Roca 15 - Kulina New Testament Brazil

Eueue amossi narrari tauimari

¹ Nazapa arra rromanodenicca taminecca zossenirri ziniro nanaccadedeni, uimasiri sseqquiri narrarideni tezerrepa: —Zesocca marinarra imittana −quenaza Zesouarri rrauirronarrari.

² Naraha zodeodeni mota marinarra parizeoza rrehe quenarrarideni, zodeodenicca marinarra maridedeni tezerrepa arra uimasiri sseqquiri narrarideniza Zeso carrimaui qqui toquenazapa nacasseraqquiri narrari. Nazapa atti atti quenarrari: —Arrana, arrarrari madirrapa uimasiri sseqquiri narrarideniza nirra naui tarri. Pouadeni tezerre naco rriparrari. Naraha iape pouadeni tezerre irripaniuarrinepe oppina tani, inarraro −quenarrari.

³ Naraha manaco Zeso pouadeniza arrirraro namiza imadinicca uima tazarrani mari icanabaqquirrari.

⁴ Poua attipa: —Rrari, tiadenipe ticcadeni eueue 100 naha ticarrimanazapa onideni ua tiquenaza orraria amossi nazapa pouatoui qquide rraui tirra-rreraqui? Rrehe, eueue rrinedepa pocca eueue qquide toccauitoui. Pocca eueue 100 naha carriraha orraria amossi nazapa 99 torrarrari. Pocca eueue 99 naha uamoniuarri inebobaqquizapa orraria amossi narrari qquide toccarrari. Nazapa qqui qqui narizanarra pocca eueue bacco inanirrari.

⁵ Bacco inanizapa poua mattoza ibari nanirrari. Nazapa uatizenirrari.

⁶ Nazapa oza bacco nanizapa poua tessetoui uaua narrari: “Occa eueue amossi narraripa bacco onaniui! Occa ozauarri rraui tirrarronarri, etizeniuarrine!” narrari.

⁷ Nazama parrissehera tiadeniza uati onarraro: Narrarossa narraro madirra uimasiri sseqquiri narraridenipa pina eueue rrano torraza amossi narrarissa quenarrari. Naraha orraria: “Deoza orraniuarrine, occa uima onebona” nazapa Deopa pocca zozosse tabaqqui memeuarricca tezerre uatizemana taui. Arra madirra taide Deoza toquerrenaporraridenicca uimaza naco memeuarriccapa uatizemana taui. Naraha arra madirra Deoza torrezatizapa denima uatizemana taui −narrari Zeso.

Amonerre ponicca ziniro amossi cananicca uima

⁸ Nazapa uima onihi naqui uati tarrari: —Amonerrepe ziniro ccarara 10 nehe carriraha ponicca ziniro carrarie amossi canezape qquide damera terreraqui? Damera tarraro. Rrorrororo iqueuessiza ponicca ozaza rroue narizarraro. Ponicca zinirotoui mouaraza qqui narizanissa tarraro.

⁹ Bacco icananizape poni tassanitoui, poni uinoriniccatoui uaua narraro: “Ouaza tetizemanarri! Occa ziniro amossi caneraha bacco ocananini” narraro −narrari Zeso.

¹⁰ —Nazama ouape tiadeniza uati onana: Narrarossa narraroa madirra uimasiri sse tarraripa: “Deoza orraniuarrine, occa uima onebona” nazapa Deo pocca zozosse tabaqqui memeuarri tezerre uatizemana taui −narrari Zeso.

Madirra poua bedi rrano torraraha bacco nanipomauicca uima

¹¹ Zesopa parra zoqquerrari zepetarribotecca uimaza uati uati narrari: —Madirrapa poua bedi pamarrari.

¹² Zotodeccapa imehiza uati tarrari: “Abi, tizepetarri, ticca ziniro, ticca zama bazima niza tizoqquezape icca torraniuarrine tade. Nezape arri occape tizoqque-rreraqquezama ouaza arobeni da tarri” narrari. Nazapa imehi poua bedi pamahaza poua zepetarri, pocca zama icanaroberizeza pouadeniza da inarizarraro.

¹³ Naraha uada onihizapa pocca abicca danirri arri zama carrizati, poua zepetarri carrizati naqui zinirotoui da inarizarraro. Nazapa ziniroma zama uarri taniuarri toccarrari. Nazapa zama uarri tanicca oza bacco tazapa erretetoui, ssenenirritoui, amonerretoui narizarrari.

¹⁴ —Nazapa pocca ziniro nemanehe inarricarraro. Naraha narrari uarranoza pemi naqui torrarizarraro. Zamatapa naco bonoriza-rrararrari. Nazapa zabisso pemirrari.

¹⁵ Tarabaiatoui nauiuarricca madirraza uati tarrari. Nauiuarricca madirra pouaza: “Occa poroco tecauabaqquirro” naza pocca poroco madimanauiuarri zosse inarrari. (Naraha zabissopa zodeorra naza poroco cacauade pouaza ocassera taraha nama naha poroco ecauarrari.)

¹⁶ Pouaza zamatapa da iquena-rraraza pemizapa: “Poroco tapari orripa naccaraho” nanarra naraha poroco tapari pina imissa narraro naqui pouaza da iquenehe nerrerani.

¹⁷ —Nazapa bodi uatomarrari: “Occa abicca ozazapa tatarabaiadedeni carri taraha pouadeniza zamatapa mota totorra nade. Neraha ouape arriuarri pemi, ouatiabote nani” narrari poua bodi.

¹⁸ Nazapa poua bodi uatomazapa: “A, occa abicca ozauarri occanina. Bacco onanizape pouaza occa uima uati onaniuarrine: Abi, orrine uima uaidira tani Deoza. Tiaza naqui orrine uima uaidira tani, onaniuarrine” narrari poua bodiza.

¹⁹ “Nazama: Abi rridapanape ouaza: ‘Occa erredeni’ terrerarri. Tiape bica tineraha orrinepe uima bica terrerani, onanitoui. Naraha rridapanape ticca zozosse orraniuarrine nacassa tinaqui? onanitoui” narrari poua bodiza.

²⁰ —Nazapa pocca abiuarri toccanirrari. Toccanirrari… bacco tanibote naza pocca abipa uarri taraha pocca erredeni ccaniui qqui tarrari. Qqui tazapa pocca erredeniza uati uana tarra narrari. Rroppa tauizarra rrari, poua dama, icauarrocossa, pano mose inarrari.

²¹ Naraha bedi attipa: “Abi, orrine uima uaidira tani Deoza. Tiaza naqui orrine uima uaidira tani. Abi, rridapanape ouaza: ‘Occa erredeni’ terrerarri. Tiape bica tineraha orrinepe uima bica terrerani” narrari imehiza.

²² —Naraha pocca abipa bedi atti mittaraha pina mitteraui narrari. Pocca zozosse tabaqquizana uati tarrari: “Uassinarra occa erredeni etero bicaniza oro tizimemanarro! Tozepecca naqui zepeza ticanauanemanarri, amoricca naco tineuezemanarro!” narrari.

²³ “Boui napizati oqui tarrari naco teccanimanaza tidemanarro, irripaqquiniuarrine” narrari.

²⁴ “Etizeniuarrine bica tani. Occa erredeni pina zoqquerrarissa naraha madinipomaui. Pouapa pina rrano torrarrarissa naraha bacco nanipomaui” narrari. Nazapa pocca ozacca bazima uatizemanarrari.

²⁵ —Naraha poua bedi taideccapa uizarrauarri zepe irriza ccaninarra oza uarriraniza mittarrari. Tire tire quenarra, tori tori quenarra narrari, pocca abicca ozaza ssenenirri torrarraro.

²⁶ Naraha pouapa pocca abicca zozossetoui uaua narrari. Ccarronazapa pouaza uati tarrari: “Nerrecotoui icca ozaza errete torrarraro?” narrari.

²⁷ Naraha imehicca zozossepa pouaza uati tarrari: “Timecote bacco nanirrari. Nomi, bica taha ccaniza ticca abi boui bedi oquibote inanazoqquerrari” narrari.

²⁸ —Naraha pouapa rramirrari. Ozauarri toqquezimanide nacassera tazapa pocca abina qquenarrari. Qquenazapa bediza uati uati tarrari, toqquezimaniuiuarrine.

²⁹ Naraha manaco imehiza uati tarrari: “Ouape tiaza uarrano uapi taha ozepe irrirraro. Ticca zossenirri arri nacassa tinarrarocca ouaza zosse zosse tarrarossa onaneraha ouaza bani bedi da taha narraraui, otessedeni tezerre oua naqui ouatizeniuarrineraha” narrari imehiza. “Bani uati ccarera tauicca pina eueue rrizaza cabra bedi naco ouaza da taha narraraui, otessedeni tezerre irripaqquiniuarrineraha.

³⁰ Naraha ticca erredeni arra ticca ziniro ponima amonerre pehiqquiri narrarodeniza inarricarraro pouazana boui bedi oquibote tinanazoqquerrari” narrari imehiza.

³¹ —Nazapa manaco imehi pouaza uati tarrari: “Neppe, tiape ouaza timadi-zanaporraro. Ozepetarri, occa uizarra, occa bani bedi, occa oza narrari bazimapa ticca” narrari.

³² “Naraha rridapanape irripaqquiza etizeniuarrine bica tani. Ticote zoqquerrarissa naraha rridapanapa uima zatiza madiniui. Pouapa rrano torraraha qqui inimaniui” narrari poua bediza −narrari Zeso.