1 Amadapụ 17 - FỊAFỊA BAỊBỤLỤ

Ịlayịja na Samụnọtẹ Sakị Mẹ na

¹ Mị sakị ḅụ Tisibi ḅẹ Ịlayịja, Gilẹdị ḅụ sime ḅọ ḅe nwẹnị Ehabụ ḅẹẹ, “KỊNỊNYANAḄỌ Izirẹlịapụ tẹkẹarị Tamụnọ ḅe ḍumo wararị ogbo, ori ḅe tẹ à fịrịmẹnjị pịrịarị ḅọ ḅe, à ḍuko-a sime ogbo, mịna akụra ma ḅụ igirigi anịanịa eene koro ḅịa.”

² KỊNỊNYANAḄỌ ḅe nwẹnị ḍuko Ịlayịja pịrị,

³ “Mịangaa ḅụ so tẹ ịrụa-saakịarị-anga mẹ dama-mu tẹ ị́ ḅụụ ḅọị Sẹrịti ḍawa mẹ Akaka ḅụ, aniemẹ tẹ Jodanị ḅụ ịrụa-saakịarị-anga ḅụ simearị ye mẹ.

⁴ Ị́ ḍawa mẹ ḅio minji ḍuu-ḍuu ḅuu ḅa, anịsakị à tọn ịn kẹ revini sịn afeni ma pịrị tẹ ịn fịye kẹ ḅo í koko ḅa anịanga.”

⁵ Anieḅụ ọ̀ nwẹnị KỊNỊNYANAḄỌ ḅe ẹkwẹn-ḅịḅị mẹ wẹrịtẹ ḅẹẹ ḅara ḍiki mịẹ, tẹ nwẹnị mu Sẹrịti ḍawa mẹ akaka ḅụ sime, aniemẹ tẹ Jodanị ḅụ ịrụa-saakịarị-anga ḅụ simearị ye mẹ.

⁶ Revini afeni ma nwẹnị dede na ḅoḅiri na ḅụ fịturu na nama na kẹ ḅo-ḅo ọ̀ pịrị, tẹ ọ̀ nwẹnị ḍawa mẹ ḅio minji ḍuu-ḍuu ḅuum.

⁷ Sakị kẹlẹ ḅọrọ tẹso, eene koro-a mẹ ẹrẹsị, ḍawa mẹ nwẹnị ḅo samụnọ.

Ịlayịja Na Diḅọ-fịtẹ-ẹrẹḅọ Ma Na Zarẹfatị Ḅụ

⁸ Anịtẹso KỊNỊNYANAḄỌ ḅe nwẹnị ḍuko Ịlayịja pịrị,

⁹ “Saakịị, so Zarẹfatị muu, sime Sayịdọnị pịrị anga mẹ, tẹ anịanga ḅụ simee. Ḍikii, à tọn kẹ gbọrụ diḅọ-fịtẹ-ẹrẹḅọ pịrị tẹ anịanga ḅụ mịnẹ á fịye kẹ í kokoo.”

¹⁰ Anieḅụ ọ̀ nwẹnị saakị tẹ so Zarẹfatị mu; ò ḅo opu ama mẹ ḅẹ ogigo-ḅọkọ la tẹso, ọ̀ nwẹnị gbọrụ sanga kobiriarị diḅọ-fịtẹ-ẹrẹḅọ ẹrị; ọ̀ nwẹnị á sịn tẹ á ḅẹẹ, “Ye kẹ minji kalịye ḍuu ḅo ị̀ pịrị tẹ à ḅụụ.”

¹¹ Á mu minji mẹ ḍuu ḅẹ-muarị ogbo ọ̀ nwẹnị à sịn tẹ ḅẹẹ, “Ị́ ḅara ḅụ iku ḅin ḅarị fịturu kalịye ọkị-ḅo ị̀ pịrịị.”

¹² Á nwẹnị ḅẹẹ, “KỊNỊNYANAḄỌ ị́ Tamụnọ ḍumo wararị ḅọ ḅe ẹrẹ ḅụụ, à fọịtẹ gberie-sọ nyana-a; gbọrụ ḅara-kuḅu ḅin ḅarị fịlawa kalịye ngẹrị mịẹ ye ḅio simearị ye, na pulo kalịye na pulo-sụaye mẹ ḅio ḅụ; à mịọkụ kobiriarị ḍọkọḍọkọ sanga kala aị ma, à kẹ mu anị sọ tẹlẹma tẹ yẹrị na ì owiḅọtụḅọ ḅe na anị fịị tẹ ḅuru-ḅa ḅụ sime fịị ḅẹ ḅara”.

¹³ Ịlayịja nwẹnị á ḅẹẹ, “Ḅalafa ma, mu ị́ ḅẹẹ ḅara mẹ mịẹ; kụma tarị anị ḅụ kịkị kalịye mịẹ tẹ ọkị-ḅo ì pịrịị, anịtẹrẹmẹ mịẹ ị́ ḅụụ na í owiḅọtụḅọ ḅe na pịrịị,

¹⁴ Gbala mịẹ KỊNỊNYANAḄỌ, Izirẹlịapụ tẹkẹarị Tamụnọ ḅe ḍuko yee, ‘Fịlawa-kokoye mẹ ḅio fịlawa ḅarị faa ḅịa, pulo-sụaye mẹ ḅio sọ pulo ḅarị kụnụnụ ḅịa nwenii àrị eene kẹ tomikiri mẹ fịrịma ene la ḅa!’ ”

¹⁵ Á nwẹnị so tẹ mu Ịlayịja ḅẹẹ ḅara mịẹ; tẹ árị na ori na á warị-suku na nwẹnị tọnwa ḍin kẹ fịye nyana tẹ fị.

¹⁶ Ịlayịja ḅụụ ḅụ KỊNỊNYANAḄỌ ḅe ẹkwẹn-ḅịḅị mẹ wẹrịtẹ kọọn ḅara, fịlawa-kokoye mẹ ḅio fịlawa ḅarị fa-a, pulo-sụaye mẹ ḅio sọ pulo ḅarị pịkị kụnụnụ-a.

¹⁷ Mịẹ mẹ ḅọrọ tẹso ọkụma, diḅọ-fịtẹ-ẹrẹḅọ ma owiḅọtụḅọ ḅe ḅo obi tẹẹ. Obi mẹ sii tọrọkọ-tọrọkọ mu nwenii tụḅọ ḅe nwẹnị fịị.

¹⁸ Á nwẹnị Ịlayịja ḅẹẹ, “Yei Tamụnọ Ịkịankoroḅọ, ị́ ị̀ na tọ ịgbanịya nyana? Ị́ ị̀ asi ma kẹ Tamụnọ ḅiokoroma tẹ mịẹtẹ ì owiḅọtụḅọ ḅe fịị ḅẹ mie í gotẹ ḅo ye?”

¹⁹ Ọ̀ nwẹnị á ḅẹẹ, “Í owiḅọtụḅọ ḅe kẹ ị̀ pịrịị.” Ọ̀ nwẹnị á kuḅu-ḅio ḅụ ori ọkị, tẹ ọ̀ kẹ iwo ọgọnọ-jụ ò simearị ḅio mu, tẹ nwẹnị ọ̀ kẹ ori ḅe iḅila ọgọnọ ḅụ ḅọlọlọma.

²⁰ Ọ̀ nwẹnị oloku KỊNỊNYANAḄỌ ḅe sịn, “Yei KỊNỊNYANAḄỌ ị̀ Tamụnọ! Ma diḅọ-fịtẹ-ẹrẹḅọ ma tẹ à warị bịan ḅọ ma sọ ị́ ḅụụ-fụka ọkị-ḅo árị ọgọnọ gbana tẹ árị owiḅọtụḅọ ḅaa tẹ?”

²¹ Anịtẹso Ịlayịja nwẹnị tụḅọ ḅe ọgọnọ ḅụ tẹra sakị kẹ ọ̀ ḅụụ sun, tẹ oloku KỊNỊNYANAḄỌ ḅe sịn, “Yei KỊNỊNYANAḄỌ ị̀ Tamụnọ, yee ḅị tụḅọ ḅe tẹmẹ pịkị pịkị-ḅo ọ̀ ḅụụ ḅio sọ!”

²² KỊNỊNYANAḄỌ ḅẹ nwẹnị Ịlayịja pọkọ naa, tẹ tụḅọ ḅe saakịmam.

²³ Ịlayịja nwẹnị ọgọnọ ḅe ḅio mẹ ḅụ ori ọkị ideri-ḅo warị mẹ suku-ḅio la tẹ ọ̀ ḅọrọma ò iyingi pịrị, tẹ Ịlayịja nwẹnị ḅẹẹ, “ḍikii, í owiḅọtụḅọ ḅe ò ḍumo wararị.”

²⁴ Ẹrẹḅọ ma nwẹnị Ịlayịja ḅẹẹ, “Mẹkịnẹ à nimi tẹ mịnẹ ị́yẹrị Tamụnọ Ịkịankoroḅọ, tẹ KỊNỊNYANAḄỌ ḅe ẹkwẹn-ḅịḅị mẹ tẹ ị́ ḅịḅị-ḅio simearị ye mẹ anie karakaraye.”