-warị mẹ na, amada-opu-warị mẹ na, Jeruselemu na, Hazọ na, Mẹgido na, Geza ḅẹ onu ma na namam tẹ pịkị Jeruselemu opu ama mẹ ḅụ ịrụa-saakịarị-anga ḅẹ kiri mẹ pịrị pakamam.

¹⁶ (Fero, Ijiputi ḅẹ amadaḅọ ḅọrọtẹ sakị ḅụ owu kẹ Geza opu ama mẹ paka tẹ Kenanị ḅẹ apụ tẹ anị anga anga sime apụ ma ḅaa fama tẹ fịnị kẹ opu ama mẹ dọkịma tẹ anị ọkịm. Anịtẹso ori ẹrẹḅọtụḅọ Sọlọmọnị na sime ye ḅụ, ọ̀ nwẹnị anị kẹ owiḅọ sime ḍiepịrịye mẹ kẹ Sọlọmọnị ta ma pịrị, tẹ

¹⁷ Sọlọmọnị nwẹnị siin Geza onu mẹ nama). Paa kụrọ kọrịnama mẹ ḅụ, Sọlọmọnị siin Bẹtị-horoni na,

¹⁸ Belatị na, Tama na namam Juda ịkpa mẹ ḅẹ ideri yọ ḅụ;

¹⁹ arị opu ama ma tẹ ori ịn fọịn ḅo ọ̀ pịrị aị ma kokoarị opu ama ma, ori asụ ma na, ò kirimẹnjị-ọmụarụ ma na, ḅẹẹye-ḅẹẹye kẹ ò Jeruselemu na Lẹbanọnị na ọ̀ kụrọ mu la ye-yọ mamgba ḅụ ọ̀ nama ḅẹ ḅii aị mamgba nama ḅẹ aị ma.

²⁰ Amọrayịtị na, Itayịti na, Pẹrịzayịtị na, Hivayịtị na, tomi kpo-kpo ma tẹ Kenanị ḅụ sime apụ ma na, Jebusayịtị apụ ma ḅụụ kirikọn-apụ ma tẹ Izirẹlịapụ ma na gboloma-a apụ ma

²¹ ḅụ paka-ḅo apụ ma tẹ Izirẹlịapụ ma inetẹ gbọrsịḅị kpọrọrọ-sin-a apụ ma ịn Kenanị ama mẹ ọkị nyana sakị ḅụ mie Sọlọmọnị kuun-ọkị tẹ kẹ omoniapụ kụrọ kọrịnama mẹ kọrị yee, anị wẹrịtẹ mịmgba ḅụ sọ sime ḅara.

²² Sọlọmọnị Izirẹlị ḅẹ gbọrụḅọ-sọ kẹ omoni sọma-a inima anie ori ọmụgbin apụ, kọrịnama kiri ḅẹ opu apụ, ḅẹrẹtọn ja apụ pịrị apụ, kirimẹnjị-ọmụarụ ma kẹ sịḅịdapụ na, asụ-dọkụ-ọmụapụ na.

²³ Sọlọmọnị warị akọrịnama ma tẹ ọ̀ kọrị aị ma ḅụ kịnị ẹndẹ sọnọma si finji na oyia apụ (550) kịrị-kịrị warị akọrịnama ma ḍikiḍiki tẹ ḅẹrẹtọnm.

²⁴ Fero, Ijiputi ḅẹ amadaḅọ ḅe ẹrẹḅọtụḅọ, Sọlọmọnị ta ma Devidi Opu ama anie Jeruselemu ḅụ saḅa so Sọlọmọnị nama á pịrị amadapụ warị mẹ mu tẹrẹmẹ, mie ori opu ama mẹ ḅụ ịrụa-saakịarị-anga mẹ ḅụ kiri mẹ pịrị pakama ye.

²⁵ Kụra tẹra sakị Sọlọmọnị nwẹn kẹ kụra-kụra ḅụ ọ̀ nama KỊNỊNYANAḄỌ pịrị agbamịẹ-anga mẹ ọgọnọ dọkịma-agba na gbọrụḅụụ-sime-agba na mịẹ-mịẹ KỊNỊNYANAḄỌ ḅe pịrịm. Ọ̀ kụnụaị sọ kẹ sụa agba mẹ dọkịmam tẹ arịḅẹ onwi ma turee-tureema so pakam. Mị-ḅara mẹ mie ọ̀ kẹ Tamụnọ-warị mẹ nama fama ḅara.

Sọlọmọnị anie Tuḅokọnḅọ

²⁶ Eziyọnị-geba ḅụ Amadaḅọ Sọlọmọnị tọnwa vala kẹ dọkụ opu onwi-arụ sọ tẹmẹm, Elatị na kpeki anga Akaba opu ọpọ mẹ akaka, Idọmụ ama mẹ ḅio ḅụ

²⁷ Amadaḅọ Hiramụ nwẹnị ori opu onwi-arụ ma ḅio tọrụ ma nimi lamatẹ tọrụ-dọkụapụ kẹ Sọlọmọnị atomi ma ḅụ sụa ọfịrịmam arị opu onwi arụ ma ḅio.

²⁸ Ịn nwẹnị dọkụ ma-mu Ọfaya ama mẹ la, tẹ nwẹnị golu, fụn akpa tẹra ẹndẹ oyia asi finji iku nẹngị ye kẹ ḅo ọ̀ pịrịm.