Roca 4 - Kulina New Testament Brazil

Zeso uimasiri inananiuarrine Tocorime-Tamine nattome inaraha rrehe narrararrari

¹ Zouao Zeso passo dopaniza niqui izanaha rricazapa Zeso bodiza Deo Corime torrauissa tarrari. Ueni Zorodaouarri qquemoranizapa Deo Corime Zeso iaccarrari, zama uamoni ssono carri, siba carri taniuarri madiuiuarrine.

² Nauiuarri bacco tazapa uada 40 naha madirrari. Nauiza naco uimasiri totonanade Tocorime-Taminepa Zeso nattome inarrari. Pouapa Zeso uimasiri inananiuarrine damera tarrari. Nazapa Zeso rriperaui uadari 40 naha madizapa pemiuissa tarrari.

³ Nazapa Tocorime-Tamine Zesoza uati tarrari: —Deo Bedi tirrezape, rrari, tirripaniuarrine arrirraro siba zamatapa torraniuarrine uati tinarri −narrari.

⁴ Naraha manaco Zeso Tocorime-Tamineza uati tarrari: —Deo Atti dozo nanizape arrima narraro: “Zamatapazara imadini orrari-rrerani” −narrari Zeso.

⁵ Naui zotode uimasiri totonanade Tocorime-Taminepa ssono imeni uarri tani tetepiuarri Zeso iaqquemorazapa zama bazima pouaza auato inanarizarraro. Tocorime-Taminepa amazati Zeso zama bazima zopi icanarizarrari.

⁶ Nazapa Tocorime-Tamine Zesoza uati tarrari: —Qqui tanerre! Arrirraro zama bazimape tiaza da onaniuarrine. Tiana narraro zama uapimacca zosse zosse taniuarrine. Narraro uapimacca biquehe naqui tiaza onananiuarrine. Arrirraro zama bazimape occa torrarrarode. Nema nezape oua touini onarraroza da onaniuarrine bica tani.

⁷ Rrehe, tia tipitoza titteza ouaza tetizeza: “Occa tamine” tarri. Ouaza nema tezape arrirraro bazimape ticca torraniuarrine, onarraro −narrari Tocorime-Tamine atti.

⁸ Naraha manaco Zeso Tocorime-Tamineza uati tarrari: —Deo Atti dozo nanizape arrima narraro: “Ia Zozossede Deo Pouazara tetizemanani orrari zanaporri. Poua Attizara iboraqquiri tiquenarri” nani Deo Attipe −narrari Zeso.

⁹ Naui zotodepa Tocorime-Tamine Zeso oza panani Zerozareuarri iaccarrari. Nanicca Deoza dada toqquimacca oza tetepiuarri inanarrari. Nauiza Tocorime-Tamine Zesoza uati tapomarrari: —Rrari, tiape Deo Bedi tirrezape ticarropparri, namiuarri tissona-rreranitoui −narrari.

¹⁰ —Deo Atti dozo nanizape arrima narraro: “Deopa pocca zozosse tabaqqui memeuarriccaza uati tauitoui, tia ecauemananiuarrine.

¹¹ Pouadeni birriza tia dama irrizemanezape temori naqui sibaza cauatidi-rreranitoui” nani Deo Atti dozo nanipe –narrari Tocorime-Tamine Zesoza.

¹² Naraha manaco Zeso uati tapomarrari: —Rrehe, Deo Atti dozo nani nema neraha Poua Atti dozo nani onihipe arrima narraro: “Ia Zozossede ticca Deo nattome tarrararro. Tettiza: "Deo nattome terrerarri'” nani Deo Attipe −narrari Zeso.

¹³ Uima onihiza uima onihiza Tocorime-Tamine Zeso icamaizarizaraha Zesopa Deoza ibora tauissa tazapa uimasiri inanerre canima-rrerarraro. Nazapa Tocorime-Tamine maizehe onihi bodi uatoma-rrarazapa toccanirrari. Toccaniraha zotode Zeso icamaizapomauiuarrine madirrari.

Zeso Carireauarri maride torraporrari

¹⁴ Zesopa zama arobeni onini Carireauarri Deo Corimecca dacorehema ccanirrari. Nazapa nauiuarricca madirra bazima Zeso tauimari uati narizemanarrari.

¹⁵ Oza onihi onihi narizaniuarri ccarizazapa poccadeni Deo Atti mamariuarri mari mari ihicanarizabaqqui narrari. Madirra bazima attidenipa: —Rrehe, Zesopa bica taui −nanarizemana narrari.

Zesopa Nazaretiuarri toccaniza mari icanabaqquirrari

¹⁶ Zesopa poua napiui oza panani Nazaretiuarri ccanirrari. Nauiza madinizapa rrassinarracca uada bacco teza zodeodenicca Deo Atti mamariuarri toqquezimarrari. Pouapa oza uapimaza nama nanariza narrari. Nazapa nauiza queriqquimanazapa pouana totemarrari, Deo Atti ua inaniuarrine.

¹⁷ Nauicca Deo Atti mamari cacauadena pouaza Deo Atti dozo nani da inarraro. Zeso narraro papeo pico naqquini tappa-ppa ineza Deo Atti cacomerabote Izaiacca dozonirri bacco inarraro. Narraroa Cristo-Mesia madirra Idinide ccarronauitoui quequenanarrari tauimaripa arrirraroparri:

¹⁸ —Ia Zozossede Deo, Poua Corime ouaza torrazapa pocca dacorehe ocarrirraro. Deopa oua tocatterrizarrari, madirra touati nauanaqquiri narrarideniza uima bicani icassiuaueraniuarrinecca uati uati onarizezape uima mimittemana nauiuarrine. Nazapa pouadeni bodidenipa: “Occa uimasiri ouaza ocassera tani” quenazapa onabicabaqquiuiuarrine, onarraro. Deo oua cazossezapa arra madirra cauacossemanarraridenipa oneqquenabaqquiuitoui. Arra uimasiri rrinede Tocorime-Taminerrine madirrapa pina cauacossemanarrarissa quenaraha poccadeni uimasiri peperri onanezape pina orrine rrauininerrarissa nauitoui. Arra madirra noccodeni siri naco noccodeni ssire onanabaqquiuiuarrine. Arra madirra ziziniza madirizemanarrarideni naco uimasiri rrinede Tocorime-Taminecca maizanirriza rrehe quenaporaha ossiuerrene pouadeniza bacco tezape pouadeni bodideni ssire onanabaqquiza ouazana rrehe quenauiuarrine, onarraro. Madirra nanarrizo toquerrenarrarideni naco odinibaqquiuitoui, onarraro.

¹⁹ Deopa oua cazosseza uati onarizarraro. Rridapanape madirraza ia Zozossede Deocca uima bicani narrorarraro. Madirra tocassiuauerauiuarrinepa narrorani −nani Izaiacca dozonirri Zeso ua inarraro.

²⁰ Nazapa Zeso papeo pico naqquini pico inanizape Deo Atti mamari cacauadeza da inanirraro. Nazapa Zeso pouadeni baccouarri uittarirrari. Nazapa rrassi zarrarideni bazima Zeso icattaqquimanazapa pouadeni mari icanabaqquirrari.

²¹ Nazapa Zeso uati tarrari: —Deo Atti dozo nani arri ua onarrarocca uima Cristo-Mesia ccarronauitoui nanarra narraripa rridapana tiadeniza madirrariparra −narrari Zeso poua tauimari uati uati taza.

²² Nazapa madirra bazima attidenipa: —A, poua attipa bica taua −quenarrari. —Naraha pouapa Zoze bediua −quenarrari.

²³ Naraha Zeso uati tapomarrari: —Maittaccazama icca ididenipa arrama quequenanade: “Toponi totonanomide tirrezape tia tinanomirri” quequenanarrari. Nazama tiadeni naqui ocanauatori canani qqui tiquenaniuarrine touini tiquenezape ouaza tettideni nema tiquenanitiderra −narrari. —Arri oza panani Capenaouarri ocanauatori canani uima timittemanezape tettideni: “Arri ticca zamaza naqui narrarossa tinanarri” tiquenarraro nitide −narrari Zeso.

²⁴ Nazapa denima uati zanaporrari: —Parrissehera tiadeniza uati onarraro: Maittaccazamacca uimape arrima narronarraro: Deo Atti cacomerabote pocca zamaza bacco naniza naco pocca madirrapa poua attiza nacasseraqquiri narrari. Pina rridapana tiadeni naqui oua arri occa zamauarri bacco onanirraroraha ouaza parrissa tiquenerrerani.

²⁵ Nazama parrissehera tiadeniza uati onarraro: Maittaccazama naco icca idideni Izarraeo potemauidenipa Deoza rrehe quenauissa tarraraza Deopa zama onihicca madirrazana canauatori canarrari. Arra Deo Atti cacomerabote Eria madiccazapa uarrano pama torrari abazico 6 canaha passo qquerrerarraro. Nezape madirra bazimaza pemi torrarizarraro. Ia Izarraeo potemaui zodeodeni iquerrenarraro icca zamaza naqui amonerre maqquirinideni rriquemanarra narronapoui narrarodeni uapi tarraro.

²⁶ Naraha narrarodeni bazimape Eria acco icanabaqquiniuarrine Deo zosse inarrararrari. Zama onihiuarrina Deo Eria zosse inarrari. Oza pamehema narraro oninipe Sarepetauarrina toccarrari. Sarepetape oza panani Sido uarrira taniza oza torrarraro. Nanicca amonerre zodeo rrerarraro maqqui zoqquerrarina acco icanarraro.

²⁷ Arrirraro uima naqui nauatoqquiri tiquenani. Maittaccazama Deo Atti cacomerabote Erizeo madipoza naco ia Izarraeo potemaui zodeodeni iquerrenarraro icca zamaza zamacoma onini leprarrine uapideni rrazimarorrarideni uapi tarrari. Naraha orraria zodeo rrararrari oni Nahamapa zama Siriauarricca madirraraha Erizeoza ccarronazapa pouana tonomiui orrarirrari −narrari Zeso pouadeniza.

²⁸ Naraha zodeodenipa arra Deo Atti mamariza rrassi tarirrari bazima Zesoza boquemanarrari. Zesocca marinarrape: —Zama onihicca madirra zodeo querrena-rrararaha Deopa narrarideni naco acco icanabaqquirrari −nazapa boquemanarrari.

²⁹ Nazapa narrarideni bazima Zesoza uadimanazapa moua ininemanaza iaqquenemanarrari. Poccadeni oza panani Nazareti deniuarri iaqqueqquime-manarrari. Nazaretipe ssonoza oza torrarraro. Nani ssono memeza taniuarri iaqquemoremanarrari, coro inaronemanauiuarrine.

³⁰ (Naraha Zesopa pouadeni rraui torraui nocconiza touanarrari. Corrorrouarri bacco toquenazapa:) —Zeso coro inaronana −quenaraha madirra uapi taraha dozonirrari Zeso. Dozonizapa toccanirrari.

Tocorime-Taminecca zozosse tocorime madirra bodiza madizarrari

³¹ Nazapa Zeso Capenaouarri toqquezipparrari. Capenaope zama Carireacca oza panani. Nanizape Deo Atti mamari carrimanarrari. Naniuarri poccadeni rrassinarracca uadaza Zesopa madirra mari icanabaqquirrari.

³² Nazapa pocca marinarra mittemanazapa: —A, pocca marinarra bica taua −quenarrari. Pouapa atti carri tarrarirrine nama quenarrari.

³³ Nazapa Deo Atti mamariuarri Zeso mari icanabaqquiraha nauizapa madirra bodiza Tocorime-Taminecca zozosse tocorime carriha uittarirrari.

³⁴ Nazapa Zeso qqui tazapa poua bodiccarrine rrazirema atti atti narrari: —Rraho, Nazaretiuarricca Zeso! Nerrecotouira ticcarronarraro? Icca uima tinarricaniuarrine ticcarronarraroqui? Ticca uima nauato onani. Tiape Deocca Erredeni Bicabote tirrani −narrari Zesoza.

³⁵ Naraha zamarrama nauiuarrine Zeso atti dacoraza uati tarrari: —Peperri! Didi tarri! Narrari madirraza tiqquenarri! –narrari. Nanarra tocorimerrine madirra pina cco inacossarrarissa narrari. Arra rrassi taririzarrarideni baccouarri touedimarrari. Nauiza touedimazapa poua bodicca qquenarrari. Naraha poua inarrizo-rrarazapa inabiquera-rrararrari.

³⁶ Nazapa qqui toquenarraridenia uarro canirezapa pouadenira uati tocanirere canarrari: —Nerrecoma narraro marinarra carrirrari? Arrarraripa dacorehe carri, atti carri narrariua. Madirra bodicca tocorime pouarrine qquenaua −quenarrari.

³⁷ Nazapa Zeso tauimari uati narizemanazapa naui pouadeni uinoricca uarrirehema nauicca madirizemanarrarideni naco Zeso tauimari mittarizemanarrari.

Zesopa Simao-Pedoro massodini inanomirraro

³⁸ Nazapa Zeso arra zodeodenicca Deo Atti mamariuarri qquenaza toccarrari, Simaocca ozauarri toqquezimarrari. Nanizape Simao massodini coma tarraro, uapini ppocorarraro. Nazapa Zesoza uati toquenarrari: —Poni tinanomirri −quenarrari.

³⁹ Nazapa Zeso poni icattoma naza arri uapini ppocorarraroza: —Peperri tarri −narrari. Nanerre uapini tonauiui narraro. Nezape amazati tonomiza totemezape arra Zeso pocca mamari tabaqqui tezerre inarripabaqquirrari.

Zesopa comaqquiri narrarideni inanomiriza-baqquirrari

⁴⁰ Nazapa marri tonauiza arra comaqquiri narrarideni cacauadedeni Zesouarri eccarronabaqquirrari. Poccadeni zamacoma comani onihi onihi narizarraro carrimanaza Zesouarri eccarronabaqquirrari. Nazapa comaqquiri narrarideni bara inarizabaqquirrari. Ouaha bara inebo, ouaha bara inebo narizazapa tocanomirerizarrari.

⁴¹ Madirra bodideniza Tocorime-Taminecca zozosse tocorime carrimanarrarideni naco Zeso pouadeniza uati tazapa bodidenicca rrauininerrari. Tocorimedenia Zesopa madirra Idinide Cristo-Mesia pouaza nauatoqquiri nazapa rroua rroua quenarrari: —Tiape Deo Bedi tirrani! −quenaraha Zesopa poua tauimari ecomeremananiuarrine nacassera tazapa: —Peperri tiquenarri! −naza didi inanabaqquirrari.

Zesopa Carireauarri Deo Atti ecomerarizarraro

⁴² Ssiuarrarroneza Zesopa naui oza pananiza toqquenazapa madirra madide nouerauiuarri toccarrari. Nazapa madirra bazima pouatoui qqui narizemanarrari. Zeso bacco iquenazapa: —Arri iaza timadiccarri, oza onihiuarri tiqquerrerarri –quenarrari.

⁴³ Naraha poua attipa: —Ouape oza onihiuarri naqui Deocca cacauehecca uima bicani mari mari onarizaniuarrine, onarraro. Nema onaniuarrine occa Abipa oua cazosserrari –narrari Zeso.

⁴⁴ Arra pouapa Izarraeodenicca zama Zodeauarri Deo Atti mamari onihi onihi narizaniuarri mari mari nanariza narrari.