Roca 13 - Kulina New Testament Brazil

Tibodideni cacarriqquimere-rrerezape tirricarizanitoui

¹ Zeso mari mari naraha madirra rrauirronarraridenia arra tamine Pirato zama Carireacca madirra inarricarraricca uima Zesoza uati toquenarrari: —Carireacca madirrapa Zerozareuarri Deoza dada toqquimaza poccadeni da naqquinarra iaqquezimemanarrari. Bani bedi Deoza da iquenauiuarrine ssipori uisside toquerrenaraha tamine Piratocca zozosse tabaqquideni bacco tozimemanazapa irrinedeni auemanarrari. Pouadenirrine bani bedi dade toquerrenarrari emenedeni bani bedi emene tezerre carrimarraro −quenarrari Zesoza.

² Naraha manaco Zeso pouadeniza uati tarrari: —Tettidenipe: “Carireacca madirrapa uimasiri sseqquiri naza oppina taniza rricarrari” tiquenarraroqui? Arra “Carireacca madirra motapa uimasiri bazira tehe carrimanazapa pouadeniza uima oppina tehe bacco nerrerarraro” tiquenanitiderra.

³ Naraha uimape nema nerrerani. Tiadeni bazima Deo Attiza ibobo tineza tibodideni cacarriqquimere-rrerezape zoqquehe rriquerreranicca bacco tiquenanitoui −narrari Zeso.

⁴ —Uima onihi naqui arrima narraro: Zerozareza passouarrine ui tozani onini Siroe uinoriniza siba ua nauarranirraro tirocosseza madirra 18 naha rricarrari. Narrarideniza naqui tettidenipe: “Uimasiri sseqquiri naza oppina taniza rricarrari” tiquenarraroqui? Arra “Zerozarecca madirra motapa uimasiri bazira tehe carrimanazapa pouadeniza uima oppina tehe bacco nerrerarraro” tiquenanitiderra.

⁵ Naraha uimape nema nerrerani. Tiadeni Deo Attiza ibobo tineza tibodideni cacarriqquimere-rrerezape zoqquehe rriquerreranicca bacco tiquenanitoui −narrari Zeso.

Aua piquera bono-rrarauicca uima

⁶ Zesopa arrirraro namiza imadinicca uimaza mari icanabaqquirrari, madirradeni bodi cacarriqquimera-rrarazapa rricaui noppine bodideni uatouiuarrine. Poua attipa: —Maqquiderre orrariapa pocca uizarraza aua piquera ppa tozaui uarrari. “Naniuarri occana, aua piquera bono carriuitide” narrari. Naraha nauiuarri bacco tazapa bono caua narrararrari.

⁷ Nazapa uizarra cacauadeza uati tarrari: “Uarrano taideccaza qquide occarrona, uarrano zotodeccaza qquide occarrona, rridapana naqui qquide occarrona neraha bono qqui onarraraua. Ca tarro! Pouama nauiza ua zanapona onerrerani” narrari.

⁸ Naraha uizarra cacauadepa manaco uizarra rrinedeza uati tarrari: “Oua zozossede, ca inarraraccana. Arrarrari uarranoza rrabouarri ui onauarraniza aua uassa tarraro tazarrani ocanarrimauiuarrine” narrari.

⁹ “Nama onanaza bonouitiderra. Naraha bono-rrarazana ca tauiuarrine” narrari uizarra cacauade −narrari Zeso.

Zesopa rrassinarracca uadaza amonerre ideni rrocazarraro inanomirraro

¹⁰ Nazama zotodepa rrassinarracca uadaza Zesopa Deo Atti mamariuarri toqquezimazapa madirra mari icanabaqquirrari.

¹¹ Naniza naqui amonerre coma tarraro qquezimarraro. Tocorime-Taminecca zozosse tocorimerrine poni ideni rrocazarraro. Uanissa taniuarrine ssamo tani. Uarrano 18 naha nema narronarraro.

¹² Nanerre Zeso qqui inezape poni ccarronaniuarrine uaua narrari. Bacco nezape: —Asi, ticca zamacoma rricaui−narrari Zeso.

¹³ Nazapa poua zepeza bara ineza amazati ideni tobicarraro. Neza uanissa tezape uatizeza Deoza rriri rriri narraro: —Rrehe, tiape bica tinani, bica tinani −narraro Deoza.

¹⁴ Naraha Zeso rrassinarracca uadaza madirra inanomizape Deo Atti mamaricca tamine nacassera tarrari. Arra zodeodenipa: —Rrassinarracca uadaza madirra zepedeni irrimanauiuarrinepa oppina tani −quequenanarrari. Nazapa Deo Atti mamaricca taminepa boqueza madirra queriqquimanarrarideniza uati tarrari: —Uada 6 nehe izepe irrini bica tani. Narraro uada 6 nehe ticanomireniuarrine rraui tirrezimarri. Naraha rrassinarracca uadaza toponi totonanomidetoui rraui tirrezima terrerarri poni! −narrari Deo Atti mamaricca tamine atti. Poua atti nama nazapa Zesoza uima inanarraro. Rrassinarracca uadaza madirra inanomibaqquizapa pina poua zepe irrirrarissa narrari.

¹⁵ Naraha Zeso taminedeniza uati tarrari: —Mamaizadedeni, ponima uati tiquenarraro! Rrari, tiadeni naqui ticcadeni boui, ticcadeni borro, ticcadeni ozaza ssoque ssoque zaneri narizazapa rrassinarracca uadaraha madone dicca tiquenaza passo ze quenauiuarrine passouarri rroca rroca titiquena narrararrarico? Narrarope rrassinarracca uadaza tizepedeni irrimana tani. Naraha: “Narrarope icca boui nomiqquiri nauiuarrine, oppinera tani” titiquena narraro −narrari Zeso.

¹⁶ —Nezape rrassinarracca uadaza ticcadeni boui tecauabaqquizapa arri amonerre rrassinarracca uadaza onanomiza naqui oppinera tani. Ponipe Abarahao potemauirre narraro pina tiadenissa neraha ponipe uarrano 18 nehe uaidirehe rrinede Tocorime-Taminerrine ideni siri torrehe madirraro. Ponipe uarrano uapi taui coma tarraro. Tocorime-Taminepa pina poni ssoque izanarrarossa narraro. Nazama rrassinarracca uadazaraha ponipe Tocorime-Tamine ssoque izaneraha tappa inaniuarrine bica tani, onarraro. Neraha tiadenizape bica terreraqui? −narrari Zeso Deo Atti mamaricca taminedeniza uati tarrari.

¹⁷ Uima nema narraro uati tazapa pouaza uadiqquiri narrarideni cappinemanarrari. Naraha madirra motapa amonerre tonomini qqui toquenaza Zesocca nauatoue bicani, deni torranicca qqui toquenazapa uatizemanarrari.

Zesopa mostada noccocca uima tazarrani mari icanabaqquirrari

¹⁸ Nazama narraro uima rriqueza Zeso attipa: —Tibodideni uatomanarri. Nerrecoma narrarona parri Deocca cacauehe? Arri Deocca cacauehe tauimarini timittemananiuarrinepe arrirraro namiza imadinicca uima onihiza tiadeni mari ocanabaqquina −narrari Zeso madirradeniza uati taza.

¹⁹ —Deocca cacauehepe pina mostada noccossa narraro. Mostada noccopa potera taraha madirra uizarraza ppa izaza napizapa pina aua imehissa narrari. Motarazapa poua inineza ppiriri pouadeni tazari bina tarimana taui. Rrehe, Deocca cacauehecca uima mari ocanabaqquirraripa pina narraro uimassa narraro. Taidepe madirra pamahaza torraporraro. Zotodena madirra bazimaza torrarizezape Deocca cacaueheza madirra touapiuitoui −narrari Zeso.

Zesopa pao ssarra tauiuarrine cacarrimacca uima tazarrani mari icanabaqquirrari

²⁰ Zeso uati tapomarrari: —Arri, Deocca cacauehecca uima timittemananiuarrine uima onihi tazarrani tiadeniza uati onana.

²¹ Deocca cacauehepe pina pao ssarra tauiuarrinecca uimassa narraro. Amonerrepe pao inauatouiuarrinepa pao ssarra tauiuarrine cacarrima oni fermento arra farinha de tirico sica nauiza irrine icanarrimarrari. Ssarra tauiuarrine cacarrima bazira taraha tirico sica naui farinha de tiricoza 3 quilopa ssarrabote torrarrari. Naraha ssarra tauiuarrine cacarrima tirico sica naui farinha de tiricoza torraribaqquizapa ssarra tarrari. Arri Deocca cacauehecca uima naqui narraro uimassa narraro. Taidepa madirra pamaraha zotodena Deocca cacauehecca uima zama uapimaza torraribaqquiza madirra bazimaza torrarizarraro –narrari Zeso.

Totoqquezima tocauabaqqueza rraui tirrezimaniuarrine tinarromana terrerarri

²² Nazama Zesopa Zerozareuarri pocca bobodeza toccazapa oza panani onihiza, onihiza mari icanabaqquirra zanapoui narrari.

²³ Madirra mari icanabaqquizapa nauicca madirra orraria poua bodi uatoza Zesoza uati tarrari: —Oua Zozossede madirra tocassiuauerauiuarrine naco ipama narraroqui? −narrari Zesoza. Nazapa Zeso atti bazimaza:

²⁴ —Dacoco tirrirarri. Totoqquezima torrera taniuarri rraui tirrezimaniuarrinepe tinarromana terrerarri. Arri occa uimaza rrehe tiquenaniuarrine Deocca cacaueheza tiquerrenaniuarrine naqui tinarromana terrerarri. Tiadeniza ouattipe arrima onarraro: Niza zotodepe madirra uapi taha: “Rrauirrezimana, Zesoza iquerrenana” quenauitouiraha ouaza toquerrenauiuarrine parriremana-rrarauitoui, onarraro.

²⁵ Taide ouaza rraui tirrezime-rrerezape niza zotodepa oza rrinede narroraza totema, totoqquezima ecossani nezape rraui tirrezimaniuarrine ssamo tanitoui. Nezape amossiniza tidomo ueza totoqquezima coba coba tiqueneza oza rrinedeza: “Totoqquezima iaza ticataborrizarri” tiqueneraha pouapa: “Tiadenipe nerrecouarricca tiquerrenani?” nauitoui tiadeniza.

²⁶ Nezape uima uati ticazanemananitoui: “Neza timadizama ia qqui tinabaqquide. Tiaza irripaqquiza ocassa tanicca naqui ze inade. Icca oza boroniza naqui ia mari ticanabaqquide” tiquenanitoui, onarraro.

²⁷ Naraha oza rrinedepa manaco tiadeniza uati tauitoui: “Neraha ouape rraui tirrarronaniuarri ssamo onani. Tiadenipe rrizaqquiri tiquenani” nauitoui. “Uimasiri ticarrimanezape ouaza timadimana-rrerarri. Arricca rraui tirrarri!” nauitoui, onarraro.

²⁸ —Nezape Deocca cacaueheza uati tineza ticattomama canezape ticcadeni idideni Abarahao, Izaqui, Zacadenipa, arra Deo Atti cacomeraqquiri narrarideni tezerre, bazima nauiza madimanaui qqui tinabaqquimanaraha tiadenipe uauattarro tiquerrenanitoui. Tiadenipe ocasserani temanazanapozape tipanodeni tozani neza orri orri tiquenanitoui.

²⁹ Nazapa zama nemaneheza madirizemanarrarideni naco Deocca cacaueheuarri rrauirronana canauitoui. Motapa Izarraeodeni querrena-rrararaha ouaza parrissa quenarrarideni naco rrauirronana canauitoui. Deo pocca cacaueheza queriqquimanazapa pocca rripaqquiecca errete imeniza zamatapa uauanariza rrassi nauarraniuitoui.

³⁰ Nazapa madirra mota arrirraro zamaza madimanaccazapa Deo Atti carrimanaporrari. Naraha narrarideni arobedeni motapa Deocca cacaueheza toquerrena-rrarauitoui. Madirra ouaha naco arrirraro zamaza madimanaccarraridenipa Deo Atti carrimanapo-rrararrari. Naraha zotodena Deo Atti pouadeniza bacco teza pouadeni motapa Deocca cacaueheza toquerrenauitoui −narrari Zeso.

Zesopa Zerozarecca madirratoui orri orri narrari

³¹ Zeso uati uati tarra naraha zodeodenicca marinarra onini parizeoza rrehe quenarrarideni bacco narronemanaza pouaza uati toquenarrari: —Arrizape timadi terrerarri. Arricca ticcarri! Tamine Erodipa: “Tia onanazoqquena” naui −quenarrari Zesoza.

³² Naraha manaco Zeso pouadeniza poua cacomerarrari: —Narrari zomarri boqueboteza uati tiquenarri: “Zeso attipa arrama naui” tiquenana. “Tibodi uatorri. Rridapana, izamassa naqui, madirra bodidenicca tocorime siri zosse onineriza-baqquiuitoui, madirra tocanomireuiuarrine. Comaqquiri narrarideni naco onanomibaqquiuiuarrine. Uada onihizana ozepe rricanitoui. Narrarotoui occaronarrarode naderra” tiquenana Erodiza −narrari Zeso.

³³ —Nema nehe nani occanitoui. Occa uimape narrorapode. Rridapanape arriza ozepe irriccani. Izamassana denima occanitoui. Uada ssiuarrape denima occapomanitoui. Uada onihiccaza naqui nema ozanaporraroa Zerozare bacco onanitoui. Arra Deo Atti cacomeraqquiri narrarideni naco Zerozareuarrina rrirriquemana narrari. Oza onihiuarri ozoqqueniuarrinepe bica terrerani −narrari Zeso.

³⁴ Nazama Zesopa oza panani Zerozareuarri madimanarraridenicca uima uati tarrari: —Ouape titouideni orri orri onezape: “Zerozare, Zerozare” ohonanarraro. Maittaccazama ticcadeni idideni madimanapoza naco Deo Atti cacomeraqquiri narrarideni inanazoqque-rizemanarra narronapoui narrari. Deopa pocca zozosse tabaqqui tiadeniza zosse zosse inarronabaqquiporaha sibaza tiquenabaqquimanarra narronapoui narrari. Neraha ouape tiadeni ouacauabaqquina, onarraro. Pina tacara poni bedi poni appani dopaniza ecauabaqquirrarissa onaniuarrineraha tiadenipe ouaza nacasseraqquiri tiquenarraro.

³⁵ Tetideni uatorri. Deopa tizamarideni Zerozare inebonitoui. Tiadeni touacauabaqqui-rrarauitoui. Oua naqui oua qqui timanimanapoma-rreraccanitoui. Nizaranibote uima narroranissa teza occanipomezana oua qqui tiquenapomanitoui. Nezana tettidenipe: “Rrehe, arrarraripa Deo onima ccaronarrari. Pouapa bica taui, bica taui” tiquenanitoui −narrari Zeso.