1 Amadapụ 18 - FỊAFỊA BAỊBỤLỤ

Ịlayịja na Balị ịkịankoroapụ na

¹ Tẹra akụra karama kụra mẹ ḅụ, tọnwa aḍin ḅọrọ tẹso, KỊNỊNYANAḄỌ ḅe nwẹnị Ịlayịja ḅẹẹ, “Muu, tẹ ị́ ḅụụ kẹ Ehabụ ḍiee, anịsakị àrị eene kẹ tomikiri mẹ fịrịma ḅa”

² Anieḅụ Ịlayịja nwẹnị ọ̀ ḅụụ kẹ Ehabụ ḍie ḅẹ mu. Mị sakị mẹ ḅụ kụrọ ịnụ Sameriya ḅụ emi.

³ Ehabụ nwẹnị obadaya amadapụ warị mẹ onyo-sẹịnḅọ ḅe sịn. (Obadaya anie gburo-gburotẹ ḅara kẹ KỊNỊNYANAḄỌ ḅe kụn-arị ḅọ.

⁴ Jezibẹlị KỊNỊNYANAḄỌ ḅe ịkịankoroapụ ma pẹlẹ-ḅaa sakị, Obadaya ịkịankoroapụ sọnọa si ọkị tẹ kịnị amesi oyia apụ finji finji kẹ gbọrụ fukuru gbọrụ fukuru ḅio ḅọị tẹ fịye na minji na kẹ in kokom.)

⁵ Ehabụ nwẹnị Obadaya ḅẹẹ, “Mu ye-yọ mẹ mẹnjị tẹ ngụngụḅa minji sime anga mamgba na tụndụ ogboku mamgba na ḍikii, sosi-ọkụma wa osuka ḍọkị-ẹrị tẹ kẹ Asụ ma na kụrọ-sịḅịsụa-asụ ma na pịrị fịị tẹ in ḅọrọma tẹ ḍumo ḅẹ ḅara, kẹ mịẹtẹ wa ḅarị ja anama fama ḅịa ḅara.”

⁶ Anieḅụ ini maa apụ ma nwẹnị ye-yọ mẹ ḍiema mịẹtẹ ini anị mẹnjị tolu ḍiki ḅẹ ḅara, Ehabụ ḅarana gbọrụ anga dam, Obadaya nwẹnị pịkị ḅarana jen anga da.

⁷ Obadaya etela mẹ ḅụ mẹnjị ma muarị ogbo kụma, ḍikii, Ịlayịja nwẹnị ori na bịama; Obadaya nwẹnị ò lekiri tẹ ò tọrụkuḅu kẹ ḅịkị-koro, tẹ ḅẹẹ, “Mie ị́yẹrị mọ, ị̀ nyanaḅọ Ịlayịja?”

⁸ Ọ̀ nwẹnị ọ̀ pakịrị, “Yẹrịị.” “Muu, tẹ ḍuko ị́ nyanaḅọ ḅe pịrị, ‘ḍikii, Ịlayịja mịangaa ḅụ emi.’ ”

⁹ Ọ̀ nwẹnị ḅẹẹ, “à tọ si mịẹ tẹ ị́ yẹrị ị̀ fịrịmẹnjịḅọ kẹ mu Ehabụ ḅara-ḅio suu ḅaa ḅẹ?

¹⁰ KỊNỊNYANAḄỌ ị́ Tamụnọ ḅe ḍumo wararị ogbo, gbọrụ opu sịẹ, anịanịa gbọrụ sịẹ sọ ofori ị̀ nyanaḅọ ḅe fịrịma tẹ à mu ị́ ḍọkị-a anga tẹ in ḍukom ‘ọ̀ mịanga ḅụ ofori’, ḅẹẹ kụma Ehabụ ḅii ḅa anị opu sịẹ mẹ ḅụ ḅẹ ḅẹrẹtọnḅọ ḅe ḅụụ-pikima mịnẹ ini ị́ ẹrị-a.

¹¹ Kụma mịọkụ í ḅiiarị mịnẹ à mu ḍuko ọ̀ pịrị mịnẹ ị́ mịangaa ḅụ emi.

¹² KỊNỊNYANAḄỌ ḅe Tẹmẹ ḅe nwẹnị à mu gbọrụ sakị í dogi-so à nimi-a anga mu tẹ anieḅụ à mu ḍuko Ehabụ pịrịm mịnẹ ị́ mịangaa ḅụ emii tẹ ò ḅo tẹ ị́ ḍọkị ẹrị-a kụma, ori ị̀ ḅaa ḅa, yẹrị ị́ fịrịmẹnjịḅọ ḅe kala-sakị kụra-ḅio KỊNỊNYANAḄỌ ḅe nimim ḅẹsọ.

¹³ Jezibẹlị KỊNỊNYANAḄỌ ḅe ịkịankoroapụ ma ḅaa sakị à mịẹ ye mẹ, anie à wẹrịtẹ KỊNỊNYANAḄỌ ḅe ịkịankoroapụ ma ḅụ kịnị sọnọa si kẹ kịnị amesi oyia apụ finji finji kẹ fukuru ḅio ḅọị tẹ fịye na minji na kẹ in koko ḅara mẹ amụ in ḍuko ị́ pịrị-a mọ, ị̀ nyanaḅọ?

¹⁴ Anieḅụ ị́ tọ-ḅara kẹ inetẹ ị̀ ḅẹẹ ḅa mịnẹ, ‘Mu ḍuko ị́ nyanaḅọ ḅe pịrị, Ịlayịja mịangaa ḅụ emii. Ori ị̀ ḅaa ḅa.’ ”

¹⁵ Ịlayịja nwẹnị ḅẹẹ, “ọmụ-ogbo mamgba nyana KỊNỊNYANAḄỌ ḅe, ori ḅe tẹ à tọrọkọ ḅụ sịẹ wararị ḅọ ḅe ḍumo wararị ogbo, à gbarị-a ḅara ḅụ ị̀ ḅụụ kẹ ó ḍie ḅa mịmgba.”

¹⁶ Anieḅụ Obadaya nwẹnị Ehabụ ḍọkụma-mu tẹ ḍuko ọ̀ pịrị, tẹ Ehabụ nwẹnị Ịlayịja na bịama ḅẹ mu.

¹⁷ Ehabụ Ịlayịja ẹrị tẹso, ọ̀ nwẹnị ọ̀ ḅẹẹ, “Mie ị́yẹrị yaa, Izirẹlị ḅụụ-fụkamaḅọ!”

¹⁸ Ịlayịja nwẹnị pakịrị, “Amụ àrị Izirẹlị ḅụụ-fụkama-a, kụma ị́yẹrị na ị́ ḍa warị na mie Izirẹlị ḅụụ-fụkama tẹ yee, gbala ị́ KỊNỊNYANAḄỌ ḅe oloko ma sịkị tẹ Balị oru-atamụnọ ma ḍukamẹnjị tẹẹ ẹrẹsị.

¹⁹ Ọkọẹrẹsị mịọkụ fịrịma tẹ Izirẹlị mẹmgba kobiri tẹ ịn kẹ Kamẹlị tụndụ ḅụ ị̀ fịrịmaa, Balị ịkịankoroapụ kịnị ẹndẹ amesi oyi finji ma na, Asẹra ịkịankoroapụ kịnị ẹndẹ ma tẹ Jezibẹlị dẹbịlẹ ḅụ fịye fịarị apụ ma sọ kẹ sụa fịrịmaa.”

²⁰ Anieḅụ Ehabụ nwẹnị fịrịma tẹ Izirẹlịapụ mamgba na, ịkịankoroapụ ma na kobiri Kamẹlị tụndụ ḅụ.

²¹ Ịlayịja nwẹnị sọma-ḅo tomi mamgba kpeki tẹ ḅẹẹ, “ọmịnị ọmịna kuroma ḅụ maa warị kpọọ oḅori sọ mu tọ sakị la ḅẹ? KỊNỊNYANAḄỌ ḅe anie Tamụnọ ḅẹḅẹ, ọmịnị ò ḍuka mẹnjịị, ori-a, kụma Balị anie Tamụnọ ḅẹḅẹ, ọmịnị ò ḍukamẹnjịị.” Kụma tomi ma gbọrụ ẹkwẹn-ḅịḅị sọ kẹ ọ̀ pakịrị-a.

²² Anịtẹso ọ̀ nwẹnị tomi ma ḅẹẹ, “Yẹrị ngẹrị kpọkpọ gbọrụ sịḅị anie KỊNỊNYANAḄỌ ḅe ịkịankoroḅọ tẹ kọn ḅọ, kụma Balị ịkịankoroapụ kịnị ẹndẹ amesi finji na oyi apụ na emi.

²³ Ọ́ maa owi-nambulo kẹ wa pịrịị, tẹ ye ini gbọrụ owi-nambulo sẹlẹ-ọkị tẹ ḅaa, tẹ kẹ pakịrị-pakịrị keni tẹ kẹ puutẹ fịnị apakịrị ọgọnọ gbana, kụma in kọrị-fịnị kẹ anị ḅụ sụa ma; anịsakị yẹrị pịkị osi owi-nambulo ḅe tẹlẹma tẹ kẹ puutẹ fịnị apakịrị ọgọnọ gbana ḅa, tẹ pịkị kọrị-fịnị kẹ anị ḅụ sụa ḅịa.

²⁴ Tẹ ọ́ nwẹnị ọmịna tamụnọ ḅe ẹrẹ sịn ḅa, tẹ yẹrị pịkị KỊNỊNYANAḄỌ ḅe ẹrẹ sịn ḅa, tẹ kọrị-fịnị kẹ sịn-ḅịḅị mẹ pakịrị Tamụnọ ḅe, ori anie Tamụnọ ḅẹẹ.” Tẹ tomi mamgba nwẹnị pakịrị “ẹkwẹn mẹ ḅẹlẹm.”

²⁵ Anịtẹso Ịlayịja nwẹnị Balị ịkịankoroapụ ma ḅẹẹ, “ọmịnị tarị gbọrụ owi-nambulo sẹlẹ-ọkị ọmịna ḅụụ pịrịị, tẹ tarị anị tẹlẹma tẹ ọmịna tamụnọ ḅe sịn, gbala ọmịnị tọnwa apụ, kụma ọ́ kọrị-fịnị kẹ anị ḅụ sụa ma.”

²⁶ In nwẹnị ịn kẹ ḅo ịna pịrị owi-nambulo mẹ ọkị tẹ anị tẹlẹma, tẹ nwẹnị dede-ḅio saakị Balị sịn nwenii ḅo ene-ogbo la ḅẹẹarị, “yei Balị wa pakịrịị.” Kụma kịnị gbọrụ pọkọ sọ naa-a, gbọrụḅọ-sọ pịkị pakịrị-a, tẹ ịn nwẹnị in nama agbamịẹ-anga mẹ ikelema-koro tẹ ịnyọ-pọkọta tẹ ḅara sime.

²⁷ Ene-ogbo ḅụ Ịlayịja nwẹnị in kombo tẹ ḅẹẹarị, “Ó kụrọma olokuu, gbala ori anie tamụnọ, sosi-ọkụma ori opu kuroma nyana wararị, anịanịa ye ori ọlọ wararị, anịanịa ò ye mu wararị, anịanịa ò monoarị tẹ naa-saakị nyanam.”

²⁸ In nwẹnị kụrọma oloku tẹ ịna mịẹ-mịẹye ḅara ḅụ okologie na, nangwọtẹ sịn kẹ ḅịḅị pịọ-pịọtẹ oḅuarị ikulele ḅụ sụa tẹ kẹ ịna ḅụụ pẹlẹ-pẹlẹ tẹ temi nwenii ọmbie nwẹnị ịna ḅụụ joi-joima sara ḅin.

²⁹ Ene-ogbo ḅọrọ tẹso, ini oloku-oloku tẹ ịna oju ma pẹlẹ nwenii anị ḅo ḅoḅiri agbamịẹ sakị lam, kụma gbọrụ pọkọọ in naa-a, gbọrụḅọ-sọ pakịrị-a, gbọrụḅọ-sọ pịkị poki-a.

³⁰ Anịtẹso Ịlayịja nwẹnị tomi mamgba ḅẹẹ, “Ọ́ sọma-ḅo ì kpekii,” tẹ tomi mamgba nwẹnị sọma-ḅo ò kpeki. Ọ̀ nwẹnị KỊNỊNYANAḄỌ ḅe agbamịẹ-anga tẹ in kan-sara nguma tẹ ye mẹ tẹlẹma.

³¹ Ịlayịja nwẹnị oyi maa ḍụḅarị finji ọkị Jekọbụ owiapụ-awọmẹ ma ibe ma kịẹn-ḅịḅị mẹ wẹrịtẹ la ḅara ḅụ, ori ḅe tẹ KỊNỊNYANAḄỌ ḅe “Izirẹlị” kẹ sịn ḅọ ḅe.

³² Ọ̀ nwẹnị KỊNỊNYANAḄỌ ḅe ẹrẹ mẹ ḅụ oyi maa aḍụḅarị finji ma kẹ gbọrụ agbamịẹ-anga nama. Ọ̀ nwẹnị minji maa agbakuru pembe ḅara sọ ḅarị nkọrọ soku agbamịẹ-anga mẹ ikelema-koro.

³³ Anịtẹso ọ̀ nwẹnị fịnị apakịrị ma kẹ ọrụtọn ḅara koroma tẹ nwẹnị owi-nambulo ḅe ḅaa tẹ kẹ pakịrị-pakịrị keni tẹ anị kẹ fịnị apakịrị ma ọgọnọ gbana. Ọ̀ nwẹnị ḅẹẹ, “Ó minji inia jongo sụa ḅinma tẹ kẹ dọkịma-agba mẹ na, fịnị apakịrị ma na ọgọnọ sara-a.” In nwẹnị ọkọ mịẹ,

³⁴ tẹ ọ̀ nwẹnị ḅẹẹ, “ọ́ pịkị maaịn karama sakị ḍuu sara,” ịn nwẹnị maaịn karama sakị ḍuu sara. Ọ̀ nwẹnị pịkị ḅẹẹ, “ọ́ tẹrẹị karama sakị ḍuu sara,” ịn nwẹnị pịkị tẹrẹị karama sakị ḍuu sara.

³⁵ Minji nwẹnị agbamịẹ-anga mẹ yọkọ-yọkọma tẹ pịkị nkọrọ mẹ sọ ḅinma.

³⁶ Anị ḅo ḅoḅiri agbamịẹ sakị mẹ la tẹso, Ịkịankoro Ịlayịja nwẹnị sọma-ḅo kpeki tẹ ḅẹẹ. “Yei KỊNỊNYANAḄỌ, Ebira-amụ na Ayịzịkị na pịkị Izirẹlị na sịḅị-tuu pịrị Tamụnọ, yee mịmgba ḅụ in nimi mịnẹ ị́yẹrị anie Izirẹlị ḅụ simearị Tamụnọ ḅee, anịsakị yẹrị anie ị́ fịrịmẹnjịḅọ, mịnẹ ị́ ẹkwẹn-ḅịḅị ḅụ mịẹ à mịna aị mamgba mịẹ yee.

³⁷ Ị̀ pakịrịị, Yei KỊNỊNYANAḄỌ, ị̀ pakịrịị, mịẹtẹ mịna apụ ma nimi ḅarị ḅara mịnẹ, Yei KỊNỊNYANAḄỌ, Ị́yẹrị anie Tamụnọ ḅee, anịsakị ị́ ịna ḅioḅẹngbọ ma pịkịma-ḅo tẹẹ.”

³⁸ Anịtẹso KỊNỊNYANAḄỌ ḅe fịnị mẹ nwẹnị siin-koro ḅo dọkịma-agba mẹ na, fịnị apakịrị ma na, ḍụḅarị ma na, fọọn ma na dọkịma, tẹ nwẹnị nkọrọ mẹ ḅio sime minji mẹ mẹnịma fama.

³⁹ Tomi mamgba anị ẹrị tẹso, ịn nwẹnị ịna tọrụkuḅu kẹ ḅịkị kiri ḅio koro tẹ ḅẹẹ, “KỊNỊNYANAḄỌ ḅe ori ḅe anie Tamụnọ ḅẹẹ, KỊNỊNYANAḄỌ ḅe ori ḅe anie Tamụnọ ḅẹẹ.”

⁴⁰ Ịlayịja nwẹnị ịn ḅẹẹ, “Ọ́ Balị ịkịankoroapụ ma ọlọọ, ọ́ ḍụkụ tẹ ịna ḅụụ gbọrụḅọ-sọ mangị-so ma.” Ịn nwẹnị ini ọlọọ, tẹ Ịlayịja nwẹnị ịna kẹ ideri Kisọnị tọrụ mẹ ḅo, tẹ nwẹnị anịanga ḅụ in ḅaa.

Samụnọ Sakị Mẹ Ḅẹ Kunoma

⁴¹ Ịlayịja nwẹnị Ehabụ ḅẹẹ, “Iwo muu, yefịị, pịkị ḅuu, gbala koroarị eene fie ma-ḅoarị.”

⁴² Anieḅụ Ehabụ nwẹnị iwo so, tẹ mu yefị tẹ pịkị ḅuu, Ịlayịja nwẹnị iwo so Kamẹlị tụndụ mẹ sịḅị ọgọnọ mu, tẹ ọ̀ ḅụụ kẹ kiri pịrị tẹ ọ̀ maa ḅụọ-kụkụ ogboku ḅụụ ọ̀ sịḅị-tuu tẹ ọ̀ tọrụkuḅu kẹ kiri lama.

⁴³ Ọ̀ nwẹnị ọ̀ fịrịmẹnjịḅọ ḅẹẹ, “Iwo muu mịọkụ, tẹ tọrụ mẹ da pakịrị mẹ ḍikii.” Ọ̀ nwẹnị iwo mu tẹ ḍikii, tẹ ḅẹẹ, “Gberie-sọ ofori.” Ịlayịja nwẹnị ọ̀ ḅẹẹ, “sọnọma sakị kẹ mu ḍikiḍiki tẹ ḅoo.”

⁴⁴ Sọnọma sakị karama ye mẹ ḅụ ọ̀ nwẹnị ḅẹẹ, “ḍikii, à tomḅọ ḅara na gbasị ḅarị kpiti-so kalịye ẹrịm, tọrụ mẹ ḅụ saakị iwoarị.” Ịlayịja nwẹnị ḅẹẹ, “Iwo mu tẹ Ehabụ ḅẹẹ, ‘í kirimẹnjị-ọmụarụ tẹlẹma tẹ ideri-muu, anieofori eene mẹ ḅofa ị́ dasịẹma!’ ”

⁴⁵ Boowa kala-sakị ḅụ, kpiti-so na kụrọ fẹrụ na nwẹnị So-tọrụ mẹ kurukuruma, tẹ gburo-gburotẹ eene nwẹnị kuro, Ehabụ nwẹnị oloku ma ò Jẹzirili mu.

⁴⁶ KỊNỊNYANAḄỌ ḅe ḅara Ịlayịja ọgọnọ ḅụ emii, tẹ ọ̀ nwẹnị ori opu kapa mẹ kẹ ò ḅiri kpọ, tẹ nwẹnị mangị Ehabụ ḅọrọ tẹ tarị mu mẹnjị-ḅọrọ Jẹzirili sọ-muarị anga mẹ la.