Mateo 25 - Kulina New Testament Brazil

Zesopa zouato 10 quenarraro tauimarinideniza mari icanabaqquirrari

¹ Nazapa Zeso madirra denima mari icanabaqquirrari: —Deocca cacauehe torrezape pina arrirraro uimassa nanitoui: Zouato 10 quenarrarope zabisso zouato cacarrireuicca rripaqquietoui narroremanezape ponidenicca rrorrororo equidirizemanaza zabisso uenabote narrari bacco irrizemanauiuarrine zome rraui torrarraro.

² Neraha zouatodeni mota 5 quenehepe bodinideni uatonissa terrerarraro. Neraha zouatodeni mota 5 quenehepe bodinideni uatonissa tarraro.

³ Nezape zouato bodinideni uatonissa terrerarrarope ponidenicca rrorrororo iaqquemanaraha pperrene rricaza denima sso izemanauiuarrine iaqquemanarrararrari.

⁴ Neraha zouato bodinideni uatonissa tarrarodenipe ponidenicca rrorrororo iaqquemanazapa pperrene rricaza denima sso izemanauiuarrine iaqquemanarrari.

⁵ Nezape rraui torrarraro, boroniza bacco toqueneraha zabisso uenabote narrari narrozapa zouatodeni cauadirrabote nezape naniza cauadirrarraro.

⁶ —Neraha zome nocconi torrezana madirra rrazirema uaua narrari: “Zabisso ccarronaui, ccarronaui! Rraui tirrarronarri, bacco tirrizemanauiuarrine!” narrari.

⁷ Nezape zouatodeni bazima nocco toquerreneza toteme-manezape ponidenicca rrorrororo denima ssiuarra tauiuarrine narroremanarraro.

⁸ Neraha zouato bodinideni uatonissa terrerarrarope motadeniza attinidenia: “Ticcadeni rrorrororo pperrene bazira taha iaza da tiquenarro, icca rrorrororo ouirizabote naui” quenarraro.

⁹ Neraha zouato bodinideni uatonissa tarrarodeni attinidenia: “Poni. Tiadeniza bazira taha sso izarraraui. Tiadeniza, iaza nazapa parrire-rraraui. Mimittauarri rraui tirraccarri, rrorrororo pperrene ouaha mitta tiquenauiuarrine” quenarraro.

¹⁰ Nezape mittade rraui torrarraro. Naraha naniuarri narromanezape arra zabisso amonerre carriuiuarrine bacco narronarrari, cacarrireuicca rripaqquieza toqquezimarrari. Nezape zouato bodinideni uatonissa taporrarodeni pouaza rraui torrezimarraro. Nezape totoqquezima icauacossarraro.

¹¹ Neraha zouatodeni mota 5 quenehepe mimittauarri mittade narromaneza zotode bacco nanimanarraro. Amossiniza domoni ueza zabisso uenabote narrariza uaua quenarraro: “Ia, ia! Rrauirrezimaniuarrine totoqquezima ticanauabarri!” quenarraro.

¹² Naraha zabissopa totoqquezima icataborriza-rrerani. Poua attipa: “Tiadeniza parrissa onocco rriza tani. Occa madirra tiquerrena-rrerani” narrari −nade Zeso.

¹³ Nazapa madirra bazimaza Zeso attipa: —Tibodideni uatonissa tarri. Oua occaninicca uada ssamoqquiri tiquenani. Marri naco ssamoqquiri tiquenani. Tinarroremanehe timadimanarri −nade Zeso.

Zesopa ziniro inauapimananiuarrinecca uimaza mari icanabaqquirrari

¹⁴ Zesopa uima onihi uati tarrari: —Deocca cacauehe torrezape pina arrirraro uimassa nanitoui. Madirra pocca bobode toccauiuarrinepa pocca zozosse tabaqqui queriqquiuiuarrine ua inabaqquirrari. Queriqquizapa pocca ziniroza zepedeni irrimanauiuarrine pouadeniza da inarizarraro. “Arra occa ziniro tinauapimaneza niza occanizape ouaza nemanehe da tanimananiuarrine” narrari.

¹⁵ Pocca zozosse orrariapa ziniro inauapiniuarrine nauato tauissa tazapa pouaza ccarara 5 mil nehe da inarraro. Ouaha naco ziniro inauapiniuarrine nauato tazapa pouaza ccarara 2 mil nehe da inarraro. Ouahapa ziniro inauapiniuarrine arramani nauato tazapa pouaza ccarara 1 mil nehera da inarraro. Nazapa ziniro rrinede bobode toccarrari.

¹⁶ —Nazapa ccarara 5 mil nehe carrirraripa amazati toccarrari. Mitta, da, mitta, da narizarrari. Zepe irririzauissa tazapa 5 mil carriporaha denima 5 mil carrirrari.

¹⁷ Nazapa ccarara 2 mil nehe carrirrari narrari naco mitta, da, mitta, da narizarrari. Zepe irriuissa tazapa denima 2 mil carrirrari.

¹⁸ Naraha ccarara 1 mil nehe carrirraripa nema inana-rrerarraro. Narraripa poua zossedecca ziniro inarrimaniuarrine nami ui izeza ppa izarraro.

¹⁹ —Ziniro rrinedepa uada uapi taza ccanirrari. Bacco nanizapa pocca zozosse tabaqquicca uima mittauiuarrine pouadeniza uaua narrari, poccadeni conta icattemaniuarrine.

²⁰ Nazapa ccarara 5 mil nehe carrirrari ccarronarrari. Ccarara 10 mil nehe rrinedeza da inanirraro. Pouaza da inaniza poua attipa: “Oua zossede, ouazape ccarara 5 mil nehe da tade. Neraha qqui tanerre, ozepe irririzanissa tezape denima 5 mil nehe torrarraro” narrari.

²¹ Nazapa ziniro rrinede attipa: “Rrehe, tiape occa zozosse ouattiza ibora tinarraro. Bica tinani. Tiaza bazira tehe da onaporaha denima torraniuarrine damera tinezape denima tiaza da onanitoui. Tiqquezimarri, erreteza etizena” narrari pocca zozosseza.

²² —Naza pocca zozosse ouaha ccarara 2 mil nehe carrirrari ccarronarrari. Poua attipa: “Rrehe, oua zossede, ouazape ccarara 2 mil nehe da tade. Neraha qqui tanerre, ozepe irririzanissa tezape denima 2 mil nehe torrarraro” narrari.

²³ Nazapa ziniro rrinede attipa: “Rrehe, tia naqui occa zozosse ouattiza ibora tinarraro. Bica tinani. Tiaza bazira tehe da onaporaha denima torraniuarrine damera tinezape denima tiaza da onanitoui. Tiqquezimarri, etizena” narrari pocca zozosseza.

²⁴ —Naza pocca zozosse ouaha ccarara 1 mil nehe carrirrari ccarronarrari. Poua attipa: “Oua zossede, tiape madirraza daco tirrirarraro. Tiape tarabaia terrereraha ticca zozosse tabaqquirrine titicarri narraro.

²⁵ Nezape tinoppine ocappineza nami ui ozeza ticca ziniro ppa ozarrarode. Arra ticca ziniro tiaza da onanina” narrari.

^26-27 Naraha ziniro rrinede attia: “Occa zozosse ibobote! Uaidira tinani! Tettipe ouaza: ‘Madirraza daco tirrirarraro. Tarabaia terrereraha ticca zozosse tabaqquirrine titicarri narraro’ taua. Neraha ouaza nauato tinezape occa ziniro arri ziniro ehecauemana naniuarrina tineboza touapizape occaniza denima ouaza da taninitouiraha” narrari ziniro rrinede atti.

²⁸ —Nazapa pocca zozosse tabaqqui ouahadeniza uati tarrari: “Rrari, occa ziniro ccarara iboboteza da onaporrarope tidinimanarri. Tidinimanezape madirra ziniro ccarara 10 mil nehe carrirrarizana da tiquenarri.

²⁹ Arra, carrirraripa pouaza denima, denima, denima torrezape uemani carriuitoui. Naraha ibobotepa bazira taha carriraha poua carrirraricca todininitoui.

³⁰ Nazama arra occa zozosse ibobotepa ziziniuarri coro tininemanarro. Nauiuarripa ocasserani aua-zanapozapa pano tozaui naza orri orri nauitoui” narrari ziniro rrinede atti −nade Zeso.

—Madirra ocatterriza-baqquiuitoui −narrari Zeso

³¹ Zesopa denima mari icanabaqquirrari: —Ouape Madirra Bedi orrarraroa niza occaronapomezape occa deni torrehe ossiuerrenema occaronapomanitoui. Deocca zozosse tabaqqui memeuarricca ouaza rrauironauitoui. Nezape deni orranicca uiuittari bicaniza ouittariza zosse zosse onanitoui.

³² Nazana zama bazimacca madirra obaccouarri queriqquiuitoui. Nazapa ouana madirra ocatterriza-baqquiuitoui. Pina eueue cacauadepa pocca eueue icatterriza-baqquirrarissa onanabaqquiuitoui. Eueue cacauadepa eueue bicaui pouadenira icatterrizabaqqui, eueue rrizaza cabra pouadenira icatterrizabaqqui narrari.

³³ Poua birri nauatoniuarripa eueue bicaui pouara. Poua birri ssamouarripa eueue rrizaza cabra pouara inanabaqquirrari. Oua naqui madirra ocatterriza-baqquizapa madirra bicaqquiri narrari Deo Poua nacassa tauicca inanemanarrarodenipa obirri nauatoniuarri onanabaqquiuitoui. Madirra uaidiraqquiri narrari Deo Poua nacassa tauicca inanemana-rrerarrarodenina obirri ssamouarri onanabaqquiuitoui.

³⁴ —Nezape oua tamine orreza arra madirra obirri nauatoniuarri domo uarrarideniza uati onanitoui: “Nirra, occa Abi tiadeniza uima bicani inanarizarraro. Pocca cacauehe tiadeniza torrani. Narrarope zama nauato-rreraqquezama tiadeniza narroraporraro.

³⁵ Ouaza bicaqquiri tiquenezape opemiza oua titapemanade. Obacco rrocoza ouaza passo da ticanemanade. Tiadeniuarri bacco onarroneza ouaza tinoccodeni rrizaqquiri neraha: ‘Iaza timadiccarri’ tiquenade.

³⁶ Etero ocappireza naqui ouaza da tiquenade. Coma oneza naqui oua qquide rrarraui tirrarrona nade. Toponi cocoroza ouezeza naqui oua qquide rrarraui tirrezima nade” onanitoui pouadeniza.

³⁷ —Nazapa arra madirra bicaqquiri narrarideni ouaza uati toquenauitoui: “Ia Zozossede nerrecoma neza tipemiza tiaza zamatapa da inarraritta? Nerrecoma neza tibacco rrocoza tiaza passo da icanarrarotte?

³⁸ Nerrecoma neza tiaza inocco rriza teraha, ‘Iaza timadiccarri’ inarrarotte? Nerrecoma neza etero ticappireza tiaza da inarrarotte?

³⁹ Nerrecoma neza coma tineza tia qquide rrauirrezimarrarotte? Nerrecoma neza toponi cocoroza tezeza tia qquide rrauirrezimarrarotte? Ssamomo inani” quenauitoui.

⁴⁰ Nezape oua tamine orrezape pouadeniza ouatti arrima onanitoui: “Parrissehera tiadeniza uati onarraro. Arra madirra occa torrarrari orraria touati nauana tarrari acco ticanemanazapa pina oua acco ticanemanarrarossa narraro” onanitoui, obirri nauatoniuarri domo uarrarideniza −nade Zeso.

⁴¹ —Naraha obirri ssamouarri domo uarraridenizape ouatti arrima onanitoui: “Arri ouazape uarrirri tinarri! Deopa tiadeniza narrizoue inanarraro. Rrororoni rriquerreraniuarri rraui tirrarri! Narrarope poua uauadide Tocorime-Tamineza, Tocorime-Taminecca zozosse tabaqquideniza narroraporraro.

⁴² Tiadenipe opemiza oua titapemane-rrerade. Obacco rrocoza ouaza passo da ticanemane-rrerade.

⁴³ Tiadeniuarri bacco onarroneza ouaza tinoccodeni rrizaqquiri neza: ‘Iaza timadiccarri’ tiquenerrerade. Etero ocappireza naqui ouaza da tiquenerrerade. Coma oneza naqui oua qquide rrarraui tirrarrona nerrerade. Toponi cocoroza ouezeza naqui oua qquide rrarraui tirrezima nerrerade” onanitoui pouadeniza.

⁴⁴ —Nazapa arra madirra uaidiraqquiri narraridenipa ouaza uati toquenauitoui: “Ia Zozossede nerrecoma neza tipemiza tiaza zamatapa da inarrararraritta? Nerrecoma naza tibacco rrocoza passo tiaza da icane-rrerarrarotte? Nerrecoma neza tiaza inocco rriza teza ‘Iaza timadiccarri’ inerrerarrarotte? Nerrecoma neza etero ticappireza tiaza da inerrerarrarotte? Nerrecoma neza coma tinaza tia qquide rrauirrezima-rrerarrarotte? Nerrecoma neza toponi cocoroza tezeza tia qquide rrauirrezima-rrerarrarotte? Ssamomo inani” quenauitoui.

⁴⁵ Nezape oua tamine orrezape pouadeniza ouatti arrima onanitoui: “Parrissehera tiadeniza uati onarraro. Arra madirra occa torrarrari orraria touati nauana tarrari acco ticanemana-rrarazapa pina oua acco ticanemane-rrerarrarossa narraro” onanitoui pouadeniza −nade Zeso.

⁴⁶ —Rrehe, uaidiraqquiri narraridenipa narrizoue rriquerreraniccaza madimana-zanapouitoui. Naraha madirra bicaqquiri narrari Deo Poua nacassa tauicca inanemanarrarodenina camittehe rriquerreraniuarri madimana-zanapouitoui −nade Zeso.