1 Amadapụ 13 - FỊAFỊA BAỊBỤLỤ

¹ KỊNỊNYANAḄỌ ḅe tọn ḅara ḅụ, gbọrụ ịkịankoroḅọ nwẹnị Juda ḅụ ḅo Bẹtẹlị la Jerobohamụ agbamịẹ-anga mẹ akaka ḅụ sịẹsime tẹ agba mịẹ ḅẹ-yearị ogbo.

² Ịkịankoroḅọ ḅe nwẹnị oloku agbamịẹ-anga mẹ pịrị tẹ ḅẹẹ, “Yei agbamịẹ-anga, agbamịẹ-anga, mịẹ KỊNỊNYANAḄỌ ḅe ḍuko yee, ‘in Josaya kẹ sịịn ḅẹ gbọrụ owiḅọtụḅọ iyi Devidi warị mẹ pịrị ḅa. Ori ị́ ọgọnọ ḅụ gele anga ma ḅụ agbamịẹapụ ma kẹ agba mịẹ ḅa, tẹ tomina mgbe ọ̀ nwẹn dọkịma ḅa ị́ ọgọnọ ḅụ.’ ”

³ Ịkịankoroḅọ ḅe nwẹnị gbọrụ elekima ḍuko ọ̀ pịrị anị gbọrụ ene mẹ ḅụ tẹ ḅẹẹm, “Mị agbamịẹ-anga mẹ kaan-sara ḅa, tẹ anị ọgọnọ ḅẹ fọọn ma gala-gala ḅa.”

⁴ Amadaḅọ Jerobohamụ ịkịankoroḅọ ḅe Bẹtẹlị ḅẹ agbamịẹ-anga mẹ si anga ḅụ ḍukoye mẹ naa tẹso, ọ̀ nwẹnị ọ̀ ḅara sụn pakama-ḅo agbamịẹ-anga mẹ ḅụ tẹ ḅẹẹm, “ọmịnị ori ọlọọ!” Tẹ anị ḅara mẹ tẹ ọ̀ sụn pakama-ḅo ọ̀ da ye mẹ nwẹnị samụnọ tẹ ọ̀ ḅarị inetẹ anị nụnụ pịkị ọ̀ ḅụụ pịrị-a

⁵ Agbamịẹ-anga mẹ nwẹnị pịkị kaan-sara, tẹ fọọn ma nwẹnị gala-gala kiri ḅio sara, anie ịkịankoroḅọ ḅe KỊNỊNYANAḄỌ ḅe ẹkwẹn-ḅịḅị ḅụ ọ̀ kẹ ọ̀ pịrị elekima mẹ.

⁶ Amadaḅọ Jerobohamụ nwẹnị Tamụnọ tomḅọ ḅe ḅẹẹ, “KỊNỊNYANAḄỌ, ị́ Tamụnọ ḅe ḍiki-ḅụụjịrị ḅii, tẹ tẹkẹ ị̀ pịrị, mịẹtẹ ị̀ ḅara mẹ ḅo anị sime-ḅara sime ḅẹ ḅara”. Tẹ Tamụnọ tomḅọ ḅe nwẹnị KỊNỊNYANAḄỌ ḅe ḅara ḅụ ḅii, tẹ amadaḅọ ḅe ḅara mẹ nwẹnị ḅo anị sime-ḅara sime.

⁷ Anịtẹso amadaḅọ ḅe nwẹnị Tamụnọ tomḅọ ḅe ḅẹẹ, “ị̀ na ama ḅoo tẹ ye kalịye kẹ ḅịḅị lamaa, tẹ à gbẹẹ-ye kẹ ị́ pịrị.”

⁸ Tamụnọ ịkịankoroḅọ ḅe nwẹnị amadaḅọ ḅe ḅẹẹ, “ị́ ị́ warị kẹ maa anga ḍie tẹ gbọrụ anga kẹ ị̀ pịrị ḅẹsọ, arị ị́ na so ḅịa, anịanịa ye fị, anịanịa minji ḅuu mị anga ḅụ.

⁹ Gbala mịẹ KỊNỊNYANAḄỌ ḅe ori ẹkwẹn-ḅịḅị ḅụ tọn ị̀ pịrị ḅara, ‘ị́ gbọrụ anga ḅụ sọ ye fị, anịanịa minji ḅuu, anịanịa í ḅo etela ḅụ pịkị-so ḅịa.’ ”

¹⁰ Anieḅụ ọ̀ ḅarị ọ̀ ḅọrọ Bẹtẹlị ḅo etela ḅụ ḅọrọ-soa kụma jen etela ḅụ.

Bẹtẹlị Ḅụ Sime Elemu Ịkịankoroḅọ

¹¹ Anịsakị ḅụ Bẹtẹlị ḅụ gbọrụ elemu ịkịankoroḅọ simem. Ori owiapụ-awọmẹ nwẹnị ḅo tẹ Juda ḅụ ḅo ịkịankoroḅọ ḅe anị ene Bẹtẹlị ḅụ mịẹ ye mẹmgba ḍuko ọ̀ pịrị; ẹkwẹn tẹ ò kọn amadaḅọ ḅe pịrị aị ma sọ in ḍuko ịna ḍaḅọ pịrịm.

¹² Ịna ḍaḅọ elemu ịkịankoroḅọ ḅe nwẹnị in gbela, “ọ̀ tọ etela ḅụ ḅọrọ so, ò so sakị?” Ịn nwẹnị ọ̀ ḅọrọ-so etela kẹ ò ḍie.

¹³ Ọ̀ nwẹnị ori owiapụ-awọmẹ ma ḅẹ, “Gbọrụ asụ tẹlẹma ị̀ pịrị.” Anieḅụ ịn nwẹnị gbọrụ asụ tẹlẹma ọ̀ pịrị tẹ ọ̀ dọkụ paka.

¹⁴ Ọ̀ nwẹnị Juda ḅụ ḅo ịkịankoroḅọ ḅe dama-mu, tẹ ori ẹrị ori ọgbọkọ pembe opu sịn, oku suku lẹgị sime wararị. Ọ̀ nwẹnị ò gbela, “Ị́yẹrị anie Tamụnọ ịkịankoroḅọ ḅe tẹ Juda ḅụ ḅo ḅọ ḅe aro?” Ọ̀ nwẹnị pakịrị, “Yẹrịị”

¹⁵ Anịtẹso ọ̀ nwẹnị ọ̀ ḅẹẹ, “Ị̀ na warị mu tẹ yefịị.”

¹⁶ Kụma Juda ḅụ ḅo ịkịankoroḅọ ḅe nwẹnị pakịrị, “Àrị ị́ na pịkịma-so, anịanịa ị́ kẹ ị̀ na sime ḅarị iḅi ḅara mẹ daa-ọkị, anịanịa yefị, anịanịa ḅẹẹye-ḅẹẹye sọ ḅuu ḅịa anịanga ḅụ;

¹⁷ gbala KỊNỊNYANAḄỌ ḅe ẹkwẹn-ḅịḅị mẹ ḅo ị̀ ḅẹẹm, ‘ị́yẹrị ḅe anịanga ḅụ yefị, anịanịa minji ḅuu, anịanịa ị́ ḅọrọ ḅo etela ḅụ pịkị pịkịma-so ḅịa.’ ”

¹⁸ Anịtẹso Bẹtẹlị ḅụ ḅo elemu ịkịankoroḅọ ḅe nwẹnị ọ̀ ḅẹẹ, “Yẹrị ḅe sọ í pembe ịkịankoroḅọ tẹ gbọrụ enjẹlị ḅo KỊNỊNYANAḄỌ ḅe ẹkwẹn-ḅịḅị ḅụ ẹkwẹn ị̀ pịrịm, tẹ ḅẹẹm, ‘Ori na pịkịma ị́ warị ḅio sọ-ḅo tẹ mịẹtẹ ò yefị tẹ minji ḅuu ḅẹ ḅara.’ ” Kụma ori iruo kọn ọ̀ pịrịm.

¹⁹ Anieḅụ ọ̀ nwẹnị ori na pịkịma-so, tẹ ọ̀ warị ḅụ yefị tẹ minji ḅuum.

²⁰ In dẹbịlẹ mẹ suku lẹgị wararị ogbo, KỊNỊNYANAḄỌ ḅe nwẹnị ẹkwẹn ọ̀ kẹ pịkị-so elemu ịkịankoroḅọ ḅe pịrị,

²¹ tẹ ọ̀ nwẹnị ḍuko Juda ḅụ ḅo ịkịankoroḅọ ḅe pịrị, “Mịẹ KỊNỊNYANAḄỌ ḅe ḍuko yee, ‘Ị́ gbala KỊNỊNYANAḄỌ ḅe ẹkwẹn-ḅịḅị mẹ poki tẹ ori oloko ma tẹ KỊNỊNYANAḄỌ ị́ Tamụnọ ḅe tọn ị́ pịrị aị ma koko-a,

²² kụma pịkị-ḅo, tẹ yefị, tẹ pịkị minji ḅuu tẹẹ ori í ḅẹẹm yefị ma, pịkị minji ḅuu ma nwẹn ḅẹẹ anga mẹ ḅụ ẹrẹsị, í oju mẹ ḅo ị́ aḍapụ ma ḍuḅu mẹ la ḅịa.’ ”

²³ Ò fịye mẹ fị fama tẹ minji ḅuu fama tẹso, elemu ịkịankoroḅọ ḅe nwẹnị asụ tẹlẹma kẹ Juda ḅẹ ịkịankoroḅọ ḅe pịrị.

²⁴ Ò dọkụ soarị ogbo, ọkụkụ nwẹnị etela mẹ ḅụ ori na donia tẹ ọ̀ ḅaa. Ori oju-akpakpa mẹ nwẹnị etela mẹ ḅụ gbiin-koro sime, tẹ asụ ḅe na, ọkụkụ ḅe na nwẹnị oju-akpakpa mẹ akaka ḅụ sịẹsime.

²⁵ Ḍikii, mẹnjị-ḅọrọ apụ nwẹnị etela mẹ ḅụ oju-akpakpa koro-sime wararị, tẹ ọkụkụ ḅe pịkị oju-akpakpa mẹ akaka ḅụ sịẹsime ḅara mẹ ẹrị. In nwẹnị ḅo Bẹtẹlị elemu ịkịankoroḅọ ḅe sime opu ama mẹ la tẹ anị ḍuko.

²⁶ Elemu ịkịankoroḅọ ḅe tẹ ọ̀ pịkịma ḅo ḅọ ḅe miemẹ naa sakị, ọ̀ nwẹnị ḅẹẹ, “Anị ịkịankoroḅọ ḅe tẹ KỊNỊNYANAḄỌ ḅe ẹkwẹn-ḅịḅị mẹ poki-a ḅo ori; ọkọẹrẹsị KỊNỊNYANAḄỌ ḅe ọ̀ kẹ ọkụkụ ḅe pịrị tẹ ori ò kanị-kọsịma tẹ ọ̀ ḅaa tẹẹ, KỊNỊNYANAḄỌ ḅe wẹrịtẹ ẹkwẹn kọn ọ̀ pịrị ḅara ḅụ.”

²⁷ Anịtẹso ọ̀ nwẹnị ori owiapụ-awọmẹ ma ḅẹẹ, “ị̀ asụ tẹlẹma ị̀ pịrịị.” Ịn nwẹnị ọkọ mịẹ.

²⁸ Tẹ ọ̀ nwẹnị dọkụ so, tẹ ori oju-akpakpa ḍọkị ẹrị, anị etela mẹ ḅụ koro-sime wararị tẹ asụ ḅe na, ọkụkụ ḅe na paa anị akaka ḅụ sịẹsime wararị. Ọkụkụ ḅe amụ oju-akpakpa mẹ pẹị-a, amụ ò pịkị asụ ḅe kanị-a.

²⁹ Elemu ịkịankoroḅọ ḅe nwẹnị Juda ḅẹ ịkịankoroḅọ ḅe oju-akpakpa mẹ sakị asụ ḅe ọgọnọ gbana tẹ anị kẹ Bẹtẹlị ḅo, kururu anị pịrị tẹ anị ḍiḅi ḅẹ ẹrẹsị.

³⁰ Ọ̀ nwẹnị anị kẹ sime ọ̀ pịrị ḍuḅu ḅio ḍiḅi tẹ ịn nwẹnị ò gotẹ kururu, ḅẹẹarị “yei iyimbere!”

³¹ Ori ò ḍiḅi tẹso, ọ̀ nwẹnị ori owiapụ-awọmẹ ma ḅẹẹ, “À fịị tẹ ḅẹḅẹ ọmịnị ị̀ kẹ mị ḍuḅu mẹ ḅio, Tamụnọ ịkịankoroḅọ ḅe ḍiḅi akaka ḅụ ḍiḅii, ì mgbe ma ori mgbe na koro-sime.

³² Gbala KỊNỊNYANAḄỌ ḅe ẹkwẹn-ḅịḅị mẹ tẹ ọ̀ kọn Bẹtẹlị ḅio ḅụ sime agbamịẹ-anga mẹ na, Sameriya ḅe ama ma ḅụ sime gele-ayeyọ ma ḅụ simearị oru-awarị mamgba pịrị ẹkwẹn mẹ karakara-ḅara-ḅụ paka ḅa.”

Fị-dogiḅo Si Tẹ Jerobohamụ Mịẹye

³³ Miemẹ ḅọrọ tẹso, Jerobohamụ ò si etela mẹ ḅụ pịkị-a, kụma tomi mamgba ḅụ, ḅẹḅọ-ḅẹḅọ tẹ agbamịẹḅọ sọ ḅẹ ḅii ḅọ goḅọ-goḅọ ọ̀ pịkị kẹ agbamịẹḅọ sọma tẹ kẹ gele anga ma pịrịm.

³⁴ Miemẹ nwẹnị si sọ kẹ Jerobohamụ warị mẹ pịrị nwenii tẹ tomikiri tọrụ mẹ ḅụ anị ẹrẹ ḅarị goo-a.