1 Amadapụ 6 - FỊAFỊA BAỊBỤLỤ

Sọlọmọnị KỊNỊNYANAḄỌ ḅe Tẹkẹ-warị Mẹ Namam

¹ Izirẹlịapụ Ijiputi koroma-so tẹ kụra gbọrụ ẹndẹ inia si finji (480) ḅọrọ sakị, anie Sọlọmọnị Izirẹlị ḅụ ama-da tẹ inia kụra karama kụra ḅụ maaịn karama akalụ tẹ ịn kẹ Zivụ sịn-arị akalụ mẹ ḅụ mie Sọlọmọnị KỊNỊNYANAḄỌ ḅe Tẹkẹ-warị mẹ ḅụ ḅẹ kọrịnama saakị ye.

² Anị ḅio mẹ ḅụ anịḅẹ nangwọ anie inia si oyia aḅụọ-kuḅu finji (27 m); anịḅẹ finjima anie ḅụọ-kuḅu asuei (9 m); anịḅẹ gele anie mesi sọnọa ḅụọ-kuḅu finji (13.5 m).

³ Mẹnjị-toluḅọrọ-anga tẹ Tẹkẹ-warị mẹ sọ-muarị anga mẹ ḅẹ pokolo anie jeia ḅụọ-kuḅu (13.5 m); Tẹkẹ-warị mẹ ḅẹ finjima laa ḅara mie anịsọ finjima laa ḅara, anie ḅụọ-kuḅu asuei (9 m).

⁴ Tẹkẹ-warị mẹ ḅẹ warị-anga ma ḅụ ikiḅa-aḅọkọ emi, tẹ etela da aị ma ịrụ kẹ ḅioju da aị ma nẹngịm.

⁵ Tẹkẹ-warị mẹ ḅẹ etela da warị-anga ma ḅụ, maa akaka ma na pịkị ọḅụjụ mẹ na ḅụ, tẹra dẹkị ḅekin-warị ịn nwẹn nama tẹ kẹ Tẹkẹ-warị mẹ ḅụ sụa wararị, tẹra dẹkị ma ḅụ gberie-gberie sọnọma ḅụọ-kuḅu na ḅara-tụngbalị (2.2 m) na kẹ gele wararị.

⁶ Tarị dẹkị mẹ ḅụ gbọrụ ḅio gbọrụ ḅio ḅẹ finjima anie sọnọma ḅụọ-kuḅu na pakịrị na (2.2 m); ogboku ḅẹ dẹkị mẹ ḅụ gbọrụ ḅio gbọrụ ḅio ḅẹ finjima anie esenia ḅụọ-kuḅu (2.7 m); anịsakị tẹrẹị karama dẹkị mẹ ḅio ma ḅẹ finjima anie oyia aḅụọ-kuḅu na pakịrị na (3.1 m). Tẹkẹ-warị mẹ ḅẹ warị-angama akpakpa sọ laa ḅara mẹ anị gele ma-muarị ḅara mie dẹkị-dẹkị ma ḅụụ akpakpa mẹ ḅụ ye sọ tẹ arị ịrụma iwoarị ḅara mịẹtẹ bio-bioma ja oluku sụa-a ḅara ḅụ arị arị ọgọnọ gbana ḅarị ḅara.

⁷ Ịn kẹ Tẹkẹ-warị mẹ nama ḍụḅarị ma ini arị soku-sokutẹ pẹlẹ pakama-ḅoarị anga mẹ ḅụ mie ịn gbọrsịḅị arị tẹlẹma fama yee, anịẹrẹsị amana, anịanịa kumbu, anịanịa ikulele kẹ mịẹ ja kọrịnama-kọrịaị kẹ ye-yọ fiema sọ ofori, Tẹkẹ-warị mẹ namarị sakị ḅụ.

⁸ Tẹkẹ-warị mẹ ḅẹ ọḅụjụ pakịrị ḅụ mie ḅọrọ ịn kẹ sụa nama wararị warị mẹ ḅẹ tarị dẹkị mẹ ḅẹ ḅọkọ simearị ye, kẹ kpọlị mu maaịn karama dẹkị na tẹrẹị karama dẹkị na laa ḅarị tanjịye anịjụ emi.

⁹ Mie Amadaḅọ Sọlọmọnị kẹ Tẹkẹ-warị mẹ nama fama ḅara. Ọ̀ nwẹnị sida ḍụḅọ ḅẹ oluku na finjimatẹ ḍụḅọ na kẹ warị mẹ ḅio isun mẹ ḅakụ gbaịn.

¹⁰ Sida ḍụḅọ mie ịn kẹ oluku mịẹ tẹ kẹ tẹra dẹkị warị mẹ tẹ gbọrụ dẹkị dẹkị sọnọma ḅụọ-kuḅu na pakịrị na (2.2 m) kẹ gele wararị dẹkị ma ọkị-ḅo gboloma yee; in arị nama Tẹkẹ-warị mẹ ḅụ etela daa pakịrị ḅẹ warị-anga mẹ ḅụ sụam.

¹¹ KỊNỊNYANAḄỌ ḅe nwẹnị Sọlọmọnị ḅẹẹ,

¹² “Ị́ nwẹnị ì oloko ma koko tẹ à tọn aị ma ḅụ ị̀ ḅịḅị pokim ḅẹḅẹ, arị à kẹẹ ị́ ḍa Devidi karịma ye mẹ mịẹ ị́ pịrị ḅa.

¹³ Àrị ị̀ atomi Izirẹlịapụ ma ogboku anga ḅa mie ị́ namarị Tẹkẹ-warị mẹ ḅio, tẹ ḅarị jen-maaịn kẹ in koroma-so ḅịa.”

¹⁴ Mie Sọlọmọnị kẹ Tẹkẹ-warị mẹ nama fama ḅara.

Tẹkẹ-warị mẹ Ḅio ḅẹ Ḅirima-aị

¹⁵ Warị mẹ ḅio ḅẹ warị-anga ma ịn sida kẹ mịẹ wararị ḅio-dẹẹ-aḍụḅọ mie ịn kẹ arị na, isun mẹ kikimaye mẹ na oḅolo gbaịn fama yee, tẹ nwẹnị pịkị payịnị kẹ mịẹ wararị ḅio-dẹẹ-aḍụḅọ kẹ kiri mẹ dẹẹ fama.

¹⁶ Tẹkẹ-warị mẹ ḅẹ ịlụkụlụkụ ḅụ gbọrụ kala-ḅio nama wararị ịn kẹ Fịafịa-tẹịn Yọ sịn anga mẹ. Anịḅẹ nangwọ anie ḅụọ-kuḅu asuei (9 m), tẹ ịn nwẹnị finjimatẹ sida ḍụḅọ pakịrị-pakịrị kẹ isun kikima ye mẹ ḅụ ọkị-ḅo kiri la ḅụ kiki-pẹlẹ anị pịrị sikima wararị warị-iyingi mẹ ḅụ.

¹⁷ Fịafịa-tẹịn Yọ mẹ tọrọkọ ḅụ simearị ḅio mẹ ḅẹ nangwọ anie ḅụọ-kuḅu atesi (18 m).

¹⁸ Ịn kẹ ḅirima ḅara kẹ warị-anga ma oḅolo wararị sida ḅio-dẹẹ-aḍụḅọ ma ọgọnọ in aḅọrọ na fịlawa na sime-ḅara sime aị sọkị sụa fama wararị. Anịḅẹ bebe ḅioju mẹmgba ịn sida kẹ warị-anga ma gbaịn fama wararị kịnị inetẹ warị-anga mẹ ḅẹ ḍụḅarị ma ẹrị ḅịa ḅara.

¹⁹ Tẹkẹ-warị mẹ ḅẹ ịlụkụlụkụ mẹ ḅụ gbọrụ kala-ḅio nama wararị ịn KỊNỊNYANAḄỌ ḅe Ọḅọkụ-Igbe mẹ kẹ koroma ḅarị anga.

²⁰ Mị kala-ḅio mẹ ḅẹ nangwọ anie ḅụọ-kuḅu asuei (9 m); anịḅẹ finjima ḅụọ-kuḅu asuei (9 m); anịḅẹ gele pịkị ḅụọ-kuḅu asuei (9 m); ịn karakara golu sọ sara arịmgba gbaịn wararị. Ịn nwẹnị sida ḅio-dẹẹ-aḍụḅọ kẹ agbamịẹ-anga mẹmgba oḅolo gbaịn wararị.

²¹ Tẹkẹ-warị mẹ ḅioju mẹmgba golu mie ịn kẹ anịmgba sọ sara gbaịn yee, tẹ nwẹnị pịkị golu-golu tọnwa ikoli kẹ mẹnjị kala-ḅio mẹ soarị anga mẹ ḅụ sụa saḅama, anị anga mẹ sọ in golu kẹ anị sara gbaịn wararị.

²² Tẹkẹ-warị mẹ ḅẹ ḅioju mẹ na pịkị Fịafịa-tẹịn Yọ mẹ ḅụụ simearị agbamịẹ-anga mẹ sọ golu mie ịn kẹ arị sọ sara gbaịn wararị.

²³ In olivu sịn kẹ pamba-sụatẹ maa Sẹrubimu ḅẹ apụ kara tẹ kẹ Fịafịa-tẹịn Yọ mẹ ḅụụ koromam; gberie-gberie ḅẹ gele anie jeia ḅụọ-kuḅu (4.4 m).

²⁴ Sẹrubimu ḅẹ apụ ma gbọrụḅọ-gbọrụḅọ pamba ḅịḅị ḅụ ọkị mu osi pamba ḅịḅị la anie jeia ḅụọ-kuḅu (4.4 m); gbọrụ pamba pamba ḅẹ nangwọ anie sọnọma ḅụọ-kuḅu na pakịrị na (2.2 m).

²⁵ Maaịn ma jen-jen nẹngị-a tẹ gbọrụ ḅara mie arị pịkị sime-ḅara.

²⁶ Arịḅẹ gberie-gberie ḅẹ gele anie jeia ḅụọ-kuḅu (4.4 m).

²⁷ Jen jen angagbasa ḅụ sịẹ ḅara mie ịn kẹ ịna sịẹma ḅara Fịafịa-tẹịn Yọ mẹ ḅụ. Anịẹrẹsị ịna finjima wararị maa apamba ma ḅịḅị nwẹnị ḅio mẹ ogboku ḅụ jen-jen na bịama, tẹ osi maa pamba ma nwẹnị mu warị-anga ma la.

²⁸ Maa Sẹrubimu mamgba ịn golu sọ sara ịna gbaịn famam.

²⁹ Kala-ḅio mẹ na pịkị anị palị ḅiokiri mẹ ḅẹ warị-anga mamgba ịn kẹ arị ḅirima-aị anie kara tẹ pamba-sụatẹ Sẹrubimu na, eneme-akọrọ na, pịkị fịlawa na.

³⁰ Warị-kiri mẹ ḅioju sọ ịn golu sọ sara arị gbaịn famam.

³¹ Ini olivu ḍụḅọ kẹ mịẹ wararị ḅọkọ maa apakịrị mie ịn kẹ Fịafịa-tẹịn Yọ mẹ ḅẹ ḅọkọ mẹ sụa ye; ḅọkọ mẹ ọgọnọ mẹ gbala arụḅa sime-ḅara mie ịn kẹ anị mịẹ ḅara.

³² In ḅọkọ tọrụ ma ḅirimam pamba-sụatẹ Sẹrubimu ma na, eneme-akọrọ na pịkị fịlawa na sọkị sụa ḅụ. Ḅọkọ tọrụ ma na, pamba sụa tẹ Sẹrubimu ma na, eneme-akaọrọ na, pịkị fịlawa mamgba na sọ ịn golu sọ sara arị gbaịn famam.

³³ Ḅo ḅiokiri mẹ sọarị ḅọkọ mẹ ḅẹ warị-ḅọkọ amasịn ma, maa apakịrị ma gele gbasịm; anie arịḅẹ ọgọnọ na suku na ḅẹ finjima sọ gbasị ḅara, olivu ḍụḅọ mie ịn kẹ anị mịẹ yee.

³⁴ Payịnị ḍụḅọ kẹ mịẹ wararị iko-aḅọkọ maa apakịrị tẹ finji anga-anga ḅụ ikoarị ye mie ịn kẹ sụa yee,

³⁵ tẹ nwẹnị pịkị pamba sụa tẹ Sẹrubimu na, eneme-akọrọ na, fịlawa na sọkị sụa arị ḅirima tẹ pịkị jen-jen nẹngị-a ḅara kẹ golu sọ arịmgba sara gbaịn fama.

³⁶ Tẹkẹ-warị mẹ tọrọkọ ḅụ ịn nwẹnị pịkị gbọrụ kala ogigo nama tẹ nwẹnị ḍụḅarị onu kẹ anị gbori ikelema, tẹra ḍụḅarị goyegoye ḅụ ịn gbọrụ sida ḍụḅọ kẹ oluku mịẹ koromam.

³⁷ Tẹkẹ-warị mẹ ḅẹ sukutarị-ḍụḅarị mẹ koroma saakị anie Sọlọmọnị ama-da tẹ inia kụra karama kụra mẹ ḅẹ maa akalụ karama akalụ ịn kẹ Zivụ sịn akalụ mẹ ḅụ.

³⁸ Sọlọmọnị ama-da tẹ oyi gbọrụ kụra finji karama kụra mẹ ḅẹ ninea akalụ ịn kẹ Bulu sịn akalụ mẹ ḅụ mie Tẹkẹ-warị mẹ busunuma kara tẹ kọrịnama fa yee, kẹ anị nama ḅẹ tẹ ḅiotọn ḅara ḅụ. Anị nama karama mẹ, sọnọma kụra kẹ Sọlọmọnị ọkịm.