1 Amadapụ 16 - FỊAFỊA BAỊBỤLỤ

¹ KỊNỊNYANAḄỌ ḅe nwẹnị ẹkwẹn Hanani owiḅọtụḅọ Jehu pịrị, ò ḍuko Basa pịrị ḅẹ ye, tẹ ḅẹẹm,

² “À fọọn mẹ ḅio ị́ saakị-gelema tẹ ị́ kẹ ị̀ atomi Izirẹlịapụ ma tọrọkọ-tarịḅọ mịẹ kụra-ḅio, í mu Jerobohamụ mẹnjị etela mẹnjị tẹ, mịẹtẹ ị̀ atomi Izirẹlịapụ ma si mịẹ tẹẹ, tẹ ịna asi ma ḅụ ị̀ ịganị sịn-saakịma tẹẹ.

³ Ḍikii, arị ịkatakirikọn-a-ḅara kẹ Basa na ọ̀ warị na ọfịn siin ḅa, tẹ ọ̀ warị mẹ kẹ Nebatị owiḅọtụḅọ Jerobohamụ warị mịẹ ḅara mịẹ ḅa.

⁴ Ḅẹḅọ-ḅẹḅọ tẹ sime kẹ Basa pịrị tẹ opu ama mẹ ḅio fịị ḅọ fịị ḅọ, obiri mḅọ pẹị ḅa; tẹ ḅẹḅọ-ḅẹḅọ tẹ sime ọ̀ pịrị tẹ pịrị ḅio fịị ḅọ fịị ḅọ, so tọrụ ḅẹ afeni mḅọ pẹị ḅa.”

⁵ Mịọkụ kirikọntẹ Basa ye-mịẹ-ḅara, na ọ̀ mịẹye na, ọ̀ kụrọ na, Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

⁶ Basa nwẹnị fịị, tẹ ịn nwẹnị Tariza ḅụ ò ḍiḅi. Ori owiḅọtụḅọ Ẹla nwẹnị ò kiri ḅụ ama-da.

⁷ Aniemẹ sikima, Hanani owiḅọtụḅọ ịkịankoroḅọ Jehu KỊNỊNYANAḄỌ ḅe ẹkwẹn-ḅịḅị ḍuko Basa na ọ̀ warị na pịrịm, gbala ọ̀ KỊNỊNYANAḄỌ ḅe ḍiki-tọrụ ḅụ siye mịẹm tẹ ori ịganịmam; ọ̀ ḅara ḅẹ kọrịnama pịkị Jerobohamụ warị mẹ kịkam, tẹ ori anie pịkị Jerobohamụ warị mẹ ḅaa fama ye ẹrẹsị.

Izirẹlị Ḅẹ Amadaḅọ Ẹla

⁸ Juda ḅẹ amadaḅọ Asa ama-da tẹ inia kụra fa suei karama kụra ḅụ, mịẹ Basa owiḅọtụḅọ Ẹla, Tariza ḅụ sime tẹ saakị Izirẹlị da ye tẹ maa kụra kẹ ama mẹ dam.

⁹ Kụma ọ̀ fịrịmẹnjịḅọ Zimiri, ori ḅe tẹ ò kirimẹnjị-ọmụarụ ma kẹ maa anga ḍiya ḅẹ gbọrụ pakịrị kẹ sịḅịdaḅọ ḅe nwẹnị ọ̀ kẹ ḅẹrẹ-ḅiya. Gbọrụ ene ḅụ, Tariza ḅụ, Ẹla amada-ogigo mẹ ḍikiḍikiarị ḅọ ḅe, anie Aza, warị ḅio iru ḅuu ọ̀ tọrụ-ḅaama wararị ogbo,

¹⁰ Zimiri nwẹnị sọ-ḅo tẹ ọ̀ ḅakụ gbin tẹ ọ̀ ḅaa, nwẹnị ò kiri ḅụ ama mẹ da. Miemẹ paka yee, Juda ḅẹ amadaḅọ Asa ama-da tẹ tẹra kụra fa suei karama kụra ḅụ.

¹¹ Ori ọ̀ ḅụụ kẹ ama-da emine mẹ ọgọnọ lẹgịma tẹ saakị ama mẹ da gbọrụ sakị mịẹ ọ̀ Basa warị mẹmgba ḅaa fama yee, kpọkpọ gbọrụ owiḅọ sọ ori amịnapụ anịanịa ori ikiapụ ma ḅụ ọ̀ ḅaa kọnma ọ̀ pịrị-a.

¹² Mị-ḅara mịẹ Zimiri kẹ Basa warị mẹ ḅaa guluguluma ḅara, KỊNỊNYANAḄỌ ḅe kọọn Basa pịrị si ẹkwẹn-ḅịḅị mẹ wẹrịtẹ Jehu ịkịankoroḅọ ḅe ḅụụ ḅo ḅara.

¹³ Basa asi mamgba na, ori owiḅọtụḅọ Ẹla asi mamgba na gotẹ, pịkị in mịẹtẹ Izirẹlịapụ ma sọ si mịẹm, tẹ nwẹnị oru-atamụnọ ma tẹkẹm ẹrẹsị, anị KỊNỊNYANAḄỌ Izirẹlịapụ tẹkẹarị Tamụnọ ḅe ịganị sịn-saakịmam.

¹⁴ Mịọkụ kirikọntẹ Ẹla ye-mịẹ-ḅara na ọ̀ mịẹ aị mamgba Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

Izirẹlị Ḅẹ Amadaḅọ Zimiri

¹⁵ Juda ḅẹ amadaḅọ Asa ama-da tẹ tẹra kụra fa suei karama kụra ḅụ mịẹ Zimiri sọnọma ḍin kẹ Tariza ḅụ ama-da yee. Mị sakị mẹ, Izirẹlị ḅẹ ọmụgbin itu ma sime Filisiteniapụ pịrị opu ama Gibẹtọnị ikelema-koro tẹ owu-paka ḅẹ akpụrụ-warị ḅio emii,

¹⁶ tẹ naam mịnẹ Zimiri amadaḅọ ḅe kẹ ḅẹrẹ-ḅiya tẹ ọ̀ ḅaa tẹ; ọkọẹrẹsị Izirẹlị mẹmgba nwẹnị akpụrụ-warị mẹ ḅio ḅẹrẹtọn ọmụ-ogbo mẹ pịrịarị ḅọ Omuri kẹ Izirẹlị mẹ ḅụ amadaḅọ mịẹ anị ene mẹ ḅụ

¹⁷ Omuri na Izirẹlịapụ mamgba na nwẹnị Gibẹtọnị ḅụ so tẹ mu owu kẹ Tariza paka ḅẹ anị ikelema-koro.

¹⁸ Zimiri ini ama mẹ ọkị tẹ ẹrị tẹso, ọ̀ nwẹnị mu amadapụ warị mẹ ḅio ịn kẹ ama mẹ ḍikiḍikiarị kụrọtẹ gele-warị mẹ ḅio orumo pakama tẹ warị mẹ dọkịma tẹ fịnị mẹ ḅio sọ tẹ fịị.

¹⁹ Ò Jerobohamụ mẹnjị etela ḍukamẹnjị tẹ KỊNỊNYANAḄỌ ḅe ḍiki-tọrụ ḅụ siye mịẹm; arị asi ma ḅụ ọ̀ mịẹtẹ Izirẹlị si mịẹm ẹrẹsị.

²⁰ Mịọkụ kirikọntẹ Zimiri ye-mịẹ-ḅara na, ọ̀ kịnị kẹ ḅẹrẹ-ḅiya na Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

Izirẹlị Ḅẹ Amadaḅọ Omuri

²¹ Anịtẹso Izirẹlịapụ ma nwẹnị maa anga ḍie; ini ḅẹ gbọrụ pakịrị nwẹnị Ginati owiḅọtụḅọ Tibini kẹ ama-da ḅẹ gotẹ ò ḍukamẹnjị, osi pakịrị nwẹnị Omuri ḍukamẹnjị.

²² Kụma Omuri ḍukamẹnjịapụ ma nwẹnị owu ḅụ Ginati owiḅọtụḅọ Tibini ḍukamẹnjịapụ ma nẹngịma, anieḅụ Tibini nwẹnị fịị, tẹ Omuri nwẹnị ḅo amadaḅọ sọ.

²³ Juda ḅẹ Amadaḅọ Asa ama-da tẹ kụra asuei gbọrụ kụra finji karama kụra ḅụ mịẹ Omuri saakị Izirẹlị mẹ da yee, tẹ nwẹnị oyi maa kụra finji kẹ ama-da; sonio akụra ọ̀ nwẹn kẹ Tariza ḅụ sime tẹ ama-dam.

²⁴ Ọ̀ nwẹnị Sẹma ḅara ḅụ seleḅa pakịrị jei ẹndẹ (6,000) kẹ Sameriya ḅẹ tụndụ mẹ fẹ tẹ nwẹnị tụndụ mẹ ọgọnọ opu ama pakama tẹ anị nama kụrọma tẹ anị sịn Sameriya, kẹ gbala tụndụ mẹ nyanaḅọ Sẹma ḅẹ ẹrẹ kẹ anị kuro ḅụ.

²⁵ Omuri KỊNỊNYANAḄỌ ḅe ḍiki-tọrụ ḅụ siye mịẹm, ò siye mịẹ ọ̀ tọrọkọ tarị ama mẹ da tẹ so apụ mamgba nẹngịm

²⁶ Gbala Nebatị owiḅọtụḅọ Jerobohamụ etela mamgba mịẹ ò ḍukamẹnjị yee; na pịkị si mẹ tẹ ori Izirẹlị mịẹtẹ in mịẹ si mẹ, anie oru ma tẹ in mịẹtẹ KỊNỊNYANAḄỌ Izirẹlịapụ tẹkẹarị Tamụnọ ḅe ịganị sịn-saakịma ye mẹ.

²⁷ Mịọkụ kirikọntẹ Omuri ye-mịẹ-ḅara tẹ ọ̀ mịẹ aị na, ọ̀ kụrọ tẹ ò ḍie-pakama aị ma Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

²⁸ Tẹ Omuri nwẹnị fịị, tẹ ịn nwẹnị Sameriya ḅụ ò ḍiḅi. Ori owiḅọtụḅọ Ehabụ nwẹnị ò kiri ḅụ ama-da.

Izirẹlị Ḅẹ Amadaḅọ Ehabụ

²⁹ Juda ḅẹ Amadaḅọ Asa ama-da tẹ maa kụra fa kụra amesi karama kụra ḅụ mịẹ Omuri owiḅọtụḅọ Ehabụ ḅo Sameriya ḅụụ sime tẹ si maa kụra finji kẹ Izirẹlị da yee.

³⁰ Omuri owiḅọtụḅọ Ehabụ nwẹnị KỊNỊNYANAḄỌ ḅe ḍiki-tọrụ ḅụ siye mịẹ tẹịn ọ̀ tọrọkọ tarị ama mẹ da tẹ so apụ mamgba nẹngị.

³¹ Gbala Nebatị owiḅọtụḅọ Jerobohamụ asi ma ḅụ sịẹ mẹnjị mẹ ọ̀ ḅụụ feke-feke ye sọ lamam. Ọ̀ nwẹnị pịkị mu Etibalị, Sidọnị ḅẹ amadaḅọ ḅe ẹrẹḅọtụḅọ Jezibẹlị na sime, tẹ mu fịrịmẹnjị Balị pịrị tẹ sunsin ọ̀ pịrị.

³² Ọ̀ gbọrụ ebeka nama Balị pịrịm Balị warị ḅio ḅụ, aniemẹ tẹ ọ̀ Sameriya ḅụ nama ye mẹ.

³³ Ehabụ nwẹnị pịkị ịn kẹ Asịra sịn gbọrụ oru tẹmẹ koroma. Izirẹlị ḅẹ amadapụ mamgba ḅụ, Ehabụ KỊNỊNYANAḄỌ Izirẹlịapụ tẹkẹarị Tamụnọ ḅe ịganị sịn-saakịma ọ̀ tọrọkọ tarị amadapụ mamgba nẹngịm.

³⁴ Ori ama-daarị eneḅaka ḅụ mịẹ Iyẹlị, Bẹtẹlị ḅẹ ḅọ ḅe siin Jeriko ama mẹ nama yee. KỊNỊNYANAḄỌ ḅe ẹkwẹn-ḅịḅị mẹ wẹrịtẹ Nọnị owiḅọtụḅọ Jọsụwa ḅụụ ḅụ kọọn ḅara, Iyẹlị sukutarị-ḍụḅarị mẹ koroma, mịẹ ori mgbee Abiramu fịị yee; ori ogigo-ḅọkọ ma sụa, mịẹ ori ịrụ-tẹịn owiḅọtụḅọ Sẹgubu fịị yee.