1 Amadapụ 10 - FỊAFỊA BAỊBỤLỤ

Sẹba Ḅẹ Amada-Ẹrẹḅọ Ḅo Toluma Sọlọmọnị Ḍikim

¹ Sẹba ḅẹ amada-ẹrẹḅọ KỊNỊNYANAḄỌ ḅe ẹrẹ gbolomaye ḅụ Sọlọmọnị ereso naa tẹso, á nwẹnị kụrọ-kụrọtẹ ḅii-aḅịḅị kẹ ọ̀ daaḍiki ḅẹ tẹ dọkụ Jeruselemu mu.

² Á tọnwa fịrịmẹnjịapụ ogbo kẹ á ḅụụ sụa tẹ kẹ ḅom, ẹnyị dogi ike-sụa-anama na, yela lama tẹ aḍụḅarị na, pịkị gburo-gburotẹ tọnwa golu sọ á nwẹn kẹ sụa ḅom. Á ḅo Sọlọmọnị na bịama tẹso, á nwẹnị arị inetẹ kuroma-ḅo ḅii-aḅịḅị mamgba kẹ ò gbela.

³ Ọ̀ nwẹnị arịmgba pakịrị fama, arị ḅụ kẹlẹ kẹ ọ̀ ḅụụ kụrọ tẹ ori inetẹ puu-finji giregirema-a ye ofori.

⁴ Sẹba ḅẹ amada-ẹrẹḅọ Sọlọmọnị nimi mẹ na, ọ̀ nama wararị amada-opu-warị mẹ na ẹrịm.

⁵ Ọ̀ dẹbịlẹ ọgọnọ in gbana ọ̀ pịrị afịaị ma na ọ̀ fịrịmẹnjị-opuapụ ma angarị awarị ma na, ori afịrịmẹnjị-opuapụ ma lẹgị ọrụtọn ḅara mẹ amadapụ warị mẹ ḅio na, pịkị gbọrụ tọrụ sụa kapa ma tẹ in sụa wararị aị ma na, fịrịmẹnjịapụ ma tẹ ò fịye fị kiri ḅụ ò koru tẹ ò ḍikiḍikiarị apụ ma na, pịkị dọkịma-agba tẹ ọ̀ Tamụnọ-warị mẹ ḅio mịẹ agba ma ẹrị fama tẹso, á nwẹnị ḅụụ-gbiripu tẹ tẹmẹ-naịn-naịn.

⁶ Á nwẹnị Amadaḅọ Sọlọmọnị ḅẹẹ, “Í gboloma aị ma tẹ arị ì opu sịẹ mẹ ḅio sime tẹ naa aị ma na, í ye-nimi mẹ na karakara yee.

⁷ Kụma arị inetẹ minini-a nwenii à ḅarana ḅo tọrụngbọ kẹ anị ẹrị tẹ. Kụma arị anị ḅẹ pakịrị sọ naa-a; í ye-nimi na, ị́ kọn ngọ na ḅẹlẹma gburo-gburo in ḍuko ị̀ pịrị ḅara nẹngị lamam.

⁸ Í sime-ereme ma na, ị́ afịrịmẹnjịapụ ma na tẹ kiri nyana tẹ ḅụụ wọkọrọ-wọkọrọ ḅara kẹ sakị mamgba ị́ tọrọkọ sime tẹ í ye-nimi ẹkwẹn naarị apụ ma tọ-ḅara na gbasị iḅi fụḅara nyana!

⁹ KỊNỊNYANAḄỌ ị́ Tamụnọ ḅe tokinii! Ori ḅe tẹ ò nyana ị́ pịrị ḅẹlẹma ḍie-pakama gotẹ ị́ kẹ Izirẹlị ḅẹ amadaḅọ mịẹ ḅọ ḅe, gbala ò nyana Izirẹlị pịrị ḅẹlẹma mẹ sime gbamasom ẹrẹsị ori ị́ kẹ ịna amadaḅọ sọmam mịẹtẹ ị́ karakara ḅẹrẹkọn tẹ pịkị oloko ma ḅụ karakara mịẹ ḅẹ ḅara.”

¹⁰ À nwẹnị à kẹ ḅo ḍiepịrị-aị ma kẹ Amadaḅọ Sọlọmọnị pịrị: golu kpo-kpo puku amesi sọnọa apuku finji (360,000) na, ḅẹlẹma gburo-gburotẹ ẹnyị na, pịkị kpọma gburo-gburotẹ yela aḍụḅarị na, sakị-sakị ḅụ ori ọkị tẹ ẹnyị mamgba ḅụ, à kẹ ọ̀ pịrị ẹnyị ma ḍuko ḅẹ ọkụ ofori ḅara kẹ gburo-gburo nẹngị-a ye ofori.

¹¹ Hiramụ vala opu onwi-arụ ma tẹ Ọfaya ḅụ golu mẹ sẹịn ḅo arụ ma pịkị anịanga mẹ ḅụ ọjị kịka sịn tẹ ịn kẹ alịmọgụ sịn-arị sịn aḅiri ma ḅẹ kịẹnkịẹn-ọkụ-ofori ḅara na, kpọma yela tẹ aḍụḅarị na sẹịn ḅo saratẹ.

¹² Sọlọmọnị nwẹnị mịna sịn aḅiri ma kẹ KỊNỊNYANAḄỌ Tamụnọ warị mẹ ḅio na, amadapụ warị mẹ ḅio na ḅụ kẹ tomi pono pono mẹnjị ḅarị aị sụam. Ọ̀ nwẹnị pịkị arịḅẹ jaị kẹ ọbọ na, ofuro-ofuro aị na mịẹ nume-su na akwa na farịarị apụ ma pịrị. Arị aị ma anie alịmọgụ asịn ma ḅụ iḅitẹịn tẹ ḅo Izirẹlị mẹ ḅio sọ tẹ aị jene-jene arị kịka aị sọ kịnị ḅarị ẹrị-a.

¹³ Amadaḅọ Sọlọmọnị, Sẹba ḅẹ amada-ẹrẹḅọ ma ọ̀ ḅara ḅụ ḅii ye goyegoye kẹ á pịrịm, ama-anganga-ḅara ḅụ ọ̀ kẹ á pịrị aị ma sikima. Anịtẹrẹmẹ arị na, arị afịrịmẹnjịapụ ma na so Sẹba ama mẹ mum.

Sọlọmọnị Kọn Ngọ

¹⁴ Kụra-kụra ḅụ Amadaḅọ Sọlọmọnị nyanarị ye anie fụn akpa iku ḅẹ kala fa golu tẹra ẹndẹ ofori tẹra puku na golu oyia asi na (23,000)

¹⁵ kẹ mu ama-oso-igbigi tẹ tuḅokọn-apụ gbẹarị igbigi na, tuḅo ḅụ ḅẹ sọye na, Arebịya ḅẹ amadapụ gbẹarị igbigi na, pịkị Izirẹlịapụ ḅụ kpo-kpo ḍiki ḍikiarị apụ ma oso ọ̀ pịrịarị igbigi ḅụ sụa.

¹⁶ Amadaḅọ Sọlọmọnị nwẹnị ḅakụtẹ golu-golu ḍụḅatẹ ekpeke oyia asi tẹmẹ, kurusu mbi na gbasị iku kọn golu ò nwẹn kẹ gberie-gberie tẹmẹm.

¹⁷ Ọ̀ nwẹnị pịkị osi-aị ma ḅụ kala ịrụ tẹ ḅakụtẹ golu ekpeke jeia asi tẹmẹ. Iku kala kurusu mbi na gbasị golu ò nwẹn kẹ gberie-gberie tẹmẹm. Ọ̀ nwẹnị mịna ekpeke mamgba kẹ ọ̀ “Lẹbanọnị Opu Piri Warị” kẹ sịịn tomi kobiri ḅio mẹ ḅụ koroma.

¹⁸ Ọ̀ pịkị gbọrụ ḍụḅatẹ ọdụ emine tẹ in golu kẹ sara gbaịn ye mịẹ ọkịm.

¹⁹ Emine mẹ sonio aḅụọ-kuḅu nyanam kẹ kpọlị iwo mu lẹgị anga mẹ la, anị ḅẹ ọḅụjụ da sịrẹrẹ anga mẹ ḅẹ sịḅị mẹ ikelema-korom. Emine mẹ ḅẹ maa akaka ma ḅụ ḅara-gbana aị emi. Ọkụkụ ma akaka ma ḅụ sịẹ sime-sime wararị.

²⁰ Kpọlị iwo sonio aḅụọ-kuḅu ma ḅụ ọkụkụ ḅụọ mẹ ḅẹ maa ịkọlị ma ḅụ emi arịmgba oyi maa ọkụkụ finji sonio aḅụọ-kuḅu ma ọgọnọ ḅụ emi. Ini anị kịka emine mịẹ pịrị jen amakiri jene-jene ofori.

²¹ Sọlọmọnị minji-ḅuu-aị mamgba in golu kẹ arị mịẹm, ọ̀ “Lẹbanọnị Opu Piri Warị” kẹ sịịn tomi kobiri ḅio mẹ ḅụ sime ẹfẹrẹ na, fịye-sọ-aị mamgba in golu kẹ arị mịẹ famam. Sọlọmọnị eneḅaka in seleḅa kẹ ye-sịn-a ẹrẹsị ini anị kẹ gberie-sọ mịẹ-a.

²² Ori abajị sọarị opu onwi-arụ ogbo nyanatẹ Hiramụ opu onwi-arụ ogbo na sọ-sọ tẹ Tasịsị dọkụ-dọkụ tẹ tẹra kụra tẹra kụra ḅụ golu na, seleḅa na, ọdụ na, ngẹrị-mẹnjị-ḅụkọ na, ḅụkọ na ogunu na tan-tan ọ̀ pịrịarị.

²³ Amadaḅọ Sọlọmọnị ye-nimi nẹngị-a, pịkị ngọ-kọn nẹngị-a jen amadaḅọ ofori,

²⁴ anịsakị bebe tomikiri mẹmgba ḅo-ḅo tẹ Tamụnọ kẹ ọ̀ pịrị nimi mẹ poki ḅẹ ḅiim.

²⁵ Ḅoḅọ-ḅoḅọ golu na seleḅa na kẹ tẹmẹ-aị na, opu akapa na, ọmụgbin aị na, ẹnyị na asụ na, kụrọ-sịḅịsụa-asụ na ḍiepịrị-aị kẹ ḅo ḍie-ḍie ọ̀ pịrịm. Miemẹ ọkọ mịẹm kụra fa kụra ḅụ.

²⁶ Sọlọmọnị nwẹnị ọmụgbin gbọrụ kpo nwẹn mịẹ pakama: in kirimẹnjị-ọmụarụ tẹra ẹndẹ oyia asi finji (1,400) na, asụ ọgọnọ ḅẹ ọmụgbin apụ ḅụ kịnị puku, oyia ẹndẹ finji (12,000) na nyanam. Ọ̀ nwẹnị jen-apụ kẹ Jeruselemu ḅụ ọ̀ ḅụụ na kpekima koroma tẹ nwẹnị kirikọn-aị ma ḍiema kẹ osi opu ama ma tẹ kirimẹnjị-ọmụarụ sime anga ma ḅụ wẹrịm.

²⁷ Ori ama-da sakị ọ̀ mịẹtẹ seleḅa ḍụḅarị jua ḅara juam, ịn kẹ sida sịn-arị sịn mẹ pịkị sịkamọ sịn Juda atụndụ ḅio ḅin ḅara ḅinm Jeruselemu ḅụ.

²⁸ Sọlọmọnị fịrịma-fịrịma ḅoarị asụ ma Ijiputi na, Kuwe (in kẹ Silisiya sịn-arị anga) na ḅụ mịẹ arị ḅoarị ye, tẹ amadaḅọ ḅe tuḅokọn apụ ma nwẹnị Kuwe ḅụ gbọrụ ḅịḅị kẹ arị da-da ḅoarị.

²⁹ In kẹ Ijiputi ḅụ gbọrụ kirimẹnjị-ọmụarụ fịrịma ḅoarị ye seleḅa pakịrị ẹndẹ oyia asi finji (600), gbọrụ asụ anie seleḅa pakịrị sọnọma si, oyi finji (150); mị gbọrụ ḅara mẹ mịẹ ịn kẹ ịna ḅụụ ḅọrọtẹ mịna aị ma kẹ Itayịti ḅẹ amadapụ na, Siriya ḅẹ amadapụ mamgba na fịrịmarị ye.