Tahimarideni 22 - Kulina New Testament Brazil

¹ Nazapa Paoro uati tarrari: —Rrehe ouimecotedeni, ime rrocouideni, tiadeniza occa uima uati onana, titauaribobo canarri. Ouaza: “Uaidira tinani” tiqueneraha ouape uima ocappirani, nouerani −narrari.

² Nazapa Paoro poua attiza uati uati tazapa zodeodeni pouadeni atti ebereo mittemanazapa denima tocadidire narrari. Nazapa Paoro attia:

³ —Ouape zodeo madirra orrani, zama Sirisiacca oza panani Tarsoza ossonarraro −narrari. —Naraha arri oza panani Zerozarezana onapirrarode. Nazama oua maridepa Camarieoparra. Madirra bazima poua oni nauatoqquiri naui. Pouapa icca ididenicca marinarra maride bica tarrari. Icca ididenicca marinarra oua mari canauissa tade. Ouape narraro uimaza ibora onade. Nazama Deotoui naqui damera onade. Pina rridapana tiadeni Deoza dameraqquiri tiquenarrarossa onarrarode.

⁴ Nazama ouape arra Zesoza rrehe quenarrarideni onarrizobaqquiuiuarrine touideni occarizeza otadamazapa ouattiza toponi cocorouarri coro coro ihizimabaqquimana nade. Maqquiderre, amonerredenima rricauiuarrine ohonanaccade.

⁵ Arri occa uimape dada toqquimadedenicca tamine deni torrarrari, ime rrocouideni tezerre nauatoqquiri naui. Pouadeniza: “Parrissaqui?” tiquenezape: “Rrehe, parrissa, nama narizaccade” quenauitoui. Pouadeniza naqui uati onezape pouadeni atti uima teppeza dozo nani ouaza da iquenezape oza panani Damascouarri poccadeni uima ouaccarrarode. Naui Damascocca zodeodenicca taminedeniza noue onarizaniuarrine zorro onarrarode. Narraro uimaza Damascocca Zesoza rrehe quenarrarideni qqui onabaqquiza otadamaza arri Zerozareuarri ouaccani-baqquizapa inarrizo-baqquimanauiuarrine oneza occarrarode.

Paoro Zesoza torrarraricca uima uati tarrari

⁶ —Nezape Damasco rraui occarraro… marri orrari uaririnaza Damasco bacco onabote naraha memeuarricca ssiuarrani dacorehe amazati ouaza bacco naronezape ouinori nemaneheza ssiuarrauarrani nade.

⁷ Nezape ouedima, namiza opona naza ouaza uaua naui omittade: “Saoro, Saoro nerrecotoui occa madirra nanarrizo tarizarraro? Arra occa madirra nanarrizo tarizarrarope pina oua nanarrizo tarizarrarossa narraro” nade ouaza.

⁸ Naraha manaco pouaza uati onade: “Tiape nerrecorrari?” onade. Nazapa: “Ouape Nazaretiuarricca Zeso orrani, tiape oua tinarrizorraro” nade ouaza.

⁹ Nazama arra ouaza rraui torrarrarideni naco ssiuarrani qqui toquenaza uarro canireraha Zeso ouaza uati taui mouini mittemanaraha pocca uima mittemana-rrarade.

¹⁰ Nezape pouaza uati onade: “Oua Zozossede nerrecoma onapazerre?” onade. Naraha ouaza uati tade: “Titemeza oza panani Damascouarri ticcarri. Nanizana occa uima, arri ouaza tizepe irriniuarrinecca uima timittaniuarrine” nade ouaza.

¹¹ Nazama ouape ssiuarrani zibehiboterrine onocco siri torrezape ouatimadedeni ozepeza oua rroca iquenezana Damascouarri bacco onade.

¹² —Naraha naui Damascozapa madirra oni Anania madirrari. Pouapa Moizecca marinarraza ibora tarrari. Damascocca zodeodeni pouaza: “Madirra bicaui” quequenanarrari.

¹³ Nazapa Anania oua qquide ccarronarrari, bacco naza ouaza uati tade: “Ouimecote Saoro, tinoccope ssire tana” nanarra onocco ssire-re, Anania parra qqui onariui nade.

¹⁴ Nazapa Anania denima ouaza uati tade: “Abi Deopa icca ididenicca Deo, narraria arri Deo pocca zossenirrissa tinananiuarrine tia tocatterrizarrari. Pocca Erredeni Bicabote qqui tinauiuarrine naqui tia tocatterrizarrari. Poua atti uati taui naqui timittaniuarrine Deo tia tocatterrizarrari” nade ouaza.

¹⁵ “Nazama Deo Pouarrine qqui tinarraro, timittarraro naqui madirra bazimaza tecomerarizaniuarrine.

¹⁶ Rrari, rridapanape passo dopaniza niniqui ticarrirri. Denima tinarro-rrerana. Ia Zozossede pouaza uati tinarri, tia tonassiuauauiuarrine, ticca uimasiri peperri inananiuarrine” nade Anania atti ouaza −narrari Paoro.

Paoropa Zeso poua zosse inarraricca uima uati tarrari

¹⁷ Nazapa Paoro denima uati uati tarrari: —Nezape oza panani Zerozareuarri bacco onaniza Deoza dada toqquimauarri oqquezimeza Deoza uatide orrezape Deorrine ouaza pina occa uadassa naraha parrissa qqui onade.

¹⁸ Oua Zozossede Zeso ouaza auatozapa ouaza uati tade: “Arri Zerozareuarripe tineboza uassinarra ticcarri. Arra Zerozarecca madirrapa otauimari mari ticanabaqqui tarrararro. Occa uimaza uaribodeni didiqquiri naui” nade.

¹⁹ Naraha ouape Zerozareza poua tauimari mari ocanabaqquiuiuarrine touini oneza pouaza uati onade: “Oua Zozossede, arrarrari madirradenipa occa madiecca uima nauatoqquiri naui. Arra zodeodenicca Deo Atti mamari onihi onihiuarri ohoccariza nezape tiaza rrehe quenarrarideni ohotadama naccade. Ohonarrizobaqqui nazapa arra toponi cocoroza coro coro ohozimabaqqui naui naco nauatoqquiri naui.

²⁰ Arra ticca zozosse, tetti uauati narizade Estevao iquenaqquimanaza emene toccaza naco nani zaboraza cattade oua nade. ‘Zoqquena, zoqquena’ quenazapa rrehe onade. Arra Estevao quenade ppauaqquiri nauiuarrine naco eterorideni motaranicca ssiti quenaza eterorideni ouacauade occa uima naco nauatoqquiri naui” onade oua Zozossedeza.

²¹ Naraha manaco oua Zozossede ouaza uati tade: “Peperri, ticcarri. Rridapanape zama uarri tanicca madirra zodeo querrena-rrararrarideni mari ticanabaqquiuiuarrine tia zosse onarraro” nade ouaza −narrari Paoro.

Paoro cossi quenauiuarrineraha: —Rromano madirra orrani −narrari

²² Nazapa zodeodeni mouaraza tauaribobo canaraha Paoro: —Zodeo querrena-rrararrarideni maride occaniuarrine −naui mittemanazapa denima mittade nacasseraqquiri naza parra moua toquenariui narrari. —Rrari zoqquena, zoqquena! Atti nama nauipa madi-rrarana! −quenade.

²³ Uadimanaza rrouaua rrouaua cananarra poccadeni etero motaranicca ssiti quenaza ppoto ppoto quenazapa Paorouarri ssiqui naqui quena quena quenarrari.

²⁴ Nanarra rromanodenicca isso teppeppedenicca tamine deni torrauicca pocca isso teppeppedeniza uati tarrari: —Arrarraripa oza bodiuarri rroca tizimemanarro! −narrari. Nazapa oza bodiza Paoro cossi inaqquimanauiuarrine icazossebaqquirrari: —Rrari, cossi taqquimanarro. Nerrecotoui zodeodeni pouaza rrouaua rrouaua canarrari? Cossi taqquimanazana iaza pocca uima ecomeraniuarrine −narrari.

²⁵ Nazapa Paoro cossi quenauiuarrine birri rrore, isso rrore iquenaraha Paoro isso teppeppedeni zossedeza uati tarrari: —Tiape ouaza nauato tinerrerarraro nitide. Ouape rromano madirra orraua. Uima cacattemadeuarri oua tiaqquemana-rrereraha oua cossi tezape oppinera taqui? Oppina teraha −narrari.

²⁶ Nazapa arra Paoro atti mittazapa isso teppeppedeni zossede pocca tamineza uati tauiuarrine rroppa taniza uati tanirrari: —Tetti nerrecoma tani? Arraccarrari madirrapa: “Rromano madirra orrani” napa −narrari pocca tamineza.

²⁷ Nazapa rromanodenicca isso teppeppedenicca tamine deni torrauicca Paoroza uatide toccarrari: —Parrissaqui? Tiape rromano madirra tirraqui? −narrari. Nazapa: —Rrehe, ouape parrissa rromano madirra orrani −narrari Paoro.

²⁸ Nazapa isso teppeppedenicca tamine atti: —Ouape rromanodeni orraniuarrine manaconi ziniro uemani da onezana rromanodeni orrarrarode −narrari. Naraha Paoro attipa: —Ouape rromano madirra orrezape ziniro da onerrerade. Ossonaponizama rromano orrani −narrari Paoro.

²⁹ Nazapa isso teppeppedeni Paoro cossi quenabote narraridenipa Paoro atti mittemanazapa touarri-baqquiqqui nade. Poccadeni tamine naco cappinarrari. Poua attiza rromano madirra cadeiaza rrore iquenarrari, cossi inaqquimanazapa pouazana uima ssonarinitouiraha. Pouaza oppina teza paparra narrari.

Paoropa zodeodenicca uima cacattemadedeniza toqquezimarrari

³⁰ Uada ssiuarrapa rromanodenicca isso teppeppedenicca tamine atti: —Nerrecotoui zodeodenipa Paoroza boqueqquiri narrari? −nazapa Paoro cadeiaza dicca inaza pouaza uati tarrari: —Niza, uaua onabaqquiza queriqquimanazana ticca uima icattememananiuarrine −narrari. Nazapa dada toqquimade taminedeni, zodeodenicca uima cacattemadedeni deni toquerrenarrarideni tezerre queriqquimanaza rromanodenicca isso teppeppedenicca tamine Paoro iaqquezimazapa taminedeni baccodeniuarri uarrari.