Mateo 20 - Kulina New Testament Brazil

Uizarra tatarabaiadedenicca uimaza mari icanabaqquirrari Zeso

¹ Zesopa pocca marinarra arrirraro namiza imadinicca uima tazarrani mari icanabaqquirrari. Poua attipa arrama nade: —Deocca cacauehecca uimape pina uizarra rrinedecca uimassa narraro. Pocca uizarraza ppa taui uva pouara ppa narizarrari. Uizarra rrinedepa izamassa qquenaza pocca uizarrauarri tarabaia quenauiuarrine madirratoui toccarrari.

² Bacco inabaqquizapa pouadeni tezerre uimahaha canarrari. Poccadeni zamacca tarabaia uada orrarie manaconipe ccarara carrarie 1 denario. “Narrarope bica tani” quenazapa rrehe canirerrari. Nazapa pocca uizarrauarri tarabaia quenauiuarrine zosse inabaqquirrari.

³ —Naui zotode marri uarirronaza naco uizarra rrinedepa tozepetarri dada carri taniuarri toccarrari. Nauizapa madirra ouaha zepedeni rriraha domo uaui qqui inabaqquirrari.

⁴ Narrarideniza naco uati tarrari: “Tiadeni naqui occa uizarrauarri tarabaia tiquenaniuarrine rraui tirrarri. Tiadeniza manaconi parrirenissa tehe da onaniuarrine” narrari. Nazapa rraui torrarrari.

⁵ Naui zotode marri orrariuariri naza naco uizarra rrinedepa nama napomarrari. Marri touenarronaza naco nama napomarrari.

⁶ Naui zotode marri toccaza naco uizarra rrinedepa madirra ouahadenitoui toccapomaza madirra zepedeni rriraha bacco inabaqquizapa pouadeniza uati tarrari: “Nerrecotoui rridaccazamama arriza tizepedeni rrirehe tiquerrenarraronerre?” narrari.

⁷ Naraha pouadeni cacomeremanarrari: “Itoui madirra uaua quena-rrarazapa” quenarrari. Nazapa pouadeniza naco: “Rrehe, occa uizarrauarri tizepedeni irrimananiuarrine tiadeni naqui rraui tirrarri” narrari. Nazapa pouadeni naco rraui torrarrari, marri toccaraha.

⁸ —Nazapa marri toziziza uizarra rrinede pocca tatarabaiadedeni cacauadeza uati tarrari: “Rrari, tatarabaiadedeni ua tanibaqquirro, poccadeni tarabaia manaconi da tinarizaniuarrine. Taidepa arra marri toccaza tarabaia quenarraridenina paca tinabaqquipona. Narrarideni nattipa marri touenarronauicca paca, marri orrari uariri nauicca paca, marri uaripouicca paca tinabaqquina. Nazana taide izamassa tarabaia quenarrarideni paca tinabaqquina” narrari.

⁹ Nazapa zotode tarabaia quenarridenizaha pouadeniza ccarara carrarie 1 denario da inarizaporrarope pina tarabaia uada orrarie manaconissa nehe da inarizarraro. Pouadeniza pouadeniza inanarizarraro.

¹⁰ Nazapa marri touenarronauicca paca, marri orrariuaririricca paca, marri uaripouicca paca inabaqquia rricazapa izamassa tarabaia quenarrarideni paca inabaqquiuiuarrine narrorarrari. Naraha pouadeni bodi attidenipa: “Iape izamassazama tarabaia inapa. Iape denima icarrinitouiua” quenaraha pouadeniza naqui uada orrariecca tarabaia manaconissa nehe ccarara carrarie 1 denariora da inarizarraro.

¹¹ —Nazapa uapima narrarossa nehe carririzemanaraha taide tarabaia quenarraridenipa narroremanaporrari, uizarra rrinedeza uima idimemananiuiuarrine.

¹² Nazapa uizarra rrinedeza pouadeni attipa: “Marri toccaza rraui torrarraridenipa marri bazira taha tarabaia quenaraha pouadeniza pina iazassa nehe da tinabaqquiua” quenarrari. “Neraha iape marri iaqquehe marri ppoccone eraha icca tarabaia manaconi iaza denima da terrerani. Arra marri toccaza tarabaia quenarraridenicca manaconissa nehe icarriua” quenarrari.

¹³ Naraha uizarra rrinedepa arra attideni nama quenarrarideni orrariaza uati tarrari: “Rrehe otesse, ticca tarabaia manaconi orrine zori terrerapa. Naza taide uada orrariecca tarabaia manaconi tiaza uati onapopa. Tettipe: ‘Ccarara carrarie 1 denario ouaza bica tani’ tapo-rrerarraroqui? Naza taide ‘Bica tani’ tapa” narrari uizarra rrinede.

¹⁴ “Nezape ticca tarabaia manaconi ticarrini. Peperri, ticcanirri. Zotode tarabaia quenarrarideniza naqui tarabaia manaconi pina tiadenizassa nehe da onaniuarrine touini onezape peperri, nema onanarraro.

¹⁵ Occa zinirope occa. Oua touini oneza da onaniuarrine bica tani. Arra pouadeniza ouati uana tezape pouadeni acco ocanabaqquirrari. Narraro acconi tirramimanarrarorane?” narrari uizarra rrinede −nade Zeso.

¹⁶ Nazapa Zeso denima uati tarrari: —Rrehe, Abi uati uana tarrari pina uizarra rrinedessa narrari. Pocca cacauehe torrezape zotode toquerrenarraridenipa pocca biquehe carrimanauitoui. Pina taide toquerrenarrarideni carrimanarrarissa quenauitoui −nade Zeso.

Zesopa poua zoqqueuicca uima uati nimanipomarrari

¹⁷ Zeso tezerre oza panani Zerozarecca rraui rrauirreza pocca zozosse tabaqqui 12 inarraro ia motta pouaza iqueriqquiniuarrine ia ua tabaqquide. Nazapa rraui rrauirreza iaza uati uati zanapozapa poua atti arrama narraride:

¹⁸ —Arri, Zerozareuarri rrauirremorarrarope nauatoqquiri tiquenani. Ouape Madirra Bedi orrarraroa niza Zerozare bacco inezape dada toqquimade taminedeni, zodeodenicca marinarra maridedeni quenarrarideni zepedeniza orranitoui. Ouaza: “Zoqquena, zoqquena” quenauitoui.

¹⁹ Zotodepe madirra ouaha zodeo querrena-rrararrarideniza oua da iqueneza narraridenina oua rrarra icanaqquimanarraro, oua cossi inaqquimanarraro nanitoui. Nezape aua porimacossaniza oua inanazoqque-maneza oua ppa izemananitoui. Naraha uada pama torrari neza onauatoninitoui −nade Zeso iaza.

Tiaco, Zouaodenicca ami Zesoza uati tarraro

²⁰ Nezape Zebedeo bedimenipe poni bedi pamaha Tiaco, Zouao quenaza Zesouarri touarriressimanarrari. Poni bodinipe: —Zesopa deni torraui, ouape arrimani orrani −neza Zeso baccouarri poni pitoniza uitta neza Zesoza uati tade: —Oua Maride, tiaza uati onaniuarrineua −nade.

²¹ Naraha Zesopa: —Nerreco uimara ouaza uati tinaniuarrine? −nade. Nezape poni attinia: —Ticca cacauehe bicaniuarri madirra cacauade tittarizape occa erredeni pamariuiuarrine tinori nauatoniuarri uittari, tinori ssamouarri uittari quenauiuarrine nama tinanabaqquirro, onarraro −nade Zebedeo bedimeni.

²² Naraha pouadeniza Zesoa: —A, narraro uimape ssamomo tinani. Ouape ocasserani ouabote nani. Ouaza narrizoue ssonarinitoui. Arri tiadenipe narrizoue tinauanemananiuarrine tiparriremanaqui? −nade. Naraha pouadenipa: —Rrehe, ia naqui iparrireni −quenade.

²³ Nazapa pouadeniza Zesoa: —Rrehe, parrissa ocasserani tinauanemananitoui. Arri oua narrizoue onauanezape tiadeni naqui niza zotode narrizoue tinauanemananitoui. Neraha memeuarri occa cacaueheza madirra cacauade ouazama pamariuiuarrinepa oua zosse zosse onerrerani. Abi Deo icatterriza-baqquirraridenina ouinoriza pamariuiuarrine −nade Zeso.

²⁴ Narraro uima uimahaha canaui imittezape Zeso uatimade mota 10 inarraroa imecote pamahaza edirrarode.

²⁵ Nazapa Zeso ia ua tabaqquiza pouaza iqueriqquide. Iaza uati tade: —Tiadenipe madirra ouaha zodeo querrena-rrararraridenicca madie nauatoqquiri tiquenani. Poccadeni taminedenipa zossede dacoraqquiri naza poccadeni madirra zosse zosse quequenanarrari. Deni toquerrenarrari ouahadeni naco poccadeni madirra dacoreheza ehecauabaqquimana narrari.

²⁶ Neraha arri ouaza tiquerrenarrarope nema tiquenaniuarrine bica terrerani. Naraha titessedeni orrariapa: “Ouana deni orrana” nazapa pouana bazima birrideni acco icanarizabaqquiuiuarrinena bica tani.

²⁷ Deocca cacaueheza deni tirraniuarrinepe titesse birrideni acco ticanarizarro. Pina poccadeni zozosse tirrarrarossa taniuarrine.

²⁸ Arri oua Madirra Bedi orrarrarope madirra zosse zosse onaniuarrine occarrona-rrerarraro. Madirra acco ocanabaqquiuiuarrinena occarronarraro. Madirra poccadeni uimasiri manaconi pouadeniza ssonari-rreraniuarrine poccadeni uimasiri manaconipe ouana oua ouaccoranitoui −nade Zeso.

Zesopa nocco siri pamaha noccodeni ssire inanabaqquirrari

²⁹ Nezape oza panani Zericoza rrauirrezima… rrauirreneraha Zeso natti madirra sibema rrauimissarrari.

³⁰ Rraui rrauirrezape nocco siri pamaha rraui inidiza pamarrari. —Zeso toqqueqquimaui −quenaui uima mittemanazapa uaua quenarrari: —Ia Zozossede, Dabi Potemaui! Iaza teti uana tarri, inaua! −quenade.

³¹ Naraha madirra attidenipa: —Poni! Zamarrima tiquenarri! −quenaraha pouadenipa denima parra uaua toquenariui uaua toquenariui narrari: —Ia Zozossede, tamine Dabi Potemaui! Itoui teti uana tarri! −quenapomade.

³² Nazapa Zeso toccaraha uaha taui naza: —Nerrecotouira ouaza uaua tiquenarraronerre? −nade.

³³ Nazapa: —Ia Zozossede, inocco ssire tinanabaqquirri, inarraro −quenade.

³⁴ Nazapa Zeso touideni uati uana taza noccodeni bara inabaqquizapa amazati noccodeni ssire-re nade. Nazapa Zesoza touedade.