Maraco 6 - Kulina New Testament Brazil

Zesopa Nazaretiuarri toccaniza mari icanabaqquirrari

¹ Nazapa Zeso poua madiuiza nebo poua napiuiuarrina toccanirrari. Poua uatimadedenima rraui torranirrari.

² Oza panani Nazareti bacco tanizapa rrassinarracca uadaza Deo Atti mamariuarri toqquezimaza mari icanabaqquirrari. Nazapa nauicca rrassi tarirrarideni mittemanazapa uarro canirezapa: —A nerrecouarri touattarraritta? −quenarrari. —Nerrecorraricca nauatoue Zesoza torrarrarotte? Nerrecoma naza madirra ihinanomi narrari? Pouapa canauatoriri canaui qqui qqui ihinana-rraraccade −quenarrari.

³ —Naraha arrarraripa aua cocobade rraraco? Aua cocobadederra, Maria bediua! Poua imecotedeni naco: Tiaco, Zoze, Zoda, Simao quenarrariparrade. Poua caripenedeni naqui arri imadiniza madimana-rreraqui? Madimanani −quenaui nade. Nazapa poua atti mittade tonacasseremanarrari.

⁴ Nazapa Zeso attia: —Ouaza parrissa tiquenerrerezape pina Deo Atti cacomeraqquiri narrarideni tauimarissa tinanemanarraro: Madirra bazimapa arra Deo Atti cacomeraboteza: “Parrissa Deocca zossenirria” quequenanaraha arra poua zamariccapa nama quena-rraraui. Poua imecotedeni, pocca ozacca naco poua attiza nacasseraqquiri naha nama narronemanarrari −naui nade.

⁵ Nazapa nauiuarricca madirra Zesoza parrissa quena-rrarazapa poua canauato-uarrapoui canauicca uapi terrerani. Madirra pamahara bara inabaqquizapa inanomibaqquirrari nade.

^6a Nazapa pocca ozauarricca madirra rrehe quena-rrarazapa Zesopa pouadenitoui poua bodi uato-zanaporrari.

Zesopa pocca zozosse tabaqqui 12 quenaha madirra maride zosse inarizabaqquirrari

^6b Nazapa oza onihiuarri oza onihiuarri Zesopa mari mari nariza narrari.

⁷ Nazapa pocca zozosse tabaqqui 12 quenarrari ua inabaqquiza zosse inabaqquirizarrari. Arrauarrica rraui topama, arrauarricca rraui topama, arrauarricca rraui topama quenauiuarrine zosse inabaqquirrari. Zesopa pocca nauatoue pouadeniza inanarizarraro. Madirra bodidenicca tocorime naco zosse inineriza-baqquiuiuarrine pouadeni inaparrirebaqquirrari.

⁸ Nazapa bobodeza rraui torraza poua attissa inanemananiuarrine Zeso pouadeni mari icanabaqquirrari. Poua attipa: —Rrehe ticcadeni bobodezape tizepedenitarri zorro tiquena terrerarri. Tizepedenizape tiadeni totocauerrizara zorro zorro tiqueneri narri. Zamatapa naco tiaqquemana tarrararro. Saco naqui tiaqquemana terrerarri. Ziniro naqui tiaqquemana terrerarri.

⁹ Temoridenicca sadaria naqui arri tezemanarrarora ohorrariri narri. Ticcadeni etero naqui pamehepe tiaqquemana terrerarri, arri tezemanarrarora ohorrariri tinanemanarri, onarraro −naui nade Zeso.

¹⁰ —Nazama oza panani onihi bacco tiquenezape arri ticadezimaporrarocca ozazara timadimanaccana. Denima ticada-rreraccaza narraro ozazara timadimanaccana.

¹¹ Naraha oza pananiuarri bacco tiqueneza madirra: “Arrizape timadimanarri” quena-rrarazapa, arra ticcadeni marinarra mittade nacasseraqquiri naza naco narraro ozaza ticadeqquimani bica tani. Madirra nama quenauicca oza tinebomanezape temoridenicca sadariaza ssiqui ma tarraro catorraniuarrine pporo pporo tiquenana. Naui poccadeni iboue bodideni uatome-manauiuarrine, onarraro −naui nade Zeso.

¹² Nazapa pocca zozosse tabaqqui rraui torrarrari. Madirra bodideni cacarriqquimere-manauiuarrine mari icanabaqqui-rizemanarrari. Pouadeni attipa: —Ticcadeni uimasiri tinebomanarri. Deozara tiquerrenarri −quenaui nade.

¹³ Madirra bodidenicca tocorime ouaha ouaha narizarrarideni naco zosse zosse ihininerizemana narrari. Madirra comaqquiri narrarideni naco ihinanomi-rizabaqquimana narrari. Oqui bazira taha tatideniza sso sso ihinaririzemana naza Deoza uati uati totoquena nazapa Deorrine totocanomireriza narrari.

Zouao Batista zoqqueuicca uima

¹⁴ Nazama zama arobeni Carireauarricca tamine Erodipa Zesocca uima uati toquenaui mittarrari. Zeso canauatori canarizauicca uima naqui torraribaqquirre narraro. Nazapa Erodi attia: —Zesopa Zouao Batista zoqqueraha nauatonirrari. Narraro nauatoniherrine canauatori canaui −naui nade.

¹⁵ Naraha madirra ouaha attidenipa: —Zesopa maittaccazamacca Deo Atti cacomerabote madiporrari Eria ccanipomarrari uitiderra −quenaui nade. Madirra ouaha attideni naco: —Arra Zesopa pina maittaccazamacca Deo Atti cacomeraqquiri narraridenissa narrari −quenaui nade.

¹⁶ Naraha tamine Erodipa madirra nama quenaui mittaraha poua attia: —Zesopa Zouao. Nauato onani. Isso teppeppe ocazossebaqquiza Zouao matto ca irrizemanaraha nauatonirrari −naui nade.

^17-18 Nazama Erodi atti nama naza taide pouarrine Zouao Batista inanazoqque-manaporrari. Narraro uimape arrima narraro: Taidepa tamine Erodi poua imecote Piripicca amonerre Erodia icarriza uima torrarraro. Zouaopa poccadeni uima mittaza Erodiza uati tarrari: —Deocca zossenirrizape timecotecca amonerre tidirrizezape bica terrerani −nanarra narrari Zouao. Narraro uima Erodia mittezape Zouaoza boquerraro. Ponicca maqquiza zosse zosse naza tamine Erodipa pocca zozosse tabaqqui izossebaqquiza Zouao dama iquenaza toponi cocoro tozimaza coro izimemanarrari.

¹⁹ Erodiape Zouaoza nacassera tezape poua inanazoqque-manauiuarrine touini naza maqquiza uati taraha poni attiniza rrehe narraraccaui.

²⁰ Erodi cappinaza: —Zouaopa bica taui. Deocca zossenirri –nanarra nazapa ecauauissa tarrari. Nazapa Zouaocca marinarra mittazapa pouaza bica taraha ibo tazapa: —Nerrecoma onapazerre? −narrari. Naraha nama naha Zouaocca marinarra mittauiuarrine pouatoui uaua uaua zanaporrari.

²¹ Naraha uada onihiza tamine Erodi poua tossonauicca uada bacco taza errete inanarraro. Nazapa rripaqquimanauiuarrine ua inabaqquirrari, taminedeni, isso teppeppe zossededeni, Carireauarricca ime rrocouideni, pouaza rripaqquimanauiuarrine. Nezape Erodia narrorarraro ponicca uima.

²² Erodia bedenipe ssene naniuarrine toqquezimarraro. Nazapa tamine Erodi, poua tessedeni tezerre ponicca ssenenirri bica tani qqui toquenaza, ponirrine uatizemanazapa zouatoza tamine Erodi attia: —Rrari rrata, ticca uatinarra ouaza uati tinarri. Nezape ticca uatinarra da onanitoui −narrari.

²³ —Parrissa! Deo nauato taui. Tia ocamaiza-rrerarraro. Occa zama arobenitoui uati tineza naqui tiaza da onanitoui −naui nade tamine Erodi atti.

²⁴ Narraro uima mitteza zouato toqquenezape imeniza uati tarraro: —Ami nerrecora uati onaniuarrine? −narraro. Nezape imeni attinia: —Rrari rrata, Zouao Batista tatitoui uati tinarri −nani nade.

²⁵ Nezape tamineuarri uassinarra toqquezimaniza ponicca uatinarra uati tarraro: —Rridapanana Zouao Batista tati parato imehiza uittizaza ouaza da ticanarro −nani nade.

²⁶ Nazapa Erodi poua bodi Zouao zoqqueuiuarrine nacassera taraha poua atti taide: —Deo nauato taui. Tia ocamaiza-rrerarraro −nanarra napoza arra poua tessedeni: —Parrissehe uati tarrari −quenauiuarrine touini naza: —Ouattissa onananitoui −naui nade. Nazapa poni attiniza rrehe narrari.

²⁷ Nazapa pocca zozosse zosse inarrari, Zouao matto ca irrizaza tati zorro icazimaniniuarrine. Nazapa pocca zozosse toponi cocorouarri toccarrari, Zouao matto ca irrizarrari.

²⁸ Tati paratoza ettizaza zorro icazimanizapa zouatoza da icanarrari. Ponina imeniza da icaniqquimarrari.

²⁹ Zotode Zouao poua uatimadedeni narraro uima mittemanazapa assiretoui rrauirronarrari. Ppa izemanauiuarrine zorro ininemanazapa siba odiniza ibezemanarrari.

Zeso madirra 5 mil quenarrarideni inarripabaqquirrari

³⁰ Nazama Zouao Batista zoqqueui natti Zeso pocca zozosse tabaqqui zosse inabaqquiporrarideni rrauiniqquirrari. Zesoza poccadeni bobodecca uima uati nanimanarrari: —Uima bicani zati mari icanabaqqui-rizaderra. Ticca deni torrehe iaza tinanarrarorrine madirra coma tarrari naco inanomibaqqui-rizaderra −quenaui nade.

³¹ Nauiza pouadeni madimanauiuarri madirra Zeso toui quenaza rrauirronana canarrari. Madirra carri taza Zeso, poua uatimadedeni tezerre zepedeni irrimanauissa tazapa rripemanauiuarrine parriremana-rraraui. Nazapa: —Rrina, madirra madide nouerauiuarri rrauirrana. Nanizana rrassi inaccana −naui nade Zeso.

³² Nama nazapa Zeso pocca zozosse tabaqqui tezerredeni todidi taniuarri rrassi quenauiuarrine darroniza touaqquemanarrari.

³³ Naraha madirra Zeso toccaui qqui toquenazapa: —A, Zeso parramarauiuarri toccauiuarrine −quenarrari. Nazapa madirra oza onihi onihi narizanicca rraui torrabacossaza Zeso tezerrema bacco toquenaporrari. Naraha zotode Zesopa poua uatimadedeni tezerre darroniza bacco narronemanarrari.

³⁴ Uana tocanemanaza Zeso toqquemorazapa madirra domo ueri naui qqui inabaqquirrari. Pouadenipa pina eueue pouadeni cacauade rriraha pouama mamadiri narizemanarrarissa quenarrari. Nazapa Zeso poua bodiza: —A, touati nauanaqquiri naui −naza pouadenitoui uati cauanari canarrari. Nazapa pocca uima onihi onihi nehe pouadeni mari icanabaqquirrari.

³⁵ Marri toccaza poua uatimadedenipa Zeso pouaza uati toquenarrari: —Rraho, marri toccaui −quenarrari. —Arrauarripa madirra madide noueraui −quenaui nade.

³⁶ —Madirra zosse tinanibaqquirro. Arrauarripa zamatapa mitta quenauiuarrine noueraui −quenarrari. —Arri, oza uarrira tanicca zamatapa mittade rraui torranina −quenaui nade.

³⁷ Naraha Zeso attia: —Tiadeni tinarripabaqquimanarro −narrari. Naraha pouadeni attipa: —Taparideni mittade rrauirraniuarrinepe ziniro uemani pina 200 denario icarrizana parrireraha iana pouadeni taparideni mittade rrauirraniuarrinerane? −quenaui nade.

³⁸ Nazapa pouadeniza uati tarrari: —Nerrecoma naha pao ticarrimanani? Qqui tarizemanarro! −naui nade Zeso. Pao, aba qqui toquenazapa pouaza uati nanimanarrari: —Pao 5, aba pama naparra −quenaui nade.

³⁹ Nazapa Zeso madirra bazimaza uati tarrari: —Nani minaza rrassi rrassi tineri narizarri −narrari.

⁴⁰ Nazapa madirra 100 quenaha queriqquiza rrassi tarrari. Madirra 50 quenaha queriqquiza rrassi tarrari. Ouahadeni naco totoqueriqquiri narizaza rrassi tarizarrari. Bazima nama narizemanarrari.

⁴¹ Nazapa Zeso poua zepeza pao izaba, aba izaba nazapa memeuarri tocattamacossaza Deoza uati tarrari: —Rrehe, peperri. Ticca danirri iaza bica taui −narrari. Nazapa Zeso canauatori canarrarirrine pao, aba narrari touapiza icanabobirizazapa poua uatimadedeniza da inabaqquirrari. Nazapa pouadenina madirra rrassi rrassi teri narrarideniza da inabaqqui-rizemanarrari.

⁴² Nazapa rripemanazapa accararize-manarrari.

⁴³ Rripemanauissa taraha mota torrarrari. Pao bobi, aba ime mota inaccanirize-manazapa quiqui 12 naha irririzarrari.

⁴⁴ Nazama pao rripemanarraridenipa maqquiderre 5 mil quenarrari.

Zeso passo tetepi ccarronarraricca uima

⁴⁵ Nazapa canauatori canauicca pao rripemanaui nattipa Zeso poua uatimadedeni coriza rrippeuarri zosse inabaqquiporrari: —Rrari, darroniza rraui tirrezezape taide oza panani Besaidauarri rraui tirraporri, onarraro −naui nade. Naraha Zeso pouapa iboccarrari. Nazapa madirra bazimaza naco uati tarrari: —Peperri, rraui tirranina −naui nade Zeso.

⁴⁶ Naza rraui torranizapa Zesopa ssonouarri denima toqquemorarrari, imehi Deoza uati tauiuarrine.

⁴⁷ Zeso poua motta naui ssonouarri Deoza uatide torraza cazomerrari. Naraha poua uatimadedenipa coriza nocconi ori toquenaui parra naccaraha.

⁴⁸ Nauiza Zeso qqui icanamissabaqquirrari. Ori ori quenaraha rrorroderrine darroni queuenacossarraro. Ssiuarraricosseza Zeso toqquezippanizapa passo tetepi toccamissarrari. Pina ssiqui toccarrarissa narrari. Pouadeni natti toccamissarrari, pouadeni uinori tossoniqquimauitouiraha.

⁴⁹ Pouadeni uinoriuarri qqui toquenanarra passo tetepi Zeso ccarronaui qqui toquenazapa rroua rroua quenarrari: —Tocorime uitiderra! −quenarrari.

⁵⁰ Poua uatimadedeni bazima qqui toquenazapa uarro quenarrari. Nazapa Zeso: —Ticappinemana terrerarri, ouape oua! −naui nade.

⁵¹ Nazapa darroniza toqquezanizapa rrorrode totapparraro. Naraha uarro quenarrarirrine cappinemanaui parra naccarrari.

⁵² Zeso uatimadedenipa Zeso pocca nauatoue arra pao da inabaqquiza inaparrire-rizabaqquiui qqui toquenaporaha bodideni ssamoqquiri narrari. Pouadeni bodi Zeso tauimari mittemanauiuarrine parriremanauissa tarrararrari. Bodideniza auatora tarraro.

Zenesareuarri Zesopa comaqquiri narrari inanomiriza-baqquirrari

⁵³ Nazapa Zeso poua uatimadedeni tezerre coriza rrippeuarri touaqquerrizemanarrari. Zama onini Zenesare bacco toquenarrari. Uana tocanemanazapa darroni ssoque icazanemaneza rraui torremorarrari.

⁵⁴ Nazapa rraui torremoraza nauiuarri madimanarrarideni Zeso qqui toquenarrari.

⁵⁵ Nazapa madirra comaqquiri narraridenitoui domodeni toccanirizarrari. Zeso ccarizauiuarri comaqquiri narrari taborodenima ihiaccamissa-baqquimana narrari.

⁵⁶ Zesopa oza onihiuarri toccaza, zotode oza capamaniuarri toccaza, oza pananiuarri toccaza naco madirra pouatoui bacco bacco nanarronemana narrari. Bazima comaqquiri narrari inanomibaqquiuiuarrine pouaza eheccarrona-baqquimana narrari. Poua tezerrema rrauiza, boroniza naco ehequibarizemana narrari. Zesoza uaua uaua quenarrari: —Zeso oua tinanomirri! Ticca etero inidira bara onaniuarrine arriuarri ticcarronarri! −quequenanarrari. Nazapa pocca etero inidi bara quenarrarideni bazimapa tocanomirerizauissa tarrari.