Mateo 13 - Kulina New Testament Brazil

Zesocca marinarra uizarra ppappadecca uima tazarrani mari icanabaqquirrari

¹ Zotodepa narraro uadaza Zeso ozaza qquenazapa coriza inidicca ssiquiuarri toqquezippaza uittarrari.

² Madirra uapi taha naui pouauarri rrauizippaza Zeso mari icanabaqquiuiuarrine darroniza toqquezazapa darronicca uiuittariza uittarirrari. Nazama madirra bazimapa naui coriza inidicca ssiquiza domo uarrari.

³ Nazapa Zeso pocca marinarra arrirraro namiza imadinicca uima tazarrani pouadeniza uati uati tarrari. Pocca uimape arrima narrarode: —Uizarra ppappadepa pocca uizarra uirade toccarrari.

⁴ Nocco zamatapa uira inarizarrari. Naraha motapa rrauiuarri catorrarra narrari. Nazapa ppiriri rrauironaza amazati saca iquenarrari.

⁵ Arra nocco uira narizarrari mota naco siba ccababa taniza catorrarrari. Nanizape nami bicani bazira teraha nama naha uassinarra moro tarrari.

⁶ Moro taraha rrabo uapiuarrira toccabaqquirrari. Marri ccarronazapa marri ppoconerrine boterrari.

⁷ Nocco mota naco namiza cotiui carri tauiuarri catorrarraria cotiui tezerre parra moro toquenariui naraha cotiuirrine tosehirrari.

⁸ Naraha nocco mota uira narizarraripa nami bicaniza catorrarizazapa mororo canarizaza bica taha napirrari. Bono carririzazapa ede orrariapa bono 100 naha carrirrari. Ede ouahaccapa bono 60 naha carrirrari. Ede ouahaccapa bono 30 naha carrirrari.

⁹ Nazama teribodeni ticarrimanezape ouatti timittemananissa tarri, onarraro −nade Zeso.

Madirra motapa Zesocca marinarra mittemana-rrararrari

¹⁰ Nazama ia, pocca zozosse tabaqqui iquerrenarrarope Zeso pouauarri uarrirrira icaneza arrima inade: —Nerrecotoui titauimari arrirraro namiza imadinicca uima tazarrani pouadeni mari mari titicanarizabaqqui narraritta? −inade.

¹¹ Naraha Zeso iaza ecomerade: —Rrehe maittaccazama Deocca cacauehecca uima zati narroraporaha madirra inauattabaqqui-rraraccade. Neraha rridapanana Deo Pouarrine pocca cacauehe tauimarini zati tiadenizana auato tani. Naraha madirra motapa Deo Pouarrine pouadeniza auatora teza mittemana-rrararrari −nade.

¹² —Arrina, Deocca cacauehe tauimarini mari ocanarizabaqquiuicca madirra touattarraripa Deorrine narraripa denima touattauitoui. Nazapa narrarina denima nauato tauissa tauitoui. Naraha Deocca cacauehe tauimarini mari ocanarizabaqquiuicca madirra mimitta naraha touatta-rrarazapa occa marinarra cappirauissa tauitoui. Bazira taha touattazapa narraro naqui amossi nanitoui.

¹³ Nema narrarorrine otauimari arrirraro namiza imadinicca uima tazarrani madirradeni mari ocanarizabaqquirra narizapoui narrari. Pouadenipa qqui qqui toquenaraha pina qqui toqueraui narrariparra. Deocca zossenirri mimittemana naraha pina mittemaneraui narrari. Pouadeni bodi naco ssamoqquiri narrari.

¹⁴ Nazama poccadeni uimape pina maittaccazama Deo Atti cacomerabote Izaia dozo inaporrarossa narraro inanemanarraro. Arri Izaia attipa: “Teribodeni ticarrimaneraha pina timittemanerani nanitoui. Tinoccodeni ticarrimaneraha pina qqui tiquerani nanitoui.

¹⁵ Arrarrari madirra bodideni tossamorizazapa parra tossamomanariui nauitoui. Uaribodeni moda nazapa pina mittemaneraui nauitoui. Noccodeni naco mozi quenazapa pina noccodeni cappiremanarrarissa nauitoui. Nama quenazapa qqui toquenauiuarrine ssamoqquiri, mittemanauiuarrine ssamoqquiri, bodideni tocauatterauiuarrine ssamoqquiri nazapa bodideni cacarriqquimera-manauiuarrine ssamoqquiri naui. Rridacca bodideni cacarriqquimere-manaza ouaza toquerrenazapa onabicabaqquiuitouiraha” naui nade Deo −nade Zeso.

¹⁶ —Neraha arri tiadenina oua ocanauatoriri canarraro tinoccodeniza qqui tiquenarizarrarope Deo tibodideniza uatizeheri inanarraroparri. Teribodeniza naqui occa marinarra timittemanarrarope Deo tibodideniza uatizeheri inanarraroparri.

¹⁷ Parrissehera tiadeniza uati onarraro: Maittaccazama Deo Atti cacomeraqquiri narrarideni, Deoza iboraqquiri narrarideni naco occa nauatohe arri rridapana tiadeni qqui tiquenarrarocca qqui toquenauiuarrine touini quenaporaha taide rricapozapa qqui toquena-rrararrari. Arri occa marinarra timittemanarrarocca naqui narraro mittemanauiuarrine touini quenaporaha rricapozapa mittemana-rrararrari −nade Zeso.

—Uizarra ppappadecca uimape arrima narrarona parri −narrari Zeso

¹⁸ Nazama Zesopa pocca marinarra arrirraro namiza imadinicca uima tazarrani mari icanabaqquipomaza naco poua attipa: —Rrari, titauaribomananissa tarri! Uizarra ppappadecca uimape arrima narraro:

¹⁹ Nocco uira inarizarrari mota rrauiuarri catorrarraripa pina madirra Deocca cacauehe tauimarini mittemanaraha rra quena-rraraza pina mittemaneraui nazapa bodideniza Deo Atti toqquezima-rrerarrarossa narraro. Arra ppiriri nocco saca inarizarraripa pina maizehe rrinede Tocorime-Tamine ccarronaza bodideni inassamobaqquirrarissa narraro. Nazapa Deo Atti pouadeniza nouerarraro.

²⁰ Madirra ouaha bodidenicca uimape pina arri siba ccababa tarrarocca uimassa narraro. Deo Atti mittemanaza amazati uatizemanarrari.

²¹ Pouadenipa Deoza rrehe zanapomanauiuarrineraha Deo Atti pouadeni bodiza torra-rrerarrarope pina siba ccababa taniza nocco moro taraha rrabo uapiuarrira toccabaqquirraricca uimassa narraro. Nazama arra marri ppoconerrine boterraricca uimape Deo Attiza rrehe quenarrarirrine pouadeniza narrizoue ssonariza, ocasserani auemanazapa rrehe quezati attidenia: “Peperriua, Deo Attipe inebona” quenarrari.

²² —Madirra ouaha bodidenicca uimape pina namiza cotiui carri tarraricca uimassa narraro. Pouadenipa Deo Atti mittemanaraha pouadeni zepedeni ihirrimana narrarotouira dameraqquiri nazapa Deo Atti tocauatterauissa tarrararrari. Ziniro touira quenaza naco narraro uimarrine Deo Atti uatideni rramemanarrari. Poccadeni rrehenirri pina arra nocco moro taraha cotiuirrine tosehizapa bono-rrararrarissa narrari. Deo Atti mittemanaraha pouadenirrine Deo Atti madirra ouahadeniza torra-rreranitoui.

²³ Naraha madirra ouaha bodidenicca uimape pina arri nami bica tarrarocca uimassa narraro. Deo Atti mittemanazapa rrehe quenauissa tarrari. Poccadeni rrehenirri napizape pina arra nocco nami bicaniza moro tauissa tazapa bono carrirrari. Ede orrariapa bono 100 naha carririzarrari. Ede ouahaccapa bono 60 naha carrirrari. Ede ouahaccapa bono 30 naha carrirrari. Arra Deoza rrehe quenauissa tarraripa madirra mari icanabaqqui-rizazapa madirra ouaha ouaha quenaha Deoza inanabaqqui-manauitoui −nade Zeso.

Arroi rrizaza tirico tezerre mina carrimanicca uima

²⁴ Zesopa pocca marinarra arrirraro namiza imadinicca uima tazarrani madirra mari icanabaqquipomarrari: —Rrehe, Deocca cacauehe tauimarini onihi naqui pina uizarra rrinede pocca uizarrauarri zamatapa nocco bicaui uira inarizarraricca uimassa narraro.

²⁵ Zome bazima cauadirrazapa poua uauadide ccarronarraria arroi rrizaza tirico bicaui tetepiza mina nocconi pina tiricossa narraro uira inarizarraro. Uira inarizehe rriquezape arra uizarra rrinedeza uadi tarraripa toccanirrari.

²⁶ Nazapa tirico bicaui moro tarrari, bono carrirrari. Mina pocani pina tiricossa narraro naqui moro tarraro.

²⁷ Naza uizarra rrinedecca zozosse tabaqqui qqui toquenaza pouadeni zossedeuarri rraui torranizapa uati toquenarrari: “Ia zossede tirico noccora ticca uizarraza uira tarrararrarittaco? Nerrecouarricca mina pocani pina tiricossa narraro nocconi ccarronarrarotte? inarraro” quenarrari.

²⁸ Naraha uizarra rrinede attipa: “Rraho, madirra ouaza uadi tarraripa mina nocconi uira inarizarraroa” narrari. Naza pocca zozosse tabaqqui attidenipa: “Touini tanipe mina pocani porede rrauirranipomana, inarraro” quenarrari.

²⁹ Naraha rrinede attipa: “Poni! Narraro mina pocani pore tiquenerrerana. Tirico naco zoppa tiquerana” narrari.

³⁰ “Paparraccaua, pamaha napimanaccana. Niza tirico bono rradazana auato tauitoui. Nazana bonotoui edema ti tiquenarizauiuarrine bica taui. Nazapa titidedeniza arrima onanitoui: Rrari, taide mina pocani ti tiquenapona, onanitoui. Tide rricaza ponira ua naqquizape rrore nacossezana botta tiquenarri, onanitoui. Naraha tirico bicaui bonotoui edema ti tiquenazapa occa ozauarri ouaza torrauiuarrine rrore rrore tanimanarro, onanitoui” narrari uizarra rrinede atti. Rrehe, Deocca cacauehepe narraro uimassa narraro −nade Zeso.

Zesopa mostada noccocca uima tazarrani mari icanabaqquirrari

³¹ Nazapa Zeso pocca uima uati tapomauiuarrine arrirraro namiza imadinicca uima tazarrani mari icanabaqquipomarrari: —Deocca cacauehepe pina mostada noccocca uimassa narraro. Madirrapa pocca uizarraza mostada nocco ppa izarrari.

³² Narrari mostada noccopa potera tarrari. Ppa taui nocco ouaha naco potera tarrari carri taraha mostada noccopa denima potera taui. Naraha mostada nocco moro tazapa uizarracca ppa tauiza pouana deni torrarrari. Napizapa pina aua imehissa narrari. Motarazapa poua inineza ppiriri pouadeni tazari bina tarimana taui. Rrehe, Deocca cacauehecca uima mari ocanabaqquirraripa pina narraro uimassa narraro. Taidepe madirra pamahaza torraporraro. Zotodena madirra bazimaza torrarizezape Deocca cacaueheza madirra touapiuitoui −nade Zeso.

Zesopa pao ssarra tauiuarrine cacarrimacca uima tazarrani mari icanabaqquirrari

³³ Nazapa Zeso poua tauimari arrirraro namiza imadinicca uima tazarrani mari icanabaqquipomaza naco: —Rrehe, Deocca cacauehe tauimarini onihi naqui pina pao ssarra tauiuarrinecca uimassa narraro. Amonerre pao inauatouiuarrinepa pao ssarra tauiuarrine cacarrima fermento tirico sica nauiza icanarrimarrari. Ssarra tauiuarrine cacarrima bazira taraha tirico sica naui farinha de tirico 3 quilopa ssarra taui motararrari. Naraha ssarra tauiuarrine cacarrima tirico sica naui farinha de tiricoza torraribaqquizapa ssarra tarrari. Arri Deocca cacauehecca uima naqui narraro uimassa narraro. Taidepa madirra pamaraha zotodena Deocca cacauehecca uima zama uapimaza torraribaqquiza madirra bazimaza torrarizarraro −nade Zeso.

Zesopa poua tauimari arrirraro namiza imadinicca uima tazarrani mari mari ihicanabaqqui narrari

³⁴ Rrehe, Zesopa poua tauimari arrirraro namiza imadinicca uima onihi onihi narraro tazarrani madirra bazima mari mari ihicanabaqqui narrari. Pouadeniza uati tazapa arrirraro namiza imadinicca uimazara mari mari ihicanabaqqui narraride.

³⁵ Zeso nama narraripa arra maittaccazamacca Deo Atti cacomerabote Zeso tezerremacca uima dozo inaponicca narrarossa inanarraro. Narraro uima Deo Atti dozo naniza arrima narraro: —Otauimari arrirraro namiza imadinicca uima tazarrani mari mari ohocanabaqqui nauitoui. Zama onauato-rreraqquezama naqui otauimari auatora tarroneraha. Niza orrine narraro uima auatorizezape madirra bazima mari ocanabaqquirizauitoui −napoui nade Deo Atti cacomerabote.

—Arroi rrizaza tirico tezerre mina pocani carrimanicca marinarrape arrima narraroparri −narrari Zeso

³⁶ Nazapa nauiza Zeso madirra bazima inebobaqquizapa toqquemoranirrari. Ozauarri toqquezimanizapa nauiza pocca zozosse tabaqquideni iape pouauarri uarrirrira ineza uati inarraro: —Rrari, rridacca uizarracca arroi rrizaza tirico tezerre mina pocani carrimani tauimarini uati tinaporraro iaza uati timanipomarri, imittanissa taniuarrine, inarraro −inade.

³⁷ Nazapa ia mari tocanabaqquirrari: —Rrehe, ouape Madirra Bedi orrarraroa pina tirico bicaui uiuiradessa onarraro.

³⁸ Nazama uizarrape arrirraro zamassa narraro. Tirico bicaui noccopa pina madirra Deocca cacaueheza toquerrenarrarissa narrari. Pouadenipa Deo Attiza iboraqquiri narrari. Naraha minape pina madirra Deoza uauadide Tocorime-Tamine attiza iboraqquiri narraridenissa narraro.

³⁹ Naza mina pocani nocconi uiuiradepa uizarra rrinedeza uauadide Tocorime-Tamine. Nazama niza tirico bono rradaza ti nauiuarrinecca uada bacco tarrarope pina niza zama rriqueza Deo Pouaza toquerrenarrarideni icatterriza-baqquiuiuarrine tauimarissa narraro. Arra tirico titidedenipa Deocca zozosse tabaqqui memeuarricca.

⁴⁰ Arri mina pocani uanaqquiza botta iquenaniuarrinecca uimape niza arrirraro zama rriqueza madirraza narrarossa narraro torranitoui, onarraro.

⁴¹ Naraha niza ouape Madirra Bedi orrarraroa memeuarri omadipomaza occa zozosse tabaqqui memeuarricca zosse onaronariza-baqquizapa uimasiri mamaridedeni, uimasiri totonanadedeni tezerre bazima icatterrizabaqqui-manauitoui, Deocca cacaueheza toquerrena-rrarauiuarrine.

⁴² Narrarideni bazimapa rrororoni rriquerreraniuarri ua izimabaqqui-manauitoui. Nauiuarripa ocasserani auemana-zanapozapa panodeni tozaui naza orri orri quenauitoui.

⁴³ Nazama icatterriza-baqquimanaha rricazapa madirra Deo Poua nacassa tauicca inanemanarrarodenina arra Pouaza toquerrenarrarideni bazima Abi Deocca cacaueheza madimana-zanapozapa pina marri zibehi tarrarissa quenauitoui. Nazama teribodeni ticarrimanezape ouatti timittemananissa tarri, onarraro −nade Zeso.

Tozepetarri uatini ccara tanicca inarrimani tauimariniza mari icanabaqquirrari

⁴⁴ —Rrehe, Deocca cacauehepe pina tozepetarri bicabote uatini ccara taniccassa narraro. Madirrapa parramarauiuarri qquide ccarizaza tozepetarri narrimaui bacco inarrari. Tozepetarri bicabote, uati ccara tauicca qqui tazapa narrari tozepetarri denima inarrimapomarrari. Nazapa uatizeza toccanirrari. Pocca ozauarri bacco tanizapa poua zepetarri nemanehe manaconitoui da inaha rricarrari. Narraro manaconi carrizapa arra poua qquide ccarizapouiuarri toccapomarrari. Nazapa narraro zama mitta inezape pocca torrarraro. Arra tozepetarri bicabote uati ccara tauicca pouarrine narrimaui naco pocca torrarrari. Narraro uimassa narraro Deocca cacauehe denima bica tezape madirra pocca uimabote nemanehe inebozape Deozara uatize-zanapouitoui −nade Zeso.

Bicabote uatini ccara tanicca perola tauimariniza mari icanabaqquirrari

⁴⁵ —Rrehe, Deocca cacauehe tauimarini onihi naqui pina madirra tomattocca uatini ccara tanicca perola mittade touini naza qquide ccarizarrari.

⁴⁶ Nazama perola bicabote uatini ccara tanicca bacco inezape rrinedeza: “Ouaza tecauarri” naza pocca ozauarri toccanirrari. Poua zepetarri inequeriqquiza manacoza da inazapa narraro manaconiza perola mittade toccapomarrari. Mitta inezape pocca torrarraro. Rrehe, Deocca cacauehepe narraro uimassa narraro. Icca uimabote nemanehe inebozape Deocca cacauehe bicabote iaza torrarraro −nade Zeso.

Aba cocoro tauimariniza mari icanabaqquirrari

⁴⁷ —Rrehe, Deocca cacauehe tauimarini onihi naqui pina aba cocoro imenibote ueni imehiuarri tappa icazippemaneza rroca icanimoranimanezape aba ouaha, ouaha naha uemarrari.

⁴⁸ Nazapa aba cocoroza irriuissa tazapa ssiquiuarrina rroca icanimoranimanazapa rrassi taza aba bica tarrarira icatterrizemanaza zamineza ua izarizemanarrari. Naraha aba uaidira tarraripa ua iquenarrari.

^49-50 Narrarossa nanitoui niza arrirraro zama rriqueza naqui. Taidepa Deoza uauadideza toquerrenarrarideni Deo inarrizobaqquiuiuarrinepa pina aba uaidira tarrari tocatterrizadessa quenauitoui. Deocca zozosse tabaqqui memeuarriccana madirra uaidiraqquiri narrari icatterrizabaqqui-manaccauitoui. Pouadenira domo uauitoui. Narraridenipa rrororoni rriquerreraniuarri ua tozimabaqquiuitoui. Nauiuarripa ocasserani auemana-zanapozapa panodeni tozaui naza orri orri quenauitoui. Naraha ouaza toquerrenarrarideni, arra Deo Poua nacassa tauicca inanemanarrarodenina Deo madiuiuarri toquerrenauitoui, onarraro −nade Zeso.

Tozepetarri rradaui, tozepetarri zati tezerre tauimariza mari icanabaqquirrari

⁵¹ Nazapa Zeso iaza uati tarrari: —Nirra? Occa uima arri tiadeni mari mari ohocanabaqqui narraro timittemananissa taqui? −nade. Nazapa: —Rrehe, imittani −inade, ia bazima.

⁵² Nazapa iaza Zeso attia: —Nema nezape zodeodenicca marinarra maridedeni Deocca cacauehe tauimarini zatiza toquerrenazapa pina oza rrinedessa quenarrari. Oza rrinedepa poua zepetarri oza bodiuarri ecauarrari. Tozepetarri rradaui carri, tozepetarri zati naco carri narrari. Nazapa poua bodi nauato taza tozepetarri rradaui zorro inine taui. Tozepetarri zati naco zorro inine tani. Nazama arra Deo Atti maridedeni madirra maride toquerrenazapa Deo Atti dozo naporrarocca, Deocca cacauehe tauimarini zati tazarrani maride nauatoqquiri narrari −nade Zeso.

Zesopa Nazaretiuarri toccaniza mari icanabaqquirrari

⁵³ Nazama Zesopa pocca marinarra arrirraro namiza imadinicca uima tazarrani uatide rricazapa nauiuarri neboza

⁵⁴ poua napiuiuarrina toccanirraride. Oza panani Nazareti bacco tanizapa poccadeni Deo Atti mamariuarri toqquezimaza mari icanabaqquirrari. Naraha nauicca madirrapa Zeso canauatoriri canaui qqui toquenapo-rraraza uarro canireza attidenipa: —A nerrecouarri touattarraritta? −quenade. —Nerrecorraricca nauatohe Zesoza torrarrarotte? −quenade.

⁵⁵ —Naraha arrarraripa aua nanauatode bediua! Imeni oninipe Maria. Poua imecotedeni naco: Tiaco, Zoze, Simao, Zoda quenarrariparrade.

⁵⁶ Poua caripenedeni naqui arri imadiniza madimana-rreraqui? Madimanani. Nazama nerrecouarricca nauatohe pouaza torrarrarotte? −quenade.

⁵⁷ Nazapa poua atti mittade tonacasseremanarrari. Nazapa Zeso attia: —Ouaza parrissa tiquenerrerezape pina Deo Atti cacomeraqquiri narrarideni tauimarissa tinanemanarraro: Madirra bazimapa arra Deo Atti cacomeraboteza: “Parrissa Deocca zossenirriua” quequenanaraha arra poua zamariccapa nama quena-rraraui, pocca ozacca naco poua attiza nacasseraqquiri naha nama narronemanarrari −nade.

⁵⁸ Nazapa nauiuarricca madirra Zesoza parrissa quena-rrarazapa poua canauato-uarrapoui canauicca uapi terrerani. Madirra pamahara inanomibaqquirraride.