1 Amadapụ 20 - FỊAFỊA BAỊBỤLỤ

Siriya Na Izirẹlị Na Gbin Ọmụ

¹ Bẹnị-hadadị Siriya ḅẹ amadaḅọ ḅe nwẹnị ori ọmụ-ogbo mamgba kobiri ḅo gboloma; ja amadapụ suei maaịn finji ọ̀ ḅụụ ḅụ emi; ịna asụ ma na, ịna kirimẹnjị-ọmụarụ na ini na. Ọ̀ nwẹnị mu Sameriya ikelema-koro tẹ owu kẹ anị paka.

² Ọ̀ nwẹnị oku kẹ fịrịmẹnjịapụ ḅara ḅụ Izirẹlị ḅẹ amadaḅọ Ehabụ fịrịma tẹ ọ̀ ḅẹẹ, “Mịẹ Bẹnị-hadadị ḍuko yee,

³ ‘Í seleḅa na í golu na ò nye; í sime iḅi ereme ma na ị́ awọmẹ ma na sọ ò nye.’ ”

⁴ Izirẹlị ḅẹ amadaḅọ ḅe nwẹnị pakịrị, “Ị́ wẹrịtẹ ḅẹẹ ḅara, yei amadaḅọ, ị̀ nyanaḅọ, yẹrị í nyee, à nyana aị mamgba sọ ị́ yaị.”

⁵ Oku-mẹnjịapụ ma nwẹnị pịkị siin ḅo tẹ ḅẹẹ, mịẹ Bẹnị-hadadị ḍuko yee, “À fịrịma tẹ ị́ ḅẹẹm í seleḅa na, golu na, í sime-ereme ma na, ị́ awọmẹ ma na ḅọrọma ị̀ pịrịị.

⁶ Anie sikima, ḅaa nwẹn pembe sakị ḅụ, arị ị̀ afịrịmẹnjịapụ kẹ ị́ fịrịma ḅa tẹ in ḅo ị́ warị na, ị́ afịrịmẹnjịapụ ma awarị na ḍọkị ḅa tẹ ịna ḅụụ ḅẹlẹ ye goyegoye ọkị so ḅa.”

⁷ Anịtẹso Izirẹlị ḅẹ amadaḅọ Ehabụ nwẹnị ama ḅẹ omongiapụ mamgba sịn tẹ ḅẹẹ, “Ọ́ kẹ elekima sụa, mịọkụ ọmịnị ẹrịarị ḅị tomḅọ ḅe ḅẹrẹ ḍọkịarị ḅara; ọ́ gbala oku kẹ ị̀ fịrịmam à sime-ereme na, ị̀ awọmẹ na, ì seleḅa na ì golu na kẹ ọ̀ pịrị tẹ à sịkị-a ẹrẹsị.”

⁸ Omongiapụ mamgba na, tomi mamgba na nwẹnị ọ̀ ḅẹẹ, “ọ̀ bala ma, pịkị minini ma.”

⁹ Anieḅụ ọ̀ nwẹnị Bẹnị-hadadị oku-mẹnjịapụ ma ḅẹẹ, “ó ḍuko ị̀ nyana amadaḅọ ḅe pịrị ọ̀ tarị ọ̀ fịrịmẹnjịḅọ ḅe ḅara ḅii aị mamgba à mịẹ ḅa; kụma mịẹ mẹ arị inetẹ mịẹ ḅịa!” Oku-mẹnjịapụ ma nwẹnị so, tẹ pịkị jen oku-ḅịḅị kẹ ḅo.

¹⁰ Bẹnị-hadadị nwẹnị oku kẹ ọ̀ fịrịma tẹ ḅẹẹ, “oru-atamụnọ ma ọkọ kẹ ị̀ mịẹ, pịkị ọkọ nẹngị ḅara sọ kẹ ị̀ mịẹ, Sameriya ḅụ simearị afọn ma ị̀ na ḅo ḅarị apụ mamgba ḅara ḅin tẹ ịn kẹ so-a ḅẹḅẹ.”

¹¹ Izirẹlị ḅẹ amadaḅọ nwẹnị pakịrị, “Ḍuko ọ̀ pịrị, ọmụ gotẹ amịnẹ ọmụ-aị ḅiriarị ḅọ, ọmụ ḅụ owu-ḅara-iḅi nyanatẹ ḅọ ḅụụ boma ḅara kẹ ḅụụ boma boma-a.”

¹² Bẹnị-hadadị amadapụ ma na igurugu-awarị ma ḅio iru ḅuuarị ogbo, ọ̀ mị oku-ḅịḅị mẹ naa tẹso, ọ̀ nwẹnị ori atomi ma ḅẹẹ, “ọmịnị ọmịna sime akiri ọkịị.” Tẹ ịn nwẹnị ịna sime akiri ma ḅụ simem, owu kẹ opu ama mẹ paka ḅẹ ḅara.

¹³ Ḍikii, gbọrụ ịkịankoroḅọ nwẹnị sọma ḅo Ehabụ Izirẹlị ḅẹ amadaḅọ ḅe na kpeki tẹ ḅẹẹ, “Mịẹ KỊNỊNYANAḄỌ ḅe ḍuko yee, mị gburo-gburotẹ tomi ogbo mẹ ị́ ẹrị tẹ? Ḍikii, mịmgba arị anị kẹ ị́ ḅara-ḅio suu ḅa, tẹ í nimi ḅa mịnẹ Yẹrị anie KỊNỊNYANAḄỌ ḅe.”

¹⁴ Ehabụ nwẹnị ḅẹẹ, “Tụḅọ tọrọkọ-tarị tẹ mu owu mẹ paka ḅẹ?” Ịkịankoroḅọ ḅe nwẹnị pakịrị, “Mịẹ KỊNỊNYANAḄỌ ḅe ḍuko yee, tomi kpo-kpo ma ḍikiḍikiarị ḅẹrẹtọn-apụ ma afịrịmẹnjịapụ ma mie anị mịẹ ḅarịye.” Anịtẹso ọ̀ nwẹnị amadaḅọ ḅe gbela, “Tụḅọ owu mẹ kẹ suku saakị ḅẹ?” Ịkịankoroḅọ ḅe nwẹnị pakịrị. “Ị́yẹrịị.”

¹⁵ Anịtẹso ọ̀ nwẹnị kpo-kpo ma ḍikiḍikiarị ḅẹrẹtọn-apụ ma afịrịmẹnjịapụ ma kobiri tẹ in pekele-ḍiki ọkị, ịna kịẹn-ḅịḅị anie kịnị oyia asi suei maa apụ finji; in ḅọrọ tẹso, ọ̀ nwẹnị Izirẹlịapụ mamgba kobiri tẹ in pekele-ḍiki ọkị, ịna kịẹn-ḅịḅị anie kịnị maa ẹndẹ oyia asi finji ofori kịnị gbọrụ puku (7,000).

¹⁶ Ene-ogbo ḅụ ịn nwẹnị paka mu, Bẹnị-hadadị na ọ̀ ḅụụ sọ wararị amadapụ suei maa apụ finji ma igurugu awarị ma ḅio sime tẹ iru ḅuu-pụn-arị ogbo,

¹⁷ Kpo-kpo ma ḍikiḍikiarị ḅẹrẹtọn-apụ ma afịrịmẹnjịapụ ma tarị pakam. Bẹnị-hadadị nwẹnị kịnị fịrịma mu ye yọ mẹ mẹnjị ḍiki, tẹ ịn nwẹnị ḅo ịba-fị ọ̀ pịrị, “Owiapụ Sameriya ḅụ mẹnjị paka ḅoarị.”

¹⁸ Ọ̀ nwẹnị ḅẹẹ, “In dein kẹ paka-ḅo-o, ini ọmụ kẹ paka-ḅo-o, ó ḍumo-tọrụ ḅụ in kuun-ọkịị.”

¹⁹ Anieḅụ mịna kpo-kpo ma ḍikiḍikiarị ḅẹrẹtọn-apụ ma afịrịmẹnjịapụ ma tẹ opu ama mẹ ḅio mẹnjị paka apụ ma na in ḍuka ḅo ọmụ-ogbo mẹ na;

²⁰ ḅụọ-ḅụọ mḅọ na sọ ḅọ ḅaam. Siriya ḅẹ apụ ma nwẹnị mangị tẹ Izirẹlịapụ ma nwẹnị in ḍuka, kụma Bẹnị-hadadị Siriya ḅẹ amadaḅọ ḅe asụ ọgọnọ ḅụ asụ-dọkụ-ọmụapụ na mangị-som.

²¹ Izirẹlị ḅẹ amadaḅọ Ehabụ nwẹnị saakị paka tẹ ịna asụ ma na, kirimẹnjị-ọmụarụ ma na kuun-ọkị tẹ gburo-gburo ḅara kẹ Siriya ḅẹ apụ ma ḅaa lama.

²² Anịtẹso ịkịankoroḅọ ḅe nwẹnị sọma ḅo Izirẹlị ḅẹ amadaḅọ ḅe kpeki, tẹ ọ̀ ḅẹẹ, “Ḅoo, ị́ ḅụụ mịẹ kụrọma, tẹ iḅiọkụ ị́ mịẹ na-iḅi ye kẹ ḅiokoromaa, gbala kala fẹngụ ḅụ Siriya ḅẹ amadaḅọ ḅe owu kẹ ị́ paka ḅa.”

Maaịn Karama Sakị Tẹ Siriya Owu Kẹ Izirẹlị Paka Ye Mẹ

²³ Siriya ḅẹ amadaḅọ ḅe afịrịmẹnjịapụ nwẹnị ọ̀ ḅẹẹ, “Ịna oru-atamụnọ ma anie tụndụ ma ọgọnọ ḅẹ atamụnọ, anie in gotẹ kụrọ wa nẹngị ye; kụma yee wa ele ḅio ini na owu-sọ, anịsakị karakara-ḅara-ḅụ wa kụrọ in nẹngị ḅa.

²⁴ Anịsakị miemẹ mie, amadapụ ma siin ḅụọ-ḅụọ kiri ḅụ, tẹ ọmụ ḅẹrẹtọn-apụ kẹ ịna akiri ḍimaa;

²⁵ tẹ ọmụ mẹ ḅio fị wararị ọmụ-ogbo mẹ pembe jen ọmụ-ogbo sẹlẹ pakamaa, asụ na kirimẹnjị-ọmụarụ na, anịtẹrẹmẹ wa mu inina ele mẹ ḅio owu mẹ sọ ḅa, tẹ karakara-ḅara-ḅụ, wa kụrọ ịn nẹngị ḅa.” Ọ̀ nwẹnị ịna ḅịḅị poki, tẹ ọkọ mịẹ.

²⁶ Kụra mẹ ikelema ḅo kala fẹngụ la tẹso, Bẹnị-hadadị nwẹnị Siriya ḅẹ apụ ma ḍiki ọkị, tẹ so Afẹkị ḅụ Izirẹlịapụ ma na owu sọ ḅẹ mu.

²⁷ Ini Izirẹlịapụ ma pekele-ḍiki ọkị tẹ, ịn kẹ in pịrị na-iḅi aị kẹ in pịrị tẹso, ịn nwẹnị in fịrịma owu mẹ mu: ịn nwẹnị Siriya ḅẹ apụ ma tọrọkọ maa kpo ḅụ ịna akpụrụ-warị pike, tẹ nwẹnị maa oḅori ogbo kịka, kụma Siriya ḅẹ apụ ma bebe ye-yọ mẹmgba ḅin wararị.

²⁸ Gbọrụ Tamụnọ ịkịankoroḅọ nwẹnị sọma-ḅo kpeki tẹ Izirẹlị ḅẹ amadaḅọ ḅe ḅẹẹ, “Mịẹ KỊNỊNYANAḄỌ ḅe ḍuko yee, ‘Gbala Siriya ḅẹ apụ ma ḅẹẹm, yẹrị anie tụndụ ma ọgọnọ ḅẹ oru-tamụnọ, yẹrị tụndụ ogboku ḅẹ oru-tamụnọ-a ḅẹẹ ye mẹ ẹrẹsị, à mị gburo-gburotẹ tomina-ogbo mẹ kẹ ị́ ḅara-ḅio suu ḅa, anịsakị í nimi ḅa mịnẹ yẹrị anie KỊNỊNYANAḄỌ ḅee.’ ”

²⁹ In nwẹnị sọnọma aḍin kẹ jụmọ-jụmọ na dama-dama tẹ sime ịna akpụrụ-warị ma ḅio. Anịtẹso owu mẹ nwẹnị saakị sọnọma ḍin karama ene mẹ ḅụ; tẹ Izirẹlịapụ ma nwẹnị Siriya ḅẹ apụ ma ḅẹ ḅụọ kẹ mẹnjịarị ọmụgbin apụ ma ḅụụ kịnị oyi maa apuku finji na kịnị oyia ẹndẹ na (100,000) ḅaa gbọrụ ene ḅụ.

³⁰ Kirikọn apụ ma nwẹnị mangị Afẹkị opu ama mẹ ḅio sọ; tẹ ama mẹ ḅẹ onu mẹ nwẹnị ḅịkị tẹ kọn apụ ma ḅụ kịnị tẹra apuku na, sọnọma ẹndẹ na, kịnị oyia asi na (27,000) ḅaa. Bẹnị-hadadị sọ nwẹnị mangị mu opu ama mẹ ḅio gbọrụ kala-ḅio ḅụ sọ

³¹ Ori afịrịmẹnjịapụ nwẹnị ọ̀ ḅẹẹ, “Mịọkụ wa naam mịnẹ Izirẹlị warị mẹ ḅẹ amadapụ ma anie ọkụrụkụrụ nyana kịnị pịrị amadapụ. Yee wa akpa ịnwaịn wamịna konju ḅụ, ḍiki kẹ wamịna asịḅị kpọ tẹ paka so Izirẹlị ḅẹ amadaḅọ ḅe ḍọkụma-mu; sosi-ọkụma, ori í ḍumo wẹrịso ḅa.”

³² Anieḅụ ịn nwẹnị akpa ịnwaịn ịna konju ḅụ, ḍiki kẹ ịna asịḅị kpọ tẹ Izirẹlị ḅẹ amadaḅọ ḅe ḍọkụma-mu tẹ ḅẹẹ, “ị́ fịrịmẹnjịḅọ Bẹnị-hadadị mẹẹ, ‘À tẹkẹm, yee à ḍumo sime.’ Ehabụ nwẹnị pakịrị, ‘Ọ̀ paa ḍumo wararị mọ? Ori anie ì iyimbere.’ ”

³³ Mịọkụ Bẹnị-hadadị atomi ma gbọrụ elekima ẹbịarị, tẹ ịn nwẹnị fọnya ọ̀ ḅịḅị ḅụ anị kan-ọkị tẹ ḅẹẹ. “Inn í iyimbere Bẹnị-hadadị.” Anịtẹso ọ̀ nwẹnị ḅẹẹ, “Ó mu ori ọkị-ḅoo.” Bẹnị-hadadị nwẹnị anịtẹso ọ̀ ḍọkụma-ḅo; ọ̀ nwẹnị ọ̀ mịẹtẹ ori iwo ḅo kirimẹnjị-ọmụarụ mẹ ḅụkụlọ.

³⁴ Bẹnị-hadadị nwẹnị ọ̀ ḅẹẹ, “Opu ama ma tẹ ị̀ ḍa ị́ ḍa ḅara ọkị ama ma àrị arị pịkịma ị́ pịrị ḅa, ị́ ḅụụ ḅẹlẹ-ḅẹlẹ tuḅokọn anga sọ finji ị́ ḅụụ pịrị Damasịkọsị ḅụ, ị̀ ḍa wẹrịtẹ Sameriya ḅụ mịẹ ḅara.” Ehabụ nwẹnị ḅẹẹ, “Mịna aị ma tẹ à kẹ ị́ na ḅịḅị-kẹ-ogbosọ ḅarị aị ma ḅụ mịẹ arị ị́ wẹrịso tẹ í so ḅarịye.” Anieḅụ ọ̀ nwẹnị ori na ọḅọkụ fị tẹ ọ̀ wẹrịso tẹ ò som.

Gbọrụ Ịkịankoroḅọ Ḅẹrẹ-ḅarasii Pẹlẹ Ehabụ Pịrịm

³⁵ KỊNỊNYANAḄỌ ḅe tọn ḅara ḅụ, ịkịankoroapụ ma owiapụ-awọmẹ ma ḅe gbọrụ owiḅọ nwẹnị ò pembe gbọrụḅọ ḅẹẹ, “Arị ị́ tẹkẹm, ì fomuu.” Kụma tomḅọ ḅe ò fomu ḍụkụ-a.

³⁶ Anịtẹso ọ̀ nwẹnị ọ̀ ḅẹẹ, “Ị́ gbala KỊNỊNYANAḄỌ ḅe pọkọ poki-a ẹrẹsị, ḍikii, ị́ ị̀ ḅụụ sikima gbọrụ sakị ọkụkụ ị́ ḅaa ḅa.” Tẹ ori ọ̀ ḅụụ sikima gbọrụ sakị, gbọrụ ọkụkụ nwẹnị ori na bịama tẹ ọ̀ ḅaa.

³⁷ Anịtẹso ọ̀ nwẹnị jen owiḅọ ḍọkị ẹrị tẹ ḅẹẹ, “Arị ị́ tẹkẹm, ì fomuu.” Tomḅọ ḅe nwẹnị ò fomu tẹ ye kẹ ọ̀ lama.

³⁸ Anieḅụ ịkịankoroḅọ ḅe nwẹnị so tẹ etela mẹ akaka ḅụ ḅịtẹ kẹ ọ̀ ḅụụ ḍima ḅara kẹ ọ̀ tọrụ fịna tẹ sime amadaḅọ Ehabụ koru.

³⁹ Amadaḅọ ḅe ḅọrọarị ogbo, ịkịankoroḅọ ḅe nwẹnị oloku ọ̀ sịn tẹ ḅẹẹ, “ị́ fịrịmẹnjịḅọ ọmụ mẹ ḅio mum, tẹ ḍikii, gbọrụ ọmụgbinḅọ nwẹnị pịkị tẹ gbọrụ tomḅọ ọkị-ḅo ị̀ pịrị tẹ ḅẹẹ, ‘Ḅị tomḅọ ḅe ḍikiḍikii; í tii kọn-arị tẹ ò so-soo, í í ḍumo kẹ ò ḍumo gbẹẹ ḅa, anịanịa í seleḅa pakịrị sọnọma ẹndẹ oyia asi finji gbẹẹ ḅa.’

⁴⁰ Kụma ị́ fịrịmẹnjịḅọ tọrụ-sịẹ-a ḅara kẹ mịanga na anịanga na ḅụ kọrịnama kọrịarị ogbo, ò so tẹẹ.” Izirẹlị ḅẹ amadaḅọ ḅe nwẹnị ọ̀ ḅẹẹ, “Mịẹ ị́ ḅẹrẹkọn mẹ sime ḅarị ḅara; ị́yẹrị ḅarana anị kọn pẹlẹ tẹẹ.”

⁴¹ Anịtẹso ọ̀ nwẹnị fọnya mịẹ tẹ ọ̀ tọrụ ḅụ ḅịtẹ mẹ sin, tẹ Izirẹlị ḅẹ amadaḅọ ḅe nwẹnị ori ịkịankoroapụ ma ḅẹ gbọrụ ḅọ ḅara kẹ ò lekiri.

⁴² Ịkịankoroḅọ ḅe nwẹnị ọ̀ ḅẹẹ, “Mịẹ KỊNỊNYANAḄỌ ḅe ḍuko yee, ‘Ị́ gbala à tọnm ḅaa ḅẹ ḅọ ḅe wẹrịso tẹ ori ị́ ḅara ḅụ som ẹrẹsị, ị́yẹrị í ḍumo kẹ ò ḍumo gbẹẹ ḅa, ị́ ị́ atomi kẹ ori atomi gbẹẹ ḅa.’ ”

⁴³ Izirẹlị ḅẹ amadaḅọ ḅe nwẹnị akụ ye ḅụụ la ḅọ na iku ye ponoma ḅọ sime-ḅara sime tẹ so ò warị mu Sameriya ḅụ.