1 Amadapụ 5 - FỊAFỊA BAỊBỤLỤ

Sọlọmọnị Tamụnọ Tẹkẹ-warị mẹ nama ḅẹ tẹ ọ̀ ḅụụ tẹlẹmam

¹ Taya ḅẹ Amadaḅọ Hiramụ anie sakị mẹmgba Devidi ikiaḅọ, ọ̀ naam mịnẹ Sọlọmọnị amada-kụlọ ḅụ Devidi kiri ọkị tẹ ẹrẹsị, ọ̀ nwẹnị ọ̀ sịẹ mẹ tọrụ-ḍima ḅara ḅụ kịnị kẹ ọ̀ fịrịma.

² Sọlọmọnị nwẹnị mị oku mẹ fịrịma pịkị Hiramụ piri,

³ “Ị́ nimi wararị mịnẹ gbala ị̀ ḍa Devidi sakị mẹmgba ori na fịya-a opu asịẹ ma tẹ ori ikelema-koro wararị apụ ma na ọmụgbin-arị tẹ inetẹ gbọrụ tẹkẹ-warị nama tẹ kẹ sunsin KỊNỊNYANAḄỌ ọ̀ Tamụnọ ḅe pịrị-a nwenii KỊNỊNYANAḄỌ ḅe owu-ḅara-iḅi kẹ ọ̀ pịrị tẹ ori na fịya-a apụ mamgba ikelema-koro ḅụ.

⁴ Kụma mịọkụ KỊNỊNYANAḄỌ ị̀ Tamụnọ ḅe dein kẹ ị̀ pịrị tẹ ị̀ ikelema-koro wararị akaka mamgba ḅụ. Ị̀nịna fịya-a apụ ḅarị ofori, anịsakị owu paka tẹ ye-kẹ-kịnị-lama sọ ḅarị ofori.

⁵ KỊNỊNYANAḄỌ ḅe kẹ ị̀ ḍa Devidi karịmam, ‘Í owiḅọtụḅọ tẹ ị́ ḅọrọ tẹso, kụma à kẹ ama-dama ḅarị ḅọ gbọrụ tẹkẹ-warị nama ị̀ pịrị ḅa.’ Tẹ mịọkụ à tọn-pẹlẹ tẹ mịnẹ àrị anị tẹkẹ-warị mẹ nama tẹ kẹ sunsin KỊNỊNYANAḄỌ ị̀ Tamụnọ ḅe pịrị mẹ pịrị ḅa.

⁶ Anịẹrẹsị ị́ atomi fịrịma Lẹbanọnị mu tẹ sida pẹlẹ koroma ị̀ pịrịị. Ị̀ atomi inina kọrị ḅa, tẹ à nwẹnị í ḍuko pẹlẹ ye pẹlẹ ye kẹ ị́ atomi ma gbẹẹ ḅa. Í nimi ḅara ḅụ ị̀ atomi ma ini í atomi opu sịn pẹlẹ ḍịn ḅara ḍịn-a.”

⁷ Hiramụ Sọlọmọnị oku-ḅịḅị mẹ daa-ọkị sakị anị nwẹnị ọ̀ ḅụụ-ḅẹlẹ saḅa-ḅọrọ tẹ ọ̀ nwẹnị ḅẹẹ, “Mịmgba ḅụ KỊNỊNYANAḄỌ ḅe tokinii ọ̀ nwẹn sime ye-nimi owiḅọtụḅọ kẹ Devidi pịrị tẹ amada-kụlọ ḅụ ori ò kiri ọkị tẹ anị gburo-gburotẹ sịẹ mẹ daarị ye mẹ!”

⁸ Anịtẹso Hiramụ nwẹnị mị oku-ḅịḅị mẹ kẹ pịkị Sọlọmọnị fịrịma: “Arị í oku-ḅịḅị mẹ daa-ọkị tẹẹ, anịsakị à tẹlẹma tẹ í ḅii ye mẹ mịẹ ḅa. À sida na pịkị payịnị opu asịn ma na kẹ ị́ fịrịma ḅa.

⁹ Ị̀ atomi Lẹbanọnị ḅụ opu asịn ḅirima ọkị-ḅo tọrụ mẹ lamatẹ arị foin tẹ tẹịn ḅarị ḅara kẹ arị fịna gboloma ḅa, tẹ nwẹnị arị tẹịnma mu ị́ sẹlẹ-ọkị tọrụ-akaka ḅụ koroma ḅa. Anị yọ ḅụ ị̀ atomi ma arị fima ḅa, tẹ ị́ atomi ma nwẹnị arị ḍikiḍiki ḅa. Ị́ pakịrị ḅụ, à ḅii ḅa í fịye ọkị-ḅo ị̀ atomi ma pịrị.”

¹⁰ Anịẹrẹsị Hiramụ nwẹnị Sọlọmọnị ḅii ḅara kẹ sida na payịnị na sịn opu aḅiri ma kẹ Sọlọmọnị pịrị,

¹¹ tẹ Sọlọmọnị nwẹnị kụra-kụra ḅụ witi, in kẹ fịturu mịẹarị fịlawa opu akpa mẹ ḅẹ maa puku, inia ẹndẹ finji (17,600) na, karakara olivu pulo mẹ ḅẹ koku ololo mẹ ḅẹ puku sọnọa si, tesi oyi finji na sọnọ apuku (1,400,000) na kẹ Hiramụ pịrị, ọ̀ kẹ ori atomi ma kokoo.

¹² KỊNỊNYANAḄỌ ḅe nwẹnị ọ̀ kẹ Sọlọmọnị karịma nimi mẹ kẹ ọ̀ pịrị. Dein nwẹnị Hiramụ na Sọlọmọnị na ogboku sime, tẹ ịn nwẹnị jụmọ-jụmọ na ḅịḅị-kẹ-ogbosọ ḅara kẹ ḅịḅị-ọkịya tẹ ḍiri kẹẹ tẹ ḅara-pono.

¹³ Amadaḅọ Sọlọmọnị nwẹnị Izirẹlị mẹmgba ḅụ kụrọ-kọrịnama gotẹ kịnị tẹra puku na jei ẹndẹ (30,000) ọkị

¹⁴ tẹ nwẹnị Aduniramu kẹ ịna sịḅịdaḅọ mịẹ. Ọ̀ nwẹnị ịn kẹ tẹra kpo ḍie, gbọrụ kpo kịnị gbọrụ puku, sọnọ ẹndẹ finji, finji. Gbọrụ kpo kpo nwẹnị Lẹbanọnị ḅụ gbọrụ akalụ sime tẹ maa akalụ kẹ ama ọgọnọ ḅụ sime

¹⁵ Sọlọmọnị pịkị tụndụ ọgọnọ ḅẹ opu sịẹ mẹ ḅụ kịnị oyia puku (80,000) nyanatẹ ḍụḅarị soku-sokutẹ pẹlẹm anịsakị kịnị ninea puku, jei ẹndẹ finji (70,000) nwẹnị anị dogiarị,

¹⁶ tẹ kịnị ninea ẹndẹ, sọnọa si finji (3,300) kẹ ịna sịḅịdapụ mịẹ, tẹ ini inina kọrịnama mẹ kẹ ọrụtọn-arị

¹⁷ Amadaḅọ Sọlọmọnị tọn ḅara ḅụ ini iḅi-fịtẹ opu aḍụḅarị sokutẹ pẹlẹ tẹ puu ḅom kẹ KỊNỊNYANAḄỌ ḅe Tẹkẹ-warị mẹ ḅẹ sukutarị-ḍụḅarị koroma ḅarị ḅara.

¹⁸ Sọlọmọnị na, Hiramụ na kọrịnama kọrị apụ ma na pịkị Bayịbịlọsị opu ama mẹ ḅụ ḅo atomi ma ḍụḅarị ma na opu asịn ḅirima na tẹlẹma tẹ kẹ KỊNỊNYANAḄỌ ḅe Tẹkẹ-warị mẹ nama mẹ pịrịm.