Romanodenidsa 7 - Kulina New Testament Brazil

Carri carricca uimaza mari icanabaqquirrari

¹ Ouimecotedeni, tiadenipe Moizecca marinarra nauatoqquiri tiquenani: Madirra madiccazapa Moizecca marinarra pouaza dacoraccani.

² Narraro uima auato taniuarrinepe uenauenacca uimaza tiadeni mari ocanabaqquina, onarraro. Moizecca marinarrazape arrima narraro: Amonerre maqquiderreza uenezape ponicca maqqui madiccazapa pouazara madiccani bica tani. Narraro carricarricca marinarra poniza dacoraccani. Naraha ponicca maqqui zoqquezapa carricarricca marinarra poniza nouerani, rricani.

³ Arra ponicca maqqui madiccazapa maqquiderre ouaha inarrazapa ponicca maqquiza uimasiri inanarraro. Carricarricca marinarra zori inanarraro. Naraha ponicca maqqui zoqquezana carricarricca marinarra poniza rricani. Maqquiderre ouaha carriniuarrine oppinera tani.

⁴ Ouimecotedeni, tiadeni naqui pina Cristo tezerre ecotarrarossa nezape Moizecca marinarra iaza zosse zosse naporrarope rricani. Rridapanape ia zossede marinarra onihi icarriniuarrine bica tani. Nezape arra Cristo zoqqueraha nauatonirraricca zozosse iquerrenani. Nema nezape Deoza izepe irririzaniuarrine bica tani.

⁵ Icca uima uaidira tarraroma imadipoza Moizecca marinarra ia mari tocanabaqquiza imitteraha narrarorrine imecca uimasiri denima touatozape denima toui ibodi uauato naccade. Narraro uimasirima imadizape zoqquehe rriquerreranicca narrizoueza imadi-zanaponiuarrineraha.

⁶ Naraha rridapanape Moizecca marinarra iaza dacora-rrerani. Ia zosse zosse naporaha rricani. Moizecca marinarrazape ecotarraro. Rridapanape Moizecca marinarraboteza Deoza izepe irrirrerani. Deo Corimecca danirri icca madie zatizana Deoza izepe irrizanaporraro.

Uimasiripe iaza madini

⁷ Rrari, arri Moizecca marinarra imitteza ibodicca uimasiri touatorraro onarrarope Moizecca marinarrape uimasiri onarraroqui? Nema onerrerani! Pocca marinarraza uimasiri onananicca uima ouattarraro. Rridacca marinarra omitte-rrerezape uimasiricca uima nauato onerreranerre. Uimape arrima narraro: Madirra ouaha zepetarri touini onacomezape obodi: —Uimasiri rrerani −oneraha Deocca zossenirri Moizeza da inarraro orrariepe: —Madirra ouaha zepetarri touini tinacomemana terrerarri −nani omittezape nauato onarraro.

⁸ Moizecca marinarra nouerezape uimasiricca dacorehe auatoma-rreranitouiraha. Naraha madirra ouaha zepetarri touini tinacomemana terrerarri omittezape occa uimasiri auatomarraro. Obodiza uaidirehe touini onarrarorrine onoccoza qqui onarraro touini ohonacoma narraro.

⁹ Taide Moizecca marinarra omitte-rrerezape pina bica oneza omadirrarossa narraro. Naraha zotode madirra ouaha zepetarri touini tinacomemana terrerarri omittezape uimasiri onanani ouaza auato tarraro. Zoqquehe rriquerreranicca naqui ouaza auato tarraro.

¹⁰ Moizecca marinarrarrinepe camittehe rriquerreranicca ouaza torraniuarrineraha narraro zori onanezape zoqquehe rriquerreraniccana ouaza torrarraro.

¹¹ Uimasiripe mamaizadessa narraro. Moizecca marinarraza oua camaizarraro. Omadi-zanaponiuarrinecca uima touini oneraha uimasiripe zoqquehe rriquerreraniccauarrina oua tonanarraro.

¹² Moizecca marinarrape bica tani, uimasiri cappirani. Deocca zossenirri bazima Pouarrine parrirenissa tarraro, bica tani.

¹³ Naraha arri Moizecca marinarra bicanirrine zoqquehe rriquerreraniuarri occaniuarrinequi? Nouerani. Uimape nema nerrerani. Deocca zossenirri orrarie zori onaneza uimasiri onanarrarorrinena zoqquehe rriquerreraniuarri occaniuarrine. Moizecca marinarra bicanirrinepe uimasiricca uima ouaza auato tarraro: Uimasiripe oppina tani, uaidira tarraro.

¹⁴ Moizecca marinarrape Deocca danirri bicani nauatoqquiri inarraro. Naraha ouape ouime ocarrie omadizape uimasiri ouaza dacorarraro. Pina oua zossedessa narraro. Poni touini naniccara onananiuarrine oua cacazosse narraro.

¹⁵ Narraro obodi uatozape: —Nerrecotoui obodicca uima rriza tarraro? –onarraro. Oua nacassa onanicca bica taniccara onane-rrerarraro. Touarrari nazi taniccara onanarraro.

¹⁶ Oua nacassera onanicca onanazape uima ouaza auato tani: Moizecca marinarrape bica tani.

¹⁷ Naraha arri oua nacassera onanicca onanarrarope oua motta orrine rrerani. Uimasiri obodiza madizarrarorrine oua ocazossenirraro.

¹⁸ Ouape ouaza uima bicani nouerarraro nauato onani. Ouime ocarrie omadirre narraro uimasiri sse onani. Uima bicani onananiuarrine touini oneraha nema onane-rrerani.

¹⁹ —Uima bicani onanana −oneraha uima bicani onane-rrerani. Ouape uima uaidira tarraro touini onerrereraha uaidirehe ohonana narraro.

²⁰ Nezape obodi uatorraro: Oua nacassera onanicca onanarrarope oua motta orrine rrerani. Uimasiri obodiza madizarrarorrine oua ocazosseniza nema onanarraro.

²¹ Obodi uatomezape arrirraro uima ocarrirraro ouaza auato tani: —Uima bicani onanana −oneraha uima uaidira taniccara onanarraro.

²² Obodipe Deocca zossenirri Moizeza da inarraro touini onani.

²³ Naraha ouimepe uima onihi carrirraro. Ouimeza uimasiri dacorarrarorrine obodicca uima bicani tazarrani pina cauadirerrarossa narraro. Uimasiri deni torrezape pina poni zapaniza orrarrarossa narraro. Oua rrore naqquirraro.

²⁴ Rraho, touati nauana onaponi! Ouimepe zoqquehe rriquerreraniuarri oua touaqquerreraniuarrine nerrecorrarina oua dicca nauiuarrine parrireui?

²⁵ Ia Zozossede Zeso Cristona oua dicca nazapa Deoza ouatizeza: —Rrehe, tirrine bica tani −onarraro. Nazama occa uimape arrima nani: Obodipe Deocca zossenirriza ibora tarraro. Naraha ouimena uimasiri onananiuarrine ibora tarraro.