1 Amadapụ 19 - FỊAFỊA BAỊBỤLỤ

Ịlayịja Sayịnayị Tụndụ Ọgọnọ Mum

¹ Ehabụ Ịlayịja mịẹ aị mamgba ḍuko Jezibẹlị pịrịm, ọ̀ wẹrịtẹ okologie kẹ Balị ịkịankoroapụ mamgba ḅaa ḅara na.

² Anịtẹso Jezibẹlị nwẹnị gbọrụ fịrịmẹnjịḅọ kẹ Ịlayịja fịrịma, tẹ ḅẹẹm, “Ḅaa nwẹn pembe sakị ḅụ, arị í ḍumo kẹ ị́ wẹrịtẹ ịna ḅụ ḅẹ gbọrụḅọ ḍumo mịẹ ḅara mịẹ-a ḅẹḅẹ, oru-atamụnọ ma ọkọ kẹ ị̀ mịẹ, pịkị ọkọ nẹngị ḅara sọ kẹ ị̀ mịẹ.”

³ Ịlayịja nwẹnị ḅalafaa, tẹ saakị tẹ ò ḍumo-mangị kọn ḅo Biyasẹba, sime Juda pịrị anga la tẹ nwẹnị anịanga ọ̀ fịrịmẹnjịḅọ koroma so

⁴ Kụma ori ḅe ḅioju nwẹnị bebe gbọrụ ene kẹ mẹnjị ịkpa mẹ ḅio sọ-mu tẹ ḅo ịn kẹ ọfịnye mịẹ-mịẹ gbọrụ opu sịn suku lẹgị sime tẹ fịị ḅẹ ḅii, tẹ ḅẹẹm, “iḅi tẹẹ, Yei KỊNỊNYANAḄỌ, mịọkụ ì ḍumo ọkịị, kẹ gotẹ ọkọ ḅẹẹarị, arị iḅi ị̀ aḍapụ ma nẹngị-a.”

⁵ Ọ̀ nwẹnị ọfịnye mịẹ opu sịn mẹ suku ḅọlọlọ tẹ mono; tẹ ḍikii, gbọrụ enjẹlị ḅẹ ḅọ nwẹnị ò jike tẹ ọ̀ ḅẹẹ, “Saakị tẹ yefịị.”

⁶ Ọ̀ nwẹnị ḍiki ikelema tẹ ọ̀ sịḅị akaka ḅụ ọfịrịarị aḍụḅarị ọgọnọ fọị wararị kịkị na minji jongo na ẹrị. Ọ̀ nwẹnị anị fị tẹ minji mẹ ḅụụ, tẹ pịkị siin ḅọlọlọ sime.

⁷ KỊNỊNYANAḄỌ ḅe enjẹlị ḅẹ ḅọ nwẹnị pịkị maaịn karama sakị kẹ ḅo ò jike tẹ ọ̀ ḅẹẹ, “Saakị tẹ fịye fị anieofori, í mu ḅẹ ḍọkịarị ye mẹ ḅofa ị́ ḅụụ gburo-gburo ḅaka.”

⁸ Ịlayịja nwẹnị saakị tẹ yefị, pịkị ḅụụ, tẹ ọ̀ fị fịye mẹ kẹ ọ̀ pịrị ịnyọ ḅụ ọ̀ nwẹnị eneḅaka amesi na ḍin amesi na kẹ mẹnjị mu Orẹbụ Tamụnọ Tụndụ mẹ la.

⁹ Ọ̀ nwẹnị anị yọ ḅụ gbọrụ fukuru ḅio sọ tẹ anị anga ḍin mẹ ḅụ mono. KỊNỊNYANAḄỌ ḅe nwẹnị ò gbela, “Ịlayịja, í tiye mịẹarị mịangaa?”

¹⁰ Ọ̀ nwẹnị pakịrị, “À KỊNỊNYANAḄỌ, ọmụ-ogbo ma nyana Tamụnọ ḅe gotẹ kpọma afana sọ tẹẹ, gbalaa Izirẹlịapụ ma ị́ na fị ọḅọkụ mẹ sịkị tẹẹ, ị́ agbamịẹ-anga ma sukuruma-gbin, tẹ okologie kẹ ị́ ịkịankoroapụ ma ḅaa fama tẹẹ; yẹrị ngẹrị kpọkpọ gbọrụ sịḅị mịẹ kọn yee, tẹ in pịkị ì ḍumo ọkị ḅẹ ḍọkịarị.”

¹¹ KỊNỊNYANAḄỌ ḅe nwẹnị ọ̀ ḅẹẹ, “Paka tụndụ mẹ ọgọnọ mu tẹ ị̀ tọrọkọ sịẹ, à mẹnjị-ḅọrọ ḅẹ-ḅiiarị.” KỊNỊNYANAḄỌ ḅe nwẹnị ḅo mẹnjị-ḅọrọ tẹ gburo-gburotẹ kụrọ fẹrụ nwẹnị tụndụ ma na ịkụ ma na kan pakịrị-pakịrị ḍiema KỊNỊNYANAḄỌ ḅe tọrọkọ — kụma KỊNỊNYANAḄỌ ḅe ori ofori fẹrụ mẹ ḅio. Kụrọ fẹrụ mẹ ḅọrọ tẹso, kiri mẹ nwẹnị jike tẹ puu — kụma KỊNỊNYANAḄỌ ḅe kiri mẹ jike tẹ puu mẹ ḅio ofori.

¹² Kiri jike tẹ puu mẹ ḅọrọ tẹso, kọrị-fịnị nwẹnị paka — kụma KỊNỊNYANAḄỌ ḅe kọrị-fịnị mẹ ḅio oforii. Kọrị-fịnị mẹ ḅọrọ tẹso, ịrụ tẹ gbọrụ kala pọkọ nwẹnị fie.

¹³ Ịlayịja mị pọkọ mẹ naa tẹso, ọ̀ nwẹnị ọ̀ kẹ ọgọnọ sụa opu kapa mẹ kẹ ọ̀ tọrụ gbaịn tẹ paka-ḅo fukuru mẹ ḅọkọ ḅụ sịẹsime. Gbọrụ pọkọ nwẹnị ẹkwẹn ọ̀ pịrị tẹ ò gbela, “Ịlayịja, í tiye mịẹarị mịangaa?”

¹⁴ Ọ̀ nwẹnị pakịrị, “À KỊNỊNYANAḄỌ, ọmụ-ogbo ma nyana Tamụnọ ḅe gotẹ kpọma afana sọ tẹ, gbala Izirẹlịapụ ma ị́ na fị ọḅọkụ mẹ sịkị tẹẹ, ị́ agbamịẹ-anga ma sukuruma-gbin, tẹ okologie kẹ ị́ ịkịankoroapụ ma ḅaa fama tẹẹ; yẹrị ngẹrị kpọkpọ gbọrụ sịḅị mịẹ kọn yee, tẹ in pịkị ì ḍumo ọkị ḅẹ ḍọkịarị.”

¹⁵ KỊNỊNYANAḄỌ ḅe nwẹnị ọ̀ ḅẹẹ, “Pịkịma-so Damasịkọsị ḅẹ ịkpa mẹ ḅio muu; í mu la tẹ ḅẹḅẹ Siriya ḅẹ amadaḅọ sọ ḅarị ḅọ ḅara ḅụ pulo kẹ Hazẹlị sịḅị saraa.

¹⁶ Izirẹlị ḅẹ amadaḅọ sọ ḅarị ḅọ ḅara ḅụ pulo kẹ Nimisi owiḅọtụḅọ Jehu sịḅị saraa, pịkị í kiri ọkị ḅẹ ịkịankoroḅọ ḅara ḅụ pulo kẹ Ebẹlị-mẹhola ḅẹ Safatị owiḅọtụḅọ Ịlayịsa sịḅị saraa.

¹⁷ Hazẹlị okologie ḅụ mangị-so ḅọ so ḅọ, Jehu mḅọ ḅaa ḅa; anịsakị Jehu okologie ḅụ mangị-so ḅọ so ḅọ, Ịlayịsa mḅọ ḅaa ḅa.

¹⁸ Anịsọ àrị Izirẹlị ḅio ḅụ kịnị tẹra ẹndẹ ofori kịnị apuku na kịnị oyia asi na (7,000) wẹrị koko ḅa, inima tẹ amụ sịḅị-tuu tẹ sunsin Balị pịrị-a apụ ma.”

Ịn Ịlayịsa Sịnm

¹⁹ Anieḅụ ọ̀ nwẹnị anịanga ḅụ so, tẹ Safatị owiḅọtụḅọ Ịlayịsa ḍọkị ẹrị ori in maaịn-maaịn kẹ ise-ise ḅụ kpọ-gboloma wararị pootẹ-anambulo ḅẹ oyi maa ise finji kẹ fịye ḍiḅi ḅẹ kiri sokuarị; oyi gbọrụ ise finji ọ̀ tọrọkọ emii, tẹ ori oyi maaịn finji karama ise mẹ na emii. Ịlayịja nwẹnị ori akaka ḅụ ḅọrọ tẹ ori opu kapa mẹ kẹ wakị ori ọgọnọ gbana.

²⁰ Ịlayịsa nwẹnị pootẹ-anambulo ma koroma-so, tẹ mangị Ịlayịja ḍuka tẹ ọ̀ ḅẹẹ, “Yee à mu ḅaaḅaa kẹ ị̀ ḍa na ì iyingi na ḅẹẹ tẹ ḅo í ḍukamẹnjị.” Ịlayịja nwẹnị ọ̀ ḅẹẹ. “Iḅim, pịkịma-soo. Àrị í kiki-a.”

²¹ Anịtẹso ọ̀ nwẹnị ḅarị ò ḍukamẹnjị-a tẹ pịkịma-so, tẹ nwẹnị ọ̀ kẹ kọrị sime maa pootẹ-anambulo ma ḅaa, ịn kẹ ịna kpọ-gboloma sịn mẹ kẹ nama ma sọ, tẹ kẹ tomi ma pịrị pẹị. Anịtẹso ọ̀ nwẹnị saakị so mu Ịlayịja ḍukamẹnjị tẹ fịrịmẹnjị ọ̀ pịrị.