Mateo 28 - Kulina New Testament Brazil

Zeso nauatonirrari

¹ Nezape rrassinarracca uada rricani nattini semana torrapomanicca uada taidecca domico ssiuarrarroneza Maria Madarenauarricca, Maria onihi tazarrani Zeso noccobiriuarri qquide touedarraro.

² Touedanerre… nami rrazirema zaroro narraro. Arri nami rrazirema zaroro narrarope ia Zozossede Deocca zozosse memeuarricca ccaronarrari. Ccaronazapa Zeso noccobiricca siba cco inarraro. Nazapa narraro sibaza uittari canaui quenade.

³ Pouapa ssiuarra tarrari pina ssissiuede ssiuarranissa narrari. Pocca etero mopo tarraro pina uepessa neraha denima mopo tarraro.

⁴ Isso teppeppedeni narrari qqui toquenazapa poua noppine cappinemanaza tacca-cca-cca quenarrari. Nazapa pina cacotarrarissa quenarrari.

⁵ Naraha Deocca zozossepa amonerre uedarronarrarodeniza uati tarrari: —Tiadenipe ticappinemana terrerarri! Zeso qquide ticadarronarraro nauato onani. Pouapa aua porimacossaniza inanazoqque-manarrari.

⁶ Naraha arraza poza-rraraui. Pouapa nauatonipa. Pina poua zoqque-rraraccazama “onauatoninitoui” nanarra naporrarissa narrari. Rrari, poua pozauiuarri qquide ticadezimarri.

⁷ Nezape uassinarra ticadaniza pocca zozosse tabaqquiza uati tinanimanarri: “Zesopa nauatoniui” tiquenana. Pouapa titezerremadeni zama arobeni Carireauarri toccanipouitoui. Naniuarri rraui tirranizana poua qqui tiquenauiuarrine. Peperri narraro uima tiadeniza uati onaponi −naui quenade.

⁸ Nezape Zeso noccobiriuarri nebomaneza uassinarra Zesocca zozosse tabaqquiza uatide zarra tanirraro. Cappinemaneraha uatizemaneri tanirraro.

⁹ Zarra taniraha naui rrauiza Zeso ponideniza auatomaza: —Nirra −narrari. Nezape pouaza touedessiza uatizemaneza ponideni pitoniza poua issoza cauarrocossemana neza: —Ia Zozossede, deni tirrani! −quenani nade.

¹⁰ Nanarra Zesopa: —Ticappinemana terrerarri! Ticadanizape ouimecotedeniza uati tinanimanana: “Zama arobeni Carireauarri rraui torranina. Nanizana oua qqui toquenauiuarrine, naparra” tiquenana −naui nade Zeso ponideniza.

Isso teppeppedenicca maizehe

¹¹ Mariadeni touedanirre neraha, Zeso noccobiri cacauade isso teppeppedeni mota naco dada toqquimade taminedeniza uati tanimanauiuarrine oza pananiuarri domo toccanirrari. Arri nami zaroro narrarocca uima, Deocca zozosse memeuarricca siba cco inarrarocca uima naqui, narraro uima bazima isso teppeppedeni qqui toquenarraricca uati tanimanarrari.

¹² Naraha dada toqquimade taminedeni narraro uima mittemanazapa ime rrocouideni tezerre queriqquimanaza uimahaha canarrari. Rrehe canirezapa ziniro uemani isso teppeppedeniza da inabaqquirizarraro, parrissa pouadeni qqui toquenarraripa ecomemananiuarrine.

¹³ —Arri tiadeniza ziniro da inabaqquirrarope maizehera uati tiquenaniuarrine. Arrima tiquenarri: “Zome icauadirreza Zesocca zozosse tabaqquipa Zeso assire idinimanarrari” tiquenarri.

¹⁴ Nezape narraro uima ticcadeni tamine Pirato mittazapa tiadeniza uadiuitouiraha ia pouaza uati inanissa tezape tiadeniza torroneuitoui −quenaui nade.

¹⁵ Nazapa isso teppeppedeni ziniro carrimanarraridenipa taminedeni attidenissa inanemanarraro. Narraro poccadeni maizehepe icca madirra zodeodeni motadeniza torrarizanissa tarraro. Arri oua omadiza arrirraro dozode orreza naqui narraro maizehe motadenipa uati uati quenaui parra naccaui.

Zesopa pocca zozosse tabaqqui zosse inabaqquirizarrari

¹⁶ Nezape ia Zesocca zozosse tabaqqui 11 inarraro Carireauarri rrauirranirraro. Pina taide amonerredeniza Zeso uati taporrarissa inanarraro. Zeso attipa: —Narraro ssonouarri rraui tirremorana −neza narraro ssonouarri rrauirremorarraro.

¹⁷ Bacco imorezape Zeso qqui inarrari. Qqui inazapa pouaza etizeza: —Tiape deni tirrani, tiape nauatonie rrinede tirrani! Arra tiassa narrari ouaha noueraui −inade. Naraha mota bodidenipa: —Parrissa Zeso nauatonirrarico? −quenarraride.

¹⁸ Nazapa Zeso zaboraza iaza uati tade: —Abi Deopa pocca nauatohe bazima memeuarricca, namiuarricca naco ouacauarizauiuarrine pocca dacorehe ouaza inanarraro.

¹⁹ Nema nezape zama bazimaza otauimari maride rraui tirrarizarri. Madirra ouaza toquerrenauiuarrine maride dameraqquiri tiquenarri. “Rrehe, Zesoza iquerrenana” quenazapa Abi Deo onima, oua Deo Bedi oua onima, Deo Corime onima passo dopaniza niqui niqui titizanabaqquimana nana, onarraro.

²⁰ Arri occa marinarra tiadeni onauattabaqquirraro nemaneheza iboraqquiri nauiuarrine naco mari mari titicanabaqqui-rizemana nana, onarraro. Ouape uada uarrirriraza tiadeniza ohomadiriza nanitoui. Nema ozanaporraroa zama rricani bacco tanitoui −nade Zeso. Peperri.