Mateo 14 - Kulina New Testament Brazil

Zouao Batista zoqqueuicca uima

¹ Nazapa Zeso canauatori canarizazapa pocca uima torraribaqquirraro. Nazapa zama arobeni Carireauarricca tamine Erodipa Zesocca uima uati uati toquenaui mittazapa

² pocca zozosse tabaqquiza uati tarrari. Erodi attipa: —Arra canauatori canarraripa Zouao Batista zoqqueraha nauatonirrari. Narraro nauatoniherrine canauatori canaui −naui nade tamine Erodi.

^3-4 Nazama Erodi atti nama naza taide pouarrine Zouao Batista inanazoqque-manaporrari. Narraro uimape arrima narraro: Taidepa tamine Erodi poua imecote Piripicca amonerre Erodia icarriza uima torrarraro. Zouaopa poccadeni uima mittaza Erodiza uati tarrari: —Deocca zossenirrizape timecotecca amonerre tidirrizezape bica terrerani −nanarra narrari Zouao. Narraro uima Erodia mittezape Zouaoza boquerraro. Ponicca maqquiza zosse zosse neza tamine Erodipa pocca zozosse tabaqqui izossebaqquiza Zouao dama iquenazapa toponi cocoro tozimaza coro izimemanarrari.

⁵ Nazapa tamine Erodipa Zouao Batista zoqqueuiuarrine touini naraha madirra noppinedeni cappinarrari. Arrana, madirradeni bazimapa: Zouao Batista attipa parrissa! Pouapa Deo Atti cacomerabote −quenarrari bazima.

⁶ Naraha uada onihiza tamine Erodi poua tossonauicca uada bacco teza errete inanarraro. Erodia bedeni ssene ssene tozezape bazima qqui toquenarrari. Nazapa tamine Erodi ponicca ssenenirri bica tani qqui taza uatizezapa

⁷ zouatoza poua attia: —Rrari rrata, ticca uatinarra ouaza uati tinarri. Nezape tiaza da onanitoui −narrari. —Parrissa! Tia ocamaiza-rrerarraro, ouattissa onanitoui −naui nade tamine Erodi.

⁸ Nezape zouatocca ami attinipe: —Zouao Batista tatitoui uati tinarri −naza narrarossa inanarraro. Attinipe: —Ouaza Zouao Batista tati parato imehiza uittizeza da ticanarro −nani nade zouato attini.

⁹ Nazapa Erodi poua bodi nacassera taraha poua atti taide: —Tia ocamaiza-rrerarraro, ouattissa onanitoui −nanarra napoza poua tessedeni: —Parrissehe uati tarrari −quenauiuarrine touini nazapa: —Rrehe, Zouao matto ca tirrizazapa paratoza poniza da ticanarro −narrari.

¹⁰ Nazapa pocca zozosse toponi cocorouarri zosse inarrari. Nazapa tamine Erodi attiza Zouao matto ca irrizemanarrari.

¹¹ Nazama tati paratoza ettizaza zorro icazimanizapa zouatoza da icanarrari. Nezape zouato poni imeniza da icanarrari.

¹² Nazapa Zouaocca zozosse tabaqquideni assiretoui rrauirronaza zorro ininemanarrari. Nazapa ppa izemanarrari. Zotodepa: —Narraro uima Zesoza uati inana −quenaza Zesoza uatide rraui torrarrari.

Zeso madirra 5 mil quenarrarideni inarripabaqquirrari

¹³ Zesopa —Zouao Batista zoqqueui −quenaui uima mittazapa poua motta madiuiuarrine madirra madide nouerauiuarri darroniza rrauirrarraro ia bazima. Naraha madirra bazimapa —Zeso toccaui −quenaui uima mittemanaza oza onihi onihi narizanicca madirra Zeso pouatoui coriza uapi rraui torrabacossarrari. (Zotoriniuarri rraui uarranirrari).

¹⁴ Nazapa Zeso darroni uana tocaneza toqquemorarrari. Nanarra madirra pouatoui rraui torrarrarideni bacco toquenapoza domo uaui qqui inabaqquirrari. Nazapa pouadenitoui uati cauanari canazapa comaqquiri narrarideni inanomiriza-baqquirrari.

¹⁵ Nazapa marri toccaza pocca zozosse tabaqqui iape Zesoza uati inade: —Arrauarripa madirra madide noueraui. Marri toccaui. Madirra zosse tinanibaqquirro, arrauarripa zamatapa mitta quenauiuarrine noueraui. Arra, ozacca zamatapa mittade rraui torranina −inade.

¹⁶ Naraha Zesopa: —Rraui torraniuiuarrinepa poua! Arraza tiadeni tinarripabaqquimanarro −nade.

¹⁷ Naraha iape: —Iazapa pao 5, aba pama naparra. Denima icappirani −inade.

¹⁸ Nazapa Zeso attia: —Paparra! Narrari ouaza teccarronemanarro −narrari.

¹⁹ Nazapa Zeso madirra bazimaza uati tarrari: —Nani mina carri taniza rrassi rrassi tineri narizarri −nade. Nazapa Zeso pao 5 naha inacca, aba pamaha izaba naza memeuarri tocattamacossa naza Deoza uati tarrari: —Rrehe, peperri. Ticca danirri iaza bica taui −narrari. Nazapa Zeso canauatori canarrarirrine pao, aba narrari touapiza icanabobirizazapa pocca zozosse tabaqqui iaza pao da inabaqquirrari. Iana madirra rrassi rrassi teri narrarideniza pao da inabaqquirizarraride.

²⁰ Da inabaqquirizaza rripemanazapa accararize-manarrari. Rripemanauissa taraha mota torrarrari. Pao bobi, aba ime mota inaccanirize-manazapa quiqui 12 nehe irririzarraro.

²¹ Naza arra madirra rripemanarraridenipa maqquiderre 5 mil quenarrari. Denima poccadeni amonerre, poccadeni erredenideni naco rripemanarrari.

Zeso passo tetepi ccarronarraricca uima

²² Nazapa canauatori canauicca pao rripemanaui nattipa Zeso pocca zozosse tabaqqui ia coriza rrippeuarri ia zosse tabaqquiporrari: —Rrari, darroniza rraui tirrezeza taide rrippeuarri rraui tirraporri, onarraro −nade. Naraha Zeso pouapa nauiza iboccarrari. Nazapa madirra bazimaza uati tarrari: —Peperri, bazima rraui tirranina −nade.

²³ Nazapa madirra rraui torraniuiuarrine uati taha rricazapa manaco poua motta ssonouarri denima toqquemorarrari, imehi Deoza uati tauiuarrine. Zeso poua motta naui ssonouarri Deoza uatide torraza cazomerrari.

²⁴ Neraha iape coriza nocconi ori ineraha rrorrode itezerrema ccarronezape passo rriba rriba narrarorrine darroni queuenacossarraro.

²⁵ Nazapa ssiuarraricosseza Zesopa qquezippaniza passo tetepiza iauarri ccamissarronaza ia bacco tamissabaqquirrari.

²⁶ Nazapa Zeso passo tetepi ccarronaui qqui inezape otessedeni tezerre uarro icanirede. Poua noppine icappinezape rroua rroua inade: —Tocorime uitiderra! −inarrarode ia bazima.

²⁷ Naraha iaza Zesopa: —Ticappinemana terrerarri, ouape oua! −nade.

²⁸ Nazapa Pedoro attia: —Oua Zozossede parrissa tiaqui? Parrissa tirrezape tiauarri passo tetepiza occaniuarrine ouaza uaua tarri, onarraro −narrari.

²⁹ Nazapa Pedoroza Zeso uaua narrari: —Rrehe, ticcarronarri −narrari. Naza Pedoropa darroniza uittizaraha totema, passoza toqquezippazapa Zesouarri passo tetepi toccarrari.

³⁰ Neraha rrorrode dacorarraro, oppina tani qqui taza Pedoro bodi cappinarrari. Cappinazapa passoza rraro zanarrari. Rraro zanazapa Zesotoui uaua narrari: —Oua! Oua! Oua Zozossede, oua tidimorarri! −narrari Pedoro.

³¹ Naza Zesopa amazati Pedoro zepeza dama mari izanazapa uati tarrari: —Pedoro, ticca rrehenirri parrirenissa terrerarrarorrine rraro tizanarraroparri. Nerrecotoui ouaza: “Rrehe, Zesopa passo tetepiza occaniuarrine oua naparrireui” terrerarraro? −nade Zeso.

³² Nazama darroniza uedezanizapa rrorrode totapparraro.

³³ Nani darroniza rrassi izeraha ia bazima ibodipe: —Zeso deni torraui, iape arrimani iquerrenani −ineza Zeso baccouarri ipitoza rrassi izezape pouaza uati inarraro: —Parrissa, tiape Deo Bedi tirrani −inarrarode, ia bazima.

Zenesareuarri Zesopa comaqquiri narrari inanomiriza-baqquirrari

³⁴ Zotode coriza rrippeuarri iaqquerrizezape zama onini Zenesareuarri bacco inarraro.

³⁵ Nezape rrauirremoreza nauiuarri madimanarrarideni Zeso qqui toquenarrari. Nazapa —Zeso iaza bacco naui −quenaui uima torrarizezape comaqquiri narrarideni pouadeni tesse eheccarrona-baqquimana narraride.

³⁶ Nazama bazima Zesotoui dameraqquiri naza pouadeni attidenipa: —Zeso, oua tinanomirri! Ticca etero inidira bara onaniuarrine arriuarri ticcarronarri! −quequenanarrari. Nazapa pocca etero inidi bara quenarrarideni bazimapa tocanomirerizauissa tarrari.