Mateo 1 - Kulina New Testament Brazil

Zeso biridideni onideni

¹ Rrehe, arrirraro uimape Zeso Cristo tauimari. Zeso biridi orrariapa Izarraeo potemaui zodeodeni quequenanarraridenicca tamine Dabi. Biridi ouaha naco Izarraeo potemaui zodeodeni bazimacca idi Abarahao. Nazapa Abarahao potemaui onideni ua ineza Zeso imenicca maqqui oni bacco inaniuarrine.

² Taidepa Abarahao. Abarahaopa Izaquicca abi. Izaquipa Zacacca abi. (Zaca oni ouahapa Izarraeo.) Zaca bedideni orraria onipa Zoda. Poua, poua imecotedeniza: —Izarraeo potemaui zodeodeni −quequenanarrari.

³ Zoda bedipa papamade: Pere, Zera quenarrari. Imenideni oninipe Tamara. Perepa Eserocca abi. Eseropa Araocca abi.

⁴ Araopa Aminadabecca abi. Aminadabepa Nahasaocca abi. Nahasaopa Saomocca abi.

⁵ Saomopa Boacca abi. Boa imeni oninipe Rrahabi. Boapa Obedicca abi. Obedi imeni oninipe Rroti. Obedipa Zese-Izahicca abi.

⁶ Zese-Izahipa Dabicca abi. Narrari Dabipa zodeodenicca tamine torrarrari. Pouapa Saromaocca abi. Saromao imenipe Oria bedimeni bote.

⁷ Saromaopa Robouacca abi. Robouapa Abiacca abi. Abiapa Asacca abi.

⁸ Asapa Zosapatecca abi. Zosapatepa Zoraocca abi. Zoraopa Osiacca abi.

⁹ Osiapa Zoataocca abi. Zoataopa Acasecca abi. Acasepa Ezequiacca abi.

¹⁰ Ezequiapa Manasecca abi. Manasepa Amaocca abi. Amaopa Zosiacca abi.

¹¹ Zosiapa Zeconiadenicca abi. Zeconia, poua imecotedeni madimanazapa zama onihicca madirra rrazire eccarronemanarraro. Narraridenina deni toquerrenazapa Izarraeo potemauideni tozepe toquerrenarrari. Poccadeni zama Babironiauarri iaccanibaqqui-manazapa tarabaiauarrine zozosse toquerrenarrari.

¹² Naza naui zama onihiuarri madimanaza Zeconia bedi tossonarrari. Poua onipa Saratieo. Saratieopa Zorobabeocca abi.

¹³ Zorobabeopa Abiodicca abi. Abiodipa Eriaquiocca abi. Eriaquiopa Azoriacca abi.

¹⁴ Azoriapa Sadocacca abi. Sadocapa Aquiocca abi. Aquiopa Eriodicca abi.

¹⁵ Eriodipa Eriasacca abi. Eriasapa Mataocca abi. Mataopa Zacacca abi.

¹⁶ Zacapa Zozecca abi. Narrari Zozena Mariacca maqqui torrarrariparra. Rrehe, Zozecca amonerre Mariazana Zeso tossonarrari. Narrari Zesona —Ia Idinide Cristo-Mesia −ihinanarraro.

¹⁷ Rrehe, narraro uimape Zeso biridideni uapi taraha onideni eti rrima-rrerarraro. Abarahao onizama ua izanapozape arricca tamine Dabi oni bacco inezape biridideni 14 quenarrari. Nezape Dabi onizama ua inapomezape Zeconia oni bacco inezape denima biridideni 14 quenarrari. Arra Zeconia madizapa Izarraeo potemauideni tozepe toquerrenaza zama Babironiauarri iaccanibaqqui-manarrari. Zotode Zeconia Babironiaza madiza poua onizama ua inapomezape ia Idinide Cristo-Mesia tossonaui bacco inezape denima 14 quenarrari.

Zeso tossonauicca uima

¹⁸ Zeso Cristo tossonauiuarrinecca uimape arrima naporraro. Zeso imeni Mariape Zoze icarriuiuarrine taide imehidenipa rrehe canireporrari. Mariape maqquiderre ssamo taccani. Zozepa pocca ozauarri Maria iaccani-rreraqquezape poniza uada-rraraccaui. Naraha ponipe rriuarraro. Deo Corime uati tazapa poni izoniza erredeni nauatoza uittizarrari.

¹⁹ Ponicca maqqui torrauiuarrine Zozepa uimari bica tarra narrari. Poni rriuani qqui taraha poniza uima inassonariniuarrine nacassera tarrari. Nazapa poua bodi: —Cacomeheza onebona −narrari.

²⁰ Poua bodi nama naraha pocca uadaza Deocca zozosse Poua Atti ccaccaronade auatoza uati tarrari: —Zoze, tiape tamine Dabi potemaui tirrani. Ticappina-rrerarri. Maria rriuaporaha ticarriniuarrine oppinera tani. Arra, Maria poni izoniza erredeni uittizarraripa madirrarrine rraraui. Deo Corime uati taza erredeni carrirraro −narrari.

²¹ —Niza poni bedi tossonazapa onipa “Zeso” tana. (Ettizape: Ia Zozossede madirra Tonassiuauade, inarraro.) Narraripa pocca madirra inassiuauabaqquiuitoui, poccadeni uimasiri manaconi narrizoue pouadeniza inassonari-rreranitoui −narrari Deo Atti ccaccaronade atti.

²² Narraro uima bazima uima torraponiuarrinepe maittaccazama Deopa Poua Atti cacomerabote Izaiaza uati taza Izaiana uati iqquimarraro.

²³ Poua attipa: —Ticattomama canarri. Zouato maqquiderre ssamo teraha rriuezape erredeni carrinitoui. Poni bedizapa: Emanoueo, quequenanauitoui –napoui nade Izaia. (Emanoueo ettizape: Deo iaza madiui, inarraro.)

²⁴ Nazapa Zozeza uati uati taha rricazapa Zoze nocco torrarrari. Deo Atti ccaccaronade attiza ibora tazapa Maria icarrirraro.

²⁵ Nezape pocca amonerre torreraha poni izonicca erredeni tossona-rraraccazapa poniza uada-rrararrari. Poni bedi tossonazapa Zoze erredeni oni ua inarrari: —Zeso −narrari.