1 Amadapụ 22 - FỊAFỊA BAỊBỤLỤ

Ịkịankoroḅọ Mayịkaya Ḅe Ehabụ Ḅeri Nụnụm

¹ Tẹra kụra ḅụ Siriya na Izirẹlị na ọmụ ịna ogboku ofori ḅara simem.

² Kụma tẹra kụra karama kụra ḅụ Jehosafatị Juda ḅẹ amadaḅọ ḅe nwẹnị Izirẹlị ḅẹ amadaḅọ ḅe ḍọkụma-ḅo.

³ Izirẹlị ḅẹ amadaḅọ ḅe nwẹnị ori afịrịmẹnjịapụ ḅẹẹ, “ó gbeke nimi mịnẹ Ramọtị-giliyadị sime kẹ wa pịrịm, tẹ wa yaụ-sime wararị tẹ Siriya ḅe amadaḅọ ḅara ḅụ anị ọkị-a?”

⁴ Ọ̀ nwẹnị Jehosafatị ḅẹẹ, “Í gbeke ị̀ na Ramọtị-giliyadị ḅẹ ọmụ mẹ mu ḅẹ?” Jehosafatị nwẹnị Izirẹlị ḅẹ amadaḅọ ḅe ḅẹẹ, “Yẹrị anie ị́yẹrị; ị̀ atomi ma anie ị́ atomi; ị̀ asụ ma anie pịkị ị́ asụ ma.

⁵ Kụma yee wa tarị KỊNỊNYANAḄỌ ḅe ḅịḅị gbela.”

⁶ Anịtẹso Izirẹlị ḅẹ amadaḅọ ḅe nwẹnị ịkịankoroapụ ma kobiri gboloma, owiapụ ẹndẹ pembe ḅara, tẹ nwẹnị ịn ḅẹẹ, “Mu Ramọtị-giliyadị na owu so mẹ à mu mụnọọ, à mu ma mọ?” Ịn nwẹnị ḅẹẹ, “Muu, KỊNỊNYANAḄỌ ḅe anị kẹ amadaḅọ ḅe ḅara-ḅio suu ḅa.”

⁷ Kụma Jehosafatị nwẹnị ḅẹẹ, “KỊNỊNYANAḄỌ ḅe jen ịkịankoroḅọ tẹ wa gbela ḅẹ ḅọ ḅarị ofori?”

⁸ Izirẹlị ḅẹ amadaḅọ ḅe nwẹnị Jehosafatị ḅẹẹ, “Gbọrụḅọ paa kọn wararị wa ọ̀ ḅara ḅụụ KỊNỊNYANAḄỌ ḅe ḅịḅị ḅii ḅarị ḅọ anie Mayịkaya, Imila owiḅọtụḅọ ḅe, kụma arị ò ḍiki-ḅioḅum, gbala jene-jene ì gbolomaye ḅụ amụ ori iḅi ịkịan koro ị̀ pịrị-a, sịẹ sikima.” Jehosafatị nwẹnị ḅẹẹ, “Yee amadaḅọ ḅe amụ ọkọ ḍuko ma tẹrẹmẹ.”

⁹ Anịtẹso Izirẹlị ḅẹ amadaḅọ ḅe nwẹnị gbọrụ ọmụ-alaḅọ sịn tẹ ḅẹẹ, “Mu fọnya Imila owiḅọtụḅọ Mayịkaya ọkị-ḅoo.”

¹⁰ Mịọkụ Izirẹlị ḅẹ amadaḅọ ḅe na, Jehosafatị Juda ḅẹ amadaḅọ ḅe na amadapụ ḅiriaị ḅiri tẹ ịna emine ọgọnọ ma ḅụ lẹgị sime wararị mgbọlụ-sẹlẹ-kiri mẹ ḅụ ḅẹ mẹnjị Sameriya ogigo-ḅọkọ mẹ sọ-mu pakịrị; tẹ ịkịankoroapụ mamgba nwẹnị ịna tọrọkọ ḅụ sime tẹ ịkịan koroarị.

¹¹ Ini ḅẹ gbọrụḅọ Kenana owiḅọtụḅọ Zẹdẹkaya nwẹnị ikulele ịfalị tẹmẹ ọ̀ ḅụụ pịrị tẹ ḅẹẹ, “Mịẹ KỊNỊNYANAḄỌ ḅe ḍuko yee, ‘Mịna ịfalị ma mịẹ ị́ kẹ Siriya ḅẹ apụ ma sukuruma nwenii tẹ in ḅaa fama ḅarịye!’ ”

¹² Osi ịkịankoroapụ mamgba nwẹnị ọkọ kẹ ịkịankoro tẹ ḅẹẹ, “Ramọtị-giliyadị muu tẹ owu-ḅara-iḅi nyana-a. KỊNỊNYANAḄỌ ḅe anị kẹ ḅara-ḅio ḅụ amadaḅọ ḅe pịrị ḅa.”

¹³ Mayịkaya sịn ḅẹ mu fịrịmẹnjịḅọ ḅe nwẹnị ọ̀ ḅẹẹ, “ḍikii, osi ịkịankoroapụ ma gbọrụ pọkọ kẹ amadaḅọ ḅe na kura ḅara kẹ ịkịan korom; yee ị́ ẹkwẹn-ḅịḅị mẹ ini ḅẹ gbọrụḅọ ẹkwẹn-ḅịḅị na kịka, tẹ í kura ḅara kẹ ẹkwẹn kọn.”

¹⁴ Kụma Mayịkaya nwẹnị ḅẹẹ, “KỊNỊNYANAḄỌ ḅe ḍumo sime wararị ogbo, KỊNỊNYANAḄỌ ḅe kẹ ị̀ ḅẹẹ ye mie à ḍuko ḅarịye.”

¹⁵ Ò ḅo amadaḅọ ḅe la tẹso, amadaḅọ ḅe nwẹnị ọ̀ ḅẹẹ, “Mayịkaya, wa mu Ramọtị-giliyadị na owu so mụnọọ, wa mu ma mọ?” Ọ̀ nwẹnị ọ̀ pakịrị. “Muu, tẹ owu-ḅara-iḅi nyana-a, KỊNỊNYANAḄỌ ḅe anị kẹ amadaḅọ ḅe ḅara-ḅio suu ḅa.”

¹⁶ Kụma amadaḅọ ḅe nwẹnị ọ̀ ḅẹẹ, “Arị nda sakị kẹ ḅii ḅa mịnẹ ị́ KỊNỊNYANAḄỌ ḅe ẹrẹ mẹ ḅụụ karakaraye mẹ sikima í jen ḍuko ị̀ pịrị ḅịa?”

¹⁷ Mayịkaya nwẹnị ḅẹẹ, “Àrị Izirẹlị mẹmgba ẹrịm ḍikiḍikiḅọ ofori anana-ogbo gala-gala ḅara kẹ gala-gala wararị tụndụ ma ọgọnọ ḅụ; tẹ KỊNỊNYANAḄỌ ḅe nwẹnị ḅẹẹ, ‘Mịna apụ ma ịn sịḅịdaḅọ nyana-a, yee ḅụọ-ḅụọ ḍẹịnma pịkịma-so mḅọ ama mu.’ ”

¹⁸ Izirẹlị ḅẹ amadaḅọ ḅe nwẹnị Jehosafatị ḅẹẹ, “À ḍuko ị́ pịrị-a mịnẹ siye sikima ori ì gboloma ye ḅụ iḅi ịkịan koro ḅịa.”

¹⁹ Mayịkaya nwẹnị ḅẹẹ. “Ọkọẹrẹsị KỊNỊNYANAḄỌ ḅe ẹkwẹn-ḅịḅị mẹ naa: À KỊNỊNYANAḄỌ ḅe ẹrịm ori ori emine ọgọnọ ḅụ lẹgị sime wararị, tẹ So-ḅio simearị apụ mamgba ori ama-ḅara na ori ere-ḅara anga na ḅụ sịẹsime wararị ori akaka ḅụ:

²⁰ tẹ KỊNỊNYANAḄỌ ḅe nwẹnị ḅẹẹ, ‘Tụḅọ mu Ehabụ toluma tẹ mịẹtẹ ò mu Ramọtị-giliyadị ḅụ ḅịkị ḅarị ḅara?’ Gbọrụḅọ nwẹnị gberie ḍuko, jụmọ nwẹnị pịkị jen ḍuko.

²¹ Anịtẹso gbọrụ tẹmẹ nwẹnị sakị paka-ḅo KỊNỊNYANAḄỌ ḅe tọrọkọ sịẹ tẹ ḅẹẹ, ‘À mu ò toluma ḅa.’

²² KỊNỊNYANAḄỌ ḅe nwẹnị ò gbela, ‘Tọ-ḅara ḅụ?’ Tẹmẹ ḅe nwẹnị pakịrị, ‘À mu ḅa, tẹ iruoarị tẹmẹ sọ ḅa ori ịkịankoroapụ mamgba ḅịḅị-ḅio ḅụ.’ KỊNỊNYANAḄỌ ḅe nwẹnị ḅẹẹ, ‘Mu ò tolumaa, ị́ mịẹ suma ḅa, mu tẹ ọkọ mịẹ.’ ”

²³ “Anịẹrẹsị ḍikii, KỊNỊNYANAḄỌ ḅe iruoarị tẹmẹ kẹ mịna ị́ ịkịankoroapụ mamgba ḅịḅị-ḅio sụa tẹ; kụma í gbolomaye ḅụ siye mịẹ KỊNỊNYANAḄỌ ḅe ḍuko ye.”

²⁴ Anieḅụ Kenana owiḅọtụḅọ Zẹdẹkaya nwẹnị sọma ḅo Mayịkaya kpeki tẹ ḅara finji ori amgba ḅọrọ tẹ gbela, “KỊNỊNYANAḄỌ ḅe tẹmẹ tọ-ḅara kẹ ị̀ ḅụụ so tẹ tọ sakị ḅụ ḅo ẹkwẹn ị́ pịrị?”

²⁵ Mayịkaya nwẹnị ḅẹẹ, “ḍikii, ị́ ẹrị ḅa anị ene mẹ ḅụ tẹ í mu gbọrụ kala-ḅio ḅụ ị́ ḅụụ ḅọị ḅarị sakị ḅụ.”

²⁶ Izirẹlị ḅẹ amadaḅọ ḅe nwẹnị tọn, “Mayịkaya ọlọọ, tẹ ọ̀ kẹ pịkị mu Amọnị opu ama mẹ ḅe ḅẹrẹtọnḅọ na Johasị amadaḅọ owiḅọtụḅọ ḅe na pịrị;

²⁷ tẹ ḅẹẹ mie amadaḅọ ḅe ḍuko yee, ‘ó ḅị tomḅọ ḅe kẹ ikoli ḅio suu, tẹ fịturu kalịye na minji na sikima ó jen kẹ ọ̀ pịrị ma nwenii à dein kẹ ḅo sakị la.’ ”

²⁸ Mayịkaya nwẹnị ḅẹẹ, “Ị́ nwẹnị dein ḅụ pịkịma-ḅo ḅoo, KỊNỊNYANAḄỌ ḅe ḅarị ị̀ ḅụụ ẹkwẹn-a.” Ọ̀ nwẹnị ḅẹẹ, “Ọ́ naa ọmịnị tomi mamgba!”

Ehabụ Fịịm

²⁹ Anieḅụ Izirẹlị ḅẹ amadaḅọ ḅe na, Juda ḅẹ amadaḅọ Jehosafatị na nwẹnị owu kẹ Ramọtị-giliyadị paka ḅẹ mu.

³⁰ Izirẹlị ḅẹ amadaḅọ ḅe nwẹnị Jehosafatị ḅẹẹ, “Yẹrị àrị ị̀ ḅụụ ḍima tẹ owu ḅio sọ-mu ḅa, kụma ị́yẹrị, ị́ ama-da ḅiriaị ḅirii.” Izirẹlị ḅẹ amadaḅọ ḅe nwẹnị ọ̀ ḅụụ ḍima tẹ owu ḅio sọ-mu.

³¹ Mịọkụ Siriya ḅẹ amadaḅọ ḅe tọn kẹ ò kirimẹnjị-ọmụarụ suei maa arụ finji ma ḅẹ ọmụ-alapụ ma pịrị tẹ ịn kala tomḅọ, anịanịa opu tomḅọ na owu sọ ma, kụma Izirẹlị ḅẹ amadaḅọ ḅe ngẹrị sikima tẹ.

³² Anieḅụ kirimẹnjị-ọmụarụ ma ḅẹ ọmụ-alapụ ma Jehosafatị ẹrị tẹso, ịn nwẹnị ḅẹẹ, “Anie karakara-ḅara-ḅụ Izirẹlị ḅẹ amadaḅọ ḅẹẹ.” Anieḅụ ịn nwẹnị ori na owu sọ ḅẹ ḅara kẹ tọrụ pịkị ọ̀ da. Kụma Jehosafatị nwẹnị oloku pakama.

³³ Kirimẹnjị-ọmụarụ ma ḅẹ ọmụ-alapụ ma ẹrịm mịnẹ Izirẹlị ḅẹ amadaḅọ ḅe ori-a, tẹso, ịn nwẹnị ḅarị ò ḍuka-a tẹ pịkị-so.

³⁴ Kụma gbọrụ tomḅọ paa ori iboli tẹịn ḍiki ḅụ tẹịn kụma okoro-ḍiein mẹ nwẹnị mu Izirẹlị ḅẹ amadaḅọ ḅe kpara, ọ̀ sụa wararị ọmụ-aị ma na ori ekpe gbaịn ye mẹ na ogboku ḅụ. Ọ̀ nwẹnị anịẹrẹsị ò kirimẹnjị-ọmụarụ dọkụḅọ ḅe ḅẹẹ, “Vuunma pịkịị, tẹ owu mẹ ḅio ị̀ dọkụ pakamaa, kẹ gotẹ ọkọ ḅẹẹarị, ye ị̀ la tẹ ẹrẹsị.”

³⁵ Anị ene ḅụ owu mẹ ọfịrịm, tẹ ịn nwẹnị anga-anga ḅụ tọrụ kẹ Siriya ḅẹ apụ ma da tẹ amadaḅọ ḅe palị sịẹma ò kirimẹnjị-ọmụarụ mẹ ḅio, ọmbie nwẹnị ọ̀ la ye mẹ ḅụ sara nwenii kirimẹnjị-ọmụarụ mẹ kuḅu ibirim mịẹ tẹ ḅoḅiri-so ḅụ ọ̀ nwẹnị fịị.

³⁶ Otuka tuuideri pembe sakị ḅụ ịn nwẹnị oloku Izirẹlị ḅẹ ọmụ-ogbo mẹmgba ikelema, “ọrụḅọ-ọrụḅọ so mḅọ opu sịẹ na mḅọ opu ama na muu!”

³⁷ Anieḅụ amadaḅọ Ehabụ fịịm, tẹ ịn nwẹnị ori oju-akpakpa kẹ ḅo Sameriya ḅụ ḍiḅi.

³⁸ In nwẹnị ò kirimẹnjị-ọmụarụ mẹ kẹ Sameriya ḅẹ ḍawa mẹ akaka ḅụ sịkịrị, tẹ obiri nwẹnị ori ọmbie mẹnị. KỊNỊNYANAḄỌ ḅẹ ẹkwẹn-ḅịḅị mẹ wẹrịtẹ ḅẹẹ tẹ ḅara ḅụ, sẹfị-ereme nwẹnị mu ịna ḅụụ sịkịrị ḍawa mẹ ḅio.

³⁹ Mịọkụ kirikọntẹ Ehabụ ye-mịẹ-ḅara na, ọ̀ mịẹ aị mamgba na, ọdụ warị mẹ tẹ ọ̀ nama ye mẹ na, opu ama ma tẹ ọ̀ nama aị mamgba Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

⁴⁰ Anieḅụ Ehabụ nwẹnị fịị, tẹ ori owiḅọtụḅọ Ahazaya nwẹnị ò kiri ọkị tẹ ama-da.

Juda Ḅẹ Amadaḅọ Jehosafatị

⁴¹ Jehosafatị Asa owiḅọtụḅọ ḅe saakị Juda dam Ehabụ Izirẹlị ḅẹ amadaḅọ ḅe ama-da tẹ ini akụra karama kụra ḅụ.

⁴² Jehosafatị sịḅị kụra suei sọnọa akụra finji ḅọrọ tẹ ọ̀ saakị Jeruselemu ḅụ ama-da sakị. Ò iyingi ẹrẹ Azuba, Silihi ẹrẹḅọtụḅọ ma.

⁴³ Ò ḍa Asa mẹnjị ḅara mẹnjị ḅara mịẹ ò ḍiki mẹnjị ye; ori anị ḅụ pịkị jen anga da-a, tẹ KỊNỊNYANAḄỌ ḅe ḍiki-tọrụ ḅụ kuraye mịẹm; anịsọ in mu-mu sunsin oru pịrịarị gele anga ma ori arị kan-siin-a, tẹ tomi ma paa mu-mu agba mịẹm pịkị kụnụ aị dọkịmam gele anga ma ḅụ.

⁴⁴ Jehosafatị Izirẹlị ḅẹ amadaḅọ na ḅẹrẹ sọ famam.

⁴⁵ Mịọkụ kirikọntẹ Jehosafatị ye-mịẹ-ḅara na, ọ̀ kụrọ tẹ ò ḍie-pakama ye mẹ na, ọ̀ wẹrị tẹ ọmụgbin ḅara na Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

⁴⁶ Ọ̀ ḍa Asa eneḅaka ḅụ ịna oru mịẹ-mịẹ ḅara ḅẹ kọn wararị sẹfị-owiapụ ma ọ̀ ḅaa famam ama mẹ ḅio.

⁴⁷ Idọmụ ḅụ amadaḅọ ofori; Juda ḅẹ amadaḅọ palị tẹ ọ̀ tọn ḅọ anie amadaḅọ anị anga.

⁴⁸ Jehosafatị Tasịsị ḅẹ opu onwi-arụ namam mu Ọfaya ḅụ golu sẹịn-sẹịn ḅo ḅarị arụ; kụma arị mu-a gbala Eziyọnị-geba ḅụ arị gbana tẹ puu famam ẹrẹsị.

⁴⁹ Anịtẹso Ehabụ owiḅọtụḅọ Ahazaya nwẹnị Jehosafatị ḅẹẹ. “Yee ì afịrịmẹnjịapụ í afịrịmẹnjịapụ na sọ tẹ mu, opu onwi-arụ ma ḅio.” Kụma Jehosafatị sịḅị-sụa-a.

⁵⁰ Jehosafatị nwẹnị fịị, tẹ ịn nwẹnị ọ̀ ḍa Devidi opu ama mẹ ḅio ori aḍapụ ma ḍiḅi anga ḅụ ò ḍiḅi. Ori owiḅọtụḅọ Joramụ nwẹnị ò kiri ọkị tẹ ama-da.

Izirẹlị Ḅẹ Amadaḅọ Ahazaya

⁵¹ Jehosafatị Juda ḅẹ amadaḅọ ḅe ama-da tẹ tẹra kụra fa si karama kụra ḅụ mịẹ Ahazaya Ehabụ owiḅọtụḅọ ḅe saakị Sameriya ḅụ sime tẹ maa kụra kẹ Izirẹlị da yee.

⁵² KỊNỊNYANAḄỌ ḅe ḍiki-tọrụ ḅụ ò siye mịẹm, tẹ ọ̀ ḍa na, ò iyingi na, Nebọtị owiḅọtụḅọ Jerobohamụ, mịẹtẹ Izirẹlị si mịẹ ḅọ ḅe etela ḅụ mẹnjịm.

⁵³ Ọ̀ fịrịmẹnjị Balị pịrị tẹ sunsin ọ̀ pịrịm ọ̀ ḍa wẹrịtẹ mịẹ ḅara mịẹ ḅara ḅụ, tẹ KỊNỊNYANAḄỌ Izirẹlịapụ tẹkẹarị Tamụnọ ḅe ịganị sịn-saakịma tẹ ori ịganịm.