1 Amadapụ 4 - FỊAFỊA BAỊBỤLỤ

Sọlọmọnị Fịrịmẹnjị-Opuapụ

¹ Sọlọmọnị anie Izirẹlị mẹmgba ḅẹ amadaḅọ,

² anịsakị mịna apụ ma anie ori afịrịmẹnjị-opuapụ: Agbamịẹḅọ ḅe anie: Azaraya, Zadọkụ owiḅọtụḅọ.

³ Ḅẹrẹkọn-warị mẹ ḅẹ ḍiri-kẹẹapụ anie: Ẹliorẹfụ na Ayija na, Sisa owiapụ-awọmẹ. Ịn kẹ ye kẹẹ sụa wararị aḍiri ma ḍikiḍiki kẹ sịḅịdaḅọ anie: Jehosafatị, Ayiludu owiḅọtụḅọ ḅe pịrịarị.

⁴ Ọmụ-ogbo mẹ ḅẹ ḅẹrẹtọnḅọ anie: Bẹnaya Johihada owiḅọtụḅọ ḅe. Agbamịẹapụ anie: Zadọkụ na Abịyata na.

⁵ Ḅẹrẹtọn kẹ tomi kpọma pịrịarị apụ ma sịḅịdaḅọ anie: Azaraya, Netanị owiḅọtụḅọ. Nimi ẹkwẹn kọn amadaḅọ ḅe pịrịarị-ḅọ anie: Zabudu, Netanị owiḅọtụḅọ.

⁶ Amadaḅọ ḅe warị ḅẹ fịrịmẹnjịapụ ma kẹ sịḅịdaḅọ anie: Ahisa. Kụrọ-kọrịnama goyegoye kẹ sịḅịdaḅọ anie: Aduniramu, Abida owiḅọtụḅọ ḅe.

⁷ Sọlọmọnị Izirẹlị ḅụ ḅẹrẹtọn kẹ tomi kpo kpo pịrịarị apụ ḅụ oyi maa apụ finji tọnm. Ini ịna kpo kpo mẹ ḅụ fịye ọkị-ḅo amadaḅọ ḅe na ọ̀ warị-kpo mẹ na pịrị ḅa Ịna ḅụụ gbọrụḅọ-gbọrụḅọ gbọrụ akalụ onyo-sẹịnm kụra mẹ ḅụ.

⁸ Mịna apụ ma tẹ ini ẹrẹ go ḅarị apụ ma anie oyi maa opu fịrịmẹnjịapụ na ịn ḍikiḍikiarị tomina-ogbo na: Bẹnị-họ ḍikiḍikiarị kpo anie: Iferemu tụndụ ọgọnọ ḅẹ opu sịẹ mẹ.

⁹ Bẹnịdẹka ḍikiḍikiarị kpo anie: Makazị na, Salibimụ na, Bẹtị-semesi na, Ẹlọnị na pịkị Bẹtị-hananị opu ama ma.

¹⁰ Bẹnị-hẹsẹdị ḍikiḍikiarị kpo anie: Aruboti na Sọkọ opu ama ma na pịkị Ẹfa ye-yọ mẹmgba na.

¹¹ Bẹnabinadabụ, Sọlọmọnị ẹrẹḅọtụḅọ Tafatị na simearị ḅọ ḅe ḍikiḍikiarị kpo anie: bebe Dọ ye-yọ mẹmgba.

¹² Bahana, Ahiludu owiḅọtụḅọ ḅe ḍikiḍikiarị kpo anie: Tenakị na Mẹgido na opu ama ma na, Ḅẹtị-seyani ye-yọ mẹmgba na Zarẹtani ama mẹ kpeki anga mẹ, Jẹzirili ama mẹ ḅụ tuuideri anga mẹ ḅụ ọkị mu Ebẹlị Mẹhola na Jokumimu opu ama mẹ na la.

¹³ Bẹnịgeba ḍikiḍikiarị kpo anie: Ramọtị-giliyadị ḅụ simearị opu ama mẹ na, Giliyadi ḅụ simearị kala-ama ma tẹ sime Jayẹ pụmbụ pịrịị Manasẹ ḅụ paka-ḅo apụ ma na pịkị Basani ḅụ simearị Agọbụ ye-yọ mẹ, inimgba ḍụḅatẹ ama tesi. Ini onu kẹ arị gbori ikelema fama wararị, kẹ arị mịẹ kụrọma gotẹ; ịn pịkị ojo-ikulele kẹ arị ogigo-aḅọkọ ma ḅụ ẹngbẹsẹ ḅara kẹ sụa wararị.

¹⁴ Ahịnadabụ Ido owiḅọtụḅọ ḅe ḍikiḍikiarị kpo anie: Mahanahịmu ibe.

¹⁵ Ahimazi, Sọlọmọnị ẹrẹḅọtụḅọ Basẹmatị di ḅe ḍikiḍikiarị kpo anie: Nafutali ibe.

¹⁶ Bahana, Husayi owiḅọtụḅọ ḅe ḍikiḍikiarị kpo anie: Asa ye-yọ mẹ na Behalọtị ama mẹ na.

¹⁷ Jehosafatị, Paruwa owiḅọtụḅọ ḅe ḍikiḍikiarị kpo anie: Ịsaka ye-yọ mẹ.

¹⁸ Simeyi, Ẹla owiḅọtụḅọ ḅe ḍikiḍikiarị kpo anie: Benijamịnị ye-yọ mẹ.

¹⁹ Geba, Yuri owiḅọtụḅọ ḅe ḍikiḍikiarị kpo anie: Gilẹdị ye-yọ mẹ, ḅọrọtẹ sakị ḅụ Amadaḅọ Siyọnị Amọrayịtị amadaḅọ ḅe na, Amadaḅọ Ogu, Basani ḅe amadaḅọ ḅe sọ ḅẹrẹtọn tẹ anị anga. Mịna oyi maa apụ finji ma sikima, gbọrụ ḅẹrẹtọnḅọ bebe ama mamgba kẹ sịḅị-daam.

Sọlọmọnị Lolotẹ Ama-da

²⁰ Mịmọ ọgọnọ ḅụ onwimgbọlị ma sara ḅara mie Juda na Izirẹlị na ḅụ tomi ḅin ḅara: ịn fịye fịịm, ịn pịkị ḅuum, tẹ nwẹnị ḅioḅẹlẹ.

²¹ Sọlọmọnị ama-da kụrọ mẹ sịẹ mamgba anị ḅio emii Yuferetisi Tọrụ mẹ ḅụ ọkị mu Filisiteni laa, saakị mu Ijiputi ama anga mẹmgba laa. Ò ḍumo mẹmgba ḅụ ini ama-oso-igbigi kẹ ọ̀ gbẹm tẹ pịkị ò suku-ḅio simem.

²² Sọlọmọnị gbọrụ ene gbọrụ ene ḅụ ḅii fịye anie: gugutẹ fịlawa opu akpa oyia asi na, gbẹẹtẹ sịnmgbọlị ḅẹ fịlawa opu akpa mẹ ḅẹ ẹndẹ na,

²³ warị ḅio ḅụ in ḍikiḍiki-timtim-ma tẹ ḅẹlẹkị sụa oyia nambulo na, osuka fịarị nambulo si mgbọ na, pịkị anana sọnọa si na: anie ịyọrọ piri-obiri na, ịnwa na, owi piri-obiri na, pịkị ọḅọkọ na sikima.

²⁴ Sọlọmọnị Yuferetisi Tọrụ mẹ ḅụ ḅẹ ịrụa-ideriarị-anga mẹ ḅụ simearị ama ma ḅụ, Tifisa Yuferetisi mẹ akaka simearị ama mẹ ḅụ sakị ḅẹrẹtọn wenii ịrụa-ideriarị-anga mẹ ḅụ mu Gaza opu ama mẹ lam. Amadapụ mamgba tẹ Yuferetisi mẹ ḅụ ḅẹ ịrụa-ideriarị-anga mẹ ḅụ sime apụ mamgba ò suku-ḅio simem, anịsakị ori na kpekitẹ sime opu asịẹ mamgba ori na dein ḅụ simem.

²⁵ Ò ḍumo mu la sakị mẹmgba ḅụ, Juda na Izirẹlị na ikelema-koro Danị ḅụ ọkị mu Biyasẹba la, tomi mamgba gberie-sọ ḅụụ laa ḅara kẹ kpaịn simem, ọrụ furo-furo amịna kụrọ suku na amịna ịla suku na ḅụ simem.

²⁶ Sọlọmọnị ḅio si sọnọa puku (40,000) nyana tẹ kẹ ò kirimẹnjị-arụ ma ḅẹ asụ na, pịkị asụ ọgọnọ ḅẹ ọmụgbin apụ kẹ ọmụgbin ḅarị asụ gbọrụ puku oyia ẹndẹ finji (12,000) na kokom.

²⁷ Ori oyi maa ḅẹrẹtọn-apụ finji ma ḅụọ-ḅụọ in ḍie kẹ mḅọ pịrị akalụ ḅụ Amadaḅọ Sọlọmọnị ḅii ọ̀ ḅụụ na pịkị amadaḅọ ḅe warị mẹ ḅụ fịye fịarị apụ mamgba fị ḅarị fịye mẹ ọkị-ḅom; ịn ḅii ye ḅii ye mie sakị mẹmgba ịn kẹ ịn pịrịarị ye

²⁸ Ḅẹrẹtọn apụ ma ḅụ ḅụọ-ḅụọ pịkị mḅọ ḍie kiri ḅụ kirimẹnjị-arụ dọkụ asụ ma na minji-kụrọ nimi-a anama na fị ḅarị ịn pẹlẹ sara tẹ ịnyịnya ma na bali sịn afịaị ma sọ ọkị-ḅom.

²⁹ Tamụnọ gbala nimi na, yefieye naa na, gburo-gburo ḅaka tẹ kịnị inetẹ tọn ḅịa sịḅịḅio kẹ Sọlọmọnị pịrịm.

³⁰ Sọlọmọnị ye nimi kẹ ịrụa-saakịarị-anga mẹ ḅẹ ye-nimiapụ ma anịanịa Ijiputi ḅẹ ye-nimiapụ ma nẹngịm.

³¹ Tomi mamgba ḅụ ori ye-nimi tẹịnm: Ò ye-nimi kẹ Ẹtanị, Ẹzịra ḅẹ ḅọ ḅẹ na, Mahọlị owiapụ-awọmẹ Hemanị na, Kalịkọlị na, pịkị Dada na sọ nẹngịm, tẹ ori ereso nwẹnị inina kpeki opu sịẹ mamgba ikelema-korom.

³² Ori egberima-ẹkwẹn sọnọma ẹndẹ na oyia asi finji (3,000) kọnm, tẹ pịkị nume maa ẹndẹ oyia asi finji na sọnọ anume (1,005) pakamam.

³³ Ori opu asịn ma na, sịn na gboloma ẹkwẹn kọnm, Lẹbanọnị ḅẹ sida asịn ma ḅụ sọ-mu oronwi-ḍiri ma tẹ onu ma ọgọnọ ḅụ so-pakarị aị ma laa; ọ̀ nama na, feni na, furo kẹ ikiriarị anama na, pịkị inji na gboloma aị sọ ẹkwẹnm.

³⁴ Tomikiri mẹmgba ikelema-koro ḅụ amadapụ mamgba ò nimi mẹ gbolomaye naam tẹ kịnị fịrịma ò poki ḅẹ mum.