Maraco 16 - Kulina New Testament Brazil

Zeso nauatonirrari

¹ Rrassinarracca uada rriquezape Maria Madarenauarricca, Maria Tiaco imeni, Sarome queneza aua marriconi marroni bica tarraro mittade rraui torrarraro, Zeso assire sse inarimanauiuarrine.

² Semana torrapomanicca uada taidecca domico izamassa marri ccarronaza Zeso noccobiriuarri aua marriconi marroni bica tarraro iaqquemanarraro.

³ Nezape Zeso noccobiriuarri rraui torreza uimahaha cazanaporraro: —Nerrecorrari ia acco canapazarra, Zeso noccobiricca siba imeni cco inaniuarrine? −quenani nade.

⁴ Naraha bacco toqueneza qqui toquenanerre tonoccobiripe touaberre narraro. Siba imenipe parrimaraniuarrina uitterre narraro.

⁵ Nezape rraui torrezimeza qqui toquenanerre zabisso eterori mopo taha nauatoniuarri uittari canarrari. Nezape uarro quenarraro nade.

⁶ Zabissopa ponideniza uati tarrari: —Ticappinemana terrerarri! Tiadenipe Zeso Nazaretiuarricca qquide rraui tirrarronarraro. Narraripa aua porimacossaniza coba izanemanaza zoqqueraha nauatonirrari. Arrazapa noueraui. Rrari, poua ibezemanauiuarri qqui tiquenarro.

⁷ Nezape rraui tirraniza poua uatimadedeniza, Pedoroza naqui uima uati tinanimanarri. Zesopa titezerremadeni zama arobeni Carireauarri toccanipouitoui. Naniuarri rraui tirranizana poua qqui tiquenauiuarrine, pina poua zoqque-rraraccazama tiadeniza uati taporrarissa narraro −naui nade zabisso atti.

⁸ Nezape amonerredeni uarrotocanireza tacca-cca-cca queneza tonoccobiriuarri domoni qquenezape rraui torranirraro. Nezape rraui domoni ccanizape cappinemaneri neza Zeso nauatoniuicca uima uati toquena-rreraccani nade.

Zesopa Maria Madarenauarriccaza auatomarrari

⁹ Zesopa semana torrapomanicca uada taidecca domicoza izamassa nauatonirrari. Naui zotodepa Maria Madarenauarriccaza auatomarrari. Narraro Mariape taide poni bodiniza tocorime 7 quenaha carriporaha Zeso zosse ininebaqquirrari.

¹⁰ Maria Madarenauarricca Zeso qqui tezape pouaza rrauirizapo-rrarideniza uatide rroppa nanirraro. Pouadenipa orri orri quenaraha Maria bacco naniza Zeso nauatoniui tauimari uati tarraro.

¹¹ Poni attinipe: —Zesopa camittemaniza madipa! Parrissa qqui onapa! −nani nade. Naraha poni attiniza parrissa quena-rrararrari.

Zesopa pouaza parrissa quenarrarideni pamahaza auatomarrari

¹² Zotode naco Zeso pouaza parrissa quenarrarideni pamahaza auatomarrari. Pouadenipa oza capamema narrarouarri touedaza rrauiza Zeso bacco iquenaraha pouadeniza rriza taccarrari. Zotodena noccodeni rrizera narrari.

¹³ Nazapa touedanirrari. Zesoza toquerrenarrarideniza Zeso nauatoniuicca uima uati tanimanaraha pouadeni attiza naco parrissa quena-rraraui nade.

Zesocca zossenirri poua uatimadedeniza

¹⁴ Zotode naco poua uatimadedeni 11 quenarrari rripade toquerrenauiza Zeso auatomarrari. Pouadenipa: —Rrehe, Zeso nauatoniuirrine parrireui −quena-rraraza uaribodeni didiqquiri naza Zeso uati icanabaqquirrari: —Nerrecotoui occa madirrapa onauatonini qqui toquenaraha pouadeni attiza parrissa tiquenerrerarraro? −naui nade.

¹⁵ Nazapa denima uati tarrari: —Zama bazimaza rraui tirrarizarri. Madirra bazimaza otauimari madirra tocassiuauerauiuarrinecca teccorarize-manarri −naui nade.

¹⁶ —Nazapa madirra otauimariza parrissa quenaza passo dopaniza niniqui carrimanazapa tocassiuauerauitoui. Naraha madirra ouaza parrissa quena-rrararraridenipa Deorrine narrizoue rriquerreraniuarri rraui torrezimauitoui.

¹⁷ Ouaza parrissa quenarraridenipa oua oniza zepedeni irrimanaza canauatorimana canauitoui. Canauatorimana quenazapa Deocca dacorehe auato tanitoui. Rrehe, oua oniza uati uati toquenazapa Tocorime-Taminecca zozosse tocorime zosse ininebaqqui-manauitoui. Touatti onihiza naco uatide nauatoqquiri nauitoui.

¹⁸ Macca coma tauicca damade parriremanauitoui. Coma tauicca oni veneno ze quenaza naco pouadeniza comene nouerauitoui. Madirra comaqquiri narrarideni naco pouadeni zepeza bara iquenazapa totocanomire nauitoui −naui nade Zeso.

Zeso toccamacossanirrari

¹⁹ Nazapa ia Zozossede Zeso poua uatimadedeniza uati taha rricazapa memeuarri Deo poua iaccamacossanirrari. Deopa Zeso deni inanazapa Poua uinori nauatoniuarri inauittarirrari, madirra ihicazossebaqqui nauiuarrine.

²⁰ Nazapa Zeso tauimari icassiuaueraniuarrinecca poua uatimadedeni zama bazimaza ecomerarize-mananiuarrine rraui torrarizarrari. Ecomerarize-manezape ia Zozossede acco icanabaqquiza pocca dacorehema canauatorimana canarizarrari. Nama quenazapa madirradeniza Zeso tauimari parrissa auato tarraro. Peperri.