Romanodenidsa 1 - Kulina New Testament Brazil

Paoro nirra narrari

¹ Nirra ouimecotedeni? Ouape Paoro, Zeso Cristocca zozosse, tiadeniza occa uima dozo onarraro. Zeso Cristocca zozosse orraniuarrinepe Deo otoui uaua narraride. Narraroa arri pocca uima bicani madirra tocassiuauerauiuarrinecca mari mari ohocanabaqquiriza nauiuarrine omadirraro.

² Maittaccazama narraro uimape Deorrine Poua Atti cacomeraqquiri narrarideni uati toquenaporrari. Poua Atti dozo nanizape anini.

³ Narraro uima bicanipe arra Deo Poua Bedi Zeso Cristo tauimari. Pina madirra bedissa naha tossonarraripa tamine Dabi potemauizana tossonarrari.

⁴ Deo Corimerrinena Zeso Cristocca uima auato inanarraro. Zeso zoqquezapa Deo pocca dacorehema inauatonirrari. Narrarorrinena uima auato tarraro: Ia Zozossede Zeso Cristopa Deo Bedi.

⁵ Narrarina ouaza uati uana taza oua cazosserrari, zama bazimacca madirra poua oni mittarizemanauiuarrine. Ouattipe: —Zeso Cristoza parrissa tiquenanissa tarri. Pocca marinarraza iboraqquiri tiquenarri −ohonariza naniuarrine oua cazosserraride.

^6-7 Rromauarri timadimanarraro tiadeniza naqui Zeso Cristo tauimari bacco tarraro. Deo titouideni uati cauanari canazapa Zeso Cristocca madirra tiquerrenaniuarrine titouideni uaua narraride. Arra icca Abi Deo, ia Zozossede Zeso Cristo tezerre tiadeniza uima bicani inanemana-zanapona, onarraro. Icca Abi Deocca rronehe naqui tiadeniza torrazanapona. Ia Zozossede Zeso Cristocca rronehe naqui tiadeniza torrazanapona, onarraro.

Paoropa: —Rromauarri occana −narrari

⁸ Rrehe, taide titouideni Zeso Cristo onima Deoza uati uati ohonanezape: —Rrehe Abi Deo, peperri. Tirrine bicaqquiri naui −ohonanarraro. Ia Zozossede Zeso Cristoza rrehe tiqueneza poua attiza iboraqquiri tiquenezape titauimarideni uati uati quequenanaui ohomittariza narraro. Zama uapimacca madirra attideni: —Rromanodenicca rrehenirripe Deoza dacorani −nanarizemana naui omitteza titouideni Deoza uati uati ohonanarraro.

⁹ Obodi ouassirema Deoza ozepe ihirri narraro. Poua Bedi tauimari icassiuaueraniuarrinecca maride damera onarraro. Deopa occa uima qqui taui, nauato taui. Narraroa titouideni Deoza uati uati ohozanapo narraro.

¹⁰ Tiadeni qquide occaniuarrine Deoza uati uati ohonaneraha rrehe narraraccaui. Deo ouattiza rrehe nazapa niza tiadeniuarri bacco onanitoui.

¹¹ Tiadeni qqui onabaqquiniuarrine touini onani. Tiadeniza Deo Atti ouacomerezape Poua Corimerrine Pouaza rrehe tiquenarraro todacorani naniuarrine, onarraro.

¹² Arri tiadeni Zeso Cristoza rrehe tiquenerre, ouanaqui Zeso Cristoza rrehe onerre nezape titezerredeni icatizerara cananiuarrine, onarraro.

¹³ Ouimecotedeni, nauatoqquiri tiquenaniuarrine oneza uarrirriraza ouape nani occaniuarrine occa bobode ohonarrora naraha occa bobode uarrirriraza tossamo tossamo zanaponi. Niza tiadeniuarri oqqueza tiadeni mari ocanabaqquizape ticcadeni madirra ouaha naco Zeso Cristoza toquerrenauiuarrine, onarraro. Arrana zodeo querrena-rrararrarideni zama onihiuarricca, zama onihiuarricca mari ocanabaqquirizapozapa Zeso Cristoza toquerrenana canade. Tiadeniuarri uima narrarossa naniuarrine nacassa onarraro.

¹⁴ Zeso Cristo otoui uaua narraripa: —Madirra zama bazimacca otauimari mittemanauiuarrine maride ticcarizarri −narraride. Nezape pina oza pananiza madimanarrarideniza, zama dopeza madimanarrarideniza naco poua tauimari mittemanauiuarrine maride occarizarraro. Arra papeo nauatoqquiri narrarideniza, papeo ssamoqquiri narrarideniza naqui Zeso Cristo tauimari mittarizemanauiuarrine maride onebo-rrerarraro.

¹⁵ Narrarorrinea Rromauarri timadimanarraro naqui Zeso Cristo tauimari icassiuaueraniuarrinecca tiadeni mari ocanabaqquiniuarrine nacassa onarraro.

Zeso Cristo tauimarina dacorabote orrarini

¹⁶ Ouape Zeso Cristo tauimari icassiuaueraniuarrinecca ouacomeraniuarrinepe ocappina-rrerarraro. Ouape nauato onani: Zeso Cristo tauimaripa Deocca dacorehe madirra tocassiuauerauiuarrine, onarraro. Taidepe zodeodeniza, zotodepa zodeo querrena-rrararrarideniza naco Zeso Cristo tauimari dacorarraro. Bazima narraroza rrehe quenazapa tocassiuauerauiuarrine.

¹⁷ Arri Zeso Cristo tauimarizana Deo ia tonanabica-baqquiuiuarrinecca uima auato tarraro. Zeso Cristoza parrissa inezape poua tauimarirrine uimasiri inanarraro manaconipe rricani. Icca rrehenirri narraro orrarirrarope Zeso Cristo tauimari iaza torrarraro. Deo Atti dozo naniza arrima narraro: —Madirra bica tarrari Deoza parrissa narraripa narraro rrehenirrima madi-zanapouitoui −naui nade Deo.

Madirra bazima uima inanemanani auato tarraro

¹⁸ Madirra uimasiri totonanadedeni animanaui. Niza Deocca narrizoue oppinabote memeuarri ccaroneza pouadeniza ssonarinitoui. Narraridenipa poccadeni uaidireherrine parrissehecca uima tocauatterauiuarrine ssamoqquiri naui.

¹⁹ Deo tauimaripe auatorizarraro. Pouadeniza naqui auato tani. Deorrine pouadeni bodi nauatoqquiri narrari.

²⁰ Deopa inoccoza qqui inarraraui. Pocca uima naqui inoccoza qqui inerrereraha zama taide Deo inauatoponizama pocca dacorehe rriquerreranicca, pocca deni torrehe bazimaza auatorronarraro. Pocca nauatoue qqui inarizarrarope narraro uimaza ibodi uauatoma nezape Deocca uima iaza auato tarraro. Naraha madirra uimasiri toui quenarraridenipa: —Deo tauimari iaza auato terrerani −quequenanaraha pouama maizemanarrari.

²¹ Pouadenipa Deo Pouaza bodideni nauatoqquiri naraha Deoza: —Bica tinani, deni tirrani −quequenana-rrararrari. —Peperri. Tirrine iaza uima bica tani −quequenana-rraraza naco pouadeni bodipa uima ponimaccazara toquerrenarizarrari. Bodideni tossamorizazapa ziziniza toquerrenarrari.

²² Attidenipa: —Nauatorride orrirarraro −quequenanaraha ssamoqquiri naui.

²³ Madirrapa uatiaha taui. Naraha Deopa uatiehera tarrari. Pocca deni torrehe bazimaza auato teraha Pouaza rrehe quena-rrarazapa madirra uatiahaqquiri narrarideni corime inauatomanaza narrarizana: —Ia cacauade −quequenanarrari. Arra bani eppe carriui corime naco inauatomana, namiza rrarrauiriza narrari arra birri carri isso carri narrarideni corime inauatomana, pouadeni baccodeniza rrarrauiriza narrari corime naco inauatomana naza poccadeni nauatonarraza: —Ia cacauade −quequenanarrari.

²⁴ Narrarorrinea Deo inebobaqquirrari. Pouadeni bodiza uaidirehe touini quenazapa uananehecca uimaza toquerrenarrari. Pouadeni tesse tezerre uananehe oppina tanicca inanemanarraro.

²⁵ Deocca uimape parrisseheccaraha Deocca uimaza uattarrorro tarrari. Maizehetouira dameraqquiri narrari. Deo inauatorizarrari corime inauatomanaza narrariza uauatizemana nazapa: —Ia cacauade −quequenanarrariparra. Pouadeni Nauatode Deozara uatizemanauiuarrine bica taraha nama quena-rrararrari. Pouaza: —Bica tinani, deni tirrani! −ihizanapo naniuarrine bica tani. Parrissa nema nana.

²⁶ Naraha madirra pouadeni cacauade ouahaza dameraqquiri nazapa Deo inebobaqquiza poccadeni uananehe oppina taniccaza toquerrenarrari. Arri amonerre ponidenicca maqqui narrade nacasseraqquiri narrarope ponidenira uima oppina tanicca inanemanarraro.

²⁷ Maqquiderre naco poccadeni amonerre arrade nacasseraqquiri narraripa pouadeni tesse tezerre uima oppina tanicca inanemanarraro. Narraro uimaza dameraqquiri nazapa poccadeni uima oppina tarraro. Nama quenazapa pouadeni imeza comani ihinauanemana narraroparri, poccadeni uananehe manaconi.

²⁸ Deoza bodideni uatouiuarrine nacasseraqquiri naza Deo Attipa: —Paparraua. Pouadeni bodi pouadeni touini quenazapa nama naha madimana-zanapouiuarrine −narrari. Narraria madirra bazima uima bica terreranicca inanarizemanarraroparri.

²⁹ Narraria madirra pouadeni bodideniza uimasiri sseqquiri naha madimana tarra, uimasiri inanemanaza uatizemana tarra narrari. Poccadeni dacorehema: —Ouana denima ocarrina −quena tarra, —Madirra ouahacca uima onauaidirana −quena tarra narrari. Pouadenipa madirra ouahacca deni torrehe acconi bodideni uadiqquiri narrari. Pouadenipa madirra inanazoqquemana taui. Amazati naco cauadire taui. —Icamaizabaqquina −quena taui. Uaidirehe denima uaidira tanicca touini quena taui. Pouama madirra ouahacca uima auatoraniza uati iqquimemana tani.

³⁰ Madirra ouahadenicca uima touaidiraniuarrine uatirridede rarra, Deoza nacasseraqquiri narra narrari. Madirra ouahaza attideni bica tarraraza atti atti quena tarra, madirra ouahadenipa: —Iana bicaqquiri inarraro −quena tarra, madirra ouahadenipa: —Iana deni iquerrenani −quenarrari uati uatirridede rarra narrari. Pouadeni bodiza uima uaidira tanicca inauatomana terre, imehideni attiza naco iboqquiri narra narrari.

³¹ Pouadenipa uima bicani mittemanauiuarrine nacasseraqquiri narrari. Pouadeni attipa: —Tiadeniza nabica onanitoui −quequenanaraha mamaizemana narrari. Poccadeni madirraza naco uatideni uanaqquiri narraraui. Madirra ouahaza naco uatideni uanaqquiri narraraui. Uadiecca naco uatideni ssonaneraqquiri narrari. Poccadeni madirracca uima tossamoza naqui: —Tia acco ocanana −quena-rraraui.

³² Madirra nama quenarraridenipa Deo Atti mittemanaporaha. Arra Deo Attia: —Uimasiri inanemanarrarodenipa parra rricariuitoui −naui nauatoqquiri narrari. Naraha pouadeni cacauemana-rrarazapa uimasiri inanemana-zanaporraro. Madirra ouahadeni uimasiri inanemanani qqui toquenaza naco: —Rrehe, bica tani −quequenanarrari.