Roca 23 - Kulina New Testament Brazil

Tamine Piratoza Zeso iaqquemanarrari

¹ Nazapa zodeodenicca taminedeni nauiza queriqquimanarrari bazimapa totememanaza tamine Piratouarri Zeso iaqquemanarrari. Tamine Piratopa rromanodeni. Pouapa zodeodenicca zama cacauade torrarrari.

² Tamine Piratouarri bacco toquenaza pouaza poccadeni maizehe uati toquenarrari: —Zesorrinepe uima bica terrerani, pocca uima arrima nani –quenarrari. —Zeso madirra inequeriqquiza mari icanabaqquizapa rromanodenicca cacaueheza tonacasseremanarrari. “Iara ia ecauana” quenarrari. Pocca marinarra naqui: “Rromanodenicca tamineza ticcadeni ziniro mota naqui paca tiquenerrerarri” nanarra naui. Nazama poua atti onihi naqui: “Ouape Cristo-Mesia, ticcadeni tamine deni torrauicca ccarronauitoui quequenanarrari orrani” naui naco imittani −quenarrari.

³ Nazapa Pirato Zesoza uati tarrari: —Tiape zodeodenicca tamine tirraqui? −narrari. —Rrehe, tetti nema tarraroparri −narrari Zeso.

⁴ Naraha Piratopa dada toqquimade taminedeniza, nauiza madirra queriqquimanarrarideni bazimaza uati tarrari: —Arrarraripa icca zamacca marinarra inarrizorre canima-rrerani. Uima oppina tanicca inana-rrerani. Tettideniza onarrizouiuarrine oparrire-rrerani −narrari Pirato.

⁵ Naraha pouadenipa denima rrazirema rroua rroua quenarrari: —Arrarrari madirra mari mari narizazapa pouarrine mouanirri torrarizani. Zama Carireauarri mari mari naporrari. Naui zotode naco arri icca zama Zodeauarri mari mari narizazapa arraza bacco narronarrari −quenarrari.

⁶ Madirra attideni: —Zama Carireauarri mari mari naporrari −quenaui mittazapa Pirato attia: —Arrarraripa Carireaccaco? −narrari.

⁷ Nazapa rrehe quenaui mittazapa tamine Erodiuarri Zeso iaqquemanauiuarrine zosse inarrari. Erodipa Carireauarricca cacauaderaha Zerozareza uada pamehe madiccarrari. Nazapa Erodiuarri Zeso iaqquemanarrari.

Tamine Erodiza Zeso iaqquezimemanarrari

⁸ Tamine Erodiuarri Zeso iaqquezimemanarrari. Arra Erodipa taide Zeso tauimari mimitta napozapa: —Zeso qqui onaccaraho −nanarra narrari. Nazapa pouauarri Zeso iaqquezimemanaui qqui tazapa uatizerrari. —Rrehe, rridapanana poua canauatori canaui qqui onanitouiua −narrari.

⁹ Nazapa Erodi Zesocca uima mittauiuarrine pouaza uati uati zanaporaha Zesopa poua cacoma narrari.

¹⁰ Naraha nauiuarri naco dada toqquimade taminedeni, zodeodenicca marinarra maridedeni tezerrepa damamera taza uima onihi, uima onihi uati toquenazapa: —Zesopa uaidira taui! Tinarrizorro, tinarrizorro! −quenarrari.

¹¹ Nazapa Erodi pocca isso teppeppedeni tezerre Zeso momoua inanemanarrari. Zesoza maizemanazapa etero bica taniccaza oro izimemanarrari. Pina taminessa inanemanaza pouaza rriza rriza quenarrari. Nazapa Erodipa tamine Piratouarri Zeso zosse inanipomarrari.

¹² Taidepa Erodi Pirato tezerre arrauarri nacassera arrauarri nacassera quenaporrari. Naraha Zeso arrauarri zosse, arrauarri zosse iquenazapa narraro uadaza carronerarrari.

—Zeso zoqqueui bica taui −quenarrari

¹³ Nazapa tamine Piratopa dada toqquimade taminedeni, zodeodeni ime rrocouideni, madirra ouahadeni naco ua inarronabaqquiza queriqquirronarrari.

¹⁴ Nazapa pouadeniza uati tarrari: —Arra Zeso ouaza teccarronemanapozapa tettidenipe: “Pouarrine mouanirri torrarizani” tiqueneraha tiadeni tinoccodeniza pouaza uati onapa. Pocca uima omittezape pina tettidenissa nerrerani. Pouazape uima nouerani −narrari.

¹⁵ —Tamine Erodi naco pocca uima mittaraha pocca uima uaidira tanicca nouereza ouauarri zosse inanipomarrari. Arra Zesopa uima uaidira tanicca inane-rrerezape pouapa zoqqueuiuarrine bica terrerani.

¹⁶ Nama nazapa pina ocazossebaqquiza cossi inaqquimanaha rricazapa zosse onanina, toccaniuiuarrine −narrari tamine Pirato.

^17-18 Naraha madirrapa Pirato: —Zeso toccaniuiuarrine −naui mittemanaza bazima rrouaua rrouaua canarrari: —Narraripa zoqquena! Arra coro tozimaporrari Barrabana tirrine qquenarro! −quenarrari. [Arra uarrano uarrirriraza errete Pascoa torrezape Piratorrine toponi cocoroza madirra uezemanarrari orraria qqueqquena narrari.]

¹⁹ Naraha Barraba pouarrinena oza panani Zerozareza madirra inaqueriqquiza rromanodeniza moua moua quenaza coro izimemanarrari. Pouarrine naco madirra zoqquerrari.

²⁰ Piratopa Zeso tappa inauiuarrine touini naza madirra bazimaza uati tapomarrari: —Zeso paparra onanana. Pouazape uima nouerani −narrari.

²¹ Naraha pouadenipa rrazirema rrouaua rrouaua canapomarrari: —Aua porimacossaniza zoqquena, zoqquena! −quenarrari.

²² Naraha Pirato pouadeniza uati tapomarrari: —Naraha nerrecotoui zoqqueuiuarrine? Nerreco uimara inanarraro? Zesocca uima omittezape uimari uaidira tanicca nouerani. Poua inanazoqqueuiuarrinepa bica tarraraui. Zesopa pina ocazossebaqquiza cossi inaqquimanazapa paparra onanaza toccaniuiuarrine, onarraro −narrari Pirato.

²³ Naraha madirradenipa Zeso aua porimacossaniza zoqqueuiuarrine touini quenazapa dacoco raza denima rrouaua rrouaua canapomarrari. Nama zanapomanazapa pouadenina deni toquerrenarrari.

²⁴ Nazapa Piratopa pouadeni attiza rrehe narrari.

²⁵ Madirra Barraba qquenauiuarrine touini quenazapa Piratorrine qquenarrari. Arra Barrabapa madirra inequeriqquiza rromanodeniza moua moua narizemanaza coro tozimarrari. Pouapa madirra irrine auauiraha irrinedeni qquenarrari. Naraha Zesona zoqqueuiuarrine pouadeniza eccorarrari. Pina pouaza uati toquenaporrarissa inananiuarrine Zeso zoqqueuiuarrine icazossebaqquirrari.

Zeso aua porimacossaniza coba izanemanarrari

²⁶ Isso teppeppedenipa Zeso iaqquemananarra zama Sirenecca madirra Simaopa uizarrauarri ccaniza bacco irrizemanarrari. Zeso aua porimacossani zorro ineraha rrao torraza isso teppeppedenipa Simao dama irrizemanaza icazossemanarrari: —Manaco tia arrarraricca aua porimacossani zorro tinarri −quenarrari. Nazapa aua porimacossani Simao rrouiza ibarimaneza Zeso natti zorro inamissarraro.

²⁷ Madirra uapi taha Zeso natti rraui torrarrari. Amonerre naqui nani carrimemanarrarodeni Zesotoui orri orri zanapomanarraro, rrazirema rroua rroua zanapomanarraro.

²⁸ Naraha Zesopa ponideniuarri qqui naniza uati tarrari: —Arri Zerozarecca amonerre tiadenipe otoui orri orri tiquenerrerarri. Arri tiadeni titouideni, arri ticcadeni erredenitouira orri orri tiquenana −narrari.

²⁹ —Arri otoui orri orri tiquenarrarope nizaranibote arri Zerozareza uima oppina tanicca bacco neza nanizana pina arri otoui orri orri tiquenarrarossa tiquenanitoui. Narraro uada bacco tezape madirrapa arrama quenauitoui: “Amonerre rriuera tanipe bicani auemanani orrimana-rrerani. Erredeni cappiremanarrarorrine orrimana-rrerarraro. Ponideni zorroriniza erredeni tomide noue querarraro naqui orrimana-rrerarraro” quequenanauitoui.

³⁰ Uima oppina tani bacco neza madirrapa cappinemanaza arrama quenauitoui: “Rraho, ssono imeni arabo tarraro iauarri corro naronaccaraho, bodi iquerrenezape nani oppina tanicca qqui inerreraniuarrine” quenauitoui.

³¹ Arri ouape uimasiri onana-rrereraha oua inarrizomanarraro. Naraha arra Zerozareuarri madimanarrarideni uimasiriza dameraqquiri nazapa narrizoue pouadeniza denima oppina tanitoui −narrari Zeso.

³² Madirra pamaha naco Zesozama topamarronauiuarrine iaccabaqquimanarrari. Pouadenipa botirridede rarra, madirra inanazoqquemana narrarideni.

³³ Ssono Totati Tonanissa nani quequenanauiuarri bacco tomoremanazapa aua porimacossaniza que tauiuarrine Zeso coba izanemanarrari. Coba izanemanaha rricazapa acca icanamacosse-manarrari. Arra botirridede rarra, madirra inanazoqquemana narrarideni naco coba izanemanarizarrari. Aua porimacossani onihiza, onihiza narizemanarrari. Ouahapa Zeso que taui uinori nauatoniuarri, ouahapa Zeso que taui uinori ssamouarri quenarrari.

³⁴ Nazapa Zeso Imehiza uati tarrari: —Abi, pouadenipa ouaza ssamoqquiri naza oua inanazoqque-maneraha peperriua. Arri ocasserani ouarraro manaconipe pouadeniza tinana-rrerana, onarraro −narrari Zeso. Nazapa isso teppeppedeni Zesocca eterotoui siba bedeniza coro coro quenarrari, —Pocca etero nerrecorrarizana torraniuarrine? −quenaza. Narraro sibaza ittomemanazapa pocca etero pouadeniza orrari orrari narizarraro.

³⁵ Madirra bazima nauiza cattade domo uarrari. Taminedeni naco nauiza cattade domo uaza attideni uaidira taza Zesoza rriza rriza quenarrari: —Arrana, madirra ouaha inassiuauabaqquiraha rridapanana poua tonassiuauana. Parrissa madirra Tonassiuauade Cristo-Mesia torrauiuarrine Deo icatterrizazapa nama naui qqui inana. Nauato taranarra −quenarrari.

³⁶ Isso teppeppedeni naco Zesoza rriza rriza quenarrari. Nazapa rraui torressiza uva pperrene ssicata, bida tarrari narrari Zeso ze nauiuarrine da icanamacosse-manarrari, —Poua comene orrizama naniuarrine −quenaza.

³⁷ Attideni onihi naqui: —Tiape zodeodenicca tamine tirrezape tia tinassiuauarri −quenarrari.

³⁸ Zeso tati tetepiuarri naqui dozo nani coba izanemanarraro. Narraro dozo nanipe: —Arrarraripa Zodeodenicca Tamine −narraro.

³⁹ Naraha botirridede rarra, madirra inanazoqquemana narrarideni Zeso uinoriza cobaba zanarrari orraria Zesoza atti uaidira taza rriza rriza narrari: —Tiape Cristo tirrezape tia tinassiuauarri. Ia naqui ia tinassiuauabaqquirri −narrari.

⁴⁰ Naraha arra coba zanarrari ouaha attia: —Parri, nema terrerarri! Deoza ticappina-rrerarrarorane? Tia naqui aua porimacossaniza coba zanaui tirreraha nerrecotoui tetti nema tarraro?

⁴¹ Arri iape ponima ocasserani errerani. Inarrizorrarorrine ocasserani erraro. Naraha arrarrari maqquiderrepa narrizo-rrararaha ocasserani auarrari −narrari.

⁴² Nazapa Zesoza uati tarrari: —Zeso, ticca cacaueheuarri bacco tineza ouaza teti uatoma nana −narrari.

⁴³ Manaco Zeso pouaza uati tarrari: —Parrissehera tiaza uati onarraro. Arri rridapana ouazama memeuarricca zama bicaniuarri timadiniuarrine −narrari.

Zeso uatiarrari

⁴⁴ Marri orrari uariri naza zama nemanehe tozizini narraro. Zizi zanaporrarope marri 3 bacco tarraro.

⁴⁵ Marri tozizizapa Deoza dada toqquima oza imeni bodiuarricca uauacossa etero sibabotepe Deorrine sseo naronarraro, carobe narraro.

⁴⁶ Marri narrarissa naza ssonouarri Zesopa rrazirema uati tarrari: —Abi, ticca cacaueheza orrapomaniuarrine, onarraro −nazapa Zeso uatiarrari.

⁴⁷ Nazapa isso teppeppe tamine Zeso cacauadepa zama tozizini nani qqui, Zeso uatiaui qqui tazapa: —Deo bica taui, deni torraui! −narrari. Poua attipa: —Parrissa, arrarrari maqquiderrepa bica taui. Uima cappirarrari −narrari.

⁴⁸ Nazapa madirra bazima Zeso cattade domo uarraridenipa marri toziziui qqui, Zeso uatiaui qqui toquenazapa cappinemanaza domo toccanirrari. Pouadeni bacco uaccacca uaccacca tocananirrari: —Rraho, icca zamaza irrine bica terrerani, bica terrerani! −tanimanarrari.

⁴⁹ Naraha arra Zesoza uatideni uanaqquiri narraridenipa uarri taniza qquide domo uarrari. Amonerredeni naqui pouadenizama domoni uarraro. Narrarodenipe Zeso Carireaza ccarizapoza pouaza rrauirizarraroa Zeso pouaza Zerozareuarri rrauirronarraro.

Zeso ppa izemanarrari

^50-51 Nauizapa madirra bicabote madirrari. Poua onipa Zoze, zama Zodeacca oza panani Arimateauarricca madirra. Pouapa Deocca zossenirri inaparrirenissa, pocca uima toccanissa tarraro. Zozepa Deocca cacauehetoui naco narroraha madirrari. Pouapa zodeodenicca uima cacattemadedeni orraria. Poua tesse uima cacattemadedeni: —Zeso zoqquena −quenaraha pouapa rrehe narrararrari. Poua tessedeni Zeso inarrizomanaza naco narrizode nacassera tarrari.

⁵² Zozepa Zeso assire ppa izauiuarrine tamine Piratouarri uatide toccarrari. Bacco tazapa Piratoza uati tarrari: —Zeso assire ppa ozauiuarrine rrehe taqui? −narrari.

⁵³ Nazapa Pirato rrehe naza Zoze naui Zeso coba zanaha que tauiuarri tocanarroranirrari. Zeso assire dicca inaza etero zorrorani onini linhoza rrore inaqquirrari. Rrore inaqquia rricazapa tonoccobiriuarri zorro inarrari. Narraro tonoccobiripe sibaza ui tozamarraro. Narrarozapa madirra zoqqueui poza-rraraccaui. Narraroza Zeso ibezarrari.

⁵⁴ Narraro uada sexta-feirape zodeodenipa poccadeni rrassinarracca uada sabadotoui narroremanarrari. Narraro rrassinarrape zomeme naza bacco bacco tarraro.

⁵⁵ Arri amonerre Zeso pouaza Carireauarri rrauirronarrarodenipe Zeso assire tonoccobiriuarri Zoze zorro inazapa ponideni naqui nani rraui torrarraro. Rraui torramissezape tonoccobiriza Zeso assire ibezaui qqui toquenarraro.

⁵⁶ Nezape ozauarri rraui torraniza marrorro marroni bica tarraro, aua marriconi marroni bica tarraro narroremanarraro. (Pina zodeodeni poccadeni madirra zoqquerrari assireza sse inamaromanarrari, uissa inamaromanarrarissa inanemananiuarrine narroremanarraro.) Nezape rrassinarracca uada torrezape rrassi quenarraro, pina Moizecca marinarrassa inanemanarraro.