1 Amadapụ 11 - FỊAFỊA BAỊBỤLỤ

Sọlọmọnị Tamụnọ ḅụ Ḅịkị Tẹẹ: Ò sime Ereme

¹ Amadaḅọ Sọlọmọnị, ò jen ama ḅẹ ereme ḅẹlẹmam. Fero tụḅọ ma sikima, ori Itayịti na, Mohabụ na, Amọnị na, Idọmụ na, Sayịdọnị na ḅụ ja ereme simem.

² KỊNỊNYANAḄỌ ḅe tọn Izirẹlịapụ ma pịrịm, mịna asịẹ ma na ọmịnị na ọmịnị ere-sime pịrị-a pịrị-a ma, gbala in sịḅị-tuu oru-atamụnọ pịrịarị, in ḅofa ó toluma mu sịḅị-tuu ịna oru-atamụnọ ma pịrị, ḅẹ apụ ma sọ, ọ̀ ḍụkụ-a tẹ mu simem tẹ nwẹnị pịkị in ḅẹlẹma lama.

³ Sọlọmọnị ereme ẹndẹ jeia si finji (700) simem. Inimgba amadapụ eremịna-awọmẹ. Ori oloapụ pịkị ereme jeia si (300): tẹ ò sime-ereme ma nwẹnị ò ḅioḅẹngbọ pịkị siin Tamụnọ ḅụ,

⁴ tẹ ḅo ori omongi sakị la sakị ò sime-ereme ma ò ḅioḅẹngbọ da-mu sunsin oru-atamụnọ pịrị ḅụ suu tẹẹ. Ọ̀ ḅarị karakara ḅara kẹ ò ḅioḅẹngbọ mẹmgba kẹ KỊNỊNYANAḄỌ ọ̀ Tamụnọ ḅe minini tẹ sịḅị-tuu ọ̀ pịrị-a, ọ̀ ḍa Devidi wẹrịtẹ mịẹ ḅara.

⁵ Ọ̀ nwẹnị mu sunsin Asịtarọtị, Sayịdọnị ḅẹ apụ ere-oru na, Mịlịkọmụ, Amọnị ḅẹ apụ tọn-tọn oru-atamụnọ ma pịrị.

⁶ Anieḅụ Sọlọmọnị nwẹnị KỊNỊNYANAḄỌ ḅe ḅụụ si mịẹ tẹ ḅarị gbọrsịḅị KỊNỊNYANAḄỌ ḅe ḍuka mẹnjị-a ọ̀ ḍa Devidi wẹrịtẹ KỊNỊNYANAḄỌ ḅe ḍuka mẹnjị ḅara.

⁷ Jeruselemu ḅụ ịrụa-saakịarị-anga mẹ ḅẹ tụndụ ọgọnọ ḅụ ọ̀ nwẹnị gbọrụ oru-warị nama, kẹ sunsin Mohabụ ḅẹ tọn-tọn oru-tamụnọ Kẹmosi pịrị ḅẹ anga na, pịkị jen oru-warị na kẹ Amọnị ḅẹ tọn-tọn oru-tamụnọ Mịlịkọmụ tẹkẹ ḅarị anga na nama.

⁸ Mị-ḅara mẹ mịẹ ọ̀ kẹ jaị sọ nama tẹ kẹ jen ama ḅụ ò sime ḅo ereme mamgba pịrị tẹ ịn kẹ sunsin ini ma sọ oru-atamụnọ ma pịrị, pịkị dọkịma-agba na kụnụaị na dọkịma-dọkịma arị pịrịarị ḅara.

⁹ KỊNỊNYANAḄỌ ḅe nwẹnị Sọlọmọnị ḅụụ ịganị nyana, gbala ò ḅioḅẹngbọ KỊNỊNYANAḄỌ, Izirẹlịapụ tẹkẹarị Tamụnọ ḅe tẹ maa sakị kẹ ḅụụ kẹ ò ḍie tẹ ḅọ ḅe ḅụụ pịkị-so tẹ ye ẹrẹsị.

¹⁰ Ọ̀ maa sakị kẹ ḅụụ kẹ ò ḍie tẹ tọn ọ̀ pịrị tẹ mịnẹ ọ̀ ḅarị oru-atamụnọ ḍukamẹnjị ma ḅẹsọ, Sọlọmọnị KỊNỊNYANAḄỌ ḅe tọn ọ̀ pịrị ye mẹ koko-a.

¹¹ Ọkọẹrẹsị KỊNỊNYANAḄỌ ḅe nwẹnị Sọlọmọnị ḅẹẹ “ị́ mị-ḅara kẹ ḍumo kọn tẹ ị́yẹrị ḅe ị̀nịna fị wararị ọḅọkụ mẹ kan tẹ ḅarị ì oloko ma koko-a ẹrẹsị, àrị ị́ ḅụụ ḅụ amakiri mẹ kan-siin tẹ kẹ ị́ fịrịmẹnjịḅọ pịrị ḅa.

¹² Anị sime-ḅara sime-ḅara sọ, ị́ ḍa Devidi gotẹ arị í ḍumo sakị ḅụ miemẹ mịẹ ḅịa, kụma í owiḅọtụḅọ ḅo ama mẹ daa ḅẹ sakị la sakị ḅụ mịẹ àrị ọ̀ ḅara ḅụ anị kan ḅarịye.

¹³ Anị ọkọ mịẹ ḅa ḅẹsọ, ị̀ fịrịmẹnjịḅọ Devidi sịḅị ẹrẹsị na, à sẹlẹ ọkị ì nye mịẹtẹ opu ama Jeruselemu gotẹ, àrị ọ̀ ḅụụ bebe amakiri mẹ kan-siin fama ḅịa kụma à gbọrụ ibe kọnma ọ̀ pịrị ḅa”.

Sọlọmọnị Na Fịya-a Apụ

¹⁴ Ọkọẹrẹsị KỊNỊNYANAḄỌ ḅe nwẹnị mịẹtẹ Ẹdadị, Idọmụ ḅụ amada-furo ḅẹ ḅo ḅe nwẹnị Sọlọmọnị si anga ḅụ sịẹ.

¹⁵ Ala tẹ sakị ḅụ Devidi Idọmụ opu sịẹ mẹ nẹngịmam ọmụ ḅụ. Johabụ ọmụ-ogbo mẹ ḅẹ ḅẹrẹtọnḅọ ḅe anịanga mu fịtẹ-apụ ma ḍiḅi ḅẹ mum, tẹ owiḅọ goḅọ-goḅọ ḅaam.

¹⁶ Ori na Izirẹlịapụ mamgba na Idọmụ ḅụ sime nwenii ini owiapụ mamgba ḅaa famam. In sonio akalụ simem;

¹⁷ Kụma Ẹdadị na, Idọmụ ḅẹ apụ tẹ fịrịmẹnjị ọ̀ ḍa pịrị sime apụ na mangị-so Ijiputi mum. (Ẹdadị ḅe anie kalatụḅọ anịsakị mẹ ḅụ.)

¹⁸ In Midiyanị ḅụ so mu Peranị lam. Ja apụ nwẹnị anị yọ ḅụ ịna ḅụụ sọ. Ịn nwẹnị ini na dọkụ mu Ijiputi la tẹ nwẹnị Fero Ijiputi ḅẹ amadaḅọ ḍọkụma-mu. Oriḅe nwẹnị warị na, kiri na, fịye na kẹ Ẹdadị pịrị.

¹⁹ Fero nwẹnị Ẹdadị na ikia sọ, tẹ ọ̀ ta Tapinizi amada-ẹrẹḅọ ma, ịyịmbara kẹ ọ̀ pịrị sime.

²⁰ Tapinizi ịyịmbara ma nwẹnị ịn kẹ Jenubati sịn gbọrụ owiḅọtụḅọ iyi ọ̀ pịrị. Tapinizi nwẹnị amadapụ opu warị mẹ ḅio ò ḍikiḍiki pakama-ḅo. Anịjụ mịẹ Jenubati, Fero owiapụ-awọmẹ na anga paka ye.

²¹ Kụma Ẹdadị Ijiputi ḅụ sime tẹ naam mịnẹ Devidi fịị tẹ, anịsakị Johabụ ori ọmụ-ogbo ḅẹ ḅẹrẹtọnḅọ ḅe sọ fịị tẹẹ nwẹn naa tẹso, Ẹdadị nwẹnị Fero ḅẹẹ, “yee à pịkị so ì opu sịẹ mu.”

²² Kụma Fero nwẹnị ò gbela, “í tiye ḅii tẹ à kẹ ị́ pịrị-a tẹ í so í opu sịẹ mu ḅẹ ḍọkịarị?” Ẹdadị nwẹnị pakịrị, “Gberie sọ ofori, kụma paa ì wẹrịso à muu.” Tẹ ọ̀ nwẹnị pịkị-so ori opu sịẹ mum. Idọmụ ḅẹ amadaḅọ ḅara ḅụ, Ẹdadị anie Izirẹlị na fịya-a si lama tẹ akụ tẹmẹ nyana ịn pịrị gbọrụḅọ.

²³ Tamụnọ nwẹnị pịkị Rezọnị, Ẹlịyada tụḅọ ḅe mịẹtẹ ọ̀ Sọlọmọnị si anga ḅụ sịẹ. Rezọnị ḅe anie ọ̀ sịḅịdaḅọ Zoba ḅẹ amadaḅọ Adadeza ḅara ḅụ mangị-so ḅọ,

²⁴ tẹ ọ̀ nwẹnị tomi kobiri tẹ, ịna kẹ sịḅịda tẹ tọrụ fọịn ma ḅọrọarị. Devidi, Adadeza na ọ̀ ḅụụ sọ apụ ma na ḅaa fama tẹrẹmẹ mịẹ-mịẹ mẹ pakaye. Rezọnị na ori atomi na nwẹnị so Damasịkọsị mu, tẹ ịn nwẹnị anịjụ ọ̀ kẹ Siriya ḅẹ amadaḅọ mịẹ.

²⁵ Sọlọmọnị ḍumo sakị mẹmgba ḅụ ori anie Izirẹlị na fịya-a ḅẹ gbọrụḅọ.

Tamụnọ Minini Jerobohamụ Pịrịye

²⁶ Jụmọ tẹ pịkị Amadaḅọ Sọlọmọnị si anga ḅụ sịẹ ḅọ anie Jerobohamụ ori opu fịrịmẹnjịapụ ma ḅụ ḅẹ gbọrụḅọ. Iferemu ḅẹ gbọrụ ama Zẹrẹda ḅụ ḅo Nebatị owiḅọtụḅọ ḅe. Ò iyingi anie diḅọ-fịtẹ-ẹrẹḅọ ịn kẹ Zeruya sịn ḅọ ma.

²⁷ Mịẹ ori ò si anga ḅụ sịẹ ye mẹ paka ḅara. Sọlọmọnị Jeruselemu ḅụ ịrụa-saakịarị-anga mẹ ḅụ kiri mẹ pịrị gelemarị tẹ pịkị ọ̀ da Devidi Opu ama mẹ ḅẹ onu mẹ ḅụ kaan wararị anga tẹlẹmarị sakị ḅụ.

²⁸ Ịn kẹ Jerobohamụ sịn owiḅọ ḅe ịnyọ kpọma inetẹ kụrọ kọrịnama mẹ kọrịm. Sọlọmọnị ẹrịm mịnẹ asatụḅọ ḅe kọrịnama kọrị-ḍin wararị ye ḅụ ọ̀ nwẹnị ọ̀ kẹ kụrọ-kọrịnama mẹmgba ḅụ Josẹfụ Warị mẹ ḅẹ sịḅịdaḅọ sọma.

²⁹ Gbọrụ ene ḅụ, Jerobohamụ Jeruselemu ḅụ sime tẹ ye-muarị ogbo, ịkịankoroḅọ Ayija nwẹnị Silo ḅụ sime tẹ ḅo ori na bịama ama anga mẹ ḅẹ etela-ogbo ori ngẹrị sime anga ḅụ. Ịkịankoroḅọ Ayija mịọkụ gbọrụ ịwọ opu kapa kẹ jen kapa ọgọnọ sụa wararị.

³⁰ Ayija nwẹnị ọ̀ sụa wararị ịwọ opu kapa mẹ sin tẹ anị kẹ oyi maa pakịrị finji puu,

³¹ tẹ Jerobohamụ ḅẹẹ, “Oyia apakịrị ọkị ị́ ḅụụ pịrịị, gbala KỊNỊNYANAḄỌ Izirẹlịapụ tẹkẹarị Tamụnọ ḅe í ḅẹẹarị, ‘À Sọlọmọnị ḅara ḅụ amakiri mẹ ọkị ḅa tẹ oyia ibe kẹ ị́ pịrị ḅa.

³² Ị̀ fịrịmẹnjịḅọ Devidi na, Jeruselemu, opu ama mẹ tẹ bebe Izirẹlị ḅẹ ama mamgba ḅụ à sẹlẹ-ọkị tẹ kẹ ì nye sọma tẹ ama mẹ sịḅị ẹrẹsị, à gbọrụ ibe wẹrịso Sọlọmọnị pịrị ḅa.

³³ À miemẹ mịẹ ḅa gbala Sọlọmọnị ì sịkị tẹ mu sunsin igoni oru-atamụnọ Asịtatị, Sayịdọnị ḅẹ ere-oru na; Kẹmosi, Mohabụ ḅẹ oru-tamụnọ na; Mịlịkọmụ, Amọnị ḅẹ oru-tamụnọ na pịrị tẹ ẹrẹsị. Sọlọmọnị ḅarị ì ḅịḅị poki-a tẹ ọ̀ mịẹ-irima tẹẹ, tẹ ḅarị ì oloko ma na à tọn aị ma na koko-a, ọ̀ ḍa Devidi wẹrịtẹ mịẹ ḅara.

³⁴ Kụma anị sime-ḅara sime-ḅara sọ arị ọ̀ ḅara ḅụ bebe amakiri mẹ ọkị ḅịa; kụma à mịẹtẹ ọ̀ ḅẹrẹtọnḅọ sọ ḅa ò ḍumo-ene mamgba ḅụ ì fịrịmẹnjịḅọ Devidi, ori ḅe tẹ à sẹlẹ-ọkị ḅọ ḅe tẹ à tọn aị ma na ì oloko ma na koko ḅọ ḅe sịḅị ẹrẹsị.

³⁵ Kụma Sọlọmọnị owiḅọtụḅọ ḅara-ḅio ḅụ arị oyi ibe kẹ ị́ pịrị ḅa.

³⁶ Anịsọ à gbọrụ ibe kẹ wẹrị ori owiḅọtụḅọ ḅe pịrị ḅa, mịẹtẹ ị̀ fịrịmẹnjịḅọ Devidi ḅụ paka-ḅo ḅọ Jeruselemu tomi sunsin ị̀ pịrịarị gotẹ à sẹlẹ-ọkị tẹ opu ama mẹ ḅụ ḅẹrẹtọn ḅẹ ḅara.

³⁷ Jerobohamụ, àrị ị́ kẹ Izirẹlị ḅẹ amadaḅọ mịẹ ḅa, tẹ ị́ ḅẹrẹtọn í ḅii ḅarị ye-yọ mamgba pịrị ḅa.

³⁸ Ị́ nwẹnị busunu ḅara kẹ ị̀ ḅịḅị poki, ì oloko ma kẹ ị́ sịḅị saakị, tẹ ị̀ fịrịmẹnjịḅọ Devidi wẹrịtẹ mịẹ ḅara, à tọn ye mịẹ ḅụ, ị̀ mịẹ tẹ à minini ị́ pịrị-pịrị, àrị ị́nịna sakị mamgba sime ḅa. Àrị ị́ kẹ Izirẹlị ḅẹ amadaḅọ mịẹ ḅa, tẹ karakara-ḅara-ḅụ ẹrị ḅa mịnẹ ị́ ḅọrọtẹ so, ị́ ḅụụ paka-ḅo apụ ḅẹrẹtọn ḅa, à mịẹ Devidi pịrị ḅara pembe ḅara.

³⁹ Sọlọmọnị si gotẹ, à Devidi ḅụụ paka-ḅo apụ fomu ḅa, kụma anị sime gbamaso ḅịa.’ ”

⁴⁰ Sọlọmọnị anịẹrẹsị Jerobohamụ ḅaa ḅẹ ḍọkịm, kụma Jerobohamụ nwẹnị mangị-so Ijiputi ḅẹ Amadaḅọ Sisakị ḍọkụma-mu tẹ anịjụ sime nwenii Sọlọmọnị fịịm.

Sọlọmọnị Fịịm

⁴¹ Sọlọmọnị kọrị ye goyegoye na, ò ḍumo ḅụ ọ̀ tọrọkọ muu na, ò ye-nimi na, arịmgba Sọlọmọnị gbolomaye kẹẹ wararị ḍiri mẹ ḅio emi.

⁴² Ọ̀ kụra amesi kẹ Jeruselemu ḅụ sime tẹ Izirẹlị mẹmgba ḅụ ama-dam.

⁴³ Ọ̀ fịị tẹ in Devidi Opu ama (Jeruselemu) ḅụ ò ḍiḅim tẹ ori owiḅọtụḅọ Rihobohamụ nwẹnị ama-da ḅụ ò kiri ọkị.