Maraco 5 - Kulina New Testament Brazil

Zerasauarricca madirra bodiza Tocorime-Taminecca zozosse tocorime madizarrari

¹ Arra coriza rrippeuarri bacco toquenarraricca zama oninipe Zerasa.

² Nauizana Zesopa toqquemoraraha madirra bodiza Tocorime-Taminecca zozosse madizarrari tonoccobiriuarri qquenaza Zesoza bacco zipparrari.

^3-4 Pouapa tonoccobiriza mamadi narrari. Nazapa naui Zerasauarricca madirrapa birri rrore iquenaraha rroca tarrorro, rroca tarrorro narrari. Isso naco rrore iquenaraha ttai tarrorro, ttai tarrorro narrari. Corritiza naco rrore iquenaraha pouarrine tarroppi tarroppi narraro. Rrore iquenapomaza naco nama zanapozapa pouaha deni torrazanaporrari. Rrore iquenaza ecauemanauiuarrineraha rrorrorededeni arramani toquerrenazapa parra inebomanariui narrari.

⁵ Pouapa ssiuarra ccariza, zome ccariza nanariza narrari. Rroua rroua nanariza narrari. Ssonouarri ccariza, tonoccobiriuarri ccariza nazapa sibaza poua ime ca rreo, ca rreo tonanamarorrari.

⁶ Nanarra Zeso uarri taniza qquemoraui qqui tazapa rroppa narronarrari, Zeso baccouarri poua pitoza uitta narrari.

^7-8 Naraha Zesopa amazati poua bodiccaza uati tarrari: —Tocorime, narrari madirra tineborro! −narrari. Nazapa tocorime rrazirema uati tarrari: —Zeso nerrecotouira ticcarronarraronerre? Oua narrizode ticcarronarraroqui? Tiape Deo deni torrarraricca Erredeni tirrani. Deo onima oua tinarrizo terrerarri, onaua −narrari.

⁹ Naraha Zesopa tocorimeza uati tapomarrari: —Tia onipe nerreco? −narrari. —Oua onipe Siba tani, tocorime uapi inani −naui nade.

¹⁰ Nazapa madirra bodicca tocorimedenia Zesoza uatide dameraqquiri narrari: —Arrirraro zama uarri taniuarri ia zosse tinabaqqui terrerarri, inaua −quenarrari.

¹¹ Naraha naui ssono uarrira taniza poroco uapi taha rriparizemanarrari.

¹² Nazapa tocorimedeni Zesoza uati toquenapomarrari: —Poroco bazimazana ia zosse tizimabaqquirri. Nanizana iquerrenana −quenarrari.

¹³ Nazapa Zeso: —Rrehe, porocozana tiquerrenana! −narrari. Nazapa narrari madirra bodicca tocorime rrauininezapa porocozana rraui torrezimarizarrari. Nanarra porocopa coriza inidiuarri domo toqquezippaza corro-rro quenarrari, tocatorrezipparrari. Poroco bazimapa 2 mil quenarrari. Corizaza rre tocanirezapa cacotezanarrari.

¹⁴ Nazapa poroco cacauadedenipa oza pananiuarri uima rroppa tocanarrari, ouahapa uizarrauarri uima rroppa tocanarrari. Nama narizemanarrari. Uima inanarizemanezape cattade rrauirronana canarrari, madirra bazima.

¹⁵ Nazapa qquide rrauirronazapa Zeso uauiuarri bacco narronemanarrari. Arra madirra poua bodiza tocorimedeni carriporraripa tonomiuira qqui toquenarrari. Nauiza uitta canarrari. Etero oro tozimapomarrari, bodi uatoue naco carripomarrari. Nazapa madirra bazima cappinemanarrari.

¹⁶ Qqui toquenaporraridenia arra madirra bodicca tocorimedeni rrauininerrari tauimari uati, poroco tauimari uati toquenarrari.

¹⁷ Nazapa poccadeni zamaza Zeso toccaniuiuarrine zossede damamera tarrari: —Ticcanirri, arri icca zamazape timadi terrerarri! −quenarrari.

¹⁸ Nazapa Zeso toqquezippanizapa darroniza toqquezanirrari. Nazapa madirra tocorime carriporaha tonomirraripa Zesoza uaua narrari: —Oua naqui tiaza occana! −narrari.

¹⁹ Naraha Zeso attipa: —Poni, ticcanirri. Ticca ozauarri ticca madirraza tirranirri. Ticca madirraza uati tinabaqquina: “Onomirrarope Deorrine. Deopa ouaza uati uana tarrari” tinanina −naui nade Zeso.

²⁰ Nazapa toccaniza pocca uima uati narizarrari. Zama arobeni Decaporicca oza uapimaza poua tonomiuicca uima, Zeso poua inanomiuicca uima uati tarizarrari. Nazapa bazima mittemanazapa: —A, Deorrine bica taua −quenaui nade.

Zairo bedeni tonominicca uima, amonerre amauissoranarra coma teraha tonominicca uima

²¹ Zesopa poua uatimadedeni tezerre darroniza rrippeuarri touaccanimanarrari. Bacco tanimanazapa madirra Zeso qquide rrauizippappa canarrari. Zesopa coriza inidiza uarrari.

²² Nanarra zodeodenicca Deo Atti mamariuarricca tamine orraria naco ccarronarrari. Poua onipa Zairo. Zesoza bacco narronazapa poua bodipa: —Zesopa deni torraui, ouape arrimani orrani −naza Zeso baccouarri poua pitoza uitta naza tocatteza narrari.

²³ Nazapa Zesoza uati tarrari: —Occa erredeni amonerre bedeni tomirrirani. Rrina, occa ozauarri icadaccana. Tizepeza poni bara teza tonomiza madipomaniuarrine −naui nade Zairo.

²⁴ Nazapa Zeso Zairo tezerre rraui touedanirrari. Naraha madirra bazima Zesoza cauarra zanaporrarirrine Zeso toqueberibote zanaporrari.

²⁵ Madirra bazima rraui torrauiza naqui amonerre coma tarraro touanarraro. Ponipe zamacoma oni amauissoranarra carrirraro. Poni coma tanicca uarranopa 12 naraha ama rricaquera tanicca totonauana zanaporraro.

²⁶ Coma teza toponi totonanomidedeniuarri ponima totocca neraha tonomi-rrerarraro. Denima coma zanaporraro. Toponi totonanomidedeniza poni manaconi carricarizarraro.

^27-28 Naraha Zeso tauimari madirra uati uati toquenaui mittarraro. Nema narraroa arri Zesotoui toccarraroparri. Poni bodinipe: —Pocca eterozara bara onezape onominitoui −narraro. Madirra si tocanarra narronaraha amonerre coma tarrarope Zeso nattiuarri toccamisseza touarriressissi neza pocca eteroza bara narraro.

²⁹ Nanerre amazati amani totapparraro. Nezape poni doroni comani tomossinicca nauato tarraro.

³⁰ Nazapa Zeso poua bodi nauato tarrari, pocca dacoreherrine madirra inanomirraro. Nanarra amazati Zeso poua nattiuarri piti nauarraniza uati tarrari: —Nerrecorrari occa eteroza bara inarraronerre? −narrari.

³¹ Naraha poua uatimadedeni attidenia: —Madirra si tocanarra narronarraripa. Naraha tiape: “Nerrecorrarina oua bara narrari?” tarraro −quenaui nade.

³² Naraha Zeso poua bara narrari toui arrauarri qqui, arrauarri qqui narizarrari.

³³ Nezape amonerre cappinehe ccarroneza tacca-cca canarronarraro. Zeso baccouarri poni pitoniza uitta neza poni cacomerarraro: —Orrinepa −narraro. Nezape poni amauissoranarra carrirraro Zeso pocca etero bara ineza amazati totapparrarocca uima uati tarraro.

³⁴ Nazapa Zeso poniza uati tarrari: —Rrehe asi, ouaza tibodi: “Rrehe, Zeso oua tonanomiuiuarrine parrireui” tezape narrarorrine ticca zamacomape toccapa. Ticcanizape ticappina terrerana. Narraro comaniza quiza tapoma-rreranitoui −narrari.

³⁵ Nauiza Zeso uati uati taraha, zodeodenicca Deo Atti mamariuarricca tamine pocca ozacca madirra bacco narronemanaza erredeni imehiza uati toquenarrari: —Zairo, ticca erredeni zoqqueni. Rridapanapa ia Maride ccarrona-rrarana. Zoqqueni. Peperri, poni −quenarrari.

³⁶ Nama quenaraha Zesopa Zairoza: —Tibodipe ticappina terrerana. Pina “Rrehe, poni tonominiuarrine” tana −naui nade Zeso atti.

³⁷ Zeso poua natti rraui torramissarrarideni pouaza rraui torra-rrarauiuarrine Zeso eccoccobaqquirrari. Naraha pouaza rraui torrauiuarrinepa Pedoro, Tiaco, Zouao quenarrari. Arra Zouaopa Tiaco ouaha. Pouadenira rrina inabaqquirrari.

³⁸ Nazapa Zairocca ozauarri rraui torra, bacco toquenarrari. Bacco toquenaza pina moua moua quenarrarissa narrari Zeso qqui tarrari. —Erredeni zoqqueni −quenaza rrazirema orri orri quenarrari, rroua rroua canimarrari.

³⁹ Ozaza toqquezimazapa Zeso uati tarrari pouadeniza: —Nerrecotoui ticcadeni orrihe dacorarraro? Nerrecotoui rroua rroua tiquenarraro? Erredenipe zoqque-rrerani. Uadani −naui nade Zeso.

⁴⁰ Naraha pouadenipa Zeso atti rrarra icanemanarrari. Naraha Zesopa madirra bazima zosse ininebaqquirrari amossiniuarri. Nazapa Zeso, poua uatimadedeni, erredeni imehi, imeni quenaza erredeni uatiarraro poriniuarri rraui torrezimarrari.

⁴¹ Nazapa Zesoa erredeni zapani equidiza poua attiza uati tarrari: —Tarita comi −narrari. (Narraro ettizape: —Erredeni, titemarri −narrari.)

⁴² Nanerre erredenipe amazati camittemanizape totemarraro. Nezape ccarizarraro. Uarranorini 12 narrari. Narraro erredeni ccarizezape madirra bazima uarro quenaraha uatizemanarrari: —A, paparra bica taui −quenarrari.

⁴³ Nazapa Zeso atti pouadeniza: —Arrirraro uimape uati tarizemana terrerana. Poni −narrari. Nazapa Zeso attia: —Ticcadeni erredeni tinarripemanarri −naui nade Zeso.