Romanodenidsa 11 - Kulina New Testament Brazil

Deopa Izarraeodeni icatterrizabaqquirrari

¹ Rrari, uati onana: Deopa pocca madirra Izarraeodeniza uattarro taco? Noueraui. Arri ouape Izarraeo potemaui zodeo orrani. Occa idipa Abarahao. Narrari rrinodi Benzami potemauicca madirra orrani.

² Taidezama Deopa Izarraeo potemauideniza: —Occa madirra −narronarraria arra rridapana pouadeni ettarrobaqqui-rrararrariparra. Deo Atti dozo naniza Poua Atti cacomerabote Eria tauimari nauatoqquiri tiquenarraro. Maittaccazama Izarraeodenicca uima bica terrereza Eria Deoza uati tarrari:

³ —Oua Zozossede Deo, ticca madirra Izarraeodenipa Tetti cacomeraqquiri narrarideni inarricarizemanaui. Arri siba ua tamaroni Tiaza dada toqquimacca naqui itaborizemanani. Oua naqui oua inanazoqque-mananiuarrine touini quenaraha oua motta omadiccani −naui nade Eria Deoza.

⁴ Naraha Deopa Eriaza uati tarrari: —Madirra mota 7 mil (7.000) quenaha ocarrini, ouattarrobaqqui-rrararrari. Pouadenipa deo pouamacca Bahao corimeza uatizemana-rraraui, pouadeni pitoza rrassi rrassi tarraraui −naui nade Deo Eriaza.

⁵ Rridapana naco narrarideni potemaui mota pamehema naha Deo nebomana-rrararrari. Deopa bica tarra, uati uana tarra narrarirrine icatterrizabaqquirrari.

⁶ Deo bica tarrarirrine icatterriza-baqquirraripa madirra pouadeni inanemanarrarorrine rrerani. Rridacca pouadeni inanemanarrarorrine Deo icatterriza-baqquizapa ettipe: —Deo bica tarrarirrine −inerreranitouiraha.

⁷ Nazama Izarraeodenicca uimape nerrecoma narrarona parri? Pouadenipa Deoza bicaqquiri nauiuarrine touini quenaraha narraro uima bacco toquena-rraraui. Mota sibera taha Deo icatterriza-baqquirraridenina Pouaza bicaqquiri narrari. Motapa parra uaribodeni todidimanariui narrari.

⁸ Deo Atti dozo nanizape arrima narraro: —Deorrine bodideni pina cauadirrabote toquerrenarrarissa quenarrari. Noccodeni mozi inanabaqquirrari, qqui toquena-rrarauiuarrine. Uaribodeni moda inabaqquirrari, mittemana-rrarauiuarrine. Narraro uima anirronarrarope rridapana arrirraroparri −nani nade Deo Atti dozo naniza.

⁹ Tamine Dabi naco narraro uima Deoza uati tarrari: —Poccadeni rripaqquieza uauatizemana naraha poccadeni rripaqquiepe pina cotterreheza ppiro tocanirerrarissa nana. Naui touedimemanazapa nanarrizo toquerrenauiuarrine.

¹⁰ Noccodeni tozizi-zanapona, qqui toquena-rrarauiuarrine. Idedeni rrocazemanaha nama zanapomanana, ocasserani inauanemana-zanaponiuarrine −naui nade Dabi.

Zodeo querrena-rrararrari tocassiuauerauiuarrinecca uima

¹¹ Rrari, uati onapomana: Zodeodeni touedime-manarrarissa quenarraripa Deo parra ettarrobaqquiriui narrarico? Noueraui. Pouadeni Deoza iboqquiri nazapa arri icassiuaueraniuarrineccape zodeo querrena-rrararraridenizana torrarraro. Narraro acconi Deorrine zodeodeni uadimanaza: —Ia naqui Deoza iquerrenani-pomana −quenauiuarrine.

¹² Zodeodeni iboqquiri naza poccadeni uima tossamozape madirra ouahadenizana Deocca biquehe, pocca acco canehe torrarizarraroparri. Niza zodeodeni Deoza toquerrenaniuissa tazapa madirra bazimaza uima bicani denima torrarizanitoui.

¹³ Naraha zodeo tiquerrena-rrerarraro tiadeniza uati onarraro. Deopa oua cazosserrari ouaza bica taza tiadeni maride damera onarraro.

¹⁴ Narraroza occa madirra motadeni uima bicani ticarrimanani qqui toquenaza: —Rraho, iaza torra naccaraho −quenazapa bodideni cacarriqquimere-manauiuarrine. Tossiuauehe naqui carrimanauiuarrine, onarraro.

¹⁵ Zodeodeni uauattarro toquerrenarraripa Deorrine madirra ouahadenira Pouaza carronerara canarrari. Niza zodeodenicca uima Deoza tobicapomezape uatizehe imeni torranitoui. Pina madirra uatiaraha camittemanirrarissa quenauitoui.

¹⁶ Ia zodeodeni icca uimape pina pãocca uimassa narraro. Tirico bono taidecca pore quenaporrariccaza pão inauatozapa sica naui ime mota bazira taha Deoza da da ihinanarrari. Narrari pão ime mota Deoza torrazapa namanaha naco Deocca torrarrari. Aua rritona rrabo naco Deoza torrazapa inine bazima Deocca torrarizarrari. Nazama icca idi potaporrari Abarahaopa pina pão ime motassa, pina rritona rrabossa narrari. Pouapa Deoza torrazapa poua potemauideni naco Deocca toquerrenarrari.

¹⁷ Zodeodeni motapa pina uizarracca rritona ininessa quenarrari. Cacauadepa rritona inine mota ca ippirizaza manaco zamacca rritona ininera ppa icazana-rizarrari. Tiadeni Abarahao potemaui tiquerrena-rrerarrarope pina zamacca rritona inine ppa cazana-rizarrarissa tiquenarraro. Nezape rritona rraborrinena camittaqquiri tiquenarraro.

¹⁸ Naraha: —Iana denima bicaqquiri inarraro, zodeodenipa arramani toquerrenaui −tiquenerrerana. Tibodideni uatorri. Tiadenipe rritona inine tiquerrenani. Tirrinedenipa rritona camitta tarraraui. Poua rraborrinena camitta tarrari.

¹⁹ Tibodideni arrima tiquenanitide: —Rrehe, zodeodenipa pina rritona inine ca toppirizarrarissa quenarrari. Deo ettarrobaqquizapa iana pocca madirra iquerrenaniuarrine ia ppa tozanabaqquirrari −tiquenarraro.

²⁰ Nema tiquenarrarope parrisseheraha tibodideni uatorri. Pouadeni parrissa quena-rrarazapa uauattarro toquerrenarrari. Tiadenipe parrissa tiquenarrarorrine Deocca tiquerrenarraroparri. Nazama parri! —Iape deni iquerrenani −tiquenerrerarri. Deo noppinera ticappinemanarri.

²¹ Deopa rritona inine ca toppi-rrarauiuarrine poni narrarazapa ca toppia rricarrari. Parri, tiadeniza pina narraridenizassa inanerana.

²² Nazama tibodideni uatomanarri. Deopa uati uana tarrari, bica taui. Naraha Poua naco narrizo taui. Pouaza iboqquiri narrarideni ettarrobaqquirrari. Naraha tiadeniza uati uana tarrari. Pocca touati uanehezara timadimana-zanaporri. Nema tiquenerrerezape pina aua inine ca ippirizarrarissa tiquenanitoui.

²³ Naraha zodeo bodideni cacarriqquimere-manaza poccadeni uima parrissa quena-rrararraricca nebomanazapa Deoza toquerrenani-pomauitoui. Deo Dacorabotepa aua rritona inine ca ippirizaporrari inaccaniza ppa icazanani-rizapomauiuarrine parrireui.

²⁴ Tiadenipe pina zamacca rritona inine uizarracca rritonaza ppa cazana-rizarrarissa tiquenarraro. Naraha zodeodeni Deocca madirra toquerrenani-pomauiuarrinepa Deo Pouaza denima bica tarraro. Pina uizarracca rritona inine ca ippirrari inaccaniza poua edeza ppa icazanani-rizapomarrarissa narraro.

Izarraeo potemaui zodeodeni naco tocassiuauerauiuarrine

²⁵ Ouimecotedeni, arrirraro uimape taide madirraza auatora taporaha timittemananiuarrine uati onana, nani tibodideniza: —Iape deni iquerrenani −tiquenerreraniuarrine. Narraro uimape Izarraeo potemaui zodeodeni mota uapi taha Deoza touibomanarrari. Naraha zodeo querrena-rrararrarideni touapiuissa tazana zodeodeni poccadeni iboue nebomanauitoui.

²⁶ Nazana Izarraeo potemaui zodeodeni bazima tocassiuauerauitoui. Narraro uimape Deo Atti dozo naporraroza arrima narraro: —Niza oza panani Siaocca ia Idinide ccarronauitoui. Izarraeo potemauidenicca uaidirehe inanamossiniuarrine −naui nade Deo.

²⁷ Poua Atti onihi naqui arrima narraro: —Nazana pouadeni tezerre rrehe icanirerraro onaparrirenissa tezape poccadeni uimasiri onanamossinitoui −naui nade Deo.

²⁸ Zodeodeni motapa pina Deocca uadidedenissa quenaccaui. Nema narraroa Zeso Cristo tauimari icassiuaueraniuarrinecca tiadenizana torrarraro, ticassiuaueraniuarrine. Naraha Deopa zodeodeni potaporrarideni icatterriza-baqquiporrarirrine pouadeni potemauitoui uati uana taui parra naccaui.

²⁹ Deo pocca danirripe idini-rrerani. Madirra uaua inabaqquiporrarideni naco inebobaqqui-rraraui.

³⁰ Tiadenipe taide Deoza iboqquiri tiquenaporraro. Naraha rridapana zodeodeni Pouaza touibomanazapa tiadenizana uati uana tarrari.

³¹ Deopa zodeodeniza narrarossa inanapomaniuarrine. Rridapana Pouaza iboqquiri narrarirrine pocca touati uanehe tiadeniza bacco tarraro. Niza zotode pouadeniza naqui pocca touati uanehe auato inanapomanitoui.

³² Madirra bazimapa narrarissa caniqquimerarrari. Iboue carririzemanazapa Deo inebobaqquirrari, ibouecca uimaza madimanauiuarrine. Deo nama nazapa uapimaza pocca touati uanehe auato inananiuarrine.

³³ A, Deocca biquehepe rriquerrerani! Pocca nauatoue naqui rriquerrerani. Poua bodicca uatoue imittaniuarrine iparrire-rrerani. Poua inananicca naqui qqui qqui ineraha imitte-rrerani.

³⁴ Nerrecorrari ia Zozossede bodi nauato taui? Noueraui. Nerrecorrari Deo bodi acco icanauiuarrine parrireui? Noueraui.

³⁵ Nerrecorrari poua carrirraricca Deoza da inaza: —Deo ouaza dirri naui −nauiuarrine parrireui? Noueraui.

³⁶ Memecca, namicca bazima anirizarraripa Deo inauatorizarrari. Pocca dacoreheza bazima ecauarizarrari. Bazima anirizarrariza Deocca deni torrehe auato tarraro. Nezape Pouaza: —Tiape deni tirrani, denima bica tinani. Arra Tiassa narrari ouahapa noueraui −ihizanapo nana. Parrissa nema nana.