1 Amadapụ 3 - FỊAFỊA BAỊBỤLỤ

Sọlọmọnị Nimi Gotẹ Tẹkẹm

¹ Sọlọmọnị nwẹnị Ijiputi ḅẹ amadaḅọ na gbọrụ ḅụụ sime, ori ẹrẹḅọtụḅọ na sime ḅụ. Ori arị ọkị-ḅo Devidi Opu ama mẹ ḅio anga nwenii tẹ ori ori Amada-opu-warị na, Tamụnọ Tẹkẹ-warị mẹ na, pịkị Jeruselemu gbori ikelema-koro onu mẹ sọ nama famam.

² Gbọrụ tẹkẹ-warị sọ amụ nama tẹ kẹ KỊNỊNYANAḄỌ ḅe pịrị-a, ọkọẹrẹsị tomi ma paa kịrị-kịrị tọnwa agbamịẹ-anga ḅụ agba mịẹ KỊNỊNYANAḄỌ ḅe pịrịarị.

³ Sọlọmọnị KỊNỊNYANAḄỌ ḅe ḅẹlẹmam tẹ nwẹnị ọ̀ ḍa Devidi kẹ ò toluma toluma aị ma ḍukamẹnjịm, kụma ori sọ nama ḅaa tẹ arị kẹ agba mịẹ tẹẹ, kịrị-kịrị agbamịẹ-anga ḅụ.

⁴ Agbamịẹ gbọrụ sakị ḅụ ọ̀ nwẹnị so Gibiyọnị ḅụ agba mịẹ ḅẹ mu, gbala anịanga mie ereso tẹịn agbamịẹ-anga mẹ sime ye. Ḅọrọtẹ sakị ḅụ ori anị yọ ḅụ dọkịma-agba maa ẹndẹ oyia asi finji (1,000) mịẹ tẹ.

⁵ Anị ḍin mẹ ḅụ KỊNỊNYANAḄỌ ḅe nwẹnị amịna ḅụụ kẹ ò ḍie ḍawọ-jụ ḅụ tẹ nwẹnị ò gbela, “Í ḅii ḅa mịnẹ à tiye kẹ ị́ pịrịị?”

⁶ Sọlọmọnị nwẹnị pakịrị, “Ị́ sakị mamgba gburo-gburotẹ ḅẹlẹma nyanatẹ kẹ ị́ fịrịmẹnjịḅọ ị̀ ḍa Devidi pịrịm, anịsakị ori sọ pịkị ị́yẹrị na ori na gboloma ḅụ iḅi ḅara na, ḅẹlẹma na, minini na, kịnị-inoma-a, furu-a pịkị iruo-a ḅara kẹ ị́nịna simem. Ị́yẹrị sọ pịkị sịkọpẹlẹ-a ḅara kẹ sakị mamgba í gburo-gburotẹ ḅẹlẹma nyana ọ̀ pịrịm, gbọrụ owiḅọtụḅọ kẹ ọ̀ pịrị tẹ mịmgbaa ḅụ ori ò kiri ḅụ ḅẹrẹtọn-arị.

⁷ Yei KỊNỊNYANA-TAMỤNỌ í mininitẹ àrị amada-kụlọ ḅụ ị̀ ḍa ḅe kiri ọkị tẹ, anịsọ àrị asambịrịma lama wararị tẹ kẹ ḅẹrẹtọn ḅarị ḅara nimi-a.

⁸ Mie yẹrị ị́ sẹlẹ-ọkị tẹ kẹ ị́ atomi mịẹtẹ apụ ma ogboku, tọnwa tọnwa ḅẹ atomi tẹ kịnị inetẹ kịẹn ḅịa atomi ma.

⁹ Anịẹrẹsị à ḅiiarị à kẹ karakara ḅụ ḅẹrẹtọn kẹ ị́ atomi ma pịrị tẹ pịkị kẹ iḅi na si na, kịrị lekiri ḅarị nimi kẹ ị̀ pịrịị. Anieofori à tọ-ḅara kẹ inetẹ ḅẹrẹtọn kẹ mie í gburo-gburotẹ atomi ma pịrị ḅẹ?”

¹⁰ Sọlọmọnị miemẹ ḅii ye mẹ nwẹnị KỊNỊNYANAḄỌ ḅe ḅụụ-ḅẹlẹ,

¹¹ anịẹrẹsị ọ̀ nwẹnị ọ̀ ḅẹẹ, “Ị́ nangwọ ḍumo ḅii ị́ ḅụụ pịrị, anịanịa ngọ, anịanịa ị́nịna fịya-a apụ ma fịị ḅii ḅẹ nakara, ị́ kẹ karakara-ḅara-ḅụ ḅẹrẹtọn ḅarị nimi ḅii ye mẹ ẹrẹsị,

¹² Àrị ị́ ḅii ye mẹ mịẹ ḅa. À ja nimi na yefieye naa na kẹ ị́ pịrị ḅẹḅọ-ḅẹḅọ nẹngị ḅa tarị arị nyanaḅọ sime-sime, anịanịa tọrọkọ ḅụ jen ene fa-a jen ene ḅụ nyana ḅẹ ḅọ sọ.

¹³ Ị́ ḅii-a ye sọ à kẹẹ ị́ pịrị ḅa; í bebe ḍumo mẹmgba ḅụ ị́ ngọ na kụn na nyana ja ḅẹẹ amadaḅọ goḅọ-goḅọ nẹngị ḅa.

¹⁴ Anịsakị ị́ ḍa Devidi wẹrịtẹ mịẹ ḅara, ị́ nwẹnị ị̀ ḅịḅị poki tẹ ị̀ oloko ma na à toluma aị ma na koko ḅẹḅẹ, à nangwọ ḍumo kẹ ị́ pịrị ḅa.”

¹⁵ Sọlọmọnị nwẹnị naa-saakị tẹ lekiri mịnẹ Tamụnọ ḍawọ-jụ ḅụ ẹkwẹn ọ̀ pịrị tẹ. Anịtẹso ọ̀ nwẹnị so Jeruselemu muu tẹ KỊNỊNYANAḄỌ ḅe Ọḅọkụ-Igbe mẹ tọrọkọ sịẹsime tẹ dọkịma-agba na gbọrụḅụụ-sime-agba na mịẹ KỊNỊNYANAḄỌ ḅe pịrị. Anie mẹ ḅọrọ tẹso, ọ̀ nwẹnị kopini afịaị sọ kẹ ọ̀ fịrịmẹnjị-opuapụ mamgba pịrị.

Sọlọmọnị Kọn Kụrọtẹ Ḅẹrẹ

¹⁶ Gbọrụ ene ḅụ, maa ama-mẹnjị-ereme nwẹnị amịna ḅụụ kẹ Amadaḅọ Sọlọmọnị tọrọkọ ḅo.

¹⁷ Ịna ḅụụ ḅẹ gbọrụḅọ nwẹnị ḅẹẹ, “Ị́yẹrị Amada-opu-nyanaḅọ, ma ẹrẹḅọ ma na ị̀nịna gbọrụ warị mẹ ḅio mie wa angarị yee; árị ma sọ warị-ḅio simearị ogbo à nwẹnị gbọrụ owiḅọtụḅọ iyi.

¹⁸ Àrị iyi tẹso, tẹra aḍin karama eneḅaka ḅụ árị sọ nwẹnị pịkị gbọrụ owiḅọtụḅọ iyi. Wamịnị maa apụ ngẹrị mie warị mẹ ḅio angarị ye — jen gbọrụḅọ-sọ ofori.

¹⁹ Gbọrụ ḍin ḅụ gbarị-sii ḅara ḅụ á nwẹnị á tụḅọ mẹ ponoma ḅaa.

²⁰ Á nwẹnị ḍin mẹ ḅụ saakị, nwẹnị ị̀ akaka ḅụ ị̀ owiḅọtụḅọ ḅe saakị ọkị, à monoarị ogbo tẹ ò dogi tẹ kẹ árị iḅila mu; á nwẹnị anịtẹso á fịị tẹ tụḅọ mẹ kẹ ị̀ iḅila ọgọnọ koroma.

²¹ Ene-ḅaa ḅẹ dede-ḅio, à naa-saakị tẹ mu fịye kẹ ị̀ tụḅọ pịrị fị ḅẹ-muarị kụma, àrị ẹrị tẹ mịnẹ ọ̀ fịị tẹẹ. À nwẹnị kweinma tọrụ kẹ siin tụḅọ mẹ ḍiki tẹ ẹrị mịnẹ anị mie ị̀ tụḅọ mẹ anị-a.”

²² Kụma osi ẹrẹḅọ ma nwẹnị ḅẹẹ “Ẹn-ẹn! Ḍumo wararị tụḅọ mẹ anie ì nye, anịsakị fịtẹ tụḅọ mẹ anie í nye!” Tarị ẹrẹḅọ ma nwẹnị pakịrị, “Ẹn-ẹn! Fịtẹ tụḅọ mẹ anie í nye, anịsakị ḍumo wararị tụḅọ mẹ anie ì nye!” Mị-ḅara mie ịn kẹ amadaḅọ ḅe tọrọkọ ḅụ ye na ịgbanịya ḅara.

²³ Anịtẹso Amadaḅọ Sọlọmọnị nwẹnị ḅẹẹ, “Ọmịnị maa apụ ma ḅụ ḅụọ-ḅụọ ịgbanịarị mịnẹ ḍumo wararị tụḅọ mẹ anie á nye, anịsakị fịtẹ tụḅọ mẹ ḅarị sime kẹ gbọrụḅọ-sọ pịrị-a.”

²⁴ Ọ̀ nwẹnị fịrịma in mu okologie ọkị-ḅoo, tẹ ini anị ọkị-ḅo tẹso,

²⁵ ọ̀ nwẹnị ḅẹẹ, “Ḍumo wararị tụḅọ mẹ kẹ maaịn pẹlẹẹ, tẹ pakịrị-pakịrị kẹ gbọrụḅọ-gbọrụḅọ pịrịị.”

²⁶ Karakara-ḅara-ḅụ tụḅọ mẹ iyingiḅọ ma, á nyana árị owiḅọtụḅọ pịrị ḅẹlẹma á tẹmẹ ḅio ḅin wararị ḅara ḅụ nwẹnị amadaḅọ ḅe ḅẹẹ, “Sisi, Gburo-gburo Opuḅọ, tụḅọ mẹ ḅaa ma! Anị kẹ á pịrịị!” Kụma osi ẹrẹḅọ ma nwẹnị ḅẹẹ, “Anị kẹ wamịna aḅụụ gbọrụḅọ-sọ pịrị ma; mịẹ sunmaa, tẹ anị kẹ maaịn pẹlẹẹ.”

²⁷ Anịtẹso Sọlọmọnị nwẹnị ḅẹẹ, “Tụḅọ mẹ ḅaa ma! Anị kẹ tarị ẹrẹḅọ ma pịrịị — árịma anie karakara-ḅara-ḅụ anị iyi iyingiḅọ.”

²⁸ Izirẹlịapụ Sọlọmọnị ḅẹrẹ-pẹlẹ ḅịḅị mẹ naa tẹso, pokolotẹ mangịma nwẹnị ịna ḅio ḅụ ḅin kẹ ọ̀ pịrị, ịn nwẹnị gbala anịsakị rẹ nimi mịnẹ Tamụnọ nimi mẹ kẹ ò pịrị tẹ ọ̀ kẹ iḅi ḅara kẹ ịgbanịya kọn pẹlẹ.