1 Amadapụ 15 - FỊAFỊA BAỊBỤLỤ

Juda Ḅẹ Amadaḅọ Abijamụ

¹ Amadaḅọ Jerobohamụ, Nebatị owiḅọtụḅọ ḅe ama-da tẹ maa kụra fa si karama kụra ḅụ, mịẹ Abijamụ saakị ama-da yee.

² Tẹ ọ̀ nwẹnị tẹra kụra kẹ Jeruselemu ḅụ ama-da. Ò iyingi ẹrẹ Mahaka, Abusalọmụ ẹrẹḅọtụḅọ ma.

³ Ò ḍa mịẹ gbọrụ ḅara ḅẹ asi ma mie ọ̀ mịẹ yee, tẹ busunuma sịḅị-tuu KỊNỊNYANAḄỌ ọ̀ Tamụnọ ḅe pịrị-a, ori opu ḍaḅọ ḍa Devidi wẹrịtẹ sịḅị-tuu ḅara.

⁴ Anị sime-ḅara sime-ḅara sọ, Devidi sịḅị ẹrẹsị, KỊNỊNYANAḄỌ ọ̀ Tamụnọ ḅe nwẹnị gbọrụ tọnjọ kẹ ọ̀ pịrị Jeruselemu ḅio ḅụ, anie ọ̀ ḅụụ ḅụ gbọrụ owiḅọtụḅọ pakama-ḅo tẹ ò kiri ọkị tẹ ama mẹ da tẹ Jeruselemu mịẹ pakama ḅẹ ḅara.

⁵ Gbala Devidi KỊNỊNYANAḄỌ ḅe tọrụ ḅụ kuraye mịẹm tẹ ọ̀ tọn ọ̀ pịrị ye goyegoye ḅụ pịkị jen anga da-a, ò ḍumo-ene mamgba ḅụ, Yuraya Itayịti ḅẹ ḅọ ḅe ḅẹrẹ sikima.

⁶ Abijamụ ama-da sakị mẹmgba ḅụ, Jerobohamụ sịkọpẹlẹ-a ḅara kẹ ori na ọmụ gbinm.

⁷ Kirikọntẹ Abijamụ ye-mịẹ-ḅara na, ọ̀ mịẹ aị mamgba na Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

⁸ Abijamụ nwẹnị fịị, tẹ ịn nwẹnị Devidi opu ama mẹ ḅio ò ḍiḅi. Ori owiḅọtụḅọ Asa nwẹnị ò kiri ḅụ ama-da.

Juda Ḅẹ Amadaḅọ Asa

⁹ Izirẹlị ḅẹ Amadaḅọ Jerobohamụ ama-da tẹ si kụra karama kụra ḅụ mịẹ Asa saakị Juda da yee,

¹⁰ tẹ ọ̀ nwẹnị kụra amesi gbọrụ kụra finji kẹ Jeruselemu ḅụ ama-da. Ori opu-iyingiḅọ anie Mahaka, Abusalọmụ ẹrẹḅọtụḅọ ma.

¹¹ Asa KỊNỊNYANAḄỌ ḅe tọrụ ḅụ kụra ye mịẹm ori atẹngịḅọ Devidi mịẹ ḅara.

¹² Ama mẹ ḅio ori owiapụ na ereme na sẹfị ḍumo mẹ famam tẹ ori aḍapụ ma mịẹ oru mamgba tan-siin famam.

¹³ Ọ̀ nwẹnị pịkị ori opu-iyingiḅọ Mahaka dee-siin amadaḅọ iyingiḅọ kiri ḅụ, gbala arị Asẹra, tọn-tọn oru mẹ kara koroma ye ẹrẹsị; Asa nwẹnị á kpokobia mẹ pẹlẹ-gbin tẹ Kidirọnị ḍawa mẹ ḅụ anị dọkịma.

¹⁴ Kụma gele ayeyọ ma ori arị kan sin-a. Anie mẹmgba, Asa karakara-ḅara-ḅụ ò ḅioḅẹngbọ kẹ KỊNỊNYANAḄỌ ḅe ḍukam ò ḍumo-ene mamgba ḅụ.

¹⁵ Ọ̀ nwẹnị ọ̀ ḍa na ori na sikima tẹ wẹrị fịafịama wararị ḍiepịrị-aị ma, anie golu ma na, seleḅa ma na, ye-sụa-aị ma na, ọkị-ḅo KỊNỊNYANAḄỌ ḅe warị mẹ ḅio sunm.

¹⁶ Ọmụ-ọmụ-ọmụ mie Asa, Juda ḅẹ Amadaḅọ ḅe na, Basa, Izirẹlị ḅẹ amadaḅọ ḅe na gbin yee, ini ama-da ene mamgba ḅụ.

¹⁷ Basa, Izirẹlị ḅẹ amadaḅọ ḅe nwẹnị mu Juda si anga ḅụ sịẹ tẹ Rama nama gbaịn; ọ̀ ḍụkụ tẹ gbọrụḅọ-sọ mẹnjị-so Asa Juda ḅẹ amadaḅọ ḅe ḍọkụma-mu anịanịa mẹnjị-paka ḅịa ḅara.

¹⁸ Anịtẹso Asa nwẹnị KỊNỊNYANAḄỌ ḅe warị mẹ ḅio ngọ ma na, amadaḅọ ḅe warị ḅio ḅẹ ngọ ma na, kọn wararị golu mẹ na seleḅa mẹ na ọkị tẹ kẹ ori afịrịmẹnjịapụ ḅara sụa; tẹ ịn nwẹnị arị kẹ Siriya ḅẹ amadaḅọ Bẹnị-hadadị, Tabirimọnị owiḅọtụḅọ pịkị Eziyọnị taa-owiḅọtụḅọ ḅe tẹ Damasịkọsị ḅụ sime ḅọ ḅe fịrịma tẹ ḅẹẹm,

¹⁹ “Yee yẹrị na ị́yẹrị na ogboku ḅụ ḅarasụa jụmọ-jụmọ pịrị, pịkị gbọrụḅụụ-sime paka, anị wẹrịtẹ ị́ ḍa na ị̀ ḍa na ogboku sime-ḅara: ḍikii, à golu na seleḅa na ḍiepịrịye kẹ ị́ fịrịmarị; muu, Basa, Izirẹlị ḅẹ amadaḅọ ḅe ị́nịna nyana ḅarasụa jụmọ-jụmọ pịrị mẹ, pịkị gbọrụḅụụ-sime mẹ kaan, mịẹtẹ ori ị̀ ḅụụ ọ́ ḅụụ nụnụ ọkị ḅẹ ḅara”.

²⁰ Bẹnị-hadadị nwẹnị Amadaḅọ Asa ḅịḅị poki tẹ nwẹnị ḅẹrẹtọn ori ọmụ-ogbo ma pịrịarị apụ ma fịrịma mu Izirẹlị ḅẹ opu ama ma si anga sịẹ, tẹ ịn nwẹnị Ijọnị na, Danị na, Ebẹlị-bẹtị-mahaka na Kịnẹrẹtị na Nafutali iri ḅụ sime ama mamgba na nẹngịma.

²¹ Basa miemẹ naa tẹso, ọ̀ nwẹnị Rama nama gbaịn mẹ dasịẹma tẹ Tariza ḅụ anga.

²² Anịtẹso Amadaḅọ Asa nwẹnị gbọrụḅọ-sọ sikima-a ḅara kẹ kpo-kpo gbolo Juda ḅụ sime apụ mamgba pịrị, tẹ ịn nwẹnị Rama ḅụ sime aḍụḅarị ma na anị ḅẹ opu asịn-ḅiri ma na dogi siin arị aị ma tẹ Basa kẹ nama sime aị ma. Amadaḅọ Asa nwẹnị arị ọkị tẹ kẹ Benijamịnị ye-yọ ḅụ Geba opu ama mẹ na Mizipa na nama kụrọma.

²³ Mịọkụ kirikọntẹ Asa ye-mịẹ-ḅara mẹmgba, ọ̀ kụrọ mẹmgba, ọ̀ mịẹ aị mamgba, na ọ̀ nama opu ama mamgba na, Juda Amadapụ Ma Aḅụụ Paka-aị Ḍiri mẹ ḅio kẹẹ wararị. Kụma ori omongi sakị ḅụ ọ̀ nwẹnị ḅụọ-obi kọn.

²⁴ Asa nwẹnị fịị, tẹ ịn nwẹnị ọ̀ ḍa Devidi opu ama mẹ ḅio ori aḍapụ ma ḍiḅi anga ḅụ ò ḍiḅi. Jehosafatị ori owiḅọtụḅọ nwẹnị ò kiri ḅụ ama-da.

Izirẹlị Ḅẹ Amadaḅọ Nadabụ

²⁵ Amadaḅọ Asa Juda ḅụụ ama-da tẹ maaịn karama kụra ḅụ mịẹ Jerobohamụ owiḅọtụḅọ Nadabụ saakị Izirẹlị ḅụ ama-da yee.

²⁶ Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, ori ọ̀ ḍa mẹnjị etela ḅụ mẹnjịm, tẹ pịkị ò si mẹ tẹ ori Izirẹlịapụ mịẹtẹ in mịẹ si mẹ mịẹm.

²⁷ Ịsaka warị ḅẹ Ahija owiḅọtụḅọ Basa nwẹnị ọ̀ kẹ ḅẹrẹ-ḅiya tẹ ọ̀ tẹịn-gbin Gibẹtọnị sime Filisiteniapụ pịrị ye-yọ ḅụ; gbala Nadabụ na Izirẹlị mẹmgba na Gibẹtọnị ikelema-koro tẹ owu kẹ anị paka ḅẹ-yearị.

²⁸ Mịẹ Basa wẹrịtẹ ọ̀ ḅaa ḅara, Juda ḅẹ amadaḅọ Asa ama-da tẹ tẹrẹị karama kụra ḅụ, tẹ nwẹnị ò kiri ọkị tẹ ama mẹ da.

²⁹ Ò ḅo amadaḅọ sọ gbọrụ sakị, ọ̀ nwẹnị Jerobohamụ warị mẹmgba ḅaa fama; ò ḍumo wararị gbọrụḅọ-sọ kọnma Jerobohamụ warị mẹ pịrị-a, KỊNỊNYANAḄỌ ḅe wẹrịtẹ ọ̀ fịrịmẹnjịḅọ Ahija, Silo ḅẹ ḅọ ḅe ḅụụ ẹkwẹn-kọn ḅara;

³⁰ Jerobohamụ mịẹ asi ma, tẹ pịkị mịẹtẹ Izirẹlị mẹ so mịẹ wararị asi ma ḅụụ ḅo ye ḅụ, mịẹ ọ̀ KỊNỊNYANAḄỌ ḅe, Izirẹlịapụ tẹkẹarị Tamụnọ ḅe ịganị sịn sakị yee.

³¹ Mịọkụ kirikọntẹ Nadabụ ye-mịẹ-ḅara na ọ̀ mịẹ aị mamgba Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

³² Ọmụ-ọmụ-ọmụ mịẹ Asa, Juda ḅẹ Amadaḅọ ḅe na, Basa, Izirẹlị ḅẹ amadaḅọ ḅe na gbin yee, ini ama-da ene mamgba ḅụ.

Izirẹlị Ḅẹ Amadaḅọ Basa

³³ Juda ḅẹ amadaḅọ Asa tẹrẹị karama kụra ḅụ mịẹ Ahija owiḅọtụḅọ Basa sakị Tariza ḅụ sime tẹ Izirẹlị mẹmgba da yee, tẹ nwẹnị si inia kụra finji kẹ ama-da.

³⁴ Ò KỊNỊNYANAḄỌ ḅe ḍiki-tọrụ ḅụ siye mịẹm, ò Jerobohamụ mẹnjị etela ḅụ mẹnjịm, tẹ pịkị ò si mẹ tẹ ori Izirẹlịapụ mịẹtẹ in mịẹ si mẹ mịẹm.