1 Amadapụ 12 - FỊAFỊA BAỊBỤLỤ

Ḍiematẹ Amakiri Mẹ

¹ Rihobohamụ nwẹnị Sẹkẹmụ mu gbala Izirẹlịapụ mamgba ọ̀ kẹ amadaḅọ mịẹ gotẹ Sẹkẹmụ ḅo tẹ

² Jerobohamụ, Nebatị owiḅọtụḅọ, ori ḅe tẹ Sọlọmọnị ḅara ḅụ mangị-so Ijiputi mu ḅọ ḅe mị inume mẹ naa tẹso, ọ̀ nwẹnị Ijiputi ḅụ pịkịma-ḅo

³ tẹso, ịn nwẹnị fịrịma ọ̀ sịn; tẹ Jerobohamụ na Izirẹlị ḅẹ kobiri-ogbo mẹmgba na nwẹnị Rihobohamụ ḅẹẹ,

⁴ “ị́ ḍa iku dogiye kẹ wamịna ọgọnọ gbanam. Ị́ nwẹnị ori iku dogiye mẹ mịẹ feke-fekema, pịkị ọ̀ fịrị mẹ mịẹ sarasarama wa pịrị ḅarị ḅẹḅẹ, wa sịḅị-tuu tẹ fịrịmẹnjị ị́ pịrị ḅa.”

⁵ Ọ̀ nwẹnị in ḅẹẹ “Ó soo, tẹ tẹra aḍin ḅụ ó siin pịkị ị̀ ḍọkụma-ḅoo.” Anieḅụ tomi ma nwẹnị mẹnjị-so.

⁶ Anịtẹso Amadaḅọ Rihobohamụ nwẹnị ọ̀ ḍa Sọlọmọnị ḍumo sakị ḅụ daa-karakarama ẹkwẹn kọn ọ̀ pịrị-pịrị omongiapụ ma gbela, “Ọ́ tọ-ḅara kẹ ì daa-karakarama tẹ à kẹ mịna atomi ma pakịrị ḅẹ?”.

⁷ Ịn nwẹnị ọ̀ ḅẹẹ, “Ị́ nwẹnị mịmgba ḅụ fịrịmẹnjịḅọ sọ mịna tomi ma pịrị ḅa tẹ kọrịnama kọrị ịn pịrị, tẹ ị́ ịn pakịrị ḅẹ sakị iḅi ẹkwẹn kọn in pịrị-pịrị, anịrẹ ini ị́ afịrịmẹnjịapụ sọ gbamaso ḅa.”

⁸ Kụma ọ̀ nwẹnị omongiapụ ma kẹ ọ̀ daa-karakarama ḅara mẹ sịkị, tẹ nwẹnị ọ̀ ḅara ḅẹ asawọ ma sịn ọ̀ tọrọkọ ḅụ sịẹma.

⁹ Ọ̀ nwẹnị in gbela, “Ọ́ tọ daa-karakarama ẹkwẹn kọn tẹ wa kẹ mịna atomi ma tẹ ị̀ ḅẹẹm, ‘ị́ ḍa kẹ wamịna ọgọnọ gbana ikuye mẹ mịẹ feke-fekema ḅẹ apụ ma pakịrị ḅẹ?’ ”

¹⁰ Ọ̀ ḅara ḅẹ asawọ ma nwẹnị ọ̀ ḅẹẹ, “Mịna atomi ma tẹ ị́ ḅẹẹm ‘Ị́ ḍa wamịna ikuye mịẹ ikumam, kụma í gbeke anị mịẹ feke-fekema wa pịrị ḅẹ’ ḅẹẹ apụ ma, mị-ḅara mịẹ ị́ kẹ ịn ḅẹẹ ḅarị ḅara, ‘Ị̀ kala ḅara-tụngbalị kpokoro ị̀ ḍa ḅiri nẹngịm’.

¹¹ Ịn ḅẹẹ, ị̀ ḍa fomuye mịẹ ọ̀ kẹ ó fomu-fomuye ḅẹḅẹ, asụ-fomuye mịẹ à kẹ ó fomu ḅarịye!”

¹² Tẹra ḍin ḅọrọ tẹso, Jerobohamụ na tomi mamgba na nwẹnị amadaḅọ Rihobohamụ ḍọkụma-ḅo ọ̀ wẹrịtẹ in ḅẹẹ ḅara.

¹³ Amadaḅọ ḅe nwẹnị omongiapụ ma kọọn ọ̀ pịrị datụkụma ẹkwẹn mẹ sịkị tẹ nwẹnị gadapụ-gadapụ ḅara kẹ ẹkwẹn tomi ma pịrị,

¹⁴ asawọ ma kẹ wẹrịtẹ ọ̀ datụkụma ḅara, ori mẹẹ “Ị̀ ḍa iku-aị kẹ ọmịna ọgọnọ gbanam: àrị arị mịẹtẹ arị iku ḅaka ḅa. Fomuye mịẹ ọ̀ kẹ ó fomu-fomuye, kụma asụ-fomuye mịẹ à kẹ ó fomu ḅarịye”

¹⁵ Amadaḅọ ḅe gotẹ tomi ma poki-a ye mẹ anie KỊNỊNYANAḄỌ ḅe ḅara ḅom, kẹ mịẹtẹ ịkịankoroḅọ Ayija, Silo ḅẹ ḅọ ḅe kọọn Jerobohamụ, Nebatị owiḅọtụḅọ ḅe pịrị ẹkwẹn mẹ paka ḅẹ ḅara.

¹⁶ Bebe Izirẹlịapụ mamgba ḅo amadaḅọ ḅe kẹ in poki-a ḅara mẹ ẹrị tẹso, tomi ma nwẹnị amadaḅọ ḅe pakịrị, “Wa Devidi ḅụ tọ ḍiekiri nyana? Jese owiḅọtụḅọ ḅe ḅụụ wa ḍuḅu fị nyana-a. Yei Izirẹlịapụ, ‘ọrụ-warị-warịye-gbọ-kị-gbọ’! Devidi, tọrụ-pịkị ị́ nyana warị mẹ ḍikii mịọkụ.” Anieḅụ Izirẹlịapụ mamgba nwẹnị so ịna warị mu.

¹⁷ Kụma Izirẹlịapụ ma tẹ Juda opu ama ma ḅio angarị apụ ma, Rihobohamụ ịna amadaḅọ sọm.

¹⁸ Anịtẹso amadaḅọ Rihobohamụ nwẹnị Adoramụ, kụrọ kọrịnama kẹ sịḅịda ḅọ ḅe fịrịma Izirẹlị mu, tẹ Izirẹlị mẹmgba nwẹnị ḍụḅarị kẹ ò gbin ḅaa. Mịẹ ḅụ amadaḅọ Rihobohamụ nwẹnị fọnya ḅara ḅụ ò kirimẹnjị-arụ ḅụkụlọ tẹ mangị-so Jeruselemu mu.

¹⁹ Anieḅụ anịngẹ-kụraḅio Izirẹlị Devidi warị mẹ ḅẹ si anga ḅụ sịẹ nwenii ḅo mịmgbaa lam.

²⁰ Izirẹlịapụ mamgba Jerobohamụ pịkịma-ḅo tẹ naa tẹso, ịn nwẹnị ọ̀ sịn ịna kobiri ḅo tẹ ọ̀ kẹ Izirẹlị ḅẹ amadaḅọ mịẹ. Juda ibe mẹ ngẹrị mịẹ sịḅị-tuu Devidi ḅụ paka-ḅo apụ pịrịarị ye.

Sẹmaya Koro Ịkịan

²¹ Rihobohamụ ḅo Jeruselemu la tẹso, ọ̀ nwẹnị Juda na, Benijamịnị na ibe ma sịn ḅo gboloma tẹ nwẹnị iḅitẹịn ọmụgbin-apụ kịnị si maa puku finji na kịnị oyi ẹndẹ na (180,000) sẹlẹ-ọkị, mịẹtẹ ini Izirẹlị warị mẹ na ọmụgbin tẹ amakiri mẹ pịkịma-ḅo Sọlọmọnị owiḅọtụḅọ Rihobohamụ pịrị ḅẹ ḅara.

²² Kụma Tamụnọ nwẹnị ori ịkịankoroḅọ Sẹmaya ḅẹẹ,

²³ “Mu ḍuko Rihobohamụ Sọlọmọnị owiḅọtụḅọ, Juda ḅẹ amadaḅọ ḅe na, Juda na Benijamịnị awarị mamgba na, kirikọn atomi ma na pịrị tẹ ḅẹẹ,

²⁴ mịẹ KỊNỊNYANAḄỌ ḅe ḍuko yee, ‘Ọ́ saakị mu, anịanịa owu kẹ ọmịna amịnapụ Izirẹlịapụ ma paka ma. Ọrụḅọ-ọrụḅọ pịkịma-so mḅọ ama muu, gbala ị̀ ḅụụ miemẹ ḅom ẹrẹsị.’ ” Anieḅụ ịn nwẹnị KỊNỊNYANAḄỌ ḅe ẹkwẹn-ḅịḅị mẹ poki tẹ pịkịma-so amịna ama mum, KỊNỊNYANAḄỌ ḅe wẹrịtẹ tọn ḅara.

Jerobohamụ KỊNỊNYANAḄỌ Ḅe Ḅụụ Pịkị-som

²⁵ Anịtẹso Jerobohamụ nwẹnị Iferemu tụndụ opu sịẹ mẹ ḅio Sẹkẹmụ ama mẹ nama kụrọma tẹ anịanga ḅụ anga. Anịanga ḅụ ọ̀ nwẹnị mu Pẹnụwẹlị ama nama kụrọma.

²⁶ Jerobohamụ nwẹnị ò ḅioḅẹngbọ ḅụ ḅẹẹ, “Mịọkụ ḅụ mịẹ-aị ma wẹrịtẹ sime-ḅara, ama-da mẹ inetẹ pịkịma-so Devidi warị mu ḅa.

²⁷ Mịna atomi ma nwẹnị Jeruselemu mu tẹ anịanga Tẹkẹ-warị mẹ ḅio agba mịẹ KỊNỊNYANAḄỌ ḅe pịrị kụma, ini ịna sịḅị-tuu mẹ saḅama tẹ kẹ Juda ḅẹ Amadaḅọ Rihobohamụ pịrị ḅa tẹ ị̀ ḅaa ḅa tẹ Juda ḅẹ amadaḅọ Rihobohamụ ḍọkụma-mu ḅa.”

²⁸ Anieḅụ amadaḅọ ḅe nwẹnị kuroma nyana, tẹ golu kẹ maa kala nambulo tẹmẹ, tẹ ọ̀ nwẹnị tomi ma ḅẹẹ, “ọmịnị iḅere-iḅerea kụra-ḅio Jeruselemu mu-mu tẹ sunsin-arị ye mẹ iḅi tẹẹ. Yei Izirẹlịapụ, ọmịnị ọmịna oru-atamụnọ ma tẹ Ijiputi ama mẹ ḅio ọ́ ḅọrọma pakama-ḅo aị ma ḍikii.”

²⁹ Ọ̀ nwẹnị gberie kẹ Bẹtẹlị ḅio ḅụ koroma tẹ nwẹnị osiye kẹ Danị ḅụ koroma.

³⁰ Miemẹ nwẹnị mịẹtẹ tomi ma ḅo si mịẹm, gbala in mu-mu Bẹtẹlị na iḅere-iḅerea anga ḅụ simearị Danị na ḅụ sunsin arị pịrịarị ẹrẹsị.

³¹ Ọ̀ nwẹnị pịkị geletẹ ye-yọ ḅụ oru-awarị nama, tẹ nwẹnị tomi ma ogbo ḅụ Livayị furo ḅụ paka-ḅo-a apụ tọn, agbamịẹapụ ḅara ḅụ.

In Si Kẹ Bẹtẹlị Ḅụ Tẹkẹ Mẹ Sịn Tẹẹ

³² Jerobohamụ nwẹnị pịkị alalị tọn ninea akalụ karama akalụ mẹ ḅẹ jeia aḍin ene mẹ ḅụ, Juda ḅụ in fị-fị alalị mẹ pembe ḅara. Bẹtẹlị ḅụ agbamịẹ-anga mẹ ọgọnọ ḅụ ọ̀ nwẹnị agba mịẹ kẹ ò golu kẹ tẹmẹ nambulo ma pịrị, tẹ nwẹnị Bẹtẹlị ḅụ gele ye-yọ tẹ ọ̀ nama ye mẹ ḅụ ọ̀ kẹ koroma ḅẹ agbamịẹapụ ma kẹ koroma.

³³ Anị ḅo ninea akalụ karama akalụ mẹ ḅẹ jeia aḍin ene mẹ tẹ ori ò ḅioḅẹngbọ ḅụ pẹlẹ sakị mẹ la tẹso, ò gboo-koroma Izirẹlịapụ ma pịrị tẹ alalị mẹ fị ḅụ ọ̀ nwẹnị Bẹtẹlị mu tẹ agbamịẹ-anga mẹ ọgọnọ ḅụ agba mịẹm.