Tahimarideni 12 - Kulina New Testament Brazil

Tiaco inanazoqquemana, Pedoro toponi cocoroza coro izimemana narrari

¹ Nazama pemi torra-rreraccazape zama arobeni Zodeauarri zodeodenicca tamine Erodi madirrari. Narraripa Zesoza rrehe quenarrarideni inarrizobaqquiuiuarrine pocca madirra icazossebaqquizapa itadamemanarrari.

² Nazapa poua attiza Zouaocca ato Tiaco toponi uauarrinaza inanazoqque-manarrari.

³ Narrari zoqquezapa zodeodeni uatizemanarrari. Uatizemanaui tamine Erodi qqui tazapa: —Pedoro naco dama tiquenarro −narrari pocca madirraza. Zodeodenicca errete imenibote onini Pao ssarra tarrarauicca (onini onihipe Pascoa) narraro erretecca uadaza Erodi atti nama narrari.

⁴ Nazapa Pedoro dama iquenaza toponi cocoroza coro izimemanarrari. Nazapa isso teppeppe bazima Pedoro ecauemanarrari. Taide 4 quenaha ecauemanaporrari. Zotode 4 quenaha ecauemana, zotode 4 quenaha ecauemana, zotode 4 quenaha ecauemana narrari. Tamine Erodi attipa: —Niza errete Pascoa rriquezana Pedorocca uima cattemaniuarrine uaua onana. Nazana toponi cocoroza qquenazapa madirra bazima qqui toquenaza zoqqueuiuarrine −narrari.

⁵ Nazapa Pedoro toponi cocoroza uezaraha Zesoza toquerrenarraridenipa oza onihiuarri Pedorotoui Deoza uati uati zanapomanarrari.

Deorrine Pedoro toponi cocoroza qquenarrari

⁶ Narraro zomeza Pedoropa toponi cocoro bodiza uezarrari. Corriti pamacosseza birri rrore iquenazapa isso teppeppe arrauarri ua arrauarri ua naui nocconiza Pedoro uittizaza uadarrari. Poua cacauade ouahadenipa totoqquezimaza barrari. Uada ssiuarrana Erodipa Pedorocca uima cattemade uaua nauiuarrineraha narraro zomeza Pedoro amossi narrari.

⁷ Naui toponi cocoroza ia Zozossede Deocca zozosse memeuarricca auatozapa tossiuarrabaqqui narraro. Pedoro uadaraha ppariza dipi naza: —Uassinarra titemarri! −nanarra birricca corriti rreouarrarra narraro.

⁸ Nazapa: —Rrari, ticca etero tezarri, temoricca sadaria naqui tezarri −narrari. Uezazapa Deocca zozosse uati tapomarrari: —Ticca etero motaranicca naqui tezeza onatti tiqquenarri −narrari.

⁹ Nazapa Deocca zozosse memeuarricca taide torreninerrari, Pedoropa narrari natti toqquenaraha poua bodipa: —A, arrirrarope pina occa uadassa nani −narrari. Deocca zozosse memeuarricca parrissa poua eqquenarrariraha Pedoropa ssamo tarrari.

¹⁰ Nazapa totoqquezima cacauade uaueri narizaraha deniccaza tossoniqquimani, deniccaza tossoniqquimani tanimanarrari. Totoqquezima amossiniuarriccape pperro nauatoni uacosseraha nauiuarri bacco tanimanazapa noccobirri poni poniraraha touabarraro. Nazapa touedemanizapa rraui touedadada… Deocca zozosse amossi narrari.

¹¹ Pedoropa qquenaza bodi uatomarrari: —A, rridapanape qqui onani parrissaraha Deocca zozosse memeuarriccarrine oqquenarraro. Oua rrarade zodeodeni naco Erodi oua inanazoqqueuiuarrine touini quenaraha rridapanape zori onani −narrari Pedoro.

¹² Nazapa Pedoro arra poua parrissa qquenarraricca uima bodi uatomauissa tazapa Mariacca ozauarri toccarrari. Ponipe Zouaocca ami, arra Zouao poua oni ouahapa Maraco. Naui Mariacca ozazapa madirra Deoza uatide toqueriqquirra narrari.

¹³ Nauiza bacco tazapa toqquezimauiuarrine amossiniuarricca totoqquezimaza coba coba naza uaua narrari. Mariacca zozosse Rode mittaza —Nerrecorrari uaua narrari? −nezape qquide qquenarraro.

¹⁴ Nanarra Pedoro atti poniza rrizera nezape uatizeza totoqquezima taborani rroppa tozimanirraro. Attinipe: —Pedoro ccaniui! Amossiniuarricca noccobirriza uarrari! −narraro.

¹⁵ Naraha bodideni parrissa quena-rraraza: —Timaizarraro, ccani-rraraui −quenarrari. Naraha Rode attinia: —Parrissa narraripa! −narraro. Naraha: —Narrari rrarauitide. Poua cacauade Deocca zozosse memeuarricca uitide −quenarrari.

¹⁶ Naraha Pedoropa coba coba naui parra narrari. Nezape totoqquezima icataborrizemananerre Pedoro rrizera nazapa uarro quenarrari.

¹⁷ Nazapa uimahaha canarrari, naraha Pedoro poua zepe da naza: —Zamarrima tiquenaccarri. Occa uima uati onaccana −narrari. Nazapa Deorrine poua qquenauicca uima pouadeniza uati uati tarrari. Rriquezape: —Arri occa uima Zesoza rrehe quenarraridenicca tamine Tiacoza uati tiquenana, arra imecotedeni bazimaza naqui uati tarizemanana, occa uima nauatoqquiri nauiuarrine −narrari Pedoro. Nazapa nauicca madirra inebobaqquiza oza onihiuarri toccarrari.

¹⁸ Naraha arra Pedoro cacauade isso teppeppedenipa cassiuerremanaza qqui toquenaraha amossi nazapa uarro quenarrari. Ssamoni auemanazapa: —Nerrecouarri arraza uezarraripa? Nerrecoma naza rroppa tarrarinarra? −quenarrari.

¹⁹ Tamine Erodipa: —Pouatoui qqui tarizemananissa tarri! −narrari. Naraha qqui inimanirrarazapa Erodipa isso teppeppedeniza uati tarrari: —Nerrecoma naza Pedoropa amossi narraritta? −narrari. Naraha ssamoqquiri naza pouadeni cacomemanazapa tamine Erodi attipa: —Rrari, tiadenipe tirricarri! −narrari. Nazapa pouadeni rricauiuarrine iaqquenabaqquimanarrari. Naui zotodepa tamine Erodi zama arobeni Zodeaza madiraha toccarrari, oza panani Sezareazana madiccauiuarrine.

Tamine Erodipa zoqquerrari

²⁰ Naraha tamine Erodipa oza panani Tirocca madirraza boque, oza panani Sidocca madirraza naco boque tarrari. Erodicca madirrapa narrarideniza zamatapa dada iquenaza rrirripemana naraha tamine Erodi pouadeniza uadizapa zamatapa dada paparra quenarrari. Naraha pouadenira queriqquimanazapa: —Rrina, tamine Erodiza rrauirrezimeza icarronerapomana −quenarrari. Naraha taidepa tamine Erodi birri accode onipa Barastozaha rraui torrezimaporrari. Pouaza attidenipa: —Rrari, tamine Erodi iaza torronemaniuiuarrine ia acco ticanabaqquirri −quenarrari Barastoza. Nazapa Barasto Erodiza uati tarrari.

²¹ Naraha Erodipa Barastoza: —Niza uada onihizana uimarideni omittaniuarrine −narrari. Nazapa narraro uada bacco teza pocca uima uati tauiuarrine tamine Erodi pocca etero bicani uezazapa madirra queriqquimanauiuarri toqquezimarrari. Nazapa pocca uiuittari bicaniza uittarizapa uima uati uati tarrari.

²² Tamine Erodicca uima mittemanazapa uatizemanaza rroua rroua quenarrari: —Arrarrari attipa pina deo attissa narrari! Madirra atti rraraui! −quenarrari.

²³ Tamine Erodipa pocca madirra pouaza uatizemanaza nama quenaraha: —Nema tiquenerrerarri, ouape deo orrarrerani −narrararrari. Nazapa Deocca zozosse memeuarriccarrine Erodi amazati quiza narrari. Poua ime meqquene rrine ssari quenazapa uatiarrari.

²⁴ Tamine Erodi madiccaza pouarrine narrizoue torrarizeraha Deo Atti zama bazimaza torrarizezape madirra Zesoza toquerrenarrari touapirizarrari.

²⁵ Nazapa Banabe Saoro tezerrepa oza panani Atioquiauarricca da naqquinarra Zerozareuarri iaccanimanaza da iquenehe rriquezape Atioquiauarri touedanirrari. Zouao pouaza Maraco quequenanarrari naco pouadeniza toccarrari.