Romanodenidsa 12 - Kulina New Testament Brazil

Icca madie Deoza eccorarrarocca uima

¹ Ouimecotedeni, Deo iaza uati cauanari canaui auato tarraro. Narrarorrine ouatti bica teza tiadeniza uati onana, ouattissa tinanemananiuarrine: Tiadeni tessiredenima Deoza teccoremanarri. Tibodideni ssiuarra, uisso teza ticcadeni madie zati Pouaza teccoremanezape Pouatouira timadimanarri. Nema tiquenezape tiadeniza: —Rrehe, ticcadeni danirri ouaza bica tani −narrari. Narrarope Deo Pouaza parrissa tetizemanarrarocca uima parrirenissa tarraro.

² Rridapanape arrirraro zama bazimacca uimassa tinanemanapoma-rrerarri. Arrima tiquenanina bica tani: Tibodidenicca uatoue zati tinanemanarri. Nema tiquenezape ticcadeni madie cacarriqquimeraniuarrine, Deo nacassa tauicca naqui ticauatteraniuarrine. Narrarope bica tanicca ticauattera, Deo tinauatizemanauiuarrine ticauattera, parrirenissa tanicca tinanemananiuarrine ticauattera nanitoui.

³ Deo ouaza uati uana tarraria oua cazosseza tiadeniza uati onarraro. Ponima: —Deni orrani, ouana nauato onani –tiquenerrerarri. Mouaraza Deorrine nauatoto tinarraroccaza ticcadeni uima nattome tiquenarri. Zeso Cristoza parrissa tiquenarraroma tibodideni uatome-manarri.

⁴ Ia bazimape essire imadirraro. Essire orrarieza uanarizanipe uapi tarraro. Naraha bazima narrarossa nerrerani. Nauatoue onihi onihi nehe carririzemanani.

⁵ Ia Zeso Cristocca iquerrenarraro naqui narrarossa inarraro. Uapi ineraha Zeso Cristoza itassaqquizape pina poua assire orrarirrarissa inarraro. Iape orrari orrari inarizeraha imecotedeni bazimape irrariqquirraro.

⁶ Deopa iaza nauatoue onihi onihi nehe da inarizarraro. Poua nacassa tauicca madirra ouahaza, ouahaza da inarizarraro. Deorrine nema nezape Poua Atti uati iqquimaniuarrine madirraza nauatoue da inezape narraripa Poua Atti uati iqquimarizana. Poua bodiza: —Parrissa Deo ouaza uati tarrari −nazapa Deo Atti uati toqquimade torrauiuarrine bica taui.

⁷ Deocca nauatoue onihipe madirra birrideni acco icanabaqquiuiuarrine. Narraro nauatoue iaza inanezape acco icanabaqquiuissa tana. Madirra mari icanabaqquiuiuarrine Deo iaza inanaza naqui madirra inauattabaqquiuiuarrine dameraqquiri inana.

⁸ Ettiza madirra bodi inauatizeuiuarrine Deo iaza inanaza naqui dameraqquiri inana. Madirraza da inaniuarrine Deo iaza inanaza naqui accora ineza da inana. Quequeriqquimana narrari cacauade Deo iaza inanaza naqui dameraqquiri inana. Touati nauanaqquiri narrarideni acco canade Deo iaza inanaza naqui etizeza acco icanabaqquina.

Zeso Cristocca madirra tiquerrenarrarope arrima tiquenarri

⁹ Parrissehera madirra bazimaza tetideni uanaqquiri narri. Uaidirehezape nacasseraqquiri tiquenarri. Uima bicanitouina dameraqquiri tiquenarri.

¹⁰ Zeso Cristoza rrehe tiquenarrarope pina tia timecote tezerre tetideni cauanerarrarossa tiquenarri. Timecotedeni bica tauicca carrimanapouiuarrine naco tetizemaneza: —Ouape zotode −tiquenana. Timecote uima bicani inaneza naqui pouaza: —Rrehe, tirrine bica tani −tiquenana. Nema ticanirere canezape bica tani.

¹¹ Tizepedeni irrimananiuarrinepe iboqquiri tiquenerrerarri. Tibodideni uatizeheri neza ia Zozossedeza tizepedeni irrimanana.

¹² Arri titezerremadenicca uima bicanitoui timadimanezape uatizehema timadimanarri. Ocasserani temaneza naqui mouaraza tinauanemanarri. Deoza uatide naqui tinebomana-rrerarri.

¹³ Zeso Cristoza parrissa quenarrarideni cappiremanaza naco tiadenina pouadeniza da tiquenana. Madirra ticcadeni ozaza bacco narronemanaza naco pouadeniza bicaqquiri tiquenarri. Pouadeniza: —Nirra, rraui tirrezimarri. Arra, tirripemanarri. Arriza ticauadirraniuarrine bica tani −tiquenana.

¹⁴ Madirra tiadeniza rrara rrara quenaza naco tamassomana terrerarri. Uima bicani carrimanauiuarrine Deozara uati uati tiquenana.

¹⁵ Titessedeniza uima bicani torrezape pouadeni tezerre tetizemanarri. Titessedeniza uima ocassera tanicca torrezape pouadeni tezerre orri tiquenarri.

¹⁶ Ticarronerara caneza timadimanarri. —Ouana deni orrani −tiquenerrerarri. Pina timecote arramani toquerrenarraridenissa tiquenarri. —Ouana denima nauato onarraro −tiquenerrerarri.

¹⁷ Madirra tiadeniza uima inanemanaza naqui manaco pouadeniza uima tinanemana-rrerarri. Uima bicani tinanemananiuarrinera dameraqquiri tiquenarri. Nazapa madirra bazima ticcadeni madie qqui toquenaza: —Rrehe, poccadeni uima bica tani −quenauiuarrine.

¹⁸ Madirra bazima tezerre ticarronerara canehe timadimananiuarrine dameraqquiri tiquenarri.

¹⁹ Ouimecotedeni, tiadeniza ouati uana tani. Madirrarrine tiadeniza uima ssonarizape: —Manaco −tiquenerrerarri. —Ouacconepa Deona inarrizobaqquiuitoui −tiquenarri. Deo Atti dozo nanipe arrima nani: —Poccadeni narrizoue manaconipe Ouana pouadeni onarrizobaqquiuitoui −naui nade ia Zozossede Deo.

²⁰ Poua Atti dozo nani onihipe arrima nani: —Tiaza boque tarrari pemiza naco rripauiuarrine da tinarro. Bacco rrocoza naco ze nauiuarrine passo da ticanarri. Nazapa rraborreri naza tocomehizapa pano tomaccoui nauitoui −nani nade Deo Atti dozo naniza.

²¹ Uima uaidira tarraro tiadeni arrimani tonana-rreraniuarrine dameraqquiri tiquenarri. Uima bicani tinanemanezape uaidirehena arrimani torraniuarrine.