Tahimarideni 10 - Kulina New Testament Brazil

Pedoro Conerio tezerre

¹ Nazama oza panani Zope uarrira taniza oza panani onini Sezareazapa maqquiderre madirrari, poua onipa Conerio. Pouapa rromanodenicca isso teppeppe zossede, pocca zozosse tabaqqui 100 quenarrari. Pouadeniza: —Zama Itariauarricca isso teppeppedeni −quequenanarrari.

² Coneriopa madirra bicaui, Deoza damera tarrari. Pouapa zodeo rrararaha poua pocca madirrama Deoza nacassaqquiri naza Deo Attiza iboraqquiri narrari. Arra Coneriopa zodeodeni touati nauanaqquiri narrarideniza naco accora tarrari. Deoza uatide naco nenebo narrararrari.

³ Nazapa marri touenarronaza pina 3'za Conerio pocca uadassa neza Deo Atti ccaccaronade auatorrari. Conerioza qquezimaza uaua narrari: —Conerio! −narrari.

⁴ Nanarra Conerio cattoma nazapa cappinaza uati tarrari: —Nerrecora ouaza uati tinaniuarrine? −narrari. Nazapa pouaza uati tarrari: —Deopa titoui uati rrama-rraraui. Tetti mittaui, arra touati nauanaqquiri narrarideniza naqui accora tinani qqui taui.

⁵ Rrari, oza panani Zopeuarri madirra zosse tinabaqquirro Simaotoui, poua oni ouahapa Pedoro. Narraripa pouadeniza ccarronauiuarrine.

⁶ Poua pina poua onissa narraricca ozaza madirrari. Narrari Simaopa bani etero nanadacomade. Pouapa ueni imehi inidiza madirrari −narrari.

⁷ Nazapa Deo Atti ccaccaronade Conerioza uati uati taha rricazapa toccamacossanirrari, amossi narrari. Nazapa Conerio pocca tatarabaiade pama, isso teppeppe orrari narrarideniza uaua narrari. Isso teppeppepa Deoza damera tarrari, Conerio birri accode torrarrari.

⁸ Nazapa pocca uima uati tauissa tazapa Zopeuarri zosse inabaqquiza rraui torrarrari.

⁹ Uada ssiuarra rraui rraui torrarrari, marri orrariuariri naza Zopeuarri bacco toquenabote narrari. Marri narrarissa naza Pedoropa Deoza uati tauiuarrine Simaocca oza tetepiuarri toccamarorrari.

¹⁰ Pedoropa pemiza rripauiuarrine touini naraha rrirripa ppede narromanaccaza Deoza uatide torranarra pina pocca uadassa neraha Deorrine parrissa qqui tarrari.

¹¹ Nazapa qqui tanerre meme touaba neza pina etero imenissa narraro arriuarri ssoque zanani pama, arriuarri ssoque zanani pama nehe namiuarri ccaronarraro.

¹² Nazama arri etero ssoque caniqquimani bodizape bani carrizamaro narrari. Bani zamacca, ozacca, eppe carriuicca, poua baccoza ccarizarraricca narrari. (Bani motapa bani siri, arra Moizecca marinarraza: —Tirripemana terrerarri −nauicca.)

¹³ Nazapa memeuarri atti mittaronaui Pedoro mittarrari: —Pedoro, titemarri! Ticca bani titauaccarro, tirripaniuarrine −narrari.

¹⁴ Naraha Pedoropa: —Oua Zozossede, poua! Bani oppina tauiccapa Moizecca marinarraza: “Arrarraripa tirripemana terrerarri” nade. Ouape bani nama nauicca ohorripa nerrerani −narrari.

¹⁵ Naraha Pedoroza uati tapomarrari: —Pedoro, parrissa Deopa: “Arrarrari bani tirripemana terrerarri” naporaha rridapanapa Deo Pouarrine toppineraui. Nezape Deorrine toppinerauiccaza: “Oppina taui” terrerarri −narrari Deo Atti ccaccaronade Pedoroza.

¹⁶ Arra bani tauimari uati nimaniui 3 nazapa arri etero ssoque caniqquimanipe memeuarri toccamacossanirraro.

¹⁷ Nazapa Pedoro pocca uadassa narraro qqui tarrariza bodi uatoto canaza: —Nerrecotoui nama naui qqui onarrari? −narrari. Nanarra Conerio zosse inarronabaqquirrarideni arra Zopeza bacco quenarraridenipa: —Nerrecouarrina Simao madirrari? −narronemanarrari. Nazapa Simaocca ozacca siba sse nauarraninicca totoqquezimauarri bacco iquenarrari.

¹⁸ Nazapa bacco iquenazapa uaua quenarrari: —Simao-Pedoropa arraza madirrarico? −quenanarra: —Rrehe, arraza madiui −quenarrari.

¹⁹ Pedoropa oza tetepiuarri bodi uatoto cananarra Deo Corime pouaza uati tarrari: —Madirra 3 quenaha titoui bacco quenaui.

²⁰ Titemarri, ticcaroneza pouadeniza ticcana. Ticappina-rrerarri, arra titoui bacco quenarraridenipa oua zosse onarronabaqquirrari −narrari Pedoroza.

²¹ Nazapa Pedoro ccaronaza pouadeni qqui tazapa uati tarrari: —Arra toui rraui tirrarronarrarope arri ouaparri. Nerrecotouira rraui tirrarronarraro? −narrari Pedoro.

²² Nazapa pouadeni attia: —Conerio ia zosse narronabaqquirrari. Pouapa isso teppeppedeni zossede, madirra bica bote. Zodeo rrararaha Deoza ibora tarrari. Zodeodeni naco pouaza: “Uima bicani carriui” quequenanarrari. Narraria arra Deo Atti ccaccaronade pouaza auatoza: “Ticca madirra Pedorotoui zosse tinabaqquirro, ticca ozauarri ccarronaza pocca uima timittaniuarrine” naza ia zosse narronabaqquirrari −quenarrari.

²³ Nazapa Pedoro: —Rrehe, bica tani. Arri occa ozaza timadimanaccarri, izamassana tiadeniza occaniuarrine −narrari. Nazapa uada ssiuarrana Pedoro Coneriocca zozosse tabaqquiza toccarrari. Zopeuarricca Zesoza rrehe quenarrarideni mota naco rraui torrarrari pouadeniza.

²⁴ Nazapa uada ssiuarrana oza panani Sezareaza bacco tanimanarrari. Nauizapa Conerio, pocca madirra, poua tessedeni quenaza Pedorotoui madimanarrari.

²⁵ Nanarra Pedoro Coneriocca ozaza bacco taza toqquezimabote naraha Conerio qquenazapa Pedoro baccouarri poua pitoza uitta narrari. Pouaza uatizeza: —Deni tirrani −nauiuarrineraha.

²⁶ Naraha Pedoropa Conerio zepeza rroca inimaza: —Titemarri, ouape Deo orrarrerani. Oua naqui madirra arri tiassa onarraro −narrari.

²⁷ Nazapa Conerio tezerre uauatiti tarrari. Oza bodiuarri touedezimaza oza bodiza madirra queriqquimanaui uapi taui qqui tarrari.

²⁸ Nazapa Pedoro pouadeniza uati tarrari: —Ouape zodeo madirra orrani. Nazama arri zodeodenicca uimape nauatoto tinani. Occa madirrapa madirra ouaha zodeo querrena-rrararrarideniza icarrimani pina rridapana tiadeniza qquide oqquezimezape oppina tani quequenanade. Naraha Deo oua mari canazapa arrama narrari: “Rridapanape madirra ouahadeniza icarrimani naqui oppinera tani. Pouadeniza: Oppina tani, terrerarri” nade ouaza.

²⁹ Nema nezape ouaza uaua teza Deorrine ocappine-rrereza occarronarraroparri. Nazama nerrecotoui ouaza uaua tarrarotte? Rridapana ouaza uati tinarri, omittaniuarrine −narrari Pedoro.

³⁰ Nazapa Conerio Pedoroza uati tarrari: —Arri maittazama onihima neza rridapanape uada 4 nani occa ozauarri Deoza uatide orrezape marri touenarronaza pina 3'za Deo Atti ccaccaronade ouaza auatoza qqui onarraride. Pocca eterope zibehi tarraro.

³¹ Nazapa ouaza uati tade: “Conerio, Deopa titoui uati rrama-rraraui. Tetti mittaui, touati nauanaqquiri narrarideniza accora tinani naqui Deopa qqui taui.

³² Rrari, oza panani Zopeuarri madirra zosse tinabaqquirro Simaotoui, oni ouahapa Pedoro. Poua onissa narraricca ozaza madirrari. Narrari Simaopa bani etero nanadacomade. Pouapa ueni imehi inidiza madirrari” nade ouaza.

³³ Nazapa uassinarra occa madirra titoui zosse onabaqquirrariparra. Arri ia qquide ticcarronani ibora tineza bacco tarronezape etizerraro. Rrari, rridapana Deo tezerrema iqueriqquiza ia Zozossede tia mari canarraricca uima uati tinarri, imittaniuarrine −narrari Conerio.

Pedoropa Coneriocca ozaza Zeso tauimari maride torrarrari

³⁴ Nazapa manaco Pedoro pocca uima uati uati tarrari: —Rrehe, rridapana parrissa omittarrarope Deo: “Zodeodenira orrarimanana” narrararrari.

³⁵ Deopa zama bazimacca madirraza uati cauanari canaui. Poua Attiza madirra iboraqquiri naza uima bicani inanarizemanezape Deo pouadeniza nacassa tarrari.

³⁶ Deopa ia Izarraeodeniza uima bicani uati narronarrari. Narraroa arri Zeso Cristorrine Deo iaza torronerrariparra. Pouarrinena Deocca uadie zori icanirenitoui. Pouana madirra bazima Zozossededeni.

^37-38 Tiadenipe arrirraro uima nauatoto tinani. Narraroa arri Nazaretiuarricca Zeso tauimari. Taidepa Zouao pocca uima eccorarizeza poua attipa: “Ticcadeni uimasiri tinebomanarri, passo dopaniza niniqui ticarrimanarri” naporrari. Nazapa madirra passo dopaniza niqui izanabaqquirrariparra. Naui zotodepa Zeso naco Zouao passo dopaniza niqui izanarrari. Passo dopaniza niquide rrica, idimora nazapa Deo Poua Corime Zesoza inanauissa tarrari. Deo pocca dacorehe naqui Zesoza inananissa tarraro. Nazapa Zeso uima bicani inanarizarraroparri. Taidepe zama arobeni Carireauarri uima bicani inanarizarraro, zotode zama arobeni Zodea nemaneheza naqui uima bicani inanarizarraro. Uimasiri rrinede Tocorime-Taminerrine madirra ocasserani auemanarrari naco inanomibaqqui-rizarrari. Zesopa Deo pouaza madirrarirrine nama narizarrariparra.

³⁹ Nazama ia naqui Zesocca zozosse tabaqqui pouaza rrauirrarizeza oza panani Zerozareza zepe irriui qqui, zodeodenicca zama Zodea nemaneheza zepe irririzaui naco qqui qqui inarrarode. Naraha zotodepa zodeodeni aua porimacossaniza coba izanemanaza inanazoqque-manarrari.

⁴⁰ Naraha uada 3 naza Deorrine Zeso nauatonipomarrari. Naui zotode naco Deorrine iaza auatonirrari.

⁴¹ Madirra bazimazapa auatoni-rrararaha iazana ahauatoni narraride. Deopa taide ia tocatterrizabaqquiporraria arri parrissehecca uima ecomerarizaniuarrine iaza auato inanarraroparri. Iape Zeso nauatonizapa poua tezerre irriparizarraro, zeze bica tauicca ze inarizarraro narrarode.

⁴² Narraria poua tauimari madirra bazimaza ecomerarizaniuarrine ia tocazossebaqquirrariparra. Abi Deo Poua Bedi zosse inaronarraripa madirra bazimacca uima cacattemade torrauiuarrine. Naui nizaranibote Zeso poua ccanipomaza rricaporrarideni inauatonibaqquizapa arra camittaqquiri narrarideni tezerre uimarideni icattemanitoui.

⁴³ Narraria Zeso poua tauimari maittaccazama Deo Atti cacomeraqquiri narrarideni dozo narronemanarraripa arrama quequenanarrari: “Ia Idinide icca uimasiri inanamossiniuarrine nauato taui orrari naui. Pouaza parrissa inezape icca uimasiri inanamossi tani” quenapoui nade. Narraro uimape madirra bazimaza torrarraro −narrari Pedoro.

Zodeo querrena-rrararrarideniza Deo Corime torrarizarrari

⁴⁴ Nazapa Pedoro uati uati taui Conerio pocca madirrama tauaribobo cananarra Deo Corime bodideniza torrarizarrari.

^45-46 Nazama Deo Corimerrine pouadenipa touatti rriza tarraroza uati uati toquenarrari. Deoza uatizemanaza attidenipa: —Deopa bica taui! Deopa nauatorride raui! −quenarrari. Nazama Zopeuarricca Zesoza rrehe quenarrarideni Pedoroza rrauirronarraripa zodeodenirra narrari. Pouadenipa arra madirra ouahadeni zodeo querrena-rrararaha touatti rriza tarraroza uati uati toquenaui mittemanazapa: —A, madirra ouaha querrenaraha Deo Corime pouadeniza torrarizarrari −quenarrari.

⁴⁷ Nazapa Pedoro uati tapomarrari: —Arra Coneriocca madirrapa madirra ouaha querrenaraha Deorrine Poua Corime bodideniza torrarizarrari. Pouadenipa Deo Corime carrimanarrari, pina iassa quenaui. Nazapa passo dopaniza niniqui carrimanauiuarrine bica tani. Nerrecorrari pouadeniza: “Passo dopaniza niniquipa carrimana-rrarana” nauiuarrine? Noueraui −narrari Pedoro.

⁴⁸ Nazapa Conerio pocca madirrama passo dopaniza niniqui carrimanauiuarrine Pedoro icazossebaqquirrari: —Rrari, Zeso Cristo onima passo dopaniza niniqui carrimanana −nazapa madirra passo dopaniza niqui izanabaqquirrari. Zotodepa Pedoroza uati toquenarrari: —Rrari, iaza timadiccarri –quenarrari. Nazapa Pedoro uada pamehe pouadeniza madirrari.