Piremao 1 - Kulina New Testament Brazil

Paoro nirra narrari

¹ Nirra Piremao? Tiaza occa uima dozo onarraro. Ouape Paoro Zeso Cristo tauimari mari mari ohonanarrarorrine toponi cocoroza ouezarraroparri. Rrehe Piremao, imecote Timoti tezerre tiaza nirra inarraro. Tiape itesse bica tinade. Titoui eti uana tani. Zeso Cristo tauimari maride tia ineza izepe irrirrarode.

² Ticca ozauarri Deo Atti mittemanauiuarrine totoqueriqqui narrarideniza naqui nirra inarraro. Arri imecote Apia poniza naqui nirra inarraro. Imecote Ariquipo, Zeso Cristo tauimari maride ihicaberariza narrariza naqui nirra inarraro.

³ Icca Abi Deo, ia Zozossede Zeso Cristo tezerre tiadeniza uima bicani inanemanana. Poccadeni rronehe naqui tiadeniza torrana, inarraro.

Paoropa Piremaotoui Deoza uati uati tarrari

⁴ Rrehe Piremao, titoui Deoza uati uati onezape: —Abi Deo, peperri, tirrine bica tani −ohonanarraro.

⁵ Nema onarrarope tirrine uima bica tani quenaui omittarraro. Ia Zozossede Zesoza rrehe tanissa tarraro. Deoza toquerrenarrarideni bazimaza teti uana tarraro. Narrarorrinea Deoza ouatizerraro.

⁶ Ticca rrehenirri pina icca rrehenirrissa narraro. Zeso Cristo iaza uati uana tarrarirrine iaza uima bicani inanarraro. Narraro pocca danirri bazima timittanissa taniuarrine Deoza uati uati ozanaporraro.

⁷ Rrehe ouimecote, Deoza toquerrenarrarideni bazimaza teti uana teza bodideni acco ticanabaqquizapa uatizemanarrari. Narraro uima omittezape oua naqui ouatizerraro. Obodi tobicani napomani.

Paoropa Piremaoza: —Ouattissa tinanana −narrari

⁸ Rrehe Piremao, tiape bica tinarrarorrine arrirraro uima tiaza dozo onarraro. Zeso Cristocca zozosse orrarrarorrine ouatti ocarriraha tiaza zosse zosse onerrerani.

⁹ Arrima onanina bica tani: Deocca touati uanehema tiaza uati onarraro, ouattissa tinananiuarrine nacassa oneza. Ouape Paoro rradaui ocarrani. Zeso Cristo tauimariza damera onarrarorrine rridapanape toponi cocoroza ouezani.

¹⁰ Ouattiza rrehe tezape ouimecote Onesimoza bica tinana, onarraro. Arri toponi cocoroza Onesimo bacco naza Zeso Cristo tauimari mari ocanazapa Zesoza rrehe narraride. Nazapa pina occa erredenissa narrari, onarraro.

¹¹ Taidepa tarabaiauarrine ticca zozosse torraporaha tiaza zepe irriuissa tarrararrari. Naraha rridapanapa zepe irriuissa tauiuarrine ibora taui. Tiaza bica tauiuarrine, ouaza naco bica taui.

¹² Pouapa tiauarri zosse onanipomarrari. Pouapa obonoccoricca. Tia naqui pouaza bica tinana, pina ouazassa tana, onarraro.

¹³ Ouape Zeso Cristo tauimari icassiuaueraniuarrinecca mari mari ohonariza narrarorrine toponi cocoroza oua coro izimemanarraro. Naniza ouezeza obirri acco ticananiuarrine touini oneraha noue tirrirezape Onesimona oua accode torrarraride. Pouapa ouaza madi-zanapouiuarrine touini oneraha.

¹⁴ Tiana parri. Tetti omitterreraqquezape ssamo tani. Oua touini onanicca touini onerrerani. Tia touini taniccana parri. Naraha ouattiza nacassera tinezape peperri, poni, onarraro.

¹⁵ Rrehe Piremao, ticca zozosse Onesimo tiaza neborraripa tiaza torranipomauiuarrine uitide. Rridapanapa ticca tiaza nama zanapouiuarrine.

¹⁶ Naraha rridapanapa pina tiaza zozosse torrapozassa narraraui. Zozosse ouahadenipa arramani toquerrenaraha pouapa denima bica taui. Rridapanapa pouaza pina imecoteza eti uana tarrarossa inana, onarraro. Ouape pouaza ouati uana tani, naraha tiana denima pouaza teti uana taniuarrine. Pouapa ticca zozosseraha ia Zozossede Zeso Cristocca torrazapa timecote torrarrari.

¹⁷ Rrehe, ouaza: —Ouimecote −tezape Onesimo ticca ozauarri bacco tanizapa pouaza: —Rrehe ouimecote, tiqquezimanirri! −tana. Pina ouaza: —Rrehe, tiqquezimarri! −tarrarossa tana, onarraro.

¹⁸ Nazama tiaza uaidirehe inanapozape ouaza uati tinarri. Pocca uima cattemade nacassa onani. Tiaza dirri naza naco ouazana uati tinarri.

¹⁹ Ouape Paoro, arri ozepeza dozo onarrarope pina ouattissa onananitoui. Pocca dirrinarra paca onaniuarrine. Naraha tibodi uatomarri. Occa marinarrarrine Zeso Cristocca tirrezape pina ouaza dirri tarrarossa narraro.

²⁰ Rrehe ouimecote, ia Zozossedeza ibora tinezape pina ouattissa tinanana. Zeso Cristoza iquerrenarrarope pina imecotessa inarizarraro. Nezape oua tinauatizena, onarraro.

²¹ Rrehe, occa uima tiaza dozo onarraroza ibora tinaniuarrine nauato onani. Onesimoza ouattissa tinananitoui. Ouattissa neraha tiape denima bica tinananitoui.

²² Nazama nani tiauarri omadiniuarrine naqui otezerrema tinanarrorapona. Rrehe, otoui Deoza uati uati titiquena nana. Deorrine toponi cocoroza oqquenezape tiadeni qquide occanitoui, onarraro ouatti.

Paorocca uima rricanicca

²³ Rrehe imecote Epafrapa tiaza nirra narrari. Poua naco Zeso Cristo tauimariza torrarrarirrine tezerre toponi cocoroza ibezarraro.

²⁴ Ibirri accodedeni Maraco, Aristaco, Dema, Roca quenarrarideni naco tiaza nirra quenarrari.

²⁵ Nazapa ia Zozossede Zeso Cristo naco tiadeniza biquehe inanana, inarraro. Peperri.