1 Amadapụ 14 - FỊAFỊA BAỊBỤLỤ

Jerobohamụ Owiḅọtụḅọ Ḅe Fịị Mẹ

¹ Anị sakị ḅụ Abija, Jerobohamụ owiḅọtụḅọ ḅe nwẹnị obi.

² Jerobohamụ nwẹnị ọ̀ ta ḅẹẹ, “Saakịị, tẹ ị́ ḅụụ ḍimaa, mịẹtẹ gbọrụḅọ-sọ nimi ḅịa mịnẹ ị́yẹrị Jerobohamụ ta ḅara, tẹ Silo muu: ḍikii, Ayija ịkịankoroḅọ ḅe tẹ ḅẹẹm arị Izirẹlị ḅụ amadaḅọ sọ ḅa ḅẹẹ ḅọ ḅe ori anịanga ḅụ emii.

³ Fịturu oyi akpo na, kịkị na ḅẹm gbọrụ jongo na ọkị tẹ kẹ ọ̀ ḍọkụma-mu tẹ ò gbela ọ̀ tụḅọ ḅe ḅụụ paka ḅẹ ye ḍuko ị́ pịrị ḅa.”

⁴ Jerobohamụ ta nwẹnị ọkọ mịẹ tẹ saakị so Silo mu, tẹ ḅo Ayija warị la. Mịọkụ Ayija ḅarị inetẹ ye ẹrị-a, omongi ọ̀ tọrụngbọ ḅutuḅutuma tẹ ẹrẹsị.

⁵ KỊNỊNYANAḄỌ ḅe nwẹnị Ayija ḅẹẹ, “ḍikii, Jerobohamụ ta ḅo ị́ ḅara ḅụ arị owiḅọtụḅọ gbolomaye gbela ḅe ḅoarị, gbala ori obiarị. Mịẹ ị́ kẹ á ḅẹẹ ḅarị ḅara.” Á ḅo la sakị, á nwẹnị gbala jen ẹrẹḅọ kịka ḅara kẹ ḅụụ wẹrị.

⁶ Kụma á ḅọkọ mẹ ḅụ mẹnjị-so ḅoarị tẹ ori á ḅụọ fieye naa tẹso, ọ̀ nwẹnị ḅẹẹ, “So ḅoo, Jerobohamụ ta. Í tiegotẹ jụmọ kịka ḅara kẹ ḅụụ wẹrị? Àrị iku tẹ oku-ḅịḅị nyana ị́ wẹrịma wararị.

⁷ Mu tẹ ḍuko Jerobohamụ pịrịị. Mịẹ KỊNỊNYANAḄỌ, Izirẹlịapụ tẹkẹarị Tamụnọ ḅe ḍuko yee, ‘Gbala tomina ogboku ḅụụ arị ị́ saakị-gelema tẹ ị́ kẹ Izirẹlị ì atomi ma tọrọkọ-tarịḅọ mịẹm,

⁸ tẹ nwẹnị amakiri mẹ kan-siin Devidi warị ḅụ tẹ anị kẹ ị́ pịrịm; kụma anịsọ ị́ paa ị̀ fịrịmẹnjịḅọ Devidi kịka-a, ori ḅe tẹ ì oloko ma koko, tẹ ò ḅioḅẹngbọ mẹmgba kẹ ì ḍukamẹnjị tẹ ị̀ tọrụ ḅụ kuraye ngẹrị mịẹm,

⁹ kụma ị́yẹrị si mịẹ ị́ ọḅụjụ ama-da so tẹ apụ mamgba nẹngị fama tẹẹ, tẹ mu ja oru-atamụnọ nyana, tẹ ḅara kẹ ye kịkama tẹmẹ tẹ kẹ ị́ ḅụụ pịrị tẹ ị̀ kẹ ị́ ọḅụjụ gbin-koroma tẹẹ, tẹ ịganị sịn sakị tẹ ì ḅụụ ḅụ;

¹⁰ Ọkọẹrẹsị ḍikii, à fị-na-fa-na ọkị-ḅo Jerobohamụ warị ọgọnọ ḅụ gbana ḅa, tẹ Izirẹlị mẹ ḅụ owiḅọ goḅọ-goḅọ pẹlẹ-siin ḅa Jerobohamụ warị ḅụ, anị ḍaḅọ-tụḅọ-o, furo-tụḅọ-o sọ, tẹ tomḅọ sịḅị-ngụngụnma aị dọkịma nwenii arị dọkịma nguma fama ḅara, à nwẹn kẹ Jerobohamụ warị mẹ ọfịn siin ḅa.

¹¹ Sime Jerobohamụ pịrị tẹ opu ama mẹ ḅio fịị ḅọ fịị ḅọ, obiri mḅọ pẹị ḅa; tẹ opu sịẹ mẹ ḅio fịị ḅọ fịị ḅọ, So-tọrụ ḅẹ afeni ma mḅọ pẹị ḅa, gbala yẹrị KỊNỊNYANAḄỌ ḅe anị ḍuko tẹ ẹrẹsị.’

¹² Ọkọẹrẹsị saakịị, so ama muu. Ị́ ḅụọ opu ama mẹ la gbọrụ sakị, tụḅọ ḅe fịị ḅa.

¹³ Izirẹlịapụ mamgba kururu ọ̀ pịrị tẹ ò ḍiḅi ḅa. Ori ngẹrị mịẹ Jerobohamụ warị ḅụ ḍuḅu ḅio ḍiḅi ḅarị ḅo, gbala Jerobohamụ warị mẹ ḅio, ọ̀ ḅụụ ḅụ KỊNỊNYANAḄỌ Izirẹlịapụ tẹkẹarị Tamụnọ ḅe ḅioḅẹlẹmarị ye emii.

¹⁴ Anịtẹrẹmẹ KỊNỊNYANAḄỌ ḅe ọ̀ ḅụụ ḅẹlẹ gbọrụḅọ saakị pakama-ḅo Izirẹlị ḅụ amadaḅọ mịẹ ḅa, ori ḅe tẹ mịmgbaa ḅụ Jerobohamụ warị mẹ pẹlẹ-siin ḅarị ḅo.

¹⁵ Ọkị tọrọkọ mu ḅụ, KỊNỊNYANAḄỌ ḅe Izirẹlị mẹ fomu tẹ á minji ḅio so-paka kpọ-a sịn jike ḅara jike ḅa, tẹ Izirẹlị soku-siin ḅa mị iḅi ama mẹ tẹ ọ̀ kẹ ịna aḍapụ ma pịrị ye mẹ ḅụ, tẹ in gala-galama Yuferetisi mẹ saḅama ḅa, gbala ịn Asịra kẹ ịna ere-oru mịẹ ye ḅụ in KỊNỊNYANAḄỌ ḅe ịganị sịn-saakịma tẹ ẹrẹsị.

¹⁶ Ori Izirẹlị kẹ gbin koroma ḅa, Jerobohamụ mịẹ asi ma, tẹ Izirẹlịapụ ma ḅọrọma mu si ḅio sunm ẹrẹsị.”

¹⁷ Anịtẹso Jerobohamụ ta nwẹnị saakị tẹ pịkị so mu Tariza la. Á paa ḅo warị-ḅọkọ mẹ la gbọrụ sakị mịẹ tụḅọ ḅe fịị yee.

¹⁸ Izirẹlị mẹmgba nwẹnị ò ḍiḅi tẹ kururu ọ̀ pịrị, KỊNỊNYANAḄỌ ḅe ẹkwẹn-ḅịḅị mẹ, tẹ ọ̀ kọọn kẹ ọ̀ fịrịmẹnjịḅọ ịkịankoroḅọ Ayija pịrị ḅara ḅụ.

Jerobohamụ Fịị Mẹ

¹⁹ Mịọkụ kirikọntẹ Jerobohamụ ye-mịẹ-ḅara goyegoye, ọ̀ wẹrịtẹ ọmụ gbin ḅara na ori ama-da ḅara na, Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

²⁰ Sakị tẹ Jerobohamụ kẹ ama-da ye anie si maa kụra finji; tẹ ọ̀ nwẹnị fịị, tẹ ori owiḅọtụḅọ Nadabụ nwẹnị ò kiri ḅụ ama-da.

Juda Ḅẹ Amadaḅọ Rihobohamụ

²¹ Sọlọmọnị owiḅọtụḅọ Rihobohamụ Juda ḅụụ ama-da sakị ọ̀ sịḅị kụra amesi, gbọrụ kụra finji ḅọrọ tẹẹ, tẹ nwẹnị tẹra kụra fa si kẹ Jeruselemu, Izirẹlị ibe mamgba ḅụ KỊNỊNYANAḄỌ ḅe kẹ in sunsin ọ̀ pịrị ḅẹ anga gotẹ sẹlẹ-ọkị opu ama mẹ ḅụ ama-dam. Ò iyingi ẹrẹ Nahama, Amọnị ḅẹ ẹrẹḅọ.

²² Juda KỊNỊNYANAḄỌ ḅe tọrụ ḅụ si mịẹm tẹ nwẹnị ori ịganịma tẹ ori ịna asi ma tẹ in mịẹ ịna aḍapụ mịẹ asi mamgba nẹngị asi ma afanam.

²³ In gbala gele anga sọ nama ịna ḅụụ pịrịm, ịḅalị pike, Asịra fụḅara mịẹ koroma gele tẹ tụndụ ọgọnọ goyegoye ḅụ na, eleleinda-tọrụ ḅịa opu sịn suku goyegoye ḅụ;

²⁴ tẹ ereme na owiapụ na nwẹnị gbọrsịḅị ama mẹ ḅio sime tẹ sẹfị, tẹ opu sịẹ mẹ ḅio in mịẹ tọn-tọn-aị tẹ KỊNỊNYANAḄỌ ḅe dee tẹrẹmẹ Izirẹlịapụ ma sọ-ḅo aị mamgba ini ọkọ kẹ arị mịẹ famam.

²⁵ Amadaḅọ Rihobohamụ ḅo ama-da tẹ sọnọa kụra karama kụra ḅụ, mie Ijiputi ḅẹ amadaḅọ Sisakị ḅo owu kẹ Jeruselemu paka yee.

²⁶ Ọ̀ nwẹnị KỊNỊNYANAḄỌ ḅe Tẹkẹ-warị mẹ ḅio na, amadaḅọ ḅe warị mẹ ḅio ịn kẹ koko wẹrị ngọ mamgba ọkị so fama. Ọ̀ nwẹnị pịkị Sọlọmọnị golu kẹ mịẹ ekpeke mamgba kẹ sụa so.

²⁷ Amadaḅọ Rihobohamụ nwẹnị ojo-ikulele kẹ mịẹ ekpeke kẹ arị akiri ḅụ koroma, tẹ nwẹnị arị kẹ amadapụ warị mẹ ḅẹ ogigo-ḅọkọ ma ḍikiḍikiarị opu fịrịmẹnjịapụ ma ḅara ḅụ sụa.

²⁸ Amadaḅọ ḅe KỊNỊNYANAḄỌ ḅe Tẹkẹ-warị mẹ ḅo sakị ḅo sakị ḅụ, ḅọkọ ḍikiḍikiapụ ma ekpeke ma dogi ḅa, ye tẹ ḅẹḅẹ in pịkị arị ọkị-ḅo ḅọkọ ḍikiḍikiapụ ḅio mẹ ḅụ wẹrị tẹẹ.

²⁹ Mịọkụ kirikọntẹ Rihobohamụ ye-mịẹ-ḅara goyegoye, na ọ̀ mịẹ aị mamgba na Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

³⁰ Sịkọpẹlẹ-a ḅara Rihobohamụ na Jerobohamụ na nwẹn kẹ mị sakị mamgba ḅụ ọmụ gbinm.

³¹ Rihobohamụ nwẹnị fịị, tẹ ịn nwẹnị ò ḍiḅi Devidi opu ama mẹ ḅụ. Ò iyingi ẹrẹ Nahama, Amọnị ḅẹ ẹrẹḅọ ma. Ori owiḅọtụḅọ Abija nwẹnị ò kiri ḅụ ama-da.