Maraco 7 - Kulina New Testament Brazil

Zodeodenicca marinarrarrine Deocca zossenirri uauattarro torrarraro

¹ Nazapa uada onihiza oza panani Zerozareuarricca zodeodeni marinarra parizeoza rrehe quenarrarideni, zodeodenicca marinarra maridedeni tezerre Zesoza bacco narronemanarrari.

² Narrari pouadenina Zesocca mamari tabaqqui pouadeni zepe ssauaraui rripemanaui qqui toquenarrari. Narrarope pouadeniza bica terrerani. Pina uimasiri inanemanarrarossa narraro, quequenanarrari. Arra zodeodeni poccadeni ididenicca marinarraza iboqquiri nazapa oppina tani quequenanarrari.

³ Zodeodeni bazima, parizeodeni naco poccadeni ididenicca marinarra uapi tehe ecauarronemanarraro. Narraro marinarra motape rripemanabote nazapa pouadeni zepe ssaua ssaua quequenanapo narrari. Narrarope soue tani noppineni rrerani. Madirra ouaha arra zodeo querrena-rrararrarideni tezerre carrimemanarrari noppine.

⁴ Zodeodenipa mimittauarri rrauiniza naco taide pouadeni zepea ssaua quenapozana rrirripemana narrari. Poccadeni rrirripauarrinecca bazima pina parato, queneco, panera naco ssaua ssaua quequenanarrari. Deocca zossenirripe nema nerrereraha zodeodeni poccadeni marinarra uapi tehe Deo Attiza inauarimanarraro.

⁵ Nazapa parizeodeni, zodeodenicca marinarra maridedeni tezerre Zesocca mamari tabaqqui pouadeni zepe ssauaraui rripemanaui qqui toquenazapa Zesoza uati toquenarrari: —Nerrecotoui ticca mamari tabaqquipa zodeo querrenaraha icca ididenicca marinarra ecauemana-rrerarraro? Arrana, pouadeni zepe ssauaraui rripemanazapa Deoza bica terrerani, iaza naqui oppina tani, ihinanarraro −quenaui nade.

⁶ Nazapa Zeso pouadeniza uati tarrari: —A, tiadeni naqui Deocca zossenirri nauatoqquiri tiqueneraha tecauemananissa terrerarraro. Tiadenipe maizehe ticarrimanani. Maittaccazama Deorrine Poua Atti cacomerabote Izaiapa ticcadeni uimassa nehe dozo inaporraro. Rridapanana narrarossa narraroza timadimanarraro. Arrana, maittaccazama Deorrine Izaiapa: “Arrarrarideni madirrapa ouaza: ‘Deo, tiape bica tinani’ quequenanaraha pouadeni bodideniza otoui quena-rraraui.

⁷ Pouama ouaza rriri rriri quequenanarrari. Pouadeni maride naco: ‘Deo Atti mari mari inarraro’ quequenanaraha madirracca marinarrara mari mari nanarizemana narrari” napoui nade Deo.

⁸ Arrina, madirracca marinarrana tiadeniza denima bica tezape Deocca zossenirripe tinebomanarraro −naui nade Zeso.

⁹ Zeso denima uati tapomarrari pouadeniza: —Ticcadeni madirracca marinarraza dameraqquiri tiquenezape Deocca zossenirripe ponima tinanemanarraro.

¹⁰ Pina arrirraro uimassa narraro Deocca zossenirri Moize uati iqquimarraro: “Ticcadeni abiza, ticcadeni amiza tetideni uanaqquiri nana. Pouadenitoui tetideni uanaqquiri neza attideniza iboraqquiri tiquenana” napoui nade. Poua atti naqui: “Madirrapa imehiza, imeniza uimasiri inanezape manaco narraripa zoqqueuitoui” napoui nade Deo Atti, Moizerrine dozo naniza.

¹¹ Naraha tiadenizape uima arrima narrarona bica tarraro: “Madirra imehiza, imeniza poua attipa: ‘Rraho, tiadeni acco ocanabaqquiniuarrineraha ocarrirraro bazimapa Deoza da onauiuarrine onapozape tiadeni acco ocanabaqquiniuarrine oparrire-rrerani’ quena taui.”

¹² Naza tettidenipe: “Rrehe, madirra nama nazapa peperri, poni, pocca abiza, pocca amiza da inerrerana” tiqueneraha.

¹³ Ticcadeni madirracca marinarra tipotemanideniza mari mari tatarronemana narrarozana: “Bica tani” titiquena nezape tirrinedeni Deocca zossenirri parrissehecca uauattarro torrarraro. Ticcadeni madirracca uima narrarossa narraro carri tani −naui nade Zeso.

Uaidirehe madirra bodiza auatomezape uimasiri torra tani

¹⁴ Zotodepa Zeso madirra pouauarri rrauirronauiuarrine touideni uaua napomarrari. Pouauarri bacco narronemanaza Zesopa: —Rrari, bazima ouatti titauaribobo canarri, timittemananissa taniuarrine.

¹⁵ Tiadenizape rrirripa oppina tauicca carri taui. Madirra nama nauicca rripazapa tettidenipe: “Deoza bica terrerani, Moizecca marinarraza naqui oppina tani” titiquena narraro. Naraha ouattipe arrima narraro: Bazima itaparipa dappi inaza ibodiza torrazapa uimasiri torra-rrerani. Naraha ebenoza uati uati ihinanarrarorrinena madirraza uimasiri ihinanemana narraro.

¹⁶ Nazama teribodeni ticarrimanezape ouatti timittemananissa tarri, onarraro −naui nade Zeso atti.

¹⁷ Nazapa Zeso madirra inebobaqquizapa ozaza toqquezimarrari. Nauiza poua uatimadedeni pouaza uati toquenarrari: —Ia Maride ticca marinarra nerrecoma narraro? −quenaui nade.

¹⁸ Nazapa Zeso attia: —Tiadeni naqui ouatti timittemana-rrerarraroqui? Nema nezape timittemananissa taniuarrine tiadeni mari ocanabaqquipomana. Arra itapari bazima dappi inazapa ibodiza uimasiri torra-rrerani.

¹⁹ Itaparipa ibodi uauato naniuarri toqquezima-rraraui. Itaparipa izonezana totoqquezima narrari. Zotode mirri inazapa toqqueqquimarrari −naui nade Zeso. (Poua atti nama nazapa itapari uapima oppinera taui, narrari.)

²⁰ Zesopa denima uati tarrari: —Naraha madirra poua arrariza qquenarrarope poua bodi uatoza poua ebenorrine uati uati tarrarirrinena uimasiri totorra narraro.

²¹ Arrina, uaidirehe bazimape madirra poua bodiza auatomeza poua tozossenizapa uimasiri inanarraro. Narrarope pina madirra uimasiritoui poua bodi uatorrari, maqquiderre tabiraraha amonerre arrade touini narrari, amonerre tabiraraha maqquiderre narrade touini narraro, botie touini narrari, madirra inanazoqqueuiuarrine touini narrari. Narraro uima madirra poua bodiza auatomezape uimasiri torra tani.

²² Uaidirehe onihi naqui pina madirra amonerre carriraha amonerre onihi arrade touini narrari, amonerre maqqui carriraha maqquiderre ouaha narrade touini narraro, madirra ouaha carrirraricca touini narrari, uima uaidira tarraro inananiuarrine touini narrari, madirra icamaizabaqquiuiuarrine touini narrari. Narraro uima madirra poua bodiza auatomezape uimasiri torra tani. Uaidirehe onihi naqui pina poua cacauade nacassera taza bazima ponima touini narrari, madirra deni torrehe acconi bodi uadi tarrari, madirra tatamasso nauiuarrine touini narrari, poua bodi “Ouana bica onarraro, deni orrani” narrari, madide ssamo taza maizehecca uimaza parrissa narrari. Narraro uima madirra poua bodiza auatomezape uimasiri torra tani.

²³ Narraro uaidirehe uapima madirra poua bodiza auatomeza poua bodi touaidirarrari. Narrarorrinena madirra uimasiri ihinanemana narraro −naui nade Zeso.

Zodeo madirra rrereraha Zesoza parrissa narraro

²⁴ Nazapa nauiuarri mari icanabaqquia rricazapa Zeso toccarrari. Oza panani onini Tirocca zamauarri toccarrari. Nauiuarricca ozaza bacco tazapa mouaraza Zeso toqquezimarrari. —Bacco onani madirra motadeni ssamoqquiri nana −narrari. Naraha poua bacco naui uima torrarizarraro.

²⁵ Nanerre amonerre —Zeso arraza bacco naui −quenaui uima mittezape pouatoui toqquezimarraro. Poni bedeni bodiniza tocorime carrirraro. Imeni bodinipe: —Arrarrarina occa erredeni inanomiuiuarrine parrireui −nezape Zeso poua baccouarri poni pitoniza uittarraro.

²⁶ Poni attinipe: —Zeso, occa erredeniza tocorime madizaui. Zosse tininerro, tonominiuarrine, onarraro −nani nade imeni. Naraha narraro amonerrepe zodeo rrerani. Ponipe zama Siria arobeni Penisiauarricca madirra.

²⁷ Nazapa Zeso poniza uati tarrari: —Madirra ouaha zodeo querrena-rrararrari acco ocanabaqquipouiuarrinepa bica terrerani. Narraro uimape pina madirra pocca erredenideniza zamatapa da inaraha idiniza pocca ettezana da inarrarissa narraro. Erredenidenipa taide rripemanapona, onarraro. Arra Deocca madirra zodeodenina acco ocanabaqquipouiuarrine bica tani −naui nade Zeso.

²⁸ Nezape pouaza uati tarraro: —Parrissa oua Zozossede, naraha rrirripacca uauanari dopaniza erredenicca zamatapa tabottoza ette naco rriparrari. Zodeo orrarrereraha ouaza ticca acco canehe bazira tehe tinanarri, onarraro −nani nade Zesoza.

²⁹ Nazapa: —Rrehe, tetti nema nezape bica tani. Ticcanina. Ticca erredeni bodinicca tocorimepa toqquenaui −naui nade Zeso.

³⁰ Nezape toccanirraro. Ponicca oza bacco taniza toqquezimanizape poni bedeni tonominira qqui tarraro. Nezape mouaraza pori canarraro. Tocorimepa toqquenarrari. Nouerarrari.

Madirra uaribo didibote, uati tauiuarrine naco ebeno ssamo tarrari Zesorrine tobicarrari

³¹ Zesopa oza panani Tiroza rroppemarrari, oza panani Sidouarri toccauiuarrine. Naui Sidoza tossoniqquima, ccauarranizapa zama arobeni onini Decaporiza ccarizarrari. Zotodepa Carireacca corizauarri bacco tanirrari.

³² Naui Carireazana Zesoza madirra uaribo didibote eccarronemanarrari. Uati tauiuarrine naco ebeno ssamo tarrari. Ccaccarronadedeni attidenia: —Zeso, itesse tinanabicauiuarrine tizepeza poua bara tarro −quenaui nade.

³³ Nazapa Zeso arra uaribo didibote madirra sibema domo uauizapa iacca-cca naza poua zepeza uaribo odini ororo icanarraro. Poua ebeno naqui poua zepeza ppito naza ebeno bara inarrari.

³⁴ Nazama Zeso memeuarri tocattamacossanarra poua ssa tocanacossaza poua attiza uati tarrari: —Epata! −narrari. (Narraro ettizape: —Teribo ssire-re narri! −narrari.)

³⁵ Nanerre poua uaribo ssire-re narrari. Poua ebeno naqui tobicarraro. Nazapa uati taui tobicarrari.

³⁶ Nazapa pouaza, poua tessedeniza naco Zeso uati tarrari: —Arrirraro uimape tecomemanana −narrari. Naraha amazati poua tauimari ecomerarize-manarraro. Zeso attipa: —Tecomemanarri, onapa −napomaraha zamarrama quena-rrararrari.

³⁷ Arra, bazima uarro quenaraha uatizemanaza attidenipa: —A, uima deni torraniuarrinecca qqui inani −quenarrari. —Zesocca nauatouepe uapima bica tani. Arrana, uaribo didi taraha pouarrine uaribo tobicazapa touatti mittarrari. Atti cappiraraha pouarrine atti carrirrari −quenaui nade.