Sams-Zgame 124 - Anumzamofo Routage Avantafere

Ra Anumzamofo ra mono nontega marenerino hu' zagame, Deviti asunte'nea zagamere

¹ Maka Israeli vahe'mota amanage huta hiho. Ra Anumzamo'ma tagri kazigama omani'neresina, inankna hugahie?

² Ra Anumzamo'ma tagranema omani'nesige'zama ha' vahetimo'zama ha'ma eme hurantesnazana inankna hugahie?

³ Ha' vahetimo'zama tusi zamarimpama aherante'naresina, ko e'za magozagama asgahu nakriankna hu'za tagrira eme tavuaga tasgahu nakrizasine.

⁴ Tagrira timo hageno eme tavreno nevigeno, timo tazeri nakariresine.

⁵ Tusi avunema anteno hageno nea timo, tagrira eme tavreno vu'neresine.

⁶ Ra Anumzamofona humuse huntesanune. Na'ankure agra tatrege'za afi zagamo'zama zagagafama ahe'za tragama nehazaza hu'za, ha' vahe'mo'za eme tahe'za traga osu'naze.

⁷ Krifuma anagintegeno azeri'nea namamo'a rugraru'vazino freaza huta, tazeri'nea nofimo'a rukano higeta atreta fre'none.

⁸ Ra Anumzama monane mopane tro'ma hu'nea Anumzamo tagrira taza nehie.