Mateo 26 - Kulina New Testament Brazil

Zeso tozepe torrauiuarrine uimahaha canarrari

¹ Zesopa madirra mari icanabaqquia rricazapa ia poua uatimadedeniza uati tarrari:

² —Nauatoqquiri tiquenani uada pama nezape errete Pascoa torranitoui. Ouape Madirra Bedi orrarraroa niza narraro errete torrezape tozepe orranitoui. Aua porimacossaniza oua inanazoqque-mananiuarrine −nade.

³ Nazapa Zesoza nacasseraqquiri narrarideni arra dada toqquimade taminedeni, zodeodeni ime rrocouideni tezerre poccadeni tamine deni torrarrari onipa Caipa pocca oza imeniza queriqquimanarrari.

⁴ Nauiza uimahaha canarrari: —Nerreco maizeheza Zeso tozepe torraza zoqqueuiuarrine? −quenaui nade.

⁵ Naraha pouadeni atti onihipe: —Errete torrezape uima noueraccaniuarrine. Zesoza madirra nacassaqquiri narrarideni poua dama inaui qqui toquenazapa moua moua quenarana −quenaui nade.

Zeso tatiza marrorro sso inarirrarocca uima

⁶ Zesopa oza capamema narraro onini Betaniauarri madiza Simao pouaza uapi rrazizi quequenanarraricca ozaza toqquezimarrari.

⁷ Naui Simaocca ozaza rripade rrassi inariza amonerre Zesoza touarriressirraro, poni zapaniza siba onini alabastro nauatoni rrorro bicaui zorro inarronarrari. Narrari rrorroza marrorro bicani uatini ccara tanicca zorro icazimarraro. Zesoza bacco tezape tatiza nemanehe sso inarirraro.

⁸ Naraha Zesocca zozosse tabaqqui ia qqui inezape edirraro. Ettipe: —Nerrecotoui marrorro ponima inarricarraro? −inade.

⁹ —Narraro marrorro manaconiza da icaneza madirra cappiremanarrarideniza da iqquimanitouiraha −inade.

¹⁰ Etti nema ineza Zeso mittazapa poua attipa: —Peperri tiquenarri. Nerrecotoui poniza tedimanarraro? Ponirrine ouaza nema nezape bica tani.

¹¹ Cappiremanarraridenina tiadeniza madimana-zanapouitoui. Neraha ouape tiadeniza omadizanapo-rreranitoui.

¹² Arri marrorro ouassireza sso inarirrarope pina ozoqqueza oua ppa izemananiuarrinessa narraro narroraporraro −nade. (Zodeodenipa poccadeni madirra zoqquezapa nama quequenanarrari.)

¹³ —Parrissehera tiadeniza uati onarraro: Zama onihi, zama onihiza otauimari madirra tocassiuauerauiuarrinecca ecomeremanezape arri otatiza marrorro sso inarirrarocca uima naqui madirra mittarizemanauitoui. Nema nezape ponicca uima uatideni rramemana-rrarauitoui −nade Zeso.

Zodapa Zeso eccorauiuarrine narrorarrari

¹⁴ Zesocca zozosse tabaqqui 12 quenarrari orraria oni Zoda Iscariotepa dada toqquimade taminedeniza uatide toccarrari.

¹⁵ Poua attipa: —Rrari, Zeso tizepedeniza onanauiuarrinepa nerrecoma nehe ouaza da tiquenaniuarrine? −narrari. Nazapa taminedeni ziniro ccarara prata 30 nehe uatini ccara tanicca Zodaza da iquenarraro.

¹⁶ Nazapa toccaniza poua bodi narrorarrari. Zeso pouadeniza eccorauiuarrine inoccozarizarrari.

Ia Zozossedecca rripaqquie

¹⁷ Izarraeo potemaui zodeodenicca errete imeni bacco tarraro, oninipe Pao ssarra tarrarauicca. Narraro erretepe uada 7 nehe rricaniuarrine. Taidecca uadaza rripaqquie onini Pascoa ihinanemana narraro. (Pascoa ettizape: Deo tossoniqquimarrari, inarraro.) Nezape narraro uadaza Zesoza ia poua uatimadedeni uati inarraro: —Nerrecouarri Pascoacca rripaqquie tiaza inarroraniuarrine? −inade.

¹⁸ Iaza uati tarrari: —Oza pananiuarri otessecca ozaza uatide rraui tirraporri. Pouaza arrima tiquenana: “Ia Maride attipa: ‘Ouaza uima torrabote nani’ narrari. ‘Nazapa occa zozosse tabaqqui tezerre ticca ozaza Pascoacca rripaqquieza eueue bedi irripaqquiniuarrine’ naparra” tiquenana −nade Zeso.

¹⁹ Nezape Zesocca zozosse tabaqqui iape Zeso poua attissa inanarraro. Pascoacca rripaqquie zome irripaqquiniuarrine inarrorarrarode.

²⁰ Nezape narraro zomeza ia Zesocca zozosse tabaqqui 12 inarraro poua tezerre zamatapa uauanariza irripaqquiniuarrine rrassi inauarranirrarode.

²¹ Rripade iquerrenanerre Zeso iaza uati tarrari: —Parrissehera tiadeniza uati onana: Arri tiadeni orrariaha oua ccaccorazapa tozepe orranitoui −nade Zeso.

²² Poua atti nama nazapa ibodi qquezeza: —Oua Zozossede, arri ouazaqui? −inarizarraro.

²³ Nazapa Zeso attia: —Madirra orrariapa icca paratoza poua naco pocca paoza depo apa, depo apa naui. Narrarina oua ccaccorauitoui.

²⁴ Rrehe, ouape Madirra Bedi orrarraroa niza ozoqquenitoui. Pina maittaccazama otezerremacca uima Deo Atti cacomeraqquiri narrarideni dozo iquenaporrarossa onanitoui. Neraha oua ccaccoradeza oppina tehe torranitoui. Rraho, narrari maqquiderre tossona-rrarazapa bica teraha, oppina tanicca zori tauitouiraha −nade Zeso.

²⁵ Nazapa Zoda Iscariote, Zeso ccaccoradepa Zesoza uati tarrari: —Oua Maride ouazanitide? −naraha Zesoa: —Rrehe, tia tetti nema tarraroparriua −nade.

²⁶ Nezape rripade iquerreneza Zeso pao idi naza Deoza uati tarrari: —Rrehe, Abi Deo ticca danirri iaza bica taui −nade. Nazapa pao icanarobeza dize rrai da, dize rrai da inarizade. Ia pocca zozosse tabaqquiza uati tarrari: —Arra, apa tiquenarro. Arrirrarope ouimecca uima −nade Zeso.

²⁷ Zotodepa ze inauiuarrine zeze equidi naza Deoza uati tarrari: —Rrehe, Abi Deo ticca danirri iaza bica taui −nade. Nazapa iaza da icanaza iaza uati tarrari: —Arra, ze tarizemanarro, tiadeni bazima.

²⁸ Arrarrari zezepa ouemenecca uima. Deo madirra tezerre rrehe canireuiuarrinecca uima torraniuarrine. Niza oua ozoqqueza ouemene toqquezape narraro rrehe canirenirri parrissa torranitoui. Arri ouemene toccarrarope madirra bazimaza uima bicani torraniuarrine. Narrarope madirra bazimacca uimasiri manaconi ouaza torrezape Deopa poccadeni uimasiri peperri inananiuarrine.

²⁹ Arrirrarope tiadeniza uati onarraro: Uva pperrene ze inarraripa ze onapoma-rraraccauitoui. Niza occa Abicca cacauehe torranissa teza titezerre uva pperrene ouaha zatira ze inauitoui −nade Zeso.

Pedoro poua namaizauiuarrine Zeso uati taporrari

³⁰ Pascoacca rripaqquie rriquezape Deoza rriri inade. Rriri inehe rriquezape ssono onini Rritona queuarri rrauirremoranide.

³¹ Naniza bacco imorezana Zeso iaza uati tarrari: —Arrirraro zomeza tiadeni bazima oua tinebomananitoui. Pina Deo Atti dozo naporrarossa nanitoui: “Niza eueue cacauade zoqquezapa pocca eueue torraribaqquiuitoui.”

³² Neraha ouape Deorrine onauatoninitoui. Onauatonizape titezerremadeni zama arobeni Carireauarrina occaninitoui −nade Zeso.

³³ Naraha Pedoro attia: —Bazima tia inebomaneraha ouape tia onebo-rreranitoui −nade.

³⁴ Nazapa Zeso Pedoroza: —Parrissehera tiaza uati onana: Tiape arrirraro zome tacara uaua narraraccaza ouaza: “Onocco rriza tani” tanitoui. Zotode naqui: “Onocco rriza tani” tapomanitoui. Zotode naqui nema tapomanitoui −nade Zeso.

³⁵ Naraha Pedoroa: —A, ouape nema onerreranitoui −nade. —Uima oppina teza naqui tiaza: “Onocco rriza tani” onerreranitoui. Tiazama ozoqqueniuarrine bica tani −nade Pedoro. Ia poua uatimade bazima naqui etti nema nade.

Zesopa Quezemaniuarri Deoza uati uati tarrari

³⁶ Nazapa Zeso poua ineza aua ppa narizaui oni Quezemaniuarri rrauirrarraro. Naniuarri bacco inezape ia pocca zozosse tabaqqui iquerrenarraro, iaza Zeso attipa: —Tiadenipe arriza rrassi tinaccarri. Ouape arriccaza Abi Deoza uati onaccana −nade.

³⁷ Nazapa poua uatimade 3 quenaha rrina inabaqquirrari. Pouadenipa Pedoro, Zebedeo bedideni Zouao, Tiaco quenarrarideni pouaza denima rraui torrarrari. Nauizana Zeso bodi qquezazapa orribote narrari.

³⁸ Nazapa pouadeniza: —Obodi ocassera tarrarorrine ouatiabote-te canani. Tiadenipe arriza tibomanaccarri. Ouazama tinoccodeni bissaccana −naui nade Zeso.

³⁹ Nazapa Zeso tocca-cca naza poua baccouarri namiza pona naza Imehiza uati tarrari: —Abi, arri madirra tocassiuauerauiuarrinecca uima onihi noueraqui? Nouerezape peperri. Madirra bazimacca uimasiri manaconi narrizoue ouaza torrezape ocasserani ouanitoui. Pina zeze bidabote ze onaniuarrinessa narraro. Narraro onauananiuarrine touini onerrereraha, oua nacassa onanicca toui onerrerarraro. Tia nacassa tinaniccana parri. Narrarozana ibora onarraro −naui nade.

⁴⁰ Nazapa poua uatimadedeniuarri ccanirrari. Bacco nanizapa cauadirrauira qqui tarrari. Nazapa Pedoroza Zeso uaua narrari: —Ticauadirrarraroqui? Zome nocconi ocarra-rrereraha tinoccodeni bissade tiparriremane-rrerarraroqui?

⁴¹ Ticauadirra-rreraza Deoza uati tiquenarri, uima oppina tehe torrezape tirraparimaneza uima tinanemana-rreraniuarrine. Tibodidenipe ibora teraha tessiredenina mirrira tarraro −naui nade Zeso.

⁴² Nazapa toccanipomaza Imehiza uati tapomaza naco: —Abi, nauato tinani. Madirra bazimacca uimasiri manaconi ocasserani ouaniuarrine nacassera oneraha tia nacassa tinaniccazana ibora onarraro −naui nade Zeso.

⁴³ Nazapa poua uatimadedeniuarri ccanipomaraha cauadirrauira qqui inabaqquirrari, uada comani auemanarra naza.

⁴⁴ Nazapa inebobaqquipomaza Deoza uati tapomarrari. Pina poua uati tapouissa narrari uati tapomarrari.

⁴⁵ Nazapa poua uatimadedeniuarri ccanipomaza Zeso attipa: —Tiadenipe ticauadirra zanaponiuarrinequi? Ouape Madirra Bedi orrarraroa rridapanape oua ccaccoraderrine uimasiri carrimanarrarideni zepedeniza orranitoui −naui nade.

⁴⁶ Nazapa: —Rrina, titememanarri. Arrana, rridapanapa oua ccaccorade ccarronaui −naui nade Zeso.

Zeso dama iquenarrari

⁴⁷ Zeso uati uati naccaraha Zoda bacco narronarrari. Zodapa Zesocca zozosse tabaqqui 12 quenarrarideni orraria. Pouana madirra uapi taha eccarronabaqquirrari. Rrazirecca massito eccarronemana, uauacca eccarronemana narraro. Pouadenipa dada toqquimade taminedenicca zossenirri, ime rrocouidenicca zossenirri rrauirronarrari.

⁴⁸ Zodapa Zeso tozepe inanauiuarrine eccarronabaqqui-rraraccazama taminedeniza uati taporrari: —Niza pano mose onauitoui. Narrarina dama tiquenauiuarrine −naporrari nade.

⁴⁹ Nazapa bazima rrauirronaza bacco narronemanarrari. Nanarra Zoda Zesoza touarriressi, pina parrissa pouaza bica tarrarissa naza: —Nirra oua Maride? −nanarra pano mose inarraride.

⁵⁰ Naraha Zesopa Zodaza: —Otesse, ouaza uima tinananiuarrine ticcarronarraro. Nezape nema tarri −nade. Nazapa Zesoza touarriressimanaza dama iquenarrari.

⁵¹ Naraha Zesocca madirra orrariana massito cauidireqquimanani zoppa rreo, dada toqquimadedenicca tamine deni torrarraricca zozosse uaribo ca tanerre tarro canarraro.

⁵² Naraha Zeso narrariza: —Parri! Ticca massito anitinanirri. Rrazirecca massitoza madirra irrine auarraripa niza zotode poua naco rrazirecca massitoza inanazoqque-manauitoui −nade.

⁵³ —Rraho tibodi ssamo tarraroqui? Oua nacassa oneza Abi Deoza uati onezape pocca zozosse tabaqqui memeuarricca oua acco icanemananiuarrine pina issoteppeppedenissa narrari 72 mil quenaha zosse inaronabaqquiuitoui.

⁵⁴ Naraha nema onezape pina Deo Atti dozo naporrarossa onana-rreranitoui. Arri, ouaza uima oppina tanicca torraniuarrinepe maittaccazama Deorrine dozo iquenaporraro. Peperri! Deo Atti nemanehe onaparrirenissa taniuarrine. Oua accodetoui uaua onerrerana onarraro −nade Zeso atti.

⁵⁵ Nazapa Zeso pouatoui rrauirronarrarideniza uati tarrari: —Nerrecotoui tiadenipe oua dama tiquenaniuarrine rrazirecca massitoma, uauaccama rraui tirrarronarraro? Nema tiquenezape pina bobotidetoui rraui tirrarronarrarossa narraro. Neza tiadenizama uarrirriraza Deoza dada toqquimauarri mari mari ohonaneraha oua dama tiquenehe nerrerade.

⁵⁶ Neraha peperri, ouaza uima tinanemananiuarrinepe pina arri Deo Atti cacomeraqquiri narrarideni dozo iquenaporrarossa narraro torraniuarrine −nade Zeso. Naraha ia pocca zozosse tabaqqui bazimape Zeso ineboza idomo toccade. Nazapa Zeso poua motta orrari naha iaccanimanaui nade.

Dada toqquimadedenicca tamine deni torrarrariza Zeso iaqquemanarrari

⁵⁷ Zeso dama iquenazapa tamine Caipacca ozauarri iaqquemanarrari. Pouapa dada toqquimadedenicca tamine deni torrarrari. Nauiza zodeodenicca marinarra maridedeni, zodeodeni ime rrocouideni bazima queriqquimanaui nade.

⁵⁸ Naraha Pedoropa uarrima touanamissaza dada toqquimadedenicca tamine deni torrarraricca boroniza bacco tozimarrari. Caipacca zozosse tabaqquidenizama uittarrari. Poua bodipa: —Zeso nerrecoma inanemanauiuarrine? −narrari.

⁵⁹ Nazapa dada toqquimade taminedeni, zodeodenicca uima cacattemadedeni deni toquerrenarrarideni tezerre Zesoza uima inassonarimananiuarrine touini quenaza madirra maizehe uati toquenauiuarrine toui qqui narizemanarrari. Arra madirra attidenipa: —Zesopa icca marinarraza oppina tanicca inanaparra −quenaza taminedeni: —Rrehe, narraro uimaza Zeso zoqqueuiuarrine parrireui −quenauiuarrine.

⁶⁰ Madirrapa maizehe onihi onihi uati toquenaraha narraro uimaza Zeso zoqqueuiuarrine parrire-rrerani. Poccadeni maizehe narrarossa narize-rrerani. Oppina tanicca rrerani. Zotodecca madirra pamahana poccadeni maizehe narrarossa narraro uati toquenarrari.

⁶¹ Orraria attipa: —Titauaribobo canarri. Zeso atti arrama naui omittade. “Arri Deoza dada toqquimacca oza madirra icanauatomaneraha ocatabozape uada 3 neza ocanauatoninitoui” nade poua atti −naui nade. Poua tesse naco narrarossa narraro uati tarrari. Attideni nama quenaraha maizemanarrari.

⁶² Nazapa dada toqquimadedenicca tamine deni torrarrari totema, ua naza Zesoza uati tarrari: —Tiape tia tecomarraroqui? Tiaza uima inassonarimanarrarope nerrecoma nanerre? −naui nade tamine atti.

⁶³ Naraha Zesopa poua cacoma narrari. Nazapa tamine uati tapomarrari: —Deo camitta tarrari onima uati tinarri onezama iaza tia tecomerarri: Tiape Deo Bedi Cristo-Mesia tirraqui? −naui nade tamine.

⁶⁴ Nazapa Zeso: —Rrehe, tiadeni ouaza nema tiquenarraroparri. Neraha tiadeniza uati onarraro: Ouape Madirra Bedi orrarraroa niza zotode Deo Dacorabote oua deni tonanazapa Poua uinori nauatoniuarri ouittarini qqui tiquenanitoui. Niza meme essenima occaronapomani qqui tiquenanitoui −naui nade Zeso.

⁶⁵ Nanarra dada toqquimadedenicca tamine deni torrarraripa Zeso atti mittaza uati rrami naza pocca etero rroca tanerre sseo narraro. Nazapa bazimaza uati tarrari: —Deo itamassorrari! Peperri! Rridapanape pocca uima nauatoto inani. Madirra ouahacca uimatoui uati inerrerana. Poua attipa pina: “Ouape Deo orrani” narrarissa naua. Poua atti uaidira tani timittemanani.

⁶⁶ Rrari, tettideni nerrecoma tiquenani? −naui nade Caipa. Naraha bazima: —Rrehe, poua atti nama nazapa zoqquena inarraro! −quenaui nade.

⁶⁷ Nazapa Zeso panoza ppito-to ppito-to quenarrari, idaqquimanarrari, pouadeni zepeza naco pano ppa inanimanarrari nade.

⁶⁸ —Rrari, Cristo-Mesia tirrezape nerrecorrari tia idarrari? Tecomerarro! −quenaui nade.

Pedoropa Zesoza: —Onocco rriza tani −narrari

⁶⁹ Zesopa oza bodiuarri nanarrizo torraraha Pedoropa amossiniuarri boroniza uittarrari. Nezape narraro ozacca zozosse zouato ccarronezape pouaza uati tarraro: —Tiape Zeso Carireauarricca uatimade tirraderra −nani nade.

⁷⁰ Naraha bazima mittemanaza Pedoro poua namaizarrari: —A, ouape onocco rriza tani. Qqui onarrarade. Narraro uima ssamo onani ouape −naui nade.

⁷¹ Nazapa Pedoro narraro boronicca qqueqquezimauarri toccaza narraro ozacca zozosse onihi poua qqui teza bazimaza uati tarraro: —Arrarraripa Zeso Nazaretiuarriccaza ccarizaderra −nani nade.

⁷² Naraha Pedoro poua namaizapomarrari: —Deo nauato taui pouaza onocco rriza tani −napomaui nade.

⁷³ Naraha zotodepa nauiza toqueriqquirrari attidenipa: —Parrissade! Tiape Zesocca tirrade. Carireauarricca touatti ticarrini −quenaui nade Pedoroza.

⁷⁴ Nazapa Pedoro boquerrari. —Parrissa uati uati onerrerezape Deo oua tinarrizorri, onana. Parrissa tiadeniza uati onarraroa: Narrari madirraza onocco rriza tani −naui nade. Nanarra tacara uaua narra narrari.

⁷⁵ Nazapa Zeso atti Pedoro bodi uatomanirrari: —Tacara uaua narraraccazapa tetti tinamaizani 3 nanitoui −naporrari. Arra Zeso atti Pedoro bodi uatomanizapa qquenaza orrirrari nade.